Read Tunisian Arabic New Testament لُوقَا 13 Bible Online

لُوقَا 13 - Tunisian Arabic New Testament bible

لُوقَا 13

¹وْفِي الوَقْتْ هَاذَاكَا بِالضَّبْطْ جَاوْ جْمَاعَة مِالنَّاسْ وِحْكَاوْلُو عْلَى النَّاسْ الِّي مِالجَلِيلْ الِّي قْتَلْهُمْ بِيلاَطُسْ، وِدْمُومَاتْهُمْ تْخَلّْطِتْ مْعَ دَمْ الذْبَايِحْ مْتَاعْهُمْ.

²جَاوِبْهُمْ يَسُوعْ وْقَالْ: «يَاخِي مَاشِي فِي بَالْكُمْ الِّي الجَلِيلِيِّينْ هَاذُوكُمْ كَانُوا مِذْنْبِينْ أَكْثِرْ مِنْ بْقِيِّةْ الجَلِيلِيِّينْ، حَتَّى لِينْ يَجْرَالْهُمْ الشَّيْء هَاذَاكَا؟

³آنَا نْقُلْكُمْ لاَ! آمَا إِذَا كَانْ إِنْتُومَا مَا اتُّوبُوشْ رَاكُمْ الكُلْكُمْ بَاشْ تِتْهِلْكُوا كِيفْهُمْ.

⁴وِلاَّ مَاشِي فِي بَالْكُمْ الِّي الثْمَنْطَاشْ الِّي طَاحْ عْلِيهُمْ البُرْجْ فِي سِلْوَامْ وِقْتَلْهُمْ، كَانُوا يَعْمْلُوا فِي الذْنُوبْ أَكْثِرْ مِنْ السَّاكْنِينْ فِي أُورْشَلِيمْ الكُلْهُمْ؟

⁵آنَا نْقُلْكُمْ لاَ! آمَا إِذَا إِنْتُومَا مَا اتُّوبُوشْ، رَاكُمْ الكُلْكُمْ بَاشْ تِتْهِلْكُوا كِيفْهُمْ.»

⁶وْزَادْ عْطَى المَثَلْ هَاذَا: «كَانْ ثَمَّة وَاحِدْ عَنْدُو كَرْمَة مَغْرُوسَة فِي سَانْيِةْ العْنِبْ مْتَاعُو، مْشَى بَاشْ يْنَحِّي مِنْهَا الكَرْمُوسْ يَاخِي مَا لْقَاشْ فِيهَا بِالكُلْ.

⁷قَالْ لِلخَدَّامْ: "تَوَّا ثْلاَثَة سْنِينْ وْآنَا نْجِي لِلكَرْمَة هَاذِي بَاشْ انَّحِّي الكَرْمُوسْ لَكِنْ مَا نَلْقَى فِيهَا حَتَّى شَيْء، نقُصّْهَا، عْلاَشْ تْخَلّيهَا تْضُرْ فِي الأَرْضْ؟"

⁸آمَا الخَدَّامْ جَاوْبُو وْقَالْ: "يَا سِيدِي خَلِّيهَا العَامْ هَاذَا زَادَا وْتَوْ نِحْفِرْ التْرَابْ الِّي دَايِرْ بِيهَا وِنْحُطُّلْهَا الغْبَارْ

⁹بَالِكْشِي تْجِيبْ الغَلَّة، وْكَانْ مَا جَابِتْشْ قُصّْهَا."»

¹⁰وْكَانْ يَسُوعْ فِي سِبْتْ مِالأَسْبَاتْ يْعَلِّمْ فِي وَاحِدْ مِالمَجَامِعْ.

¹¹وْإِذَا بِيهَا مْرَا مُوجُودَة الغَادِي وْسَاكِنْهَا رُوحْ شَرْ مْخَلِّيهَا مْرِيضَة ثْمَنْطَاشْ سْنَة وِظْهَرْهَا أَعْوِجْ وْمَا تْنَجِّمْشْ تَاقِفْ مِصْوَابَة.

¹²كِشَافْهَا يَسُوعْ عَيّْطِلْهَا وْقَالِلْهَا: «يَا مْرَا إِنْتِ مِشْفِيَّة مِنْ مَرْضِكْ.»

¹³وْحَطْ يْدِيهْ عْلِيهَا وْبِالوَقْتْ رَجْعِتْ مِسْتْوِيَّة وْمَجّْدِتْ اللهْ.

¹⁴آمَا رَئِيسْ المَجْمَعْ تْغَشِشْ عْلَى خَاطِرْ يَسُوعْ شْفَى المْرَا فِي نْهَارْ السِّبْتْ وْقَالْ لِلنَّاسْ: «ثَمَّة سِتَّة أَيَّامْ مَسْمُوحْ فِيهُمْ بَاشْ تِخْدْمُوا، وْفِي النْهَارَاتْ هَاذُومَا إِيجَاوْ بَاشْ تِتْشْفَاوْ، آمَا مُوشْ فِي نْهَارْ السِّبْتْ.»

¹⁵يَاخِي جَاوْبُو الرَّبْ وْقَالْ: «يَا مُنَافْقِينْ: يَاخِي ثَمَّاشْ وَاحِدْ فِيكُمْ مَا يْحِلِّشْ رْبَاطْ الثُّورْ وِلاَّ البْهِيمْ مْتَاعُو فِي نْهَارْ السِّبْتْ وِيْخَرّْجُو مِالكُورِي وِيْهِزُّو بَاشْ يُشْرُبْ؟

¹⁶آمَا المْرَا هَاذِي الِّي هِيَ بِنْتْ إِبْرَاهِيمْ وِالشِّيطَانْ رَابِطْهَا مِنْ ثْمَنْطَاشِنْ سْنَة، مُوشْ كَانْ لاَزِمْ تِتْحَلْ مِنْ الرْبَاطْ هَاذَا فِي نْهَارْ السِّبْتْ؟»

¹⁷وْكِقَالِلْهُمْ الكْلاَمْ هَاذَا، الِّي عَارْضُوهْ الكُلْهُمْ حِشْمُوا عْلَى رْوَاحْهُمْ، وِالنَّاسْ الكُلْ فَرْحُوا بِالأَعْمَالْ العْظِيمَة الِّي كَانْ يَعْمِلْ فِيهَا.

¹⁸وْقَالْ يَسُوعْ: «لِشْنُوَّة تِشْبِهْ مَمْلِكْةْ اللهْ؟ وبشْنُوَّة انَّجِّمْ نْشَبِّهَّا؟

¹⁹هِيَ تِشْبِهْ لْزِرِّيعَة مْتَاعْ خَرْدِلْ، هَزّْهَا رَاجِلْ وِرْمَاهَا فِي سَانِيتُو، يَاخِي نِبْتِتْ وْوَلاَّتْ شَجْرَة كْبِيرَة، وْجَاتْ طْيُورْ السْمَاءْ وْعَشَشِتْ فِيهَا.»

²⁰وْزَادْ قَالْ: «بَاشْ نْشَبِّهْ مَمْلِكْةْ اللهْ؟

²¹هِيَ تِشْبِهْ لِخْمِيرَة خْذِتْهَا مْرَا وْحَطِّتْهَا فِي ثْلاَثَة قْصَاعْ مْتَاعْ دْقِيقْ حَتَّى لِينْ خْمِرْ العْجِينْ الكُلُّو.»

²²وْكَانْ يِتْعَدَّى فِي المُدُنْ وِالقُرَى وَحْدَة بَعْدْ الأُخْرَى يْعَلِّمْ فِيهُمْ وَقْتِلِّي كَانْ مَاشِي لْأُورْشَلِيمْ.

²³وْسِأْلُو وَاحِدْ: «يَا سِيدْنَا يَاخِي شْوَيَّة نَاسْ بَرْكْ بَاشْ يُخْلْصُوا؟»

²⁴قَالِلْهُمْ يَسُوعْ: «حَاوْلُوا أَكْثِرْ مَا يُمْكِنْ بَاشْ تُدْخْلُوا مِالبَابْ الضِّيقْ، رَانِي نْقُولِلْكُمْ: بَرْشَة بَاشْ يْحَاوْلُوا يُدْخْلُوا وْمَا يْنَجّْمُوشْ.

²⁵بَعْدْ مَا يْكُونْ مُولَى الدَّارْ قَامْ وْسَكِّرْ البَابْ، تَبْدَاوْا إِنْتُومَا وَاقْفِينْ البَرَّا، وادُّقُّوا عْلَى بَابُو وِتْقُولُوا: "يَا سِيدْنَا حِلِّلْنَا البَابْ!" يْجَاوِبْكُمْ وِيْقُولْ: "لاَ آنَا مَا نَعْرِفْكُمْشْ مْنِينْ جِيتُوا."

²⁶وَقْتْهَا تَبْدَاوْا تْقُولُوا: "كْلِينَا وِشْرَبْنَا مْعَاكْ وْإِنْتِ عَلِّمْتْ فِي الشْوَارِعْ مْتَاعْنَا."

²⁷وْهُوَ بَاشْ يْقُولِلْكُمْ: "مَا نَعْرِفْكُمْشْ إِنْتُومَا مْنِينْ جِيتُوا. امْشِيوْ مِنْ قُدَّامِي الكُلْكُمْ يَلِّي تَعْمْلُوا فِي الشَّرْ."

²⁸الوَقْتْ هَاذَاكَا بَاشْ يْكُونْ البْكَاءْ وْغَزَّانْ السِّنِّينْ كِتْشُوفُوا إِبْرَاهِيمْ وْإِسْحَاقْ وْيَعْقُوبْ وِالأَنْبِيَاءْ الكُلْهُمْ فِي مَمْلِكْةْ اللهْ وْإِنْتُومَا تِتْرْمَاوْ البَرَّا.

²⁹وْبِشْ يْجِيوْ نَاسْ مِالشَّرقْ وِالغَرْبْ وْمِالشَّمَالْ وِالجَنُوبْ وْيُقْعْدُوا وْيَاكْلُوا فِي مَمْلِكْةْ اللهْ.

³⁰الإِخْرَانِينْ يْوَلِّيوْ الأُولاَنِينْ، وِالأُولاَنِينْ يْوَلِّيوْ الإِخْرَانِينْ.»

³¹وْفِي السَّاعَة هَاذِيكَا بِيدْهَا جَاوْ جْمَاعَة مِالفَرِّيسِيِّينْ وْقَالُوا لْيَسُوعْ: «مَنَّعْ رُوحِكْ وْأُهْرُبْ مِنْ هْنَا. رَاهُو هِيرُودُسْ قَرِّرْ بَاشْ يُقْتْلِكْ.»

³²يَاخِي قَالِلْهُمْ: «إِمْشِيوْ وْقُولُوا لِلثَّعْلِبْ هَاذَاكَا: "هَانِي نْخَرِّجْ فِي الشْوَاطِنْ وْنِشْفِي فِي المُرْضَى اليُومْ وْغُدْوَة وْفِي النْهَارْ الثَّالِثْ نْتَمِّمْ كُلْ شَيْء."

³³آمَا لاَزِمْنِي نْكَمِّلْ نِمْشِي اليُومْ وْغُدْوَة وْبَعْدْ غُدْوَة، رَاهُو مُوشْ مُمْكِنْ نَبِي يْمُوتْ البَرَّا مِنْ أُورْشَلِيمْ!»

³⁴«يَا أُورْشَلِيمْ، يَا أُورْشَلِيمْ، يَلِّي تُقْتُلْ فِي الأَنْبِيَاءْ وْتُرْجُمْ فِي المَبْعُوثِينْ لِيهَا، قَدَّاشْ مِنْ مَرَّة حَبِّيتْ نْلِمْ وْلاَدِكْ مْعَ بْعَضْهُمْ كِيفْ مَا الدْجَاجَة تْلِمْ الفْلاَلِسْ مْتَاعْهَا تَحْتْ جْوَانِحْهَا. آمَا إِنْتُومَا مَا حَبِّيتُوشْ.

³⁵هَايْ دَارْكُمْ بَاشْ تَبْقَالْكُمْ خِرْبَة! وِنْقُولِلْكُمْ: مَا عَادِشْ بَاشْ تْشُوفُونِي حَتَّى لِينْ يْجِي الوَقْتْ الِّي تْقُولُوا فِيهْ "مُبَارَكْ الِّي جَايْ بْإِسْمْ الرَّبْ."»