Read Tunisian Arabic New Testament لُوقَا 11 Bible Online

لُوقَا 11 - Tunisian Arabic New Testament bible

لُوقَا 11

¹وَقْتِلِّي يَسُوعْ كَانْ يْصَلِّي فِي بُقْعَة مِالبْقَايِعْ، وْكِكَمِّلْ قَالُّو وَاحِدْ مِنْ تْلاَمِذْتُو: «يَا رَبْ عَلِّمْنَا كِيفَاشْ نْصَلِّيوْ كِيفْ مَا يُوحَنَّا عَلِّمْ تْلاَمِذْتُو.»

²قَالِلْهُمْ: «وَقْتِلِّي تْصَلِّيوْ قُولُوا: يَا بُونَا[١] خَلِّي إِسْمِكْ يِتْقَدِّسْ خَلِّي مَمْلِكْتِكْ تْجِينَا[٢]

³كُلْ يُومْ أَعْطِينَا الخُبْزْ الِّي يِكْفِينَا

⁴إِغْفْرِلْنَا ذْنُوبْنَا، كِيفْ مَا أَحْنَا نِغْفْرُوا لِلِّي يُظْلْمُوا فِينَا. مَا ادَّخِّلْنَاشْ فِي تَجْرْبَة.[٣]»

⁵مِنْ بَعْدْ قَالِلْهُمْ يَسُوعْ: «شْكُونْ الِّي عَنْدُو صَاحْبُو، ويِمْشِيلُو فِي نُصْفْ اللِّيلْ وِيْقُلُّو: "يَا صَاحْبِي سَلِّفْنِي ثْلاَثَة خُبْزَاتْ

⁶رَاهُو صَاحْبِي جَانِي مِالسْفَرْ وْمَا عِنْدِيشْ مَا نَعْطِيهْ بَاشْ يَاكُلْ."

⁷آمَا صَاحْبُو يْجَاوْبُو مِنْ دَاخِلْ: "مَا تْقَلِّقْنِيشْ! رَانِي سَكِّرْتْ البَابْ. وْآنَا وِوْلاَدِي رْقَدْنَا وْمَا انَّجِّمْشْ نْقُومْ وْنَعْطِيكْ المَاكْلَة."

⁸نْقُولِلْكُمْ إِذَا كَانْ مَا يْقُومِشْ وْيَعْطِيهْ عْلَى خَاطْرُو صَاحْبُو، رَاهُو بَاشْ يْقُومْ وْيَعْطِيهْ الشَّيْء الِّي يِحْتَاجْلُو عْلَى خَاطْرُو شَدْ فِيهْ صْحِيحْ.

⁹رَانِي نْقُلْكُمْ: اطْلْبُوا تَاخْذُوا، اسْعَاوْ تَلْقَاوْ، دُقُّوا يِتْحَلِّلْكُمْ.

¹⁰رَاهُو كُلْ مِنْ يُطْلُبْ يَاخُذْ، وْكُلْ مِنْ يَسْعَى يَلْقَى، وْكُلْ مِنْ يْدُقْ يِتْحَلْلُو.

¹¹شْكُونْ فِيكُمْ الِّي هُوَ بُو وْوِلْدُو يُطْلُبْ مِنُّو خُبْزْ وْهُوَ يَعْطِيهْ حَجْرَة؟ وِلاَّ يُطْلُبْ مِنْ عَنْدُو حُوتَة وْهُوَ يَعْطِيهْ حْنَشْ فِي عُوضْ الحُوتَة؟

¹²وِلاَّ يُطْلْبُو فِي كَعْبَة عْظَمْ يَاخِي يَعْطِيهْ عَقْرِبْ؟

¹³إِذَا كَانْ إِنْتُومَا الأَشْرَارْ تَعْرْفُوا كِيفَاشْ تَعْطِيوْ حَاجَاتْ بَاهْيَة لِوْلاَدْكُمْ إِمَّالاَ قَدَّاشْ الآبْ الِّي فِي السْمَاءْ يَعْطِي الرُّوحْ القُدُسْ لِلِّي يُطْلْبُوهْ مِنُّو.»

¹⁴وْكَانْ يَسُوعْ يْخَرِّجْ فِي شِيطَانْ مِنْ رَاجِلْ، وِالشِّيطَانْ هَاذَاكَا رَدُّو بَكُّوشْ، وْكِخْرَجْ الشِّيطَانْ الرَّاجِلْ تْكَلِّمْ وِالنَّاسْ بْقَاوْ مِتْعَجّْبِينْ.

¹⁵آمَا ثَمَّة شْكُونْ مِنْهُمْ الِّي قَالُوا: «رَاهُو يْخَرِّجْ فِي الشْوَاطِنْ بْبَعْلَزَبُولْ رَئِيسْ الشْوَاطِنْ.»

¹⁶وْنَاسْ أُخْرِينْ حَبُّوا يْجَرّْبُوهْ وْطَلْبُوا مِنُّو مُعْجْزَة مِالسْمَاءْ.

¹⁷آمَا يَسُوعْ كَانْ يَعْرِفْ الشَّيْء الِّي يْفَكّْرُوا فِيهْ وْقَالِلْهُمْ: «كُلْ مَمْلْكَة تِتْقْسِمْ مَا بِينَاتْ بْعَضْهَا تِدَّمِّرْ وْكُلْ دَارْ تِتْقْسِمْ مَا بِينَاتْ بْعَضْهَا اطِّيحْ.

¹⁸إِذَا كَانْ الشِّيطَانْ زَادَا تِقْسِمْ بِينُو وْبِينْ رُوحُو، إِمَّالاَ كِيفَاشْ المَمْلْكَة مْتَاعُو بَاشْ تِثْبِتْ؟ عْلَى خَاطِرْكُمْ قُلْتُوا الِّي آنَا نْخَرِّجْ فِي الشْوَاطِنْ بْبَعْلَزَبُولْ.

¹⁹آمَا إِذَا كَانْ آنَا نْخَرِّجْ فِي الشْوَاطِنْ بْبَعْلَزَبُولْ، إِمَّالاَ التْلاَمْذَة مْتَاعْكُمْ بِشْكُونْ يْخَرّْجُوا فِيهُمْ؟ هَاذَاكَا عْلاَشْ هُومَا الِّي بَاشْ يُحْكْمُوا عْلِيكُمْ.

²⁰آمَا إِذَا كَانْ آنَا نْخَرِّجْ فِي الشْوَاطِنْ بْيِدْ اللهْ، إِمَّالاَ رَاهِي مَمْلِكْةْ اللهْ جَاتْكُمْ.

²¹إِذَا كَانْ رَاجِلْ قْوِي وِمْسَلَّحْ بِالقْدَا يْعِسْ عْلَى القْصَرْ مْتَاعُو رَاهِي الحَاجَاتْ الِّي يِمْلِكْهَا بَاشْ تْكُونْ مَحْفُوظَة.

²²آمَا إِذَا جَا وَاحِدْ أَقْوَى مِنُّو وْغَلْبُو وْفَكّْلُو سْلاَحُو الِّي مْعَمِّلْ عْلِيهْ، رَاهُو يْفَرِّقْلُوا المُلْكْ مْتَاعُو.

²³الِّي مُوشْ مْعَايَا رَاهُو ضِدِّي، وِلِّي مَا يْلِمِّشْ مْعَايَا رَاهُو يْفَرِّقْ.»

²⁴«وْوَقْتِلِّي الرُّوحْ المَنْزُوسْ يُخْرُجْ مِالإِنْسَانْ يِبْدَى يْدُورْ فِي بْقَايِعْ مَا فِيهَاشْ المَاء يْلَوِّجْ عْلَى بْلاَصَة بَاشْ يَرْتَاحْ فِيهَا وْكِمَا يَلْقَاشْ يْقُولْ: بَاشْ نَرْجَعْ لْدَارِي الِّي خْرَجْتْ مِنْهَا.

²⁵وْكِيَرْجَعْ يَلْقَاهَا مَكْنُوسَة وِمْنَظّْمَة.

²⁶يْوَلِّي يِمْشِي وِيْجِيبْ مْعَاهْ سَبْعَة أَرْوَاحْ أُخْرِينْ أَخْيِبْ مِنُّو وْيُدْخْلُوا فِي الإِنْسَانْ هَاذَاكَا وْيُسْكْنُوا فِيهْ وْحَالْتُو تْوَلِّي أَخْيِبْ مِلِّي كَانِتْ عْلِيهْ قْبَلْ.»

²⁷وْوَقْتِلِّي هُوَ يِتْكَلِّمْ ثَمَّة مْرَا نَادَاتْ فِي وُسْطْ النَّاسْ وْقَالِتْلُو: «صَحَّة لِلكِرْشْ الِّي جَابَاتِكْ والصْدَرْ الِّي هَزِّكْ.»

²⁸آمَا يَسُوعْ قَالْ: «إِي نْعَمْ، آمَا رَاهُو صَحَّة لِيهُمْ أَكْثِرْ الِّي يِسْمْعُوا كِلْمِةْ اللهْ وْيَعْمْلُوا بِيهَا.»

²⁹وْوَقْتِلِّي كَانُوا النَّاسْ يْزَاحْمُوا فِيهْ بْدَا يْقُولْ: «الجِيلْ هَاذَا، جِيلْ فَاسِدْ، يُطْلُبْ فِي مُعْجْزَة وْحَتَّى مُعْجْزَة مَاهِي بَاشْ تِتْعْطَالُو كَانْ المُعْجْزَة مْتَاعْ يُونُسْ.

³⁰وْكِيمَا كَانْ يُونُسْ مُعْجْزَة لأُمَّالِي بْلاَدْ نِينَوَى، هَكَّا آنَا إِبْنْ الإِنْسَانْ زَادَا بَاشْ نْكُونْ مُعْجْزَة لِلجِيلْ هَاذَا.

³¹رَاهِي مَلِكِةْ بْلاَدْ سَبَأْ الِّي فِي الجَنُوبْ بَاشْ تَاقِفْ فِي يُومْ الحْسَابْ مْعَ النَّاسْ مْتَاعْ الجِيلْ هَاذَا وْتُحْكُمْ عْلِيهُمْ عْلَى خَاطِرْهَا جَاتْ مِنْ آخِرْ الدِّنْيَا بَاشْ تِسْمَعْ الحِكْمَة مْتَاعْ سُلَيْمَانْ، وْهَاوْ هْنَا شْكُونُو أَعْظِمْ مِنْ سُلَيْمَانْ

³²وْأَهْلْ مْدِينِةْ نِينَوَى بَاشْ يَاقْفُوا فِي يُومْ الحْسَابْ مْعَ الجِيلْ هَاذَا وْيُحْكْمُوا عْلِيهْ عْلَى خَاطِرْهُمْ تَابُوا وَقْتِلِّي نَبِّهْهُمْ يُونُسْ وْهَاوْ هْنَا شْكُونُو أَعْظِمْ مِنْ يُونُسْ.»

³³«مَا ثَمَّاشْ شْكُونْ يْشَعِّلْ فْنَارْ وِيْحُطُّو فِي بُقْعَة مْخُبّْيَة وِلاَّ تَحْتْ طَاسَة آمَا رَاهُو يْحُطُّو فِي بْلاَصَة عَالْيَة بَاشْ النَّاسْ وَقْتِلِّي يُدْخْلُوا يْشُوفُوا الضَّوْ.

³⁴عِينِكْ هِيَ الفْنَارْ مْتَاعْ بَدْنِكْ، وَقْتِلِّي عِينِكْ تْكُونْ صْحِيحَة بَدْنِكْ الكُلُّو يْكُونْ مْنَوِّرْ آمَا وَقْتِلِّي تْكُونْ عِينِيكْ مْرِيضَة بَدْنِكْ الكُلُّو يِتْمْلَى بِالظْلاَمْ.

³⁵رُدْ بَالِكْ لاَ يْكُونْ النُّورْ الِّي فِيكْ ظْلاَمْ.

³⁶إِمَّالاَ إِذَا كَانْ بَدْنِكْ الكُلُّو مْنَوِّرْ وْمَا فِيهِشْ ظْلاَمْ بِالكُلْ، رَاهُو بَاشْ يْكُونْ مْنَوِّرْ الكُلُّو كِيفْ مَا الفْنَارْ يِضْوِي عْلِيكْ بِالضَّوْ مْتَاعُو.»

³⁷وَقْتِلِّي يَسُوعْ كَانْ يِتْكَلِّمْ طْلَبْ مِنُّو وَاحِدْ مِالفَرِّيسِيِّينْ بَاشْ يُفْطُرْ عَنْدُو. دْخَلْ لْدَارُو وِقْعَدْ.

³⁸آمَا الفَرِّيسِي تْعَجِّبْ وَقْتِلِّي شَافْ يَسُوعْ مَا غْسَلْشْ يْدِيهْ قْبَلْ الفْطُورْ.

³⁹يَاخِي الرَّبْ يَسُوعْ قَالْ: «إِنْتُومَا الفَرِّيسِيِّينْ تَغْسْلُوا الكَاسْ وِالطْبَقْ مِالبَرَّة، آمَا إِنْتُومَا مِنْ دَاخِلْ مِلْيَانِينْ بِالسِّرْقَة وِالخُبْثْ.

⁴⁰قَدَّاشْكُمْ مْجَانِينْ يَاخِي الِّي صْنَعْ الِّي مِنْ بَرَّة، مُوشْ صْنَعْ الدَّخْلاَنِى زَادَا

⁴¹آمَا اتْصَدّْقُوا بِالحَاجَاتْ الِّي عِنْدْكُمْ وْكُلْ شَيْء بَاشْ يْوَلِّي طَاهِرْ بَاشْ تِسْتَعْمْلُوهْ.

⁴²آمَا يَا وِيلْكُمْ يَا الفَرِّيسِيِّينْ عْلَى خَاطِرْكُمْ تَدْفْعُوا العْشُرْ مْتَاعْ النِّعْنَاعْ وِالرَّنْدْ وِالحْشَايِشْ الكُلْهَا وْمَا تَعْمْلُوشْ حْسَابْ لِلْحَقْ وِمْحَبِّةْ اللهْ، كَانْ لاَزِمْ عْلِيكُمْ تَعْمْلُوا هَاذُومَا وْمَا تْخَلِّيوْشْ هَاذُوكُمْ.

⁴³يَا وِيلْكُمْ يَا الفَرِّيسِيِّينْ! تْحِبُّوا تُقْعْدُوا فِي البْقَايِعْ الأُولَى فِي المَجَامِعْ، وِالنَّاسْ يْسَلْمُوا عْلِيكُمْ فِي الأَسْوَاقْ.

⁴⁴يَا وِيلْكُمْ، رَاكُمْ كِيفْ القْبُورْ المَرْدُومَة النَّاسْ يِمْشِيوْ فُوقْهَا مِنْ غِيرْ مَا يَعْرْفُوا الِّي هِيَ مُوجُودَة.»

⁴⁵وِتْكَلِّمْ وَاحِدْ مِنْ عُلَمَاءْ الشَّرِيعَة وْقَالُّو: «يَا مُعَلِّمْ رَاكْ قَاعِدْ تْهِينْ فِينَا أَحْنَا زَادَا بِكْلاَمِكْ هَاذَا.»

⁴⁶يَاخِي قَالُّو يَسُوعْ: «يَا وِيلْكُمْ إِنْتُومَا زَادَا يَا عُلَمَاءْ الشَّرِيعَة، تْحُطُّوا عْلَى النَّاسْ فِي حِمْلْ رْزِينْ وْإِنْتُومَا مَا تْمِسُّوشْ الرْزَنْ حَتَّى بِصْبُعْ مِنْ صْوَابِعْكُمْ.

⁴⁷يَا وِيلْكُمْ، رَاكُمْ تِبْنِيوْ فِي قْبُورْ الأَنْبِيَاءْ وِجْدُودْكُمْ هُومَا الِّي قَتْلُوهُمْ.

⁴⁸إِمَّالاَ انْتُمْ شَاهْدِينْ وِمْوَافْقِينْ عْلَى العْمَايِلْ مْتَاعْ جْدُودْكُمْ، هُومَا قَتْلُوا الأَنْبِيَاءْ وِانْتُمْ تِبْنِيوْ فِي قْبُورَاتْهُمْ.

⁴⁹هَاذَاكَا عْلاَشْ حِكْمِةْ اللهْ قَالِتْ: بَاشْ نَبْعْثِلْهُمْ أَنْبِيَاءْ وْرُسُلْ وْبِشْ يُقْتْلُوا مِنْهُمْ وِيْعَذّْبُوهُمْ.

⁵⁰بَاشْ دَمْ الأَنْبِيَاءْ الِّي جْرَى مِنْ وَقْتْ الِّي تْخَلْقِتْ الدِّنْيَا، يِطّْلَبْ بِيهْ الجِيلْ هَاذَا

⁵¹مِنْ دَمْ هَابِيلْ لْدَمْ زَكَرِيَّا الِّي تِقْتَلْ بِينْ المَذْبِحْ وِالقُدُسْ الِّي فِي الهَيْكِلْ! نْقُولِلْكُمْ الِّي الدْمُومَاتْ هَاذِي الكُلْهَا بَاشْ يِطّْلَبْ بِيهَا الجِيلْ هَاذَا.

⁵²يَا وِيلْكُمْ يَا عُلَمَاءْ الشَّرِيعَة! هَزِّيتُوا المِفْتَاحْ مْتَاعْ المَعْرْفَة، لاَ دْخَلْتُوا وْلاَ خَلِّيتُوا شْكُونْ يُدْخُلْ.»

⁵³وَقْتِلِّي يَسُوعْ خَارِجْ مِنْ غَادِي بْدَاوْا الكُتَّابْ مْتَاعْ اليْهُودْ وِالفَرِّيسِيِّينْ يِقَلّْقُوا فِيهْ وِيْحَصّْلُوا فِيهْ بِالكْلاَمْ فِي بَرْشَة حَاجَاتْ.

⁵⁴وِيْعِسُّوا عْلِيهْ ثَمَّاشْ مَا يْقُولْ كْلاَمْ غَالِطْ.