Read Tunisian Arabic New Testament مَرْقُسْ 7 Bible Online

مَرْقُسْ 7 - Tunisian Arabic New Testament bible

مَرْقُسْ 7

¹وِمْشَاوْ الفَرِّيسِيِّينْ لْيَسُوعْ وِمْعَاهُمْ جْمَاعَة مِنْ الكُتَّابْ مْتَاعْ اليْهُودْ جَايِينْ مِنْ أُورْشَلِيمْ.

²وْثَمَّة جْمَاعَة شَافُوا تْلاَمِذْتُو يَاكْلُوا مِنْ غِيرْ مَا يَغْسْلُوا يْدِيهُمْ.

³وْكَانُوا الفَرِّيسِيِّينْ وِاليْهُودْ بْصِفَة عَامَّة مَا يَاكْلُوا إِلاَّ بَعْدْ مَا يَغْسْلُوا يْدِيهُمْ بِالقْدَا عْلَى خَاطِرْهُمْ يْحَافْظُوا عْلَى عْوَايِدْ الشْيُوخْ.

⁴وْوَقْتِلِّي يَرْجْعُوا مِالسُّوقْ مَا يَاكْلُوا كَانْ بَعْدْ مَا يْعُومُوا وْثَمَّة بَرْشَة تَقَالِيدْ أُخْرَى حَافْظُوا عْلِيهَا كِيفْ غَسْلاَنْ الكِيسَانْ وِالصْحَافِي وِالمَاعُونْ النْحَاسْ.

⁵الوَقْتْ هَاذَاكَا سِأْلُوهْ الفَرِّيسِيِّينْ وِالكُتَّابْ مْتَاعْ اليْهُودْ: «عْلاَشْ تْلاَمِذْتِكْ مَا يِتْصَرّْفُوشْ كِيفْ مَا تْقُولْ العْوَايِدْ مْتَاعْ الشْيُوخْ وْيَاكْلُوا وِيْدِيهُمْ امَّسْخَة؟»

⁶جَاوِبْهُمْ يَسُوعْ: «أَحْسِنْ مَا عْمَلْ إِشَعْيَاءْ وَقْتِلِّي تْنَبَّأْ عْلِيكُمْ يَا مُنَافْقِينْ كِيفْ مَا قَالْ الكْتَابْ المُقَدَّسْ: الشَّعْبْ هَاذَا بْفُمُّو يِكْرِمْ فِيَّ، وْقَلْبُو بْعِيدْ عْلِيَّ.

⁷بَاطِلْ يِعْبْدُوا فِيَّ، وِيْعَلّْمُوا فِي وْصَايَا النَّاسْ.

⁸هَمِّلْتُوا الوْصِيَّة مْتَاعْ الله وْشَدِّيتُوا فِي عْوَايِدْ النَّاسْ!»

⁹وْقَالِلْهُمْ: «أيَّا بَاهِي! مَا قْبِلْتُوشْ وْصِيِّةْ اللهْ بَاشْ تْحَافْظُوا عْلَى العْوَايِدْ مْتَاعْكُمْ.

¹⁰مُوسَى قَالْ: "إِكْرِمْ بُوكْ وْأُمِّكْ، وِلِّي يْسِبْ بُوهْ وِلاَّ أُمُّو يِلْزْمُو يْمُوتْ."

¹¹آمَا إِنْتُومَا تْقُولُوا: "إِذَا وَاحِدْ قَالْ لْبُوهْ وِلاَّ لْأُمُّو الِّي كُنْتْ نْعَاوِنْ فِيكْ بِيهْ رَانِي عْطِيتُو قُرْبَانْ للهْ."

¹²مَا عَادِشْ تْخَلِّيوْهْ يْعَاوِنْ بُوهْ وِلاَّ أُمُّو بْأَيْ حَاجَة

¹³وْهَكَّا رَدِّيتُوا كِلْمِةْ اللهْ بَاطْلَة بِالعْوَايِدْ مْتَاعْكُمْ القْدِيمَة الِّي وْرِثْتُوهَا كِيفْ بَرْشَة حَاجَاتْ تَعْمْلُوا فِيهَا.»

¹⁴وْنَادَى يَسُوعْ النَّاسْ مَرَّة أُخْرَى وْقَالِلْهُمْ: «اسْمْعُونِي وِافْهْمُونِي الكُلْكُمْ.

¹⁵مَا ثَمَّاشْ حَتَّى حَاجَة لْبَرَّة مِالإِنْسَانْ كِتُدْخُلْ فِي وُسْطُو تْنَجّْسُو آمَا رَاهِي الحَاجَاتْ الِّي خَارْجَة مِالإِنْسَانْ هِيَ الِّي تْنَجّْسُو.»

¹⁶[الِّي عَنْدُو وِذْنِينْ خَلِّيهْ يِسْمَعْ.]

¹⁷وْوَقْتِلِّي خَلَّى النَّاسْ وِدْخَلْ لْدَارْ سِأْلُوهْ تْلاَمِذْتُو عْلَى المَعْنَى مْتَاعْ المَثَلْ.

¹⁸قَالِلْهُمْ: «حَتَّى إِنْتُومَا مَا تِفْهْمُوشْ؟ يَاخِي مَا تَعْرْفُوشْ إِنُّو الحَاجَاتْ الِّي تُدْخُلْ لِلإنْسَانْ مِنْ البَرَّة مَا تْنَجِّمْشْ تْنَجّْسُو.

¹⁹عْلَى خَاطِرْهَا تُدْخُلْ لْكِرْشُو مُوشْ لْقَلْبُو وِمْبَاعِدْ تُخْرُجْ مِالبْدَنْ؟» وْهَكَّا رَدْ المَاكْلَة الكُلْهَا طَاهْرَة.

²⁰وِمْبَاعِدْ قَالْ: «الحَاجَاتْ الِّي تُخْرُجْ مِالإِنْسَانْ هِيَ الِّي تْنَجِّسْ الإِنْسَانْ.

²¹عْلَى خَاطِرْ مِنْ وُسْطْ قْلُوبْ النَّاسْ تُخْرُجْ الأَفْكَارْ الشِّرِّيرَة وِالفْسَادْ وِالسِّرْقَة وِالقَتْلْ

²²وِالزْنَى وِالطْمَعْ وِالشَّرْ وِالغَشَّة وِالتَّسَيُّبْ وِالأَنَانِيَّة وِالكُفْرْ وِالتَّكَبُّرْ وِالجَهْلْ.

²³الحَاجَاتْ الشِّرِّيرَة هَاذِي الكُلْهَا تُخْرُجْ مِنْ وُسْطْ الإِنْسَانْ وِتْنَجّْسُو.»

²⁴وِمْبَاعِدْ خْرَجْ يَسُوعْ مِالمَنْطْقَة هَاذِيكَا وِمْشَى لْجِيهِةْ صُورْ. دْخَلْ لْدَارْ وْمَا حَبِّشْ حَتَّى حَدْ يَعْرِفْ الِّي هُوَ فِيهَا، آمَا مَا نَجِّمْشْ يَبْقَى مِتْخُبِّي،

²⁵وْثَمَّة مْرَا بِنْتْهَا سَاكِنْهَا رُوحْ مَنْزُوسْ، دُوبْ مَا سِمْعِتْ بِيهْ جَاتُو وْتِرْمَاتْ قُدَّامْ سَاقِيهْ.

²⁶وِالمْرَا كَانِتْ يُونَانِيَّة، أَصْلْهَا سُورِيَّة فِينِيقِيَّة وِاشَّحْتِتُّو بَاشْ يْخَرِّجْ الشِّيطَانْ مِنْ بْنِتْهَا.

²⁷آمَا هُوَ قَالِلْهَا: «خَلِّي يِشْبْعُوا الوْلاَدْ فِي الأُوِّلْ! مُوشْ بَاهِي نَاخْذُوا الخُبْزْ مْتَاعْ الوْلاَدْ وْنَرْمِيوْهْ لِلكْلاَبْ.»

²⁸آمَا هِيَ جَاوْبِتُّو وْقَالِتْلُو: «يَا سِيدِي! حَتَّى الكْلاَبْ تَحْتْ الطَّاوْلَة تَاكُلْ مِالفِتْفَاتْ الِّي يْطَيّْحُوهْ الوْلاَدْ.»

²⁹قَالِلْهَا: «عْلَى خَاطْرِكْ قُلْتْ الكِلْمَة هَاذِي إِمْشِي، رَاهُو الشِّيطَانْ خْرَجْ مِنْ بِنْتِكْ!»

³⁰وْوَقْتِلِّي رَجْعِتْ لْبِيتْهَا لْقَاتْ بْنِتْهَا فُوقْ السْرِيرْ وِالشِّيطَانْ خْرَجْ مِنْهَا.

³¹وِمْبَاعِدْ خْرَجْ يَسُوعْ مِنْ جِيهِةْ صُورْ وِرْجَعْ لِلبُحَيْرَة مْتَاعْ الجَلِيلْ بَعْدْ مَا تْعَدَّى عْلَى صَيْدَا وِعْلَى الحُدُودْ مْتَاعْ بْلاَصَة اسْمْهَا العَشْرَة مُدُنْ.

³²وْجَابُولُو وَاحِدْ بَكُّوشْ وْأَطْرِشْ وْيِتْكَلِّمْ بِالسِّيفْ وِتْشَحّْتُوهْ بَاشْ يْحُطْ عْلِيهْ يْدِيهْ.

³³وَلَّى هَزُّو وَحْدُو بْعِيدْ عْلَى النَّاسْ وْحَطْ صْوَابْعُو لِثْنِينْ فِي وِذْنِيهْ وِدْفِلْ فِي يِدُّو وْمَسّْلُو لْسَانُو.

³⁴وْهَزْ عِينِيهْ لِلسْمَاء وِتْنَهِّدْ وْقَالُّو: «إِفَّتَا!» مَعْنَاهَا إِتْحَلْ

³⁵وْبِالوَقْتْ تْحَلِّتْ وِذْنِيهْ وِلْسَانُو تِطْلَقْ وِبْدَا يْقُولْ فِي كْلاَمْ وَاضِحْ.

³⁶وْوَصَّى النَّاسْ بَاشْ مَا يْقُولُوشْ لْحَتَّى حَدْ. آمَا كُلْ مَا يْوَصِّيهُمْ أَكْثِرْ كُلْ مَا يُنْشْرُوا الخْبَرْ أَكْثِرْ.

³⁷وْكَانُوا مِتْعَجّْبِينْ بَرْشَة وْقَالُوا: «الحَاجَاتْ الِّي يَعْمِلْ فِيهَا الكُلْهَا بَاهْيَة، يْرُدْ الطُّرْشْ يِسْمْعُوا وِالبْكَاكِشْ يِتْكَلّْمُوا.»