Read Tunisian Arabic New Testament مَرْقُسْ 5 Bible Online

مَرْقُسْ 5 - Tunisian Arabic New Testament bible

مَرْقُسْ 5

¹وِمْبَاعِدْ وُصْلُوا يَسُوعْ وِتْلاَمِذْتُو لِلجِيهَة الأُخْرَى مْتَاعْ البُحَيْرَة لْمَنْطِقْةْ الجَرَّاسِيِّينْ.

²وْدُوبْ مَا نْزِلْ مِالفْلُوكَة عَرْضُو رَاجِلْ خَارِجْ مِالجَّبَّانَة وسَاكْنِتُّو أَرْوَاحْ مَنْزُوسَة.

³كَانْ سَاكِنْ بِينْ القْبُورْ وْحَتَّى حَدْ مَا كَانْ يْنَجِّمْ يَرْبْطُو حَتَّى بِالسْلاَسِلْ.

⁴وْبَرْشَة مَرَّاتْ رَبْطُوهْ بِالحْدِيدْ وْبِالسْلاَسِلْ آمَا هُوَ كَانْ يْقَلِّعْ السْلاَسِلْ وْيَقْطِعْ الرْبَاطْ وْحَتَّى حَدْ مَا نَجِّمْ يُحْكُمْ فِيهْ.

⁵وْكَانْ دِيمَا بِينْ القْبُورْ وْفِي الجْبَالْ لِيلْ وِنْهَارْ يْصِيحْ وْيَضْرِبْ فِي رُوحُو بِالحْجَرْ.

⁶آمَا وَقْتِلِّي شَافْ يَسُوعْ مِنْ بْعِيدْ جْرَالُو وِسْجِدْلُو.

⁷وْصَاحْ عْلَى طُولْ صُوتُو: «آشْ بِينِي وْبِينِكْ يَا يَسُوعْ إِبْنْ اللهْ العَالِي؟ حَلِّفْتِكْ بِالله انِّكْ مَا تْعَذِّبْنِيشْ!»

⁸عْلَى خَاطِرْ يَسُوعْ قَالُّو: «يَا رُوحْ يَا مَنْزُوسْ، اخْرُجْ مِالرَّاجِلْ هَاذَا!»

⁹وْسِأْلُو يَسُوعْ: «آشْ إِسْمِكْ؟» جَاوِبْ: «إِسْمِي لِجْيُونْ عْلَى خَاطِرْنَا بَرْشَة!»

¹⁰وِتْشَّحْتُو بَرْشَة بَاشْ مَا يْطَرِّدْهُمْشْ لْبَرَّة مِالمَنْطْقَة هَاذِيكَا.

¹¹وْكَانُوا ثَمَّة بَرْشَة حْلاَلِفْ سَارْحِينْ قْرَابْ فِي الجْبَلْ.

¹²وِتْشَحّْتُوهْ وْقَالُوا: «أَبْعِثْنَا لِلحْلاَلِفْ بَاشْ نُدْخْلُوا فِيهُمْ.»

¹³سْمَحِّلْهُمْ يَسُوعْ وْخَرْجِتْ الأَرْوَاحْ المَنْزُوسَة وْدَخْلِتْ فِي الحْلاَلِفْ يَاخِي جْرَاتْ الحْلاَلِفْ لْحَافِةْ الجْبَلْ وْهَبْطِتْ فِي البُحَيْرَة وْغُرْقُتْ فِيهَا وْكَانِتْ قْرَابِةْ أَلْفِينْ.

¹⁴وْهَرْبُوا سُرَّاحْ الحْلاَلِفْ وْنُشْرُوا الخْبَرْ فِي المْدِينَة وْفِي القُرَى الِّي دَايْرَة بِيهَا وْخَرْجُوا النَّاسْ بَاشْ يْشُوفُوا الِّي جْرَى.

¹⁵وْجَاوْ لْيَسُوعْ وْإِذَا بِيهُمْ شَافُوا الرَّاجِلْ الِّي كَانِتْ سَاكْنِتُّو الشْوَاطِنْ قَاعِدْ لاَبِسْ دَبْشُو وْعَقْلُو لاَبَاسْ عْلِيهْ، هَاذَاكَا الِّي كَانْ سَاكْنُو لِجْيُونْ مْتَاعْ شْوَاطِنْ. يَاخِي خَافُوا.

¹⁶وِحْكَاوْلْهُمْ النَّاسْ الِّي شَافُوا الِّي جْرَى عَلِّي وْقَعْ لِلرَّاجِلْ الِّي سَاكْنَاتُو الشْوَاطِنْ وْلِلحْلاَلِفْ.

¹⁷وِبْدَاوْا يِتْشَحّْتُوا فِي يَسُوعْ بَاشْ يَرْحِلْ مِالمَنْطْقَة مْتَاعْهُمْ.

¹⁸وَقْتِلِّي طْلَعْ يَسُوعْ فِي الفْلُوكَة تْشَحّْتُو الرَّاجِلْ الِّي كَانِتْ سَاكْنِتُّو الشْوَاطِنْ بَاشْ يِمْشِي مْعَاهْ.

¹⁹آمَا هُوَ مَا خَلاَّهِشْ وْقَالُّو: «إِمْشِي لْدَارِكْ وْلُمَّالِيكْ وِاحْكِيلْهُمْ قَدَّاشْ الرَّبْ عْمَلْ مْعَاكْ وْكِيفَاشْ رَحْمِكْ.»

²⁰مْشَى الرَّاجِلْ وِبْدَا يْنَادِي بِالشَّيْء الِّي عِمْلُو مْعَاهْ يَسُوعْ الكُلُّو فِي المَنْطْقَة الِّي تِتْسَمَّى العَشْرَة مُدُنْ وِالنَّاسْ الكُلْهُمْ بْقَاوْ مِتْعَجّْبِينْ.

²¹وْوَقْتِلِّي رْجَعْ يَسُوعْ وِتْعَدَّى فِي الفْلُوكَة لِلجِيهَة الأُخْرَى مْتَاعْ البُحَيْرَة تْلَمُّوا بِيهْ بَرْشَة نَاسْ وْهُوَ مَازَالْ فِي الشَّطْ.

²²جَا وَاحِدْ مِنْ رُؤَسَاءْ المَجْمَعْ إِسْمُو يَايْرُسْ وْدُوبْ مَاشَافُو تِرْمَى قُدَّامْ سَاقِيهْ

²³وِبْقَى يِتْشَحِّتْ فِيهْ وْشَدْ صْحِيحْ وْقَالُّو: «بِنْتِي الصْغِيرَة بَاشْ تْمُوتْ إِمْشِي مْعَايَا وْحُطْ عْلِيهَا يِدِّكْ بَاشْ تِتْشْفَى وْتَحْيَى.»

²⁴وِمْشَى مْعَاهْ. وْتَبّْعُوهْ بَرْشَة نَاسْ وْكَانُوا يْزَاحْمُوا فِيهْ.

²⁵وْكَانِتْ ثَمَّة مْرَا عِنْدْهَا ثْنَاشِنْ سْنَة وْهِيَ مْرِيضَة بْنَزِيفْ دَمْ.

²⁶وْكَانِتْ تِمْشِي لْبَرْشَة طُبَّا وِتْعَانِي مِنْ بَرْشَة وْجَايِعْ وْصَرْفِتْ كُلْ مَا عِنْدْهَا بَاشْ تِتْشْفَى. آمَا مَا سْتْفَادِتْ حَتَّى شَيْء وْبِالعَكْسْ حَالِتْهَا وَلاَّتْ أَصْعِبْ مِنْ قْبَلْ.

²⁷وْوَقْتِلِّي سِمْعِتْ بْيَسُوعْ جَاتْ مِنْ تَالِي فِي وُسْطْ الزْحَامْ وْمَسِّتْ دَبْشُو

²⁸عْلَى خَاطِرْهَا قَالِتْ: «يِكْفِي بَاشْ نْمِسْ لِبْسْتُو بَاشْ نِتْشْفَى.»

²⁹وْبِالوَقْتْ تْنَحَّى النَّزِيفْ وْحَسِّتْ فِي بْدَنْهَا الِّي هِيَ تِشْفَاتْ مِنْ مْرَضْهَا.

³⁰وْدُوبْ مَا يَسُوعْ حَسْ الِّي ثَمَّة قُوَّة خَرْجِتْ مِنُّو، تْلَفِّتْ لِلنَّاسْ وِسْإِلْ: «شْكُونْ مَسْ دَبْشِي.»

³¹قَالُولُو تْلاَمِذْتُو: «يَاخِي تْشُوفْ فِي النَّاسْ كِيفَاشْ يْزَاحْمُوا فِيكْ وْتِسْإِلْ: "شْكُونْ الِّي مَسّْنِي؟"»

³²آمَا هُوَ بْقَي يْدَوِّرْ فِي عِينِيهْ بَاشْ يْشُوفْ الِّي مَسُّو.

³³يَاخِي جَاتُو المْرَا وْهِيَ تِتْرْعِدْ مِالخُوفْ عْلَى خَاطِرْهَا عَرْفِتْ شْنُوَّة الِّي صَارِلْهَا وْتِرْمِتْ قُدَّامْ سَاقِيهْ وْقَتْلُو عْلَى الحْقِيقَة الكُلْهَا.

³⁴قَالِلْهَا: «يَا بِنْتِي، إِيمَانِكْ شْفَاكْ، إِمْشِي فِي الأَمَانْ وِاتْشْفَى مِنْ مَرْضِكْ!»

³⁵وْوَقْتِلِّي يَسُوعْ يِتْكَلِّمْ جَاوْ جْمَاعَة مِنْ بِيتْ رَئِيسْ المَجْمَعْ وْقَالُوا: «رَاهِي بِنْتِكْ مَاتِتْ. عْلاَشْ تْشَقِّي فِي المُعَلِّمْ؟»

³⁶آمَا يَسُوعْ دُوبْ مَا سْمَعْ الكْلاَمْ هَاذَا قَالْ لْرَئِيسْ المَجْمَعْ: «مَا تْخَافِشْ، إِمِّنْ بَرْكْ!»

³⁷وْمَا خَلاَّشْ يَسُوعْ حَتَّى وَاحِدْ يِمْشِي مْعَاهْ كَانْ بُطْرُسْ وْيَعْقُوبْ وْيُوحَنَّا خُو يَعْقُوبْ.

³⁸وِوْصُلْ لْبِيتْ رَئِيسْ المَجْمَعْ وْشَافْ نَاسْ يِبْكِيوْ وِيْصِيحُوا بِالقْوِي.

³⁹وْوَقْتِلِّي دْخَلْ قَالِلْهُمْ: «عْلاَشْ تَعْمْلُوا فِي خُوضَة وْ تِبْكِيوْ؟ البْنَيَّة مَا مَاتِتْشْ، رَاهِي رَاقْدَة.»

⁴⁰يَاخِي ضَحْكُوا عْلِيهْ. وَلَّى خَرِّجْهُمْ يَسُوعْ الكُلْهُمْ وْهَزْ مْعَاهْ بُو البْنَيَّة وْأُمّْهَا وِالتْلاَمْذَة الِّي جَاوْ مْعَاهْ وِدْخَلْ لِلبِيتْ المُوجُودَة فِيهَا البْنَيَّة.

⁴¹وْشَدّْهَا مِنْ يِدّْهَا وْقَلْهَا: «طَلِيثَة قُومْ!» مَعْنَاهَا يَا بْنَيَّة نْقُلِّكْ قُومْ

⁴²وْبِالوَقْتْ قَامِتْ البْنَيَّة وْوَلاَّتْ تِمْشِي وْكَانِتْ عْمُرْهَا ثْنَاشِنْ سْنَة. وِالنَّاسْ الكُلْ تْعَجّْبُوا بَرْشَة.

⁴³وْوَصَّاهُمْ يَسُوعْ وْأَكِّدْ عْلِيهُمْ بَاشْ مَا يْخَبّْرُوا حَتَّى وَاحِدْ عَلِّي وْقَعْ وِأْمَرْهُمْ بَاشْ يَعْطُوهَا تَاكُلْ.