Read Tunisian Arabic New Testament لُوقَا 10 Bible Online

لُوقَا 10 - Tunisian Arabic New Testament bible

لُوقَا 10

¹وْبَعْدْ هَاذَا زَادْ يَسُوعْ خْتَارْ ثْنِينْ وْسَبْعِينْ رَاجِلْ وِبْعَثْهُمْ كُلْ زُوزْ مْعَ بْعَضْهُمْ بَاشْ يِسْبْقُوهْ لِلمُدُنْ وِالقُرَى الِّي نَاوِي بَاشْ يِمْشِيلْهُمْ الكُلْهُمْ.

²وْقَالِلْهُمْ: «الصَّابَة بَرْشَة آمَا الحَصَّادَا شْوَيَّة، اطْلْبُوا مِنْ مُولَى الحْصَادْ بَاشْ يَبْعِثْ حَصَّادَا لِلصَّابَة مْتَاعُو.

³إِمْشِيوْ وْهَانِي نَبْعِثْكُمْ كِيفْ العْلاَلِشْ بِينْ الذْيُوبَا.

⁴مَا تْهِزُّوشْ مْعَاكُمْ فْلُوسْ، وِلاَّ صُرَّة، وِلاَّ صَنْدَالْ، وْمَا تْسَلّْمُوا عْلَى حَتَّى حَدْ فِي الطْرِيقْ.

⁵وِالدَّارْ الِّي تُدْخْلُوهَا قُولُوا فِي الأُوِّلْ: "السَّلاَمْ عْلَى امَّالِي الدَّارْ."

⁶إِذَا كَانْ ثَمَّة شْكُونْ يْحِبْ السَّلاَمْ سْلاَمْكُمْ رَاهُو عْلِيهْ هُوَ، وْإِذَا كَانْ مَا ثَمَّاشْ رَاهُو سْلاَمْكُمْ بَاشْ يَرْجْعِلْكُمْ.

⁷وْتُقْعْدُوا فِي الدَّارْ هَاذِيكَا، تَاكْلُوا وْتُشْرْبُوا مِلِّي عِنْدْهُمْ، رَاهُو الخَدَّامْ يِسْتْحَقْ أَجْرُو وْمَا تِمْشُوشْ مِنْ دَارْ لْدَارْ.

⁸وِالمْدِينَة الِّي تُدْخْلُوهَا وْأُمَّالِيهَا يِقْبْلُوكُمْ، المَاكْلَة الِّي يْجِيبُوهَالْكُمْ كُولُوهَا.

⁹وِاشْفيوْ المُرْضَى الِّي فِيهَا وُقُولُولْهُمْ: "رَاهِي مَمْلِكْةْ اللهْ قْرِيبَة لِيكُمْ."

¹⁰وِالمْدِينَة الِّي تُدْخْلُوهَا وْأُمَّالِيهَا مَا يِقْبْلُوكُمْشْ، أُخْرْجُوا لِلشْوَارِعْ مْتَاعْهَا وْقُولُوا:

¹¹"حَتَّى غْبَارْ المْدِينَة مْتَاعْكُمْ الِّي لاَصِقْ فِي سَاقِينَا نُنْفْضُوهْ، أَعْرْفُوا الِّي مَمْلِكْةْ اللهْ قْرِيبَة."

¹²نْقُولِلْكُمْ رَاهِي حَالِةْ مْدِينِةْ سَدُومْ فِي يُومْ الحْسَابْ بَاشْ تْكُونْ خِيرْ مِنْ حَالِةْ المْدِينَة هَاذِيكَا!»

¹³«يَا وِيلِكْ يَا كُورَزِينْ! يَا وِيلِكْ يَا بِيتْ ‌صَيْدَا! لُوكَانْ المُعْجْزَاتْ الكْبَارْ الِّي تْعَمْلُوا فِي وُسْطْكُمْ تْعَمْلُوا فِي صُورْ وْصَيْدَا، رَاهُمْ تَابُوا مِنْ قْدِيمْ الزْمَانْ، وْهُومَا لاَبْسِينْ الشْكَايِرْ وْقَعْدُوا عْلَى الرْمَادْ.

¹⁴آمَا صُورْ وْصَيْدَا حَالِتْهُمْ بَاشْ تْكُونْ خِيرْ مِنْ حَالِتْكُمْ إِنْتُومَا فِي يُومْ الحْسَابْ.

¹⁵وْإِنْتِ يَا كَفْرْنَاحُومْ يَاخِي بَاشْ تَطْلِعْ لِلسْمَاء؟ رَاكْ بَاشْ تَهْبِطْ لْقَاعْ الهَاوْيَة.

¹⁶الِّي يَسْمْعِلْكُمْ إِنْتُومَا، يِسْمَعْلِي آنَا، وِلِّي يُرْفُضْكُمْ إِنْتُومَا، يُرْفُضْنِي آنَا، وِلِّي يُرْفُضْنِي يُرْفُضْ الِّي بْعَثْنِي.»

¹⁷وْمِنْ بَعْدْ رَجْعُوا الإِثْنِينْ وْسَبْعِينْ فَرْحَانِينْ وْقَالُوا: «يَا رَبْ حَتَّى مِالشْوَاطِنْ اطِّيعْ فِينَا بْإِسْمِكْ.»

¹⁸يَاخِي قَالِلْهُمْ يَسُوعْ: «شُفْتْ الشِّيطَانْ طَايِحْ مِالسْمَاءْ كِيفْ البَرْقْ.

¹⁹وْآنَا عْطِيتْكُمْ سُلْطَة بَاشْ تَعْفْسُوا عْلَى اللْفَاعِي وِالعْقَارِبْ وِالقُوَّة مْتَاعْ العْدُو الكُلْهَا وْحَتَّى شَيْء مَا يْضُرّْكُمْ.

²⁰آمَا مَا تَفْرْحُوشْ الِّي الأَرْوَاحْ الشِّرِّيرَة اطِّيعْ فِيكُمْ، آمَا أَفْرْحُوا بِلِّي أَسَامِيكُمْ مَكْتُوبَة فِي السْمَاوَاتْ.»

²¹وْفِي الوَقْتْ هَاذَاكَا فْرَحْ يَسُوعْ بِالرُّوحْ القُدُسْ وْقَالْ: «نِحْمْدِكْ يَا الآبْ، رَبْ السْمَاءْ وِالأَرْضْ، عْلَى خَاطْرِكْ خَبِّيتْ الحَاجَاتْ هَاذِي عْلَى الحُكَمَاءْ وِالفَاهْمِينْ وِكْشِفْتْهَا لِلوْلاَدْ الصْغَارْ، إِي نْعَمْ يَا الآبْ الشَّيْء هَاذَا يْرَضِّيكْ.

²²كُلْ شَيْء تِعْطَالِي مِنْ عِنْدْ بَابَا، وْحَتَّى حَدْ مَا يَعْرِفْ شْكُونْ هُوَ الإِبْنْ إِلاَّ الآبْ وِلاَّ شْكُونْ هُوَ الآبْ إِلاَّ الإِبْنْ وِلِّي الإِبْنْ يْحِبْ يْقُلُّو عْلِيهْ.»

²³وْمِنْ بَعْدْ تْلَفِّتْ لِلتْلاَمْذَة وْقَالِلْهُمْ وَحَّدْهُمْ: «صَحَّة لِلعِينِينْ الِّي تْشُوفْ الِّي إِنْتُومَا تْشُوفُوا فِيهْ.

²⁴آنَا نْقُولِلْكُمْ الِّي بَرْشَة مُلُوكْ وْأَنْبِيَاءْ تْمَنَّاوْ بَاشْ يْشُوفُوا الِّي تْشُوفُوا فِيهْ وْمَا شَافُوهِشْ، وْبَاشْ يِسْمْعُوا الِّي إِنْتُومَا تِسْمْعُوا فِيهْ وْمَا سِمْعُوهِشْ.»

²⁵جَا وَاحِدْ مِنْ عُلَمَاءْ الشَّرِيعَة بَاشْ يْجَرَّبْ يَسُوعْ وْقَالْ: «يَا مُعَلِّمْ، شْنُوَّة نَعْمِلْ بَاشْ نُورِثْ الحَيَاةْ الأَبَدِيَّة؟»

²⁶قَالُّو يَسُوعْ: «آشْ مَكْتُوبْ فِي الشَّرِيعَة؟ وْكِيفَاشْ تَقْرَاهْ؟»

²⁷جَاوْبُو: «حِبْ الرَّبْ إِلاَهِكْ بْقَلْبِكْ الكُلُّو وْرُوحِكْ الكُلْهَا وْقُوتِكْ الكُلْهَا وْعَقْلِكْ الكُلُّو وْحِبْ قْرِيبِكْ كِيفْ مَا تْحِبْ رُوحِكْ.»

²⁸قَالُّو يَسُوعْ: «إِنْتِ جَاوِبْتْ بِالصْحِيحْ أَعْمِلْ بِالشَّيْء هَاذَا وْإِنْتِ بَاشْ تَحْيَى.»

²⁹آمَا هُوَ حَبْ يْدَافِعْ عْلَى رُوحُو وِسْإِلْ يَسُوعْ: «شْكُونُو هُوَ جَارِي؟»

³⁰جَاوْبُو يَسُوعْ وْقَالْ: «ثَمَّة رَاجِلْ كَانْ هَابِطْ مِنْ أُورْشَلِيمْ لْأَرِيحَا، يَاخِي طَاحْ بِينْ يْدِينْ جْمَاعَة مْجَرّْمَة، نَحَّاوْلُو حْوَايْجُو وْضَرْبُوهْ، وْمِنْ بَعْدْ مْشَاوْ وْخَلاَّوْهْ بِينْ الحَيَاةْ وِالمُوتْ.

³¹وْبِالصُّدْفَة كَانْ ثَمَّة كَاهِنْ هَابِطْ فِي الطْرِيقْ هَاذَاكَا، وَقْتِلِّي شَافُو خَلاَّهْ وِتْعَدَّى عْلَى الجْنَبْ الآخَرْ.

³²تْعَدَّى وَاحِدْ مِنْ عَرْشْ لاَوِي وْكِوْصُلْ لِلبْلاَصَة هَاذِيكَا، خْزَرْلُو وْخَلاَّهْ وِتْعَدَّى عْلَى الجْنَبْ الآخَرْ.

³³آمَا ثَمَّة وَاحِدْ سَامْرِي مْسَافِرْ جَا لْغَادِي وْكِشَافُو حَنْ عْلِيهْ.

³⁴مْشَالُو وْدَاوَالُو جْرُوحُو بَعْدْ مَا صَبّْلُو عْلِيهُمْ الزِّيتْ وِالشْرَابْ. مِنْ بَعْدْ رَكّْبُو عْلَى بْهِيمُو وْوَصّْلُو لِلوْكَالَة وْتِلْهَى بِيهْ.

³⁵وْمِالغُدْوَة كِجَا خَارِجْ عْطَى لْمُولَى الوْكَالَة شْوَيَّة فْلُوسْ وْقَالُّو: "اتْلْهَى بِيهْ، وِلِّي بَاشْ تُصْرْفُو عْلِيهْ، كِنَرْجَعْ نْرُدْهُمْلِكْ."

³⁶حَسْبْ رَايِكْ شْكُونُو مِنْ الثْلاَثَة هَاذُومَا قْرِيبْ الرَّاجِلْ الِّي طَاحْ بِينْ يْدِينْ المْجَرّْمَة؟»

³⁷جَاوِبْ: «الِّي حَنْ عْلِيهْ!» يَاخِي قَالُّو يَسُوعْ: «إِمَّالاَ إِمْشِي وْأَعْمِلْ نَفْسْ الشَّيْء.»

³⁸وَقْتِلِّي هُومَا فِي الثْنِيَّة دْخَلْ يَسُوعْ لْقَرْيَة، يَاخِي سْتَقْبْلِتُّو مْرَا اسْمْهَا مَرْثَى فِي دَارْهَا.

³⁹وْكَانِتْ عِنْدْهَا أُخْتْهَا اسْمْهَا مَرْيَمْ قَعْدِتْ عِنْدْ سَاقِينْ يَسُوعْ تِسْمَعْ فِي الكْلاَمْ الِّي يْقُولْ فِيهْ.

⁴⁰آمَا مَرْثَى كَانِتْ لاَهْيَة وْتَعْمِلْ فِي بَرْشَة خِدْمَة وْقَالِتْ: «يَا رَبْ، يَاخِي بَاهِي تَوَّا كِأُخْتِي خَلاَّتْنِي نِخْدِمْ وَحْدِي؟ قُولِلْهَا تْعَاوِنِّي!»

⁴¹آمَا يَسُوعْ جَاوِبْهَا وْقَالْ: «مَرْثَى! مَرْثَى! إِنْتِ مَهْمُومَة وْقَالْقَة عْلَى بَرْشَة حَاجَاتْ.

⁴²رَاهُو ثَمَّة وَاحِدْ بَرْكْ إِنْتِ مِحْتَاجَة لِيهْ، وْمَرْيِمْ خْتَارِتْ النْصِيبْ البَاهِي الِّي حَتَّى حَدْ مَا هُوَ بَاشْ يْفُكّْهُولْهَا.»