Read Tunisian Arabic New Testament لُوقَا 12 Bible Online

لُوقَا 12 - Tunisian Arabic New Testament bible

لُوقَا 12

¹وْفِي الوَقْتْ هَاذَاكَا، كِتْلَمُّوا عَشَرَاتْ الآلاَفْ مِالعْبَادْ حَتَّى لِينْ وَلاَّوْ يْعَفّْسُوا فِي بْعَضْهُمْ فِي الأُوِّلْ بِالكُلْ بْدَا يَسُوعْ يْقُولْ لِتْلاَمِذْتُو: «رُدُّوا بَالْكُمْ مِنْ الخْمِيرَةْ مْتَاعْ الفَرِّيسِيِّينْ الِّي هِيَ النِّفَاقْ.

²مَا ثَمَّاشْ حَاجَة مَسْتُورَة مَا هِيشْ بَاشْ تِتْكْشِفْ وِلاَّ حَاجَة فِي السِّرْ مَا هِيشْ بَاشْ تِتْعْرَفْ.

³هَاذَاكَا عْلاَشْ الِّي قُلْتُوهْ فِي الظْلاَمْ الكُلُّو بَاشْ يِتْسْمَعْ فِي النُّورْ وِلِّي قُلْتُوهْ بِالشْوَيَّة فِي البْيُوتْ الدَّخْلاَنِيَّة بَاشْ يِتْنَادَى بِيهْ فُوقْ السْطُوحَاتْ.»

⁴«آمَا يَا حْبَابِي رَانِي نْقُولِلْكُمْ: مَا تْخَافُوشْ مِلِّي يُقْتْلُوا البْدَنْ، رَاهُمْ مَا يْنَجّْمُوشْ يَعْمْلُوا أَكْثِرْ مِالشَّيْء هَاذَاكَا.

⁵آمَا نْوَرِّيكُمْ مِنْ شْكُونْ تْخَافُوا: خَافُوا مِلِّي يُقْتُلْ وْهُوَ زَادَا قَادِرْ بَاشْ يَرْمِي فِي جْهَنِّمْ. إِي نْعَمْ، هَاذَا الِّي نْقُلْكُمْ خَافُوا مِنُّو.

⁶يَاخِي مُوشْ خَمْسَة عْصَافِرْ يِتْبَاعُو بْزُوزْ فْرَنْكْ؟ آمَا اللهْ مَا يِنْسَاشْ حَتَّى وَاحِدْ مِنْهُمْ.

⁷رَاهُو حَتَّى شْعَرْ رُوسْكُمْ الكُلُّو مَحْسُوبْ، إِمَّالاَ مَا تْخَافُوشْ، إِنْتُومَا أَغْلَى مِنْ بَرْشَة عْصَافِرْ.»

⁸«آمَا نْقُولِلْكُمْ: الِّي يِعْتَرِفْ بِيَّ قُدَّامْ النَّاسْ، آنَا إِبْنْ الإِنْسَانْ زَادَا بَاشْ نِعْتَرِفْ بِيهْ قُدَّامْ المْلاَيْكَة مْتَاعْ اللهْ.

⁹وِلِّي يُنْكُرْنِي قُدَّامْ النَّاسْ، آنَا إِبْنْ الإِنْسَانْ بَاشْ نُنْكْرُو قُدَّامْ المْلاَيْكَة مْتَاعْ اللهْ.

¹⁰وِلِّي قَالْ كِلْمَة عْلِيَّ آنَا إِبْنْ الإِنْسَانْ يِتْغْفِرْلُو، آمَا الِّي يَكْفِرْ بِالرُّوحْ القُدُسْ، مَا يِتْغْفِرْلُوشْ.

¹¹وْكِيْجِيبُوكُمْ وْتَاقْفُوا قُدَّامْ المَجَامِعْ وِالحُكَّامْ وِالنَّاسْ الِّي عِنْدْهُمْ سُلْطَة، مَا تْخَمَمُوشْ كِيفَاشْ بَاشْ ادَّافْعُوا عْلَى رْوَاحْكُمْ وْآشْ بَاشْ تْقُولُوا.

¹²رَاهُو الرُّوحْ القُدُسْ فِي الوَقْتْ هَاذَاكَا بِيدُو بَاشْ يْوَرِّيكُمْ شْنُوَّة الِّي يِلْزِمْكُمْ تْقُولُوهْ.»

¹³وْقَالْ وَاحِدْ مِالنَّاسْ المُوجُودِينْ لْيَسُوعْ: «يَا مُعَلِّمْ قُولْ لْخُويَا يِقْسِمْ مْعَايَا الوَرْثَة.»

¹⁴آمَا يَسُوعْ قَالُّو: «يَا بَشَرْ شْكُونْ حَطّْنِي قَاضِي وِلاَّ قَسَّامْ رْزَاقْ مَا بِينَاتْكُمْ؟»

¹⁵وْقَالْ لِلنَّاسْ: «رُدُّوا بَالْكُمْ مِالطْمَعْ فِي أَيْ حَاجَة. وَقْتِلِّي الوَاحِدْ يْكُونْ غْنِي رَاهِي حْيَاتُو مَا هِيشْ الحَاجَاتْ الِّي يِمْلِكْهَا.»

¹⁶وِعْطَاهُمْ مَثَلْ وْقَالْ: «ثَمَّة رَاجِلْ غْنِي الأَرْضْ مْتَاعُو جَابِتْلُو صَابَة كْبِيرَة.

¹⁷يَاخِي خَمِّمْ وْقَالْ: "شْنُوَّة بَاشْ نَعْمِلْ تَوَّا وْآنَا مَا عِنْدِيشْ وِينْ نْحُطْ الصَّابَة مْتَاعِي؟"

¹⁸وْقَالْ "هَاوْ آشْ بَاشْ نَعْمِلْ: نْطَيِّحْ المْخَازِنْ القْدِيمَة، وْنِبْنِى مْخَازِنْ أَكْبِرْ مِنْهَا وِنْحُطْ فِيهَا القَمْحْ وِالخِيرَاتْ الِّي عِنْدِي الكُلْهَا.

¹⁹وِنْقُولْ لْرُوحِي: رَاكْ عِنْدِكْ بَرْشَة خِيرَاتْ مْخَزّْنَة وْبِشْ تَبْقَى لْبَرْشَة سْنِينْ، إِرْتَاحْ وْكُولْ وْأُشْرُبْ وْأَفْرَحْ."

²⁰آمَا اللهْ قَالُّو: "يَا جَاهِلْ اللِّيلَة هَاذِي رُوحِكْ بَاشْ تُطْلُعْ وِالشَّيْء الِّي لَمِّيتُو لِشْكُونْ بَاشْ يَبْقَى؟"

²¹وْهَاذَا حَالْ الِّي يْلِمْ فِي الكْنُوزْ لْرُوحُو وْمُوشْ غْنِي فِي عِينِينْ رَبِّي.»

²²مِنْ بَعْدْ قَالْ يَسُوعْ لِتْلاَمِذْتُو: «هَاذَاكَا عْلاَشْ آنَا نْقُولِلْكُمْ: مَا تْخَمَمُوشْ عْلَى حْيَاتْكُمْ شْنُوَّة بَاشْ تَاكْلُوا، وْلاَ عْلَى بْدُونَاتْكُمْ شْنُوَّة بَاشْ تِلْبْسُوا.

²³رَاهِي الحَيَاةْ أَهَمْ مِالمَاكْلَة وِالبْدَنْ أَهَمْ مِاللِّبْسَة.

²⁴أُخْزْرُوا لِلغِرْبَانْ: رَاهِي لاَ تَزْرَعْ وْلاَ تَحْصِدْ وْلاَ عِنْدْهَا مَطْمُورْ وِلاَّ مَخْزِنْ، وِالله يْوَكِّلْهَا، آمَا إِنْتُومَا رَاكُمْ خِيرْ بَرْشَة مِنْ الطّْيُورْ.

²⁵شْكُونْ فِيكُمْ الِّي كِيْخَمِّمْ يْنَجِّمْ يْزِيدْ فِي عُمْرُو سَاعَة وَحْدَة؟

²⁶إِذَا كَانْ إِنْتُومَا مَا كُمْشْ قَادْرِينْ عْلَى الحَاجَاتْ الصْغِيرَة، إِمَّالاَ عْلاَشْ تْخَمَمُوا عْلَى الحَاجَاتْ الأُخْرَى.

²⁷أُخْزْرُوا لِلنُّوَّارْ مْتَاعْ بُوقَرْعُونْ كِيفَاشْ يِكْبِرْ! لاَ يِتْعِبْ وْلاَ يِغْزِلْ، آمَا آنَا نْقُلْكُمْ: حَتَّى المَلِكْ سُلَيْمَانْ فِي كُلْ مَجْدُو مَا لْبِسْشْ كِيفْ وَحْدَة مِنْهَا.

²⁸إِذَا كَانْ اللهْ يْلَبِّسْ الحْشِيشْ لِبْسَة كِيمَا هَاذِي، رَغْمِلِّي الحْشِيشْ اليُومْ يِنْبِتْ وْغُدْوَة بَاشْ يِتْرْمَى فِي النَّارْ مْتَاعْ الطَّابُونَة، إِمَّالاَ قَدَّاشْ إِنْتُومَا أَوْلَى بَاشْ يْلَبِّسْكُمْ يَلِّي إِيمَانْكُمْ ضْعِيفْ؟

²⁹مَا يِلْزِمْكُمْشْ تْخَمَمُوا آشْ بَاشْ تَاكْلُوا وِلاَّ آشْ بَاشْ تُشْرْبُوا، وْمَا تَقْلْقُوشْ.

³⁰الحَاجَاتْ هَاذِي الكُلْهَا يْفَكّْرُوا فِيهَا النَّاسْ الِّي فِي العَالَمْ، وْبُوكُمْ الِّي فِي السْمَاءْ يَعْرِفْ الِّي إِنْتُومَا تِحْتَاجُولْهُمْ.

³¹آمَا فَكّْرُوا فِي مَمْلَكْةْ الله وِالحَاجَاتْ هَاذِي بَاشْ تِتْعْطَالْكُمْ بالزَّأيِدْ.

³²مَا تْخَافُوشْ رَغْمِلِّي إِنْتُومَا شْوَيَّة مِالنَّاسْ! رَاهُو بُوكُمْ الِّي فِي السْمَاءْ يْحِبْ يَعْطِيكُمْ مَمْلِكْتُو.

³³بِيعُوا مَا تِمْلْكُوا وِاتْصَدّْقُوا بِيهْ، وْأَعْمْلُوا صُرَّة مْتَاعْ فْلُوسْ مَا تُوفَاشْ، وْكَنْزْ فِي السْمَاءْ مَا يَفْنَاشْ. الغَادِى لاَ ثَمَّة لاَ سَارِقْ بَاشْ يِسْرْقُو وْلاَ سُوسْ بَاشْ يَاكْلُو.

³⁴وِينْ يْكُونْ كَنْزْكُمْ وِينْ يْكُونْ قَلْبْكُمْ.»

³⁵«كُونُوا مِتْحَزّْمِينْ وِفْنَارَاتْكُمْ شَاعْلَة.

³⁶وْكُونُوا كِيفْ نَاسْ يِسْتَنَّاوْ فِي سِيدْهُمْ بَاشْ يَرْجَعْ مِنْ سَهْرِيَّة مْتَاعْ عِرْسْ وْوَقْتِلِّي يُوصِلْ وِيْدُقْ البَابْ يْحِلُّولُو بِالوَقْتْ:

³⁷صَحَّة لِيهُمْ هَاكَا الخُدَّامْ وَقْتِلِّي يَرْجَعْ سِيدْهُمْ وْيَلْقَاهُمْ سَاهْرِينْ. نْقُلْكُمْ الحَقْ: رَاهُو يِتْحَزِّمْ وْيِخْدِمْهُمْ وِيْخَلِّيهُمْ هُومَا يِرْتَاحُوا.

³⁸صَحَّة لِيهُمْ إِذَا كَانْ رْجَعْ سِيدْهُمْ فِي نُصْفْ اللِّيلْ وِلاَّ فِي الثْلاَثَة مْتَاعْ الصْبَاحْ وِلْقَاهُمْ سَاهْرِينْ.

³⁹آمَا أَعْرْفُوا الشَّيْء هَاذَا، كَانْ جَا مُولَى الدَّارْ يَعْرِفْ وَقْتَاشْ بَاشْ يِدْهْمُوا عْلِيهْ السُّرَّاقْ، تَالِي رَاهُو سْهَرْ وْمَا خَلاَّشْ دَارُو تِتْسْرِقْ.

⁴⁰هَاذَاكَا عْلاَشْ إِنْتُومَا زَادَا حَضّْرُوا رْوَاحْكُمْ عْلَى خَاطِرْنِي آنَا إِبْنْ الإِنْسَانْ بَاشْ نَرْجَعْ فِي سَاعَة مَا تْجِيشْ عْلَى بَالْكُمْ.»

⁴¹وِسْإِلْ بُطْرُسْ يَسُوعْ: «يَا رَبْ المَثَلْ هَاذَا قُلْتُو لِينَا أَحْنَا بَرْكْ وِلاَّ لِلنَّاسْ الكُلْ؟»

⁴²قَالْ الرَّبْ: «شْكُونُو الوْكِيلْ الثِّيقَة الِّي يَعْرِفْ كِيفَاشْ يِتْصَرِّفْ وِلِّي سِيدُو وَكّْلُو عْلَى دَارُو وِعْلَى العَبِيدْ مْتَاعُو بَاشْ يَعْطِيهُمْ المَاكْلَة مْتَاعْهُمْ فِي وَقْتْهَا؟

⁴³صَحَّة لِيهْ هَاكَا الخْدِيمْ كِيَرْجَعْ سِيدُو وْيَلْقَاهْ خْدِمْ خِدْمْتُو.

⁴⁴نْقُلْكُمْ الحَقْ: رَاهُو بَاشْ يْوَكّْلُو عْلَى أَمْلاَكُو الكُلْهَا.

⁴⁵آمَا إِذَا كَانْ الخْدِيمْ هَاذَاكَا قَالْ بِينُو وْبِينْ رُوحُو: "سِيدِي بَاشْ يَرْجَعْ امَّخَّرْ" وِبْدَا يَضْرِبْ فِي العَبِيدْ، النْسَاء وِالرْجَالْ، وْيَاكُلْ وْيُشْرُبْ وْيِسْكِرْ.

⁴⁶رَاهُو سِيدُو بَاشْ يَرْجَعْ فِي نْهَارْ مَا يْجِيشْ عْلَى بَالُو وْفِي سَاعَة مَا يَعْرِفْهَاشْ وْبِشْ يْعَاقْبُو بَرْشَة وِيْحُطُّو مْعَ الغَدَّارِينْ.

⁴⁷وْآمَا الخْدِيمْ هَاذَاكَا الِّي يَعْرِفْ الإِرَادَة مْتَاعْ سِيدُو آمَا مَا يْحَضِّرْشْ رُوحُو وْمَا يَعْمِلْشْ الشَّيْء الِّي سِيدُو يْحِبْ عْلِيهْ رَاهُو بَاشْ يِتْضْرَبْ بَرْشَة.

⁴⁸آمَا الِّي مَا يَعْرِفْشْ وِعْمَلْ الشَّيْء الِّي يِسْتَاهِلْ عْلِيهْ الضَّرْبْ، رَاهُو بَاشْ يِتْضْرَبْ شْوَيَّة، الِّي يَعْطِيوْهْ البَرْشَة رَاهُمْ زَادَا بَاشْ يُطْلْبُوا مِنْ عَنْدُو بَرْشَة، وِلِّي يِمّْنُوهْ عْلَى البَرْشَة زَادَا بَاشْ يُطْلْبُوا مِنُّو أَكْثِرْ مِلِّي إمّْنُوهْ عْلِيهْ.»

⁴⁹«آنَا رَانِي جِيتْ بَاشْ نْشَعِّلْ النَّارْ فِي الأَرْضْ، وْقَدَّاشْ نِتْمَنَّى لُو كَانْ شِعْلِتْ!

⁵⁰آمَا رَاهُو قْبَلْ هَاذَا عِنْدِي مَعْمُودِيَّة يِلْزِمْنِي نِتْعَمِّدْ بِيهَا، وْرَانِي بَاشْ نَبْقَى مْكَبِّشْ حَتَّى لِينْ اتِّمْ.

⁵¹يَاخِي مَاشِي فِي بَالْكُمْ الِّي آنَا جِيتْ بَاشْ نْجِيبْ سَلاَمْ لِلأَرْضْ؟ آنَا نْقُلْكُمْ لاَ، جِيتْ بَاشْ نْفَرِّقْ مَا بِينْ النَّاسْ.

⁵²إِذَا كَانْ دَارْ فِيهَا خَمْسَة، رَاهُمْ بَاشْ يِتْقِسْمُوا: ثْلاَثَة ضِدْ ثْنِينْ، وِثْنِينْ ضِدْ ثْلاَثَة،

⁵³البُو ضِدْ وِلْدُو، وِالوْلَدْ ضِدْ بُوهْ. الأُمْ ادُّورْ عْلَى بِنْتْهَا، وِالطُّفْلَة ادُّورْ عْلَى أُمّْهَا. الحْمَاةْ عْلَى كَنِّتْهَا وِالكَنَّة عْلَى حْمَاتْهَا.»

⁵⁴وْزَادْ قَالْ لِلنَّاسْ: «وَقْتِلِّي تْشُوفُوا السْحَابْ طَالِعْ مِالغَرْبْ بِالوَقْتْ تْقُولُوا: "المْطَرْ جَايَة" وِالشَّيْء هَاذَاكَا يْصِيرْ.

⁵⁵وْكِيْهِبْ الرِّيحْ مْتَاعْ الجَنُوبْ، تْقُولُوا: "اليُومْ بَاشْ يْكُونْ نْهَارْ سْخُونْ" وِالشَّيْء هَاذَاكَا يْصِيرْ.

⁵⁶يَا مُنَافْقِينْ تَعْرْفُوا كِيفَاشْ تْفَرّْقُوا بِينْ حَالِةْ السْمَاءْ وِالأَرْضْ، إِمَّالاَ كِيفَاشْ مَا تَعْرْفُوشْ العَلاَمَاتْ مْتَاعْ الزْمَانْ هَاذَا؟»

⁵⁷«وِعْلاَشْ مَا تُحْكْمُوشْ وَحَّدْكُمْ شْنُوَّة هُوَ الحَقْ؟

⁵⁸كِتَبْدَا مَاشِي مْعَ الِّي شَاكِي بِيكْ لِلمَحْكْمَة، حَاوِلْ فِي الطْرِيقْ بَاشْ تِتْصَالِحْ مْعَاهْ، بَاشْ مَا يْهِزِّكْشْ لِلقَاضِي، وِالقَاضِي يْسَلْمِكْ لِلشُّرْطِي وِالشُّرْطِي يْحُطِّكْ فِي الحَبْسْ.

⁵⁹آنَا نْقُلِّكْ: رَاكْ مَاكِشْ بَاشْ تُخْرُجْ مِنْ غَادِي بِالكُلْ حَتَّى لِينْ تْخَلِّصْ آخِرْ مِلِّيمْ.»