Read Tunisian Arabic New Testament لُوقَا 1 Bible Online

لُوقَا 1 - Tunisian Arabic New Testament bible

لُوقَا 1

¹كِبَرْشَة نَاسْ بْدَاوْا يِكْتْبُوا فِي كْتَابْ عْلَى الحَاجَاتْ الِّي وُقْعِتْ عِنْدْنَا

²بِالضَّبْطْ كِيفْ مَا سْمَعْنَاهَا مِنْ عِنْدْ النَّاسْ الِّي كَانُوا شْهُودْ مِالأُوِّلْ وْشَافُوهَا بْعِينِيهُمْ، وْكَانُوا خُدَّامْ لْكِلْمِةْ اللهْ.

³آنَا زَادَا بَعْدْ مَا بْحَثْتْ فِي الحَاجَاتْ الكُلْ مِالأُوِّلْ بِالقْدَا، قَرِرْتْ يَا حَضْرِةْ السَّيِّدْ ثَاوْفِيلُسْ بَاشْ نِكْتِبْهَالِكْ مْرَتّْبَة.

⁴بَاشْ تِتْأَكِّدْ الِّي الحَاجَاتْ الِّي عْرَفْتْهُمْ صْحَاحْ.

⁵وْفِي زْمَانْ هِيرُودُسْ المَلِكْ مْتَاعْ اليَهُودِيَّة كَانْ ثَمَّة كَاهِنْ إِسْمُو زَكَرِيَّا مِنْ فِرْقِةْ أَبِيَّا وْمَرْتُو مِنْ ذُرِّيِّةْ هَارُونْ وْإِسْمْهَا إِلِيصَابَاتْ.

⁶وْلِثْنِينْ كَانُوا أَبْرَارْ عِنْدْ الله وِيْطِيعُوا فِي الشَّرِيعَة وِالوْصَايَا مْتَاعْ الرَّبْ الكُلْهَا وْمَا عْلِيهُمْشْ لُومْ.

⁷آمَا مَا كَانِشْ عِنْدْهُمْ وْلاَدْ، عْلَى خَاطِرْ إِلِيصَابَاتْ كَانِتْ مَا تَضْنَاشْ، وْلِثْنِينْ كِبْرُوا فِي العْمُرْ.

⁸وَقْتِلِّي زَكَرِيَّا كَانْ يِخْدِمْ فِي الهَيْكِلْ قُدَّامْ اللهْ كِجَا دَوْرْ الفِرْقَة مْتَاعُو.

⁹وْعَمْلُوا قُرْعَة كِيفْ مَا تْقُولْ العَادَة مْتَاعْ الكُهَّانْ يَاخِي جَا دَوْرُو هُوَ بَاشْ يُدْخُلْ لْهَيْكِلْ الرَّبْ وْيَحْرِقْ البْخُورْ.

¹⁰وِالنَّاسْ الكُلْهُمْ كَانُوا يْصَلِّيوْ البَرَّة فِي وَقْتْ حَرْقَانْ البْخُورْ.

¹¹وِظْهُرْلُو مَلاَكْ مِنْ عِنْدْ الرَّبْ وَاقِفْ عْلَى يْمِينْ مَذْبَحْ البْخُورْ

¹²تِرْعِبْ زَكَرِيَّا كِشَافُو وْخَافْ.

¹³يَاخِي قَالُّو المَلاَكْ: «مَا تْخَافِشْ يَا زَكَرِيَّا. صْلاَتِكْ تْسِمْعِتْ وْمَرْتِكْ إِلِيصَابَاتْ بَاشْ تْجِيبْلِكْ وْلِدْ، وْإِنْتِ بَاشْ تْسَمِّيهْ يُوحَنَّا.

¹⁴وْبِشْ تَفْرَحْ بِيهْ وْتِتْهَنَّى، وْبَرْشَة كِيِتْوْلِدْ تْكُونْ عِنْدْهُمْ فَرْحَة.

¹⁵عْلَى خَاطْرُو بَاشْ يْكُونْ عْظِيمْ قُدَّامْ الرَّبْ وْلاَ يُشْرُبْ لاَ شْرَابْ وْلاَ حَاجَاتْ تْسَكِّرْ، وْبِشْ يِتْمْلَى بِالرُّوحْ القُدُسْ مِلِّي هُوَ مَازَالْ فِي كِرْشْ أُمُّو.

¹⁶وْبِشْ يْرَجَّعْ بَرْشَة مِنْ بَنِى إِسْرَائِيلْ لِلرَّبْ إِلاَهُّمْ.

¹⁷وْبِشْ يِمْشِي قُدَّامْ الرَّبْ بْرُوحْ النَّبِي إِيلِيَّا وِالقُوَّة مْتَاعُو، بَاشْ يْرُدْ قْلُوبْ الوَالْدِينْ لِوْلاَدْهُمْ وِيْرُدْ العَاصِينْ لِلحِكْمَة مْتَاعْ الأَبْرَارْ، بَاشْ يْحَضِّرْ شَعْبْ لِلرَّبْ.»

¹⁸وِسْإِلْ زَكَرِيَّا المَلاَكْ: «كِيفَاشْ انَّجِّمْ نَعْرِفْ الِّي الشَّيْء هَاذَا صْحِيحْ؟ وْآنَا تَوَّا رَاجِلْ كْبِيرْ وْمَرْتِي زَادَا كْبِيرَة فِي العْمُرْ.»

¹⁹جَاوْبُو المَلاَكْ: «آنَا جِبْرِيلْ الوَاقِفْ قُدَّامْ اللهْ وْنِخْدِمْ فِيهْ، وْآنَا تِبْعَثْتْ بَاشْ نْكَلّْمِكْ وِنْبَشّْرِكْ بِالشَّيْء هَاذَا.

²⁰شُوفْ، عْلَى خَاطْرِكْ مَا صَدِّقْتِشْ كْلاَمِي الِّي بَاشْ يْتِمْ فِي وَقْتُو. رَاكْ بَاشْ تَبْقَى بَكُّوشْ وْمَا تْنَجِّمْشْ تِتْكَلِّمْ حَتَّى لِينْ يْجِي اليُومْ الِّي بَاشْ يْصِيرْ فِيهْ الشَّيْء هَاذَا.»

²¹وِالنَّاسْ كَانُوا يِسْتَنَّاوْ فِي زَكَرِيَّا وْهُومَا مِتْعَجّْبِينْ مِنْ بَطْيَانُو فِي وُسْطْ الهَيْكِلْ.

²²آمَا هُوَ كِخْرَجْ مَا نَجِّمْشْ يْكَلِّمْهُمْ، يَاخِي عَرْفُوا الِّي هُوَ شَافْ رُؤْيَا وَقْتِلِّي دْخَلْ لِلهَيْكِلْ وِبْدَا يْشِيرِلْهُمْ بِيدِيهْ وِقْعَدْ بَكُّوشْ.

²³وْكِكِمْلِتْ أَيَّامَاتْ خِدْمْتُو رْجَعْ لْدَارُو.

²⁴وْبَعْدْهَا بْأَيَّامَاتْ حِبْلِتْ مَرْتُو إِلِيصَابَاتْ وِبْقَاتْ مَحْجُوبَة خَمْسَة شْهُورْ وْقَالِتْ:

²⁵«هَاذَا هُوَ الشَّيْء الِّي عَمْلُو مْعَايَ رَبِّي فِي النْهَارَاتْ الِّي رْضَى عْلِيَّ فِيهُمْ بَاشْ يْنَحِّي عْلِيَّ العَارْ مِنْ بِينْ النَّاسْ.»

²⁶وْوَقْتِلِّي هِيَ فِي شْهَرْهَا السَّادِسْ بْعَثْ اللهْ المَلاَكْ جِبْرِيلْ لِمْدِينَة فِي مَنْطِقْةْ الجَلِيلْ اسْمْهَا النَّاصْرَة.

²⁷لِصْبِيَّة مَخْطُوبَة لْرَاجِلْ إِسْمُو يُوسُفْ مِنْ عَرْشْ دَاوُدْ، وِالصْبِيَّة اسْمْهَا مَرْيَمْ.

²⁸دْخَلْ المَلاَكْ وْقَالِلْهَا: «السَّلاَمْ يَلِّي نْعِمْ عْلِيكْ رَبِّي! رَبِّي مْعَاكْ: مُبَارْكَة إِنْتِ مِنْ بِينْ النْسَاء الكُلْ.»

²⁹وِتْحَيّْرِتْ مَرْيَمْ مِنْ كْلاَمْ المَلاَكْ وْسِأْلِتْ رُوحْهَا: «زَعْمَة شْنُوَّة المَقْصُودْ بِيهْ السْلاَمْ هَاذَا؟»

³⁰يَاخِي قَالِلْهَا المَلاَكْ: «مَا تْخَافِشْ يَا مَرْيَمْ رَاهُو اللهْ رَاضِي عْلِيكْ.

³¹وْهَاكْ بَاشْ تِحْبِلْ وِتْجِيبْ وْلَدْ وِتْسَمِّيهْ يَسُوعْ.

³²هُوَ بَاشْ يْكُونْ عْظِيمْ وْبِشْ يِتْسَمَّى إِبْنْ العَالِي يَعْطِيهْ رَبِّي الِّي هُوَ اللهْ عَرْشْ بُوهْ دَاوُدْ.

³³يِمْلِكْ عْلَى ذُرِّيِّةْ يَعْقُوبْ دِيمَا، مَمْلِكْتُو مَا تُوفَاشْ.»

³⁴يَاخِي قَالِتْ مَرْيَمْ لِلمَلاَكْ: «كِيفَاشْ الشَّيْء هَاذَا بَاشْ يَاقَعْ وْآنَا مَازِلْتْ صْبِيَّة؟»

³⁵جَاوِبْهَا المَلاَكْ: «الرُّوحْ القُدُسْ بَاشْ يْجِي عْلِيكْ وْقُدْرِةْ العَالِي بَاشْ تْظَلِلْ عْلِيكْ هَاذَاكَا عْلاَشْ زَادَا القُدُّوسْ الِّي بَاشْ تْجِيبُو بَاشْ يِتْسَمَّى إِبْنْ اللهْ.

³⁶وْهَايْ قْرِيْبْتِكْ إِلِيصَابَاتْ زَادَا حِبْلِتْ وْبِشْ تْجِيبْ وْلَدْ وْهِيَ كْبِيرَة فِي العْمُرْ. وْهَاكَا الِّي يْقُولُوا عْلِيهَا الِّي هِيَ مَا تَضْنَاشْ هِيَ تَوَّا وَلاَّتْ فِي شْهَرْهَا السَّادِسْ.

³⁷وْمَا ثَمَّة حَتَّى شَيْء يُصْعُبْ عْلَى اللهْ.»

³⁸يَاخِي قَالِتْ مَرْيَمْ: «آنَا مَانِي إِلاَّ الخَادْمَة مْتَاعْ الرَّبْ، خَلِّي الِّي قُلْتْ عْلِيهْ يْصِيرْ.» مِنْ بَعْدْ مْشَى المَلاَكْ وْخَلاَّهَا.

³⁹وْفِي الأَيَّامَاتْ هَاذُوكُمْ قَامِتْ مَرْيَمْ فِيسَعْ وِمْشَاتْ لِلجْبَالْ قَاصْدَة مْدِينِةْ يَهُوذَا.

⁴⁰وْدَخْلِتْ لْدَارْ زَكَرِيَّا وْسَلّْمِتْ عْلَى إِلِيصَابَاتْ.

⁴¹وْكِسِمْعِتْ إِلِيصَابَاتْ السْلاَمْ مْتَاعْ مَرْيَمْ تْحَرِّكْ الوْلَدْ فِي كِرْشْهَا، وْتِمْلاَتْ إِلِيصَابَاتْ بِالرُّوحْ القُدُسْ.

⁴²وْصَاحِتْ بْصُوتْ عَالِي وْقَالِتْ: «مُبَارْكَة إِنْتِ بِينْ النْسَاء، وْمُبَارَكْ الصْغِيرْ الِّي فِي كِرْشِكْ.

⁴³شْكُونِي آنَا حَتَّى لِينْ أُمْ رَبِّي تْجِينِي؟

⁴⁴رَاهُو دُوبْ مَا سْلاَمِكْ جَا فِي وِذْنَيَّا، الوْلِدْ تْحَرِّكْ فِي كِرْشِي مِالفَرْحَة.

⁴⁵صَحَّة لِيهَا الِّي امّْنِتْ بِلِّي الشَّيْء الِّي تْقَالِلْهَا مِنْ عِنْدْ الرَّبْ بَاشْ يْتِمْ.»

⁴⁶وْقَالِتْ مَرْيَمْ: «نَفْسِي تْعَظِّمْ رَبِّي.

⁴⁷وْرُوحِي تَفْرَحْ بِالله الِّي خَلِّصْنِي.

⁴⁸عْلَى خَاطْرُو خْزَرْلِي آنَا خَادِمْتُو المِتْوَاضْعَة! وْهَاوْ مِاليُومْ الأَجْيَالْ الكُلْهَا بَاشْ تْسَمِّينِي المُبَارْكَة.

⁴⁹رَاهُو القَادِرْ عْلَى كُلْ شَيْء عْمَلِّي حَاجَاتْ عْظِيمَة وْإِسْمُو القُدُّوسْ.

⁵⁰وْرَحْمْتُو تَبْقَى دِيمَا لِلِّي يْخَافُوهْ جِيلْ بَعْدْ جِيلْ.

⁵¹بْيِدُّو عْمَلْ حَاجَاتْ عْظِيمَة وْشَرِّدْ المِتْكَبّْرِينْ.

⁵²هَبِّطْ الحُكَّامْ مِنْ فُوقْ عَرْشْهُمْ وِرْفَعْ المِتْوَاضْعِينْ.

⁵³شَبِّعْ الجْوَاعَى بِالخِيرَاتْ وْرَجَّعْ الغُنْيَا يْدِيهُمْ فَارْغِينْ.

⁵⁴عَاوِنْ عَبْدُو إِسْرَائِيلْ وِتْذَكِّرْ رَحْمْتُو،

⁵⁵كِيفْ مَا وْعِدْ جْدُودْنَا الأوْلِينْ، إِبْرَاهِيمْ وْذِرِّيتُو عْلَى طُولْ السْنِينْ.»

⁵⁶وْقَعْدِتْ مَرْيَمْ بِحْذَا إِلِيصَابَاتْ تَقْرِيبْ ثْلاَثَة شْهُرْ وْمِنْ بَعْدْ رَجْعِتْ لْدَارْهَا.

⁵⁷وْكِوْصُلْ وَقْتْ إِلِيصَابَاتْ بَاشْ تُولِدْ، جَابِتْ وْلِدْ.

⁵⁸وْسِمْعُوا جِيرَانْهَا وْأَقَارِبْهَا بِالرَّحْمَة العْظِيمَة الِّي رْحَمْهَا بِيهَا رَبِّي، وْفَرْحُوا مْعَاهَا.

⁵⁹وْفِي النْهَارْ الثَّامِنْ جَاوْ بَاشْ يْطَهّْرُوا الوْلَدْ وْحَبُّوا يْسَمِّيوْهْ زَكَرِيَّا عْلَى إِسْمْ بُوهْ.

⁶⁰آمَا أُمُّو جَاوْبِتْ وْقَالِتْ: «لاَ، بَاشْ يِتْسَمَّى يُوحَنَّا.»

⁶¹يَاخِي قَالُولْهَا: «حَتَّى وَاحِدْ مِنْ أَقَارْبِكْ مَا تْسَمَّى بِالإِسْمْ هَاذَا.»

⁶²وْمِنْ بَعْدْ شَارُوا لْبُوهْ بَاشْ يَعْرْفُوا آشْ يْحِبْ يْسَمِّيهْ؟

⁶³وْهُوَ طْلَبْ بَاشْ يَعْطِيوْهْ لُوحَة صْغِيرَة وِكْتِبْ عْلِيهَا: «إِسْمُو يُوحَنَّا.» يَاخِي الكُلْهُمْ تْعَجّْبُوا.

⁶⁴وْبِالوَقْتْ فُمُّو تْحَلْ وِلْسَانُو تْسَرَّحْ، وْمَجِّدْ اللهْ.

⁶⁵لَكِنْ السَّاكْنِينْ بِحْذَاهُمْ الكُلْهُمْ خَافُوا، وِالحَاجَاتْ هَاذِي الكُلْهَا وَلاَّوْ يَحْكِيوْ عْلِيهَا فِي الجْبَالْ مْتَاعْ مَنْطِقْةْ اليَهُودِيَّة الكُلْهَا.

⁶⁶وِلِّي سَمْعُهُوهُمْ الكُلْهُمْ، بْدَاوْا يْفَكّْرُوا وْهُومَا يْقُولُوا: «زَعْمَة شْنُوَّة بَاشْ يْوَلِّي الوْلَدْ هَاذَا عْلَى خَاطِرْ يِدْ الرَّبْ كَانِتْ دِيمَا مْعَاهْ.»

⁶⁷وْتِمْلَى زَكَرِيَّا بُو يُوحَنَّا بِالرُّوحْ القُدُسْ، وِتْنَبَّأ وْقَالْ:

⁶⁸مُبَارَكْ رَبِّي إِلَهْ إِسْرَائِيلْ عْلَى خَاطْرُو تْفَقِّدْ وِفْدَى شَعْبُو

⁶⁹بْعَثِّلْنَا مُخَلِّصْ قْوِى مِنْ دَارْ دَاوُدْ عَبْدُو.

⁷⁰كِيفْ مَا تْكَلِّمْ مِنْ قْدِيمْ الزْمَانْ عْلَى لْسَانْ الأَنْبِيَاءْ المُقَدّْسِينْ مْتَاعُو

⁷¹خَلِّصْنَا مِنْ أَعْدَاءْنَا وْمِنْ يْدِينْ كُلْ مِنْ يَكْرَهْنَا.

⁷²ظَهِّرْ رَحْمْتُو لِجْدُودْنَا الأوْلِينْ وِتْذَكِّرْ العَهْدْ المُقَدَّسْ مْتَاعُو

⁷³اليْمِينْ الِّي حَلْفُو لْبُونَا إِبْرَاهِيمْ بَاشْ يَعْطِيهْ لِينَا

⁷⁴انُّو مِنْ أَعْدَاءْنَا بَاشْ يْنَجِّينَا، بَاشْ نِخْدْمُوهْ مِنْ غِيرْ مَا نْخَافُوا،

⁷⁵بِالقَدَاسَة وِالبِرْ قُدَّامُو عْمُرْنَا الكُلُّو

⁷⁶إِنْتِ زَادَا، يَا وْلِدْ، نَبِي العَالِي بَاشْ تِتْسَمَّى، وْقُدَّامْ الرَّبْ تِمْشِي وِالثْنَايَا مْتَاعُو تْحَضِّرهُمْ

⁷⁷وِتْعَرِّفْ شَعْبُو بِالخَلاَصْ الِّي بِيهْ تْغِفْرِتْ ذْنُوبْهُمْ.

⁷⁸بِالرَّحْمَة وِالحَنَانْ مْتَاعْ إِلاَهْنَا الِّي بِيهُمْ زَارِتْنَا الشَّمْسْ الِّي مِالسْمَاءْ تِضْوِي عْلِينَا.

⁷⁹بَاشْ تِضْوِي عَلِّي قَاعْدِينْ فِي الظْلاَمْ وْفِي الظُّلْ مْتَاعْ المُوتْ وِيْمَشِّينَا فِي طْرِيقْ السَّلاَمْ.

⁸⁰وِالطْفُلْ كَانْ مَاشِي وْيِكْبِرْ وْشَخْصِيتُو قَاعْدَة تَقْوَى، وْكَانْ فِي الخْلاَء حَتَّى لِينْ جَا اليُومْ الِّي ظْهُرْ فِيهْ لْبَنِي إِسْرَائِيلْ.