Read Tunisian Arabic New Testament مَرْقُسْ 4 Bible Online

مَرْقُسْ 4 - Tunisian Arabic New Testament bible

مَرْقُسْ 4

¹وِمْبَاعِدْ بْدَا يَسُوعْ يْعَلِّمْ مَرَّة أُخْرَى فِي الشَّطْ مْتَاعْ البُحَيْرَة وْبَرْشَة نَاسْ تْلَمُّوا بِيهْ يَاخِي وَلَّى طْلَعْ فِي الفْلُوكَة وِقْعَدْ فِيهَا وْهِيَ فِي المَاء وِالنَّاسْ الكُلْ بْقَاوْ عْلَى الشَّطْ.

²وْعَلِّمْهُمْ بَرْشَة حَاجَاتْ بِالأَمْثَالْ وْمِالحَاجَاتْ الِّي قَالْهَالْهُمْ وْهُوَ يْعَلِّمْ فِيهُمْ:

³«اسْمْعُوا! خْرَجْ الفَلاَّحْ بَاشْ يَزْرَعْ.

⁴وَقْتِلِّي هُوَ يَزْرَعْ ثَمَّة زِرِّيعَة جَاتْ فِي الثْنِيَّة، جَاتْ الْعْصَافِرْ وِكْلِتْهَا.

⁵وْثَمَّة زِرِّيعَة أُخْرَى طَاحِتْ فِي أَرْضْ فِيهَا الحْجَرْ، مَا فِيهَاشْ بَرْشَة تْرَابْ، يَاخِي نِبْتِتْ بِالوَقْتْ عْلَى خَاطِرْ تْرَابْهَا مُوشْ بَرْشَة.

⁶آمَا وَقْتِلِّي طَلْعِتْ الشَّمْسْ تْحَرْقِتْ وْيِبْسِتْ عْلَى خَاطِرْهَا مَا عِنْدْهَاشْ عْرُوقْ.

⁷وْثَمَّة زِرِّيعَة طَاحِتْ وُسْطْ الشُّوكْ وْوَقْتِلِّي نْبِتْ الشُّوكْ خْنَقْهَا وْمَا خَلاَّهَاشْ تُثْمُرْ.

⁸وْثَمَّة زِرِّيعَة أُخْرَى طَاحِتْ فِي الأَرْضْ البَاهْيَة. نِبْتِتْ وْكِبْرِتْ وْعَمْلِتْ الثَّمَرْ. ثَمَّة مِنْهَا الِّي جَابِتْ ثْلاَثِينْ مَرَّة قَدْ الِّي تِزْرَعْ وْمِنْهَا الِّي جَابِتْ سِتِّينْ وْمِنْهَا الِّي جَابِتْ مْيَة.»

⁹وِمْبَاعِدْ قَالْ: «الِّي عَنْدُو وِذْنِينْ خَلِّيهْ يِسْمَعْ!»

¹⁰وْوَقْتِلِّي يَسُوعْ كَانْ وَحْدُو، سِأْلُوهْ النَّاسْ الدَّايْرِينْ بِيهْ وِالرُّسُلْ الأَثْنَاشْ عْلَى المَعْنَى مْتَاعْ المَثَلْ.

¹¹قَالِلْهُمْ: «إِنْتُومَا تِعْطَالْكُمْ بَاشْ تَعْرْفُوا الأَسْرَارْ مْتَاعْ مَمْلِكْةْ اللهْ. آمَا النَّاسْ الأُخْرِينْ كُلْ شَيْء يِتْقَالِلْهُمْ بِالأَمْثَالْ

¹²بَاشْ الخَزْرَانْ يُخْزْرُوا وْمَا يْشُوفُوشْ وِالسَّمْعَانْ يِسْمْعُوا وْمَا يِفْهْمُوشْ بَاشْ مَا يَرْجْعُوشْ وِذْنُوبْهُمْ مَا يِتْغِفْرُوشْ.»

¹³وْقَالِلْهُمْ يَسُوعْ: «يَاخِي مَا فْهِمْتُوشْ المَثَلْ هَاذَا؟ إِمَّالاَ كِيفَاشْ بَاشْ تِفْهْمُوا الأَمْثَالْ الأُخْرِينْ الكُلْهُمْ؟

¹⁴الفَلاَّحْ يَزْرَعْ كِلْمِةْ اللهْ.

¹⁵وِلِّي هُومَا فِي الثْنِيَّة وِينْ كِلْمِةْ اللهْ مَزْرُوعَة هُومَا الِّي دُوبْ مَا يِسْمْعُوهَا يْجِي الشِّيطَانْ وْيَخْطِفْ الكِلْمَة الِّي تْزُرْعِتْ فِي قْلُوبْهُمْ.

¹⁶وِلِّي تْزُرْعُوا فِي أَرْضْ فِيهَا بَرْشَة حْجَرْ هُومَا الِّي دُوبْ مَا يِسْمْعُوا الكِلْمَة يِقْبْلُوهَا وْهُومَا فَرْحَانِينْ.

¹⁷آمَا مَا عِنْدْهُمْشْ عْرُوقْ. يَبْقَاوْ لْمُدِّةْ قْصِيرَة وْدُوبْ مَا يْجِي وَقْتْ صْعِيبْ وِلاَّ إِضْطِهَادْ عْلَى خَاطِرْ الكِلْمَة يْطِيحُوا فِيسَعْ.

¹⁸وِالأُخْرِينْ الِّي تْزُرْعُوا وُسْطْ الشُّوكْ، هُومَا الِّي سَمْعُوا الكِلْمَة

¹⁹آمَا هْمُومْ الدِّنْيَا وِالغْنَى الِّي يْغَلِّطْ وِالحَاجَاتْ الأُخْرَى الِّي يِشْتْهُوهَا تُدْخُلْ وِتُخْنُقْ الكِلْمَة وِيْوَلُّوا مَا فِيهُمْشْ زِرِّيعَة.

²⁰آمَا الِّي يِتْزُرْعُوا فِي الأَرْضْ البَاهْيَة، هُومَا الِّي يِسْمْعُوا الكِلْمَة وْيِقْبْلُوهَا وِيْجِيبُوا زِرِّيعَة، مِنْهُمْ الِّي يْجِيبْ ثْلاَثِينْ مَرَّة قَدْ الِّي تِزْرَعْ وْمِنْهُمْ الِّي يْجِيبْ سِتِّينْ وْمِنْهُمْ الِّي يْجِيبْ مْيَة.»

²¹وْقَالِلْهُمْ يَسُوعْ: «يَاخِي النَّاسْ يْجِيبُوا الفْنَارْ وِيْحُطُّوهْ تَحْتْ طَاسَة وِلاَّ يْحُطُّوهْ تَحْتْ سْرِيرْ؟ يَاخِي مُوشْ يِتْحَطْ فِي بْلاَصَة عَالْيَة؟

²²كُلْ حَاجَة مْخُبّْيَة بَاشْ تِتْكْشِفْ وْكُلْ حَاجَة مَسْتُورَة بَاشْ تُظْهُرْ وْتِتْكْشِفْ لِلنُّورْ.

²³الِّي عَنْدُو وِذْنِينْ، خَلِّيهْ يِسْمَعْ.»

²⁴وْقَالْ لِتْلاَمِذْتُو وْلِلنَّاسْ الِّي دَايْرِينْ بِيهْ: «رُدُّوا بَالْكُمْ كِيفَاشْ تِفْهْمُوا الشَّيْء الِّي تِسْمْعُوا فِيهْ! رَاهُو الكِيلْ الِّي تْكَيّْلُوا بِيهْ، يِتْكَيّْلِلْكُمْ بِيهْ وِيِتْزَادِلْكُمْ،

²⁵الِّي عَنْدُو يِتْزَادْلُو أَكْثِرْ وِلِّي مَا عِنْدُوشْ حَتَّى الِّي عَنْدُو يِتْفَكّْلُو.»

²⁶وْقَالْ يَسُوعْ: «مَمْلِكْةْ اللهْ تِشْبِهْ لْفَلاَّحْ يَرْمِي الزِّرِّيعَة فِي الأَرْضْ.

²⁷وِمْبَاعِدْ يُرْقُدْ فِي اللِّيلْ وِيْقُومْ فِي النْهَارْ وِالزِّرِّيعَة قَاعْدَة تُطْلُعْ وْتِكْبِرْ. هُوَ مَا يَعْرِفْشْ كِيفَاشْ الشَّيْء هَاذَاكَا قَاعِدْ يَجْرَى.

²⁸الأَرْضْ وَحَّدْهَا تَعْطِي الثَّمْرَة، تْنَبِّتْ، وْبَاعِدْ تْسَبِّلْ، وِالسْبُولَة تِتْمْلَى بِالقَمْحْ.

²⁹آمَا دُوبْ مَا الصَّابَة تَحْضِرْ، يَحْصِدْهَا الفَلاَّحْ بِالمِنْجِلْ عْلَى خَاطِرْ جَا وَقْتْ الحْصَادْ.»

³⁰وْقَالْ يَسُوعْ: «بَّاشْ نْشَبّْهُوا مَمْلِكْةْ اللهْ وِبْأَيْ مَثَلْ نْمَثّْلُوهَا؟

³¹تِشْبِهْ لْزِرِّيعَة مْتَاعْ خَرْدِلْ وَقْتِلِّي تِتْزْرَعْ فِي الأَرْضْ هِيَ أَصْغِرْ مِنْ الزِّرِّيعَة الأُخْرَى الكُلْهَا.

³²آمَا وَقْتِلِّي تِنْبِتْ اطَّلِّعْ عِيدَانْ كْبِيرَة وِتْوَلِّي أَكْبِرْ مِالنَّبَاتَاتْ الِّي كِيفْهَا الكُلْهَا وِتْجِي الطّْيُورْ بَاشْ تْعَشِشْ فِي وُسْطْ الظُّلْ مْتَاعْهَا.»

³³ابَّرْشَة أَمْثَالْ كِيفْ هَاذَا كَانْ يَسُوعْ يْقُولْ فِي كِلْمِةْ اللهْ لِلنَّاسْ، عْلَى قَدْرْ مَا كَانُوا قَادْرِينْ بَاشْ يِفْهْمُوا.

³⁴وْمَا كَانِشْ يَحْكِيلْهُمْ حَتَّى شَيْء مِنْ غِيرْ مَثَلْ، آمَا كَانْ يْفَسِّرْ لِتْلاَمِذْتُو فِي كُلْ شَيْء وَقْتِلِّي يَبْقَى مْعَاهُمْ وَحَّدْهُمْ.

³⁵وْفِي النْهَارْ هَاذَاكَا، فِي العْشِيَّة قَالْ يَسُوعْ لِتْلاَمِذْتُو: «هَيَّا نِتْعَدَّاوْ لِلجِيهَة الأُخْرَى مْتَاعْ البُحَيْرَة.»

³⁶خَلاَّوْ النَّاسْ وْهَزُّوهْ مْعَاهُمْ فِي الفْلُوكَة الِّي كَانْ فِيهَا وْكَانِتْ مْعَاهْ فْلاَيِكْ أُخْرَى.

³⁷وْهَبِّتْ رِيحْ قْوِيَّة وْوَلَّى المُوجْ يَضْرِبْ فِي الفْلُوكَة حَتَّى لِينْ قْرِيبْ تِتْعَبَّى بِالمَاء.

³⁸وْهُوَ كَانْ رَاقِدْ فِي آخِرْ الفْلُوكَة وْحَاطْ رَاسُو عْلَى وْسَادَة. قَوّْمُوهْ وْقَالُولُو: «يَا مُعَلِّمْ! يَاخِي مَا يْهِمِّكْشْ فِينَا كِنْمُوتُوا؟»

³⁹وَلَّى قَامْ وِأْمَرْ الرِّيحْ وْقَالْ لِلبُحَيْرَة: «اسْكُتْ! رِيضْ!» وِالرِّيحْ وْقُفْ وِالدِّنْيَا هْدَاتْ.

⁴⁰وْقَالِلْهُمْ: «شْبِيكُمْ مَرْعُوبِينْ بَرْشَة؟ عْلاَشْ مَا عِنْدْكُمْشْ إِيمَانْ؟»

⁴¹خَافُوا بَرْشَة وْقَالُوا لِبْعَضْهُمْ: «شْكُونُو هَاذَا؟ حَتَّى مِالرِّيحْ وِالبُحَيْرَة يْطِيعُوا فِيهْ!»