Read Tunisian Arabic New Testament مَرْقُسْ 6 Bible Online

مَرْقُسْ 6 - Tunisian Arabic New Testament bible

مَرْقُسْ 6

¹وِمْشَى يَسُوعْ مِالمَنْطْقَة هَاذِيكَا وِرْجَعْ لِبْلاَدُو وِتْلاَمِذْتُو يِتَبّْعُوا فِيهْ.

²وْجَا نْهَارْ السِّبْتْ وْكَانْ يَسُوعْ يْعَلِّمْ فِي المَجْمَعْ وْبَرْشَة نَاسْ تْعَجّْبُوا وَقْتِلِّي سَمْعُوهْ وْقَالُوا: «مْنِينْ جَاهْ الشَّيْء هَاذَا؟ وِشْنُوَّة الحِكْمَة هَاذِي الِّي تِعْطَاتْلُو وِالمُعْجْزَاتْ هَاذُومَا الِّي قَاعِدْ يَعْمِلْ فِيهُمْ؟

³يَاخِي هَاذَا مُوشْ النَّجَّارْ وِلْدْ مَرْيَمْ، وْخُو يَعْقُوبْ وْيُوسِي وْيَهُوذَا وْسِمْعَانْ؟ يَاخِي مُوشْ خْوَاتُو عِنْدْنَا؟» وْهَكَّا كَانُوا يْشِكُّوا فِي يَسُوعْ.

⁴آمَا هُوَ قَالِلْهُمْ: «النَّبِي عَنْدُو قْدَرْ فِي البْلاَيِصْ الكُلْهُمْ كَانْ وُسْطْ أَقَارْبُو وْفِي دَارُو.»

⁵وْمَا نَجِّمْشْ يَعْمِلْ حَتَّى مُعْجْزَة الغَادِي، كَانْ شْوَيَّة مُرْضَى حَطْ عْلِيهُمْ يْدِيهْ وِشْفَاهُمْ.

⁶وِبْقَى مِتْعَجِّبْ كِيفَاشْ مَا يِمّْنُوشْ. وِبْدَا يَسُوعْ يْدُورْ فِي المَنَاطِقْ القْرِيبَة وِيْعَلِّمْ.

⁷وِمْبَاعِدْ نَادَى الأَثْنَاشِنْ تِلْمِيذْ وِبْعَثْهُمْ كُلْ زُوزْ مْعَ بْعَضْهُمْ وِعْطَاهُمْ سُلْطَة عْلَى الأَرْوَاحْ المَنْزُوسَة.

⁸وْوَصَّاهُمْ بَاشْ مَا يْهِزُّوا مْعَاهُمْ كَانْ عْصَا. لاَ خُبْزْ وْلاَ صُرَّة وْلاَ فْلُوسْ فِي حْزَامَاتْهُمْ.

⁹وْبَاشْ يِلْبْسُوا صَنْدَالْ وْلِبْسَة وَحْدَة.

¹⁰وْقَالِلْهُمْ: «كُلْ مَا تُدْخْلُوا لِمْدِينَة ابْقَاوْ فِي نَفْسْ الدَّارْ حَتَّى لِينْ تَرْحْلُوا مِنْهَا.

¹¹وْأَيْ بْلاَصَة مَا يِسْتَقْبْلُوكُمْشْ فِيهَا وْمَا يِسْمْعُوشْ كْلاَمْكُمْ، أُخْرْجُوا مِنْهَا وْأُنْفْضُوا التْرَابْ مِنْ سَاقِيكُمْ شْهَادَة عْلِيهُمْ.»

¹²يَاخِي مْشَاوْ يْبَشّْرُوا وْيِدْعُوا فِي النَّاسْ بَاشْ يْتُوبُوا.

¹³وْخَرّْجُوا بَرْشَة شْوَاطِنْ. وْدِهْنُوا بَرْشَة مُرْضَى بِالزِّيتْ وِشْفُوهُمْ.

¹⁴وِسْمَعْ المَلِكْ هِيرُودُسْ بْيَسُوعْ عْلَى خَاطْرُو إِسْمُو وَلَّى مَشْهُورْ وْثَمَّة شْكُونْ قَالْ: «هَاذَا يُوحَنَّا المَعْمَدَانْ قَامْ مِنْ بِينْ المُوتَى هَاذَاكَا عْلاَشْ قَاعِدْ يَعْمِلْ فِي المُعْجْزَاتْ هَاذِي.»

¹⁵وْنَاسْ أُخْرِينْ قَالُوا: «هَاذَا إِيلِيَّا» وْأُخْرِينْ قَالُوا: «هَاذَا نَبِي كِيفْ الأَنْبِيَاءْ الأُخْرِينْ!»

¹⁶آمَا هِيرُودُسْ وَقْتِلِّي سْمَعْ قَالْ: «هَاذَا مَا يْكُونْ كَانْ يُوحَنَّا قَامْ مِالمُوتْ بَعْدْ مَا آنَا قَصِّيتْلُو رَاسُو.»

¹⁷وْهِيرُودُسْ بِيدُو بْعَثْ شْكُونْ شَدْ يُوحَنَّا وْرَبْطُو فِي الحَبْسْ. بِسْبَبْ هِيرُودِيَّة الِّي تْزَوِّجْهَا هِيرُودُسْ رَغْمِلِّي هِيَ مَرْةْ فِيلِبُّسْ خُوهْ.

¹⁸يُوحَنَّا كَانْ يْقُولْ لْهِيرُودُسْ: «حْرَامْ عْلِيكْ كَانْ تَاخُذْ مَرْةْ خُوكْ.»

¹⁹وْكَانِتْ هِيرُودِيَّة نَاقْمَة عْلَى يُوحَنَّا وْتِتْمَنَّى بَاشْ تُقْتْلُو آمَا مَا نَجّْمِتْشْ

²⁰وْهِيرُودُسْ كَانْ يْخَافْ مِنْ يُوحَنَّا عْلَى خَاطْرُو يَعْرِفْ الِّي هُوَ رَاجِلْ بَارْ وْمُقَدَّسْ وْكَانْ يْحَافِظْ عْلِيهْ وْكَانْ يْحِبْ يِسْمْعُو رَغْمِلِّي كْلاَمُو يْقَلّْقُو بَرْشَة.

²¹وْجَاتْ فُرْصَة فِي عِيدْ مِيلاَدْ هِيرُودُسْ وِعْمَلْ حَفْلَة اسْتَدْعَى فِيهَا المَسْؤُولِينْ وِالقَادَة الكْبَارْ مْتَاعْ العَسْكِرْ وِالنَّاسْ الغُنْيَا مْتَاعْ مَنْطِقْةْ الجَلِيلْ.

²²وْدَخْلِتْ بِنْتْ هِيرُودِيَّة وْشَطْحِتْ وْعَجْبِتْ هِيرُودُسْ وِالنَّاسْ القَاعْدِينْ مْعَاهْ وَلَّى قَالْ المَلِكْ لِلبْنَيَّة: «اطْلْبِي الِّي تْحِبِّي وْآنَا نَعْطِيكْ!»

²³وِحْلِفِّلْهَا وْقَالْ: «نَعْطِيكْ الِّي تُطْلْبِي، حَتَّى لُوكَانْ نُصْ مَمْلِكْتِي!»

²⁴يَاخِي خَرْجِتْ البَرَّا وْسِأْلِتْ أُمّْهَا: «شْنُوَّة نُطْلُبْ؟» جَاوْبِتْهَا: «رَاسْ يُوحَنَّا المَعْمَدَانْ.»

²⁵رَجْعِتْ بِالوَقْتْ لِلمَلِكْ وْقَالِتْلُو: «نْحِبِّكْ تَعْطِينِي تَوَّا رَاسْ يُوحَنَّا المَعْمَدَانْ فِي طْبَقْ.»

²⁶حْزِنْ المَلِكْ بَرْشَة آمَا عْلَى خَاطِرْ اليْمِينْ الِّي حْلِفْ بِيهْ وِالضْيُوفْ مَا حَبِّشْ يِتْرَاجَعْ فِي الشَّيْء الِّي وْعِدْهَا بِيهْ.

²⁷وْبِالوَقْتْ بْعَثْ المَلِكْ جُنْدِي وْأُمْرُو بَاشْ يْجِيبْلُو رَاسْ يُوحَنَّا، مْشَى الجُنْدِي وْقَصّْلُو رَاسُو فِي الحَبْسْ.

²⁸وْجَابُو فِي طْبَقْ وِعْطَاهْ لِلبْنَيَّة هَزَّاتُو لْأُمّْهَا.

²⁹وْوَقْتِلِّي سَمْعُوا تْلاَمِذْةْ يُوحَنَّا بِلِّي وْقَعْ جَاوْ وْهَزُّوا الجُثَّة مْتَاعُو وْحَطُّوهَا فِي قْبَرْ.

³⁰وْجَاوْ الرُّسُلْ لْيَسُوعْ مْعَ بْعَضْهُمْ وْخَبّْرُوهْ بِالحَاجَاتْ الكُلْ الِّي عَمْلُوهَا وِلِّي عَلّْمُوهَا لِلنَّاسْ.

³¹قَالِلْهُمْ: «إِيجَاوْ مْعَايَا إِنْتُومَا وَحَّدْكُمْ لِبْلاَصَة خَالْيَة بَاشْ تَرْتَاحُوا شْوَيَّة.» عْلَى خَاطِرْ بَرْشَة نَاسْ كَانُوا مَاشِينْ جَايِينْ عْلِيهُمْ وْمَا لْقَاوْشْ حَتَّى الوَقْتْ بَاشْ يَاكْلُوا.

³²مْشَاوْ التْلاَمْذَة فِي الفْلُوكَة لِبْلاَصَة مَا فِيهَا حَتَّى حَدْ.

³³ثَمَّة بَرْشَة نَاسْ شَافُوهُمْ وْعَرْفُوهُمْ وِينْ مَاشِينْ وْخَرْجُوا النَّاسْ مِالمُدُنْ الكُلْهَا يِجْرِيوْ مْعَ بْعَضْهُمْ وْوُصْلُوا قْبَلْ التْلاَمْذَة لِلبْلاَصَة المَاشِينْ لِيهَا.

³⁴كِهْبَطْ يَسُوعْ مِالفْلُوكَة شَافْ بَرْشَة نَاسْ وْحَنْ عْلِيهُمْ عْلَى خَاطِرْهُمْ كَانُوا كِيفْ الغْنَمْ الِّي مَا عِنْدْهَاشْ سَارِحْ وِبْدَا يْعَلِّمْ فِيهُمْ فِي بَرْشَة حَاجَاتْ.

³⁵وْوَقْتِلِّي النْهَارْ قْرِيبْ يُوفَى جَاوْ التْلاَمْذَة لْيَسُوعْ وْقَالُولُو: «البْلاَصَة خَالْيَة وِالنْهَارْ قْرِيبْ يُوفَى.

³⁶أَبْعِثْ النَّاسْ خَلِّيهُمْ يِمْشِيوْ لِلفِيرْمَاتْ وِالقُرَى القْرِيبَة وْيِشْرِيوْ حَاجَة يَاكْلُوهَا.»

³⁷آمَا هُوَ جَاوِبْهُمْ: «أَعْطِيوْهُمْ انْتُومَا حَاجَة يَاكْلُوهَا.» قَالُولُو: «يَاخِي بَاشْ نِشْرِيوْ بْمِيتِينْ دِينَارْ خُبْزْ بَاشْ نَعْطِيوْهُمْ يَاكْلُوا؟»

³⁸قَالِلْهُمْ: «إِمْشِيوْ وْشُوفُوا قَدَّاشْ عِنْدْكُمْ مِنْ خُبْزَة؟» وْوَقْتِلِّي شَافُوا قَالُوا: «خَمْسَة خُبْزَاتْ وْحُوتِّينْ.»

³⁹أْمَرْهُمْ يَسُوعْ بَاشْ يْقَعّْدُوا النَّاسْ كُلْ جْمَاعَة وَحَّدْهُمْ فُوقْ الحْشِيشْ الأَخْضَرْ.

⁴⁰قَعّْدُوا النَّاسْ فِي مَجْمُوعَاتْ كُلْ وَحْدَة فِيهَا مْيَة وِلاَّ خَمْسِينْ وَاحِدْ.

⁴¹وِخْذَا يَسُوعْ الخَمْسَة خُبْزَاتْ وِالحُوتِّينْ وْهَزْ عِينِيهْ لِلسْمَاء وْبَارِكْ وِقْسِمْ الخُبْزَاتْ وِعْطَى لِتْلاَمِذْتُو بَاشْ يْفَرّْقُوا عْلَى النَّاسْ وِالحُوتِّينْ قَسِّمْهُمْ عْلَى القَاعْدِينْ الكُلْهُمْ.

⁴²وِالكُلْهُمْ كْلاَوْ وْشَبْعُوا.

⁴³وْفُضْلِتْ ثْنَاشِنْ قُفَّة مْعُبّْيَة بِالخُبْزْ وِالحُوتْ.

⁴⁴وِالرْجَالْ الِّي كْلاَوْ مِالخُبْزْ كَانُوا خَمْسَة آلاَفْ.

⁴⁵وِمْبَعْدْهَا بِالضَّبْطْ أْمَرْ يَسُوعْ تْلاَمِذْتُو بَاشْ يَطْلْعُوا فِي الفْلُوكَة وْيِسْبْقُوهْ لِلجِيهَة المْقَابْلَة مْتَاعْ البُحَيْرَة وْيِمْشِيوْ لْبِيتْ صَيْدَا حَتَّى لِينْ هُوَ يَبْعِثْ النَّاسْ يْرَوّْحُوا.

⁴⁶وْبَعْدْ مَا بْعَثْ النَّاسْ طْلَعْ لِلجْبَلْ بَاشْ يْصَلِّي.

⁴⁷وْوَقْتِلِّي جَاتْ العْشِيَّة كَانِتْ الفْلُوكَة فِي وُسْطْ البُحَيْرَة وِبْقَى يَسُوعْ وَحْدُو البَرَّة فِي الأَرْضْ.

⁴⁸وْوَقْتِلِّي شَافْ الِّي تْلاَمِذْتُو تَعْبُوا مِنْ جَبْدَانْ المَاء عْلَى خَاطِرْ الرِّيحْ كَانِتْ عَاكْسِتْهُمْ جَاهُمْ يِمْشِي فُوقْ المَاء وْكَانْ هَاذَا تَقْرِيبْ قْبَلْ الفَجْرْ وْفَاتْهُمْ

⁴⁹آمَا هُومَا وَقْتِلِّي شَافُوهْ يِمْشِي فُوقْ المَاء مْشَى فِي بَالْهُمْ الِّي هُوَ خْيَالْ وِبْدَاوْا يْصِيحُوا.

⁵⁰وْخَافُوا مِنُّو الكُلْهُمْ وَقْتِلِّي شَافُوهْ آمَا هُوَ كَلِّمْهُمْ بِالوَقْتْ وْقَالِلْهُمْ: «اتْشَجّْعُوا. رَانِي آنَا هُوَ، مَا تْخَافُوشْ!»

⁵¹وِطْلَعْ مْعَاهُمْ فِي الفْلُوكَة وْهْدَاتْ الرِّيحْ. يَاخِي بْقَاوْ مِتْعَجّْبِينْ بَرْشَة.

⁵²عْلَى خَاطِرْهُمْ مَا يِفْهْمُوشْ هَاذَاكَا عْلاَشْ مَا تْعَلّْمُوشْ مِالمُعْجْزَة مْتَاعْ الخُبْزَاتْ.

⁵³وْكِفَاتْ يَسُوعْ وِتْلاَمِذْتُو البْلاَصَة هَاذِيكَا جَاوْ لْمَنْطِقْةْ جَنِّيسَارْتْ وْوُقْفُوا.

⁵⁴وْدُوبْ مَا نِزْلُوا مِالفْلُوكَة النَّاسْ عَرْفُوا يَسُوعْ.

⁵⁵وْوَلُّوا يِجْرِيوْ فِي المَنْطْقَة الكُلْهَا وِيْجِيبُوا فِي المُرْضَى الرَّاقْدِينْ عْلَى الفْرَاشْ لِلبْلاَصَة الِّي يِسْمْعُوا بِيهْ مْشَالْهَا.

⁵⁶وْكُلْ مَا يِمْشِي لِلمُدُنْ وِلاَّ القُرَى وِلاَّ الأَرْيَافْ يْحُطُّوا المُرْضَى قُدَّامُوا فِي بْلاَصَة مَعْرُوفَة وْيِتْشَحّْتُوهْ بَاشْ يْخَلِّيهُمْ يْمِسُّوا حَتَّى الطّْرَفْ مْتَاعْ دَبْشُو. وِلِّي مَسُّوهْ الكُلْهُمْ تِشْفَاوْ.