Read Tunisian Arabic New Testament مَرْقُسْ 9 Bible Online

مَرْقُسْ 9 - Tunisian Arabic New Testament bible

مَرْقُسْ 9

¹وْقَالِلْهُمْ يَسُوعْ: «نْقُلْكُمْ الحَقْ: ثَمَّة شْكُونْ مِنْ الوَاقْفِينْ هْنَا مَا هُمْشْ بَاشْ يْشُوفُوا المُوتْ إِلاَّ بَعْدْ مَا يْشُوفُوا مَمْلِكْةْ اللهْ جَايَة بْقُوَّة.»

²وْبَعْدْ سِتَّة أَيَّامْ هَزْ يَسُوعْ بُطْرُسْ وْيَعْقُوبْ وْيُوحَنَّا وْطَلْعُوا وَحَّدْهُمْ لِجْبَلْ عَالِي وِتْبَدِّلْ قُدَّامْهُمْ.

³وْوَلَّى دَبْشُو يِلْمَعْ أَبْيِضْ مِالثِّلْجْ مَا يْنَجِّمْشْ حَتَّى صَبَّاغْ فِي الدِّنْيَا يَصْبِغْ لِبْسَة بِالأَبْيِضْ كِيفُو.

⁴وْظَهْرُولْهُمْ إِيلِيَّا وْمُوسَى وْكَانُوا يْكَلّْمُوا فِي يَسُوعْ.

⁵وْقَالْ بُطْرُسْ لْيَسُوعْ: «يَا مُعَلِّمْ، رَاهُو بَاهِي الِّي أَحْنَا مُوجُودِينْ هْنَا! خَلِّينَا نُنْصْبُوا ثْلاَثَة خْيَامْ. وَحْدَة لِيكْ وْوَحْدَة لْمُوسَى وْوَحْدَة لْإِيلِيَّا!»

⁶وْبُطْرُسْ مَا كَانِشْ دَارِي عْلَى رُوحُو آشْ قَاعِدْ يْقُولْ عْلَى خَاطِرْهُمْ كَانُوا خَايْفِينْ بَرْشَة.

⁷وْجَاتْ سْحَابَة وْغَطَّاتْهُمْ وِخْرَجْ صُوتْ مِالسْحَابَة: «هَاذَا هُوَ ابْنِي الِّي نْحِبُّو. اسْمْعُولُو!»

⁸وْخَزْرُوا التْلاَمْذَة بِحْذَاهُمْ وْمَا شَافُوا كَانْ يَسُوعْ وَحْدُو مْعَاهُمْ.

⁹وْوَقْتِلِّي هُومَا هَابْطِينْ مِالجْبَلْ، وَصَّاهُمْ يَسُوعْ بَاشْ مَا يْخَبّْرُوا حَتَّى حَدْ بِالشَّيْء الِّي شَافُوهْ حَتَّى لِينْ إِبْنْ الإِنْسَانْ ا يْقُومْ مِنْ بِينْ المُوتَى.

¹⁰عَمْلُوا التْلاَمْذَة بِالشَّيْء الِّي قَالْهُولْهُمْ آمَا بْقَاوْ يِتْنَاقْشُوا مَا بِينَاتْ بْعَضْهُمْ: «آشْ مَعْنَاهَا: يْقُومْ مِنْ بِينْ المُوتَى؟»

¹¹وْكَانُوا يِسْأْلُوا فِيهْ وِيْقُولُوا: «عْلاَشْ الكُتَّابْ مْتَاعْ اليْهُودْ يْقُولُوا الِّي إِيلِيَّا لاَزِمْ يْجِي فِي الأُوِّلْ؟»

¹²جَاوِبْهُمْ: «بِالحَقْ إِيلِيَّا يْجِي فِي الأُوِّلْ وِيْصَلِّحْ كُلْ شَيْء. إِمَّالاَ عْلاَشْ جَا فِي الكْتَابْ المُقَدَّسْ الِّي آنَا إِبْنْ الإِنْسَانْ لاَزِمْنِي نِتْألِّمْ وْنِتْهَانْ بَرْشَة.

¹³وْآنَا نْقُلْكُمْ: رَاهُو إِيلِيَّا جَا وْعَمْلُوا فِيهْ الِّي حَبُّوا، كِيفْ مَا حْكَى عْلِيهْ الكْتَابْ المُقَدَّسْ!»

¹⁴وْوَقْتِلِّي وُصْلُوا لِلتْلاَمْذَة الأُخْرِينْ شَافُوا بَرْشَة نَاسْ دَايْرِينْ بِيهُمْ وِالكُتَّابْ مْتَاعْ اليْهُودْ يْنَاقْشُوا فِيهُمْ.

¹⁵وْدُوبْ مَا النَّاسْ شَافُوا يَسُوعْ تْعَجّْبُوا وِمْشَاوْلُو يِجْرِيوْ بَاشْ يْسَلْمُوا عْلِيهْ.

¹⁶سْإِلْهُمْ: «عْلاَشْ تْنَاقْشُوا فِيهُمْ؟»

¹⁷جَاوْبُو وَاحِدْ مِنْهُمْ: «يَا مُعَلِّمْ جِبْتْلِكْ وِلْدِي، رَاهُو سَاكْنُو رُوحْ وْرَدُّو بَكُّوشْ.

¹⁸كُلْ مَا يْشِدُّو يَصْرْعُو وِيْخَرِّجْ الكْشَاكِشْ مِنْ فُمُّو وِيْعَظْ عْلَى سِنِّيهْ وْيِيبِسْ وِطْلَبْتْ مِنْ تْلاَمِذْتِكْ بَاشْ يْخَرّْجُوهْ، آمَا هُومَا مَا نَجّْمُوشْ.»

¹⁹جَاوِبْهُمْ وْقَالْ: «يَا جِيلْ يَلِّي مَا عِنْدْكُمْشْ إِيمَانْ! لْوَقْتَاشْ بَاشْ نَبْقَى مْعَاكُمْ؟ لْوَقْتَاشْ بَاشْ نِتْحَمِّلْكُمْ؟ جِيبُوهُولِي!»

²⁰جَابُوهْ لْيَسُوعْ وْدُوبْ مَا الرُّوحْ شَافُو صْرَعْ الوْلَدْ وْطَاحْ عْلَى الأَرْضْ يِتْمَرِّغْ وْخَرِّجْ الكْشَاكِشْ مِنْ فُمُّو.

²¹وِسْإِلْ يَسُوعْ بُو الوْلِدْ: «مِنْ وَقْتَاشْ بْدَا يَجْرَالُو الشَّيْء هَاذَا؟» قَالْ: «مِلِّي هُوَ صْغِيرْ

²²وْبَرْشَة مَرَّاتْ طَيّْحُو فِي النَّارْ وْفِي المَاء بَاشْ يُقْتْلُو. آمَا إِذَا كَانِكْ تِقْدِرْ تَعْمِلْ حَاجَة، حِنْ عْلِينَا وْعَاوِنَّا!»

²³قَالُّو يَسُوعْ: «قُتْلِي إِذَا كَانِكْ تِقْدِرْ! رَاهُو كُلْ شَيْء مُمْكِنْ عِنْدْ الِّي يِمِّنْ!»

²⁴وْبِالوَقْتْ صَاحْ بُو الوْلِدْ: «آنَا نِمِّنْ! وْإِنْتِ عَاوِنِّي رَانِي إِيمَانِي ضْعِيفْ!»

²⁵وْوَقْتِلِّي شَافْ يَسُوعْ الِّي النَّاسْ الكُلْهُمْ جَاوْ يِجْرِيوْ مْعَ بْعَضْهُمْ أْمَرْ الرُّوحْ المَنْزُوسْ وْقَلُّو: «يَا رُوحْ يَا بَكُّوشْ وْيَا أَطْرِشْ آنَا نُأْمْرِكْ، اخْرُجْ مِنُّو وْمَا تَرْجِعْلُوشْ بِالكُلْ!»

²⁶صَاحْ الرُّوحْ وِصْرَعْ الوْلَدْ بْقُوَّة وِخْرَجْ وْوَلَّى الوْلَدْ كَإِنُّو مِيتْ حَتَّى لِينْ بَرْشَة نَاسْ قَالُوا: «رَاهُو مَاتْ.»

²⁷آمَا يَسُوعْ شَدُّو مِنْ يِدُّو وْقَوّْمُو، وْهُوَ قَامْ.

²⁸وْبَعْدْ مَا دْخَلْ يَسُوعْ لِلبِيتْ، سِأْلُوهْ تْلاَمِذْتُو عْلَى جْنَبْ: «عْلاَشْ أَحْنَا مَا نَجِّمْنَاشْ نْخَرّْجُوهْ؟»

²⁹جَاوِبْهُمْ: «النَّوْعْ هَاذَا مَا يِطَّرِّدْ كَانْ بِالصَّلاَةْ وِالصُّومْ.»

³⁰وِمْبَاعِدْ مْشَى يَسُوعْ وِتْلاَمِذْتُو مِنْ ثَمَّة وِتْعَدَّاوْ عْلَى مَنْطِقْةْ الجَلِيلْ وْمَا حَبِّشْ حَتَّى وَاحِدْ يَعْرِفْ البْلاَصَة الِّي هُوَ مُوجُودْ فِيهَا.

³¹عْلَى خَاطْرُو كَانْ يْعَلِّمْ فِي تْلاَمِذْتُو وِيْقُولِلْهُمْ: «آنَا إِبْنْ الإِنْسَانْ بَاشْ يْسَلّْمُونِي لِيْدِينْ النَّاسْ وْبِشْ يُقْتْلُونِي وْبِشْ نْقُومْ فِي النْهَارْ الثَّالِثْ.»

³²آمَا هُومَا مَا فَهْمُوشْ كْلاَمُو وْخَافُوا بَاشْ يِسْأْلُوهْ.

³³وِمْبَاعِدْ جَا يَسُوعْ لْكَفْرْنَاحُومْ. وْوَقْتِلِّي هُوَ فِي الدَّارْ سْإِلْ تْلاَمِذْتُو: «فَاشْ كُنْتُوا تِتْنَاقْشُوا فِي الطْرِيقْ؟»

³⁴بْقَاوْ سَاكْتِينْ عْلَى خَاطِرْهُمْ كَانُوا يِتْنَاقْشُوا فِي شْكُونْ هُوَ أَعْظِمْ وَاحِدْ فِيهُمْ.

³⁵قْعَدْ وْنَادَى الأَثْنَاشِنْ تِلْمِيذْ وْقَالِلْهُمْ: «إِذَا وَاحِدْ يْحِبْ يْكُونْ الأُوِّلْ يِلْزْمُو يْحُطْ رُوحُو آخِرْ النَّاسْ وْيِخْدِمْهُمْ!»

³⁶وْجَابْ وْلِدْ صْغِيرْ وْوَقّْفُو فِي وُسْطْهُمْ وْهَزُّو مَا بِينْ يْدِيهْ وْقَالِلْهُمْ:

³⁷«الِّي يِقْبِلْ بْإِسْمِي وَاحِدْ مِنْ الوْلاَدْ الصْغَارْ هَاذُومَا رَاهُو يِقْبِلْنِي وِلِّي يِقْبِلْنِي رَاهُو مَا يِقْبِلْنِيشْ آنَا بَرْكْ آمَا زَادَا يِقْبِلْ الِّي بْعَثْنِي.»

³⁸قَالْ يُوحَنَّا لْيَسُوعْ: «يَا مُعَلِّمْ، شُفْنَا وَاحِدْ يْخَرِّجْ فِي الشْوَاطِنْ بْإِسْمِكْ وَلِّينَا حُزْنَاهْ عْلَى خَاطْرُو مُوشْ يْتَبَّعْ فِينَا.»

³⁹آمَا يَسُوعْ قَالْ: «مَا تْحُوزُوهِشْ! رَاهُو مَا ثَمَّاشْ حَتَّى وَاحِدْ يَعْمِلْ مُعْجْزَة بْإِسْمِي وِمْبَاعِدْ شْوَيَّة يْنَجِّمْ يِتْكَلِّمْ عْلِيَّ بِالخَايِبْ.

⁴⁰الِّي مُوشْ ضِدّْنَا رَاهُو مْعَانَا.

⁴¹الِّي يَعْطِيكُمْ كَاسْ مَاء بْإِسْمِي عْلَى خَاطِرْكُمْ تَابْعِينْ لِلمَسِيحْ. نْقُولِلْكُمْ الحَقْ، رَاهُو أَجْرُو مَا يْضِيعِشْ.»

⁴²«الِّي يْكُونْ سْبَبْ عَثْرَة لْوَاحِدْ مِالصْغَارْ هَاذُومَا الِّي يِمّْنُوا بِيَّ خِيرْلُو كَانْ تِتْعَلِّقْ حَجْرَة كْبِيرَة مْتَاعْ رْحَى فِي رَقْبْتُو وْيِتْرْمَى فِي قَلْبْ البْحَرْ.

⁴³وْإِذَا كَانْ يِدِّكْ تْخَلِّيكْ تَعْمِلْ الذْنُوبْ قُصّْهَا، رَاهُو كِتُدْخُلْ لِلحَيَاةْ الأَبَدِيَّة وْيِدِّكْ مَقْصُوصَة خِيرْلِكْ مِلِّي تُدْخُلْ لِجْهَنِّمْ وِيْدِيكْ الإِثْنِينْ كَامْلِينْ.

⁴⁴وِينْ دُودْهُمْ مَا يْمُوتْشْ وْنَارْهُمْ مَا تَطْفَاشْ.

⁴⁵وْإِذَا كَانْ سَاقِكْ تْخَلِّيكْ تَعْمِلْ الذْنُوبْ قُصّْهَا، رَاهُو كِتُدْخُلْ لِلحَيَاةْ الأَبَدِيَّة وْسَاقِكْ مَقْصُوصَة خِيرْلِكْ مِلِّي تِتْرْمَى فِي جْهَنِّمْ وْسَاقِيكْ كَامْلِينْ،

⁴⁶وِينْ دُودْهُمْ مَا يْمُوتْشْ وْنَارْهُمْ مَا تَطْفَاشْ.

⁴⁷وْإِذَا كَانْ عِينِكْ تْخَلِّيكْ تَعْمِلْ الذْنُوبْ قَلِّعْهَا، رَاهُو كِتُدْخُلْ لْمَمْلِكْةْ اللهْ بْعِينْ وَحْدَة، خِيرْلِكْ مِلِّي تِتْرْمَى فِي جْهَنِّمْ بْعِينِيكْ لِثْنِينْ،

⁴⁸وِينْ دُودْهُمْ مَا يْمُوتْشْ وْنَارْهُمْ مَا تَطْفَاشْ.

⁴⁹وِينْ كُلْ وَاحِدْ بَاشْ يِتْحَاسِبْ عْلَى ذْنُوبُو وْبِشْ تَهْبِطْ عْلِيهْ النَّارْ كِيفْ مَا المِلْحْ يِتْذَرْ فِي المَاكْلَة.»

⁵⁰«المِلْحْ بَاهِي. آمَا إِذَا كَانْ المِلْحْ مَا عَادِشْ عَنْدُو مَطْعِمْ، كِيفَاشْ بَاشْ تْرَجّْعُولُو مَطْعْمُو؟ خَلِّي يْكُونْ عِنْدْكُمْ مِلْحْ فِي نْفُوسْكُمْ وْعِيشُوا فِي سَلاَمْ مْعَ بْعَضْكُمْ.»