Read Tunisian Arabic New Testament لُوقَا 14 Bible Online

لُوقَا 14 - Tunisian Arabic New Testament bible

لُوقَا 14

¹وِدْخَلْ فِي نْهَارْ السِّبْتْ لْدَارْ وَاحِدْ مِنْ كْبَارَاتْ الفَرِّيسِيِّينْ بَاشْ يُفْطُرْ عَنْدُو، وْكَانُوا يْعِسُّوا عْلِيهْ.

²وْجَا قُدَّامُو وَاحِدْ مْرِيضْ ابُّومِينَة.

³يَاخِي يَسُوعْ كَلِّمْ عُلَمَاءْ الشَّرِيعَة وِالفَرِّيسِيِّينْ وِسْإِلْهُمْ: «زَعْمَة حْلاَلْ كِالوَاحِدْ يِشْفِي النَّاسْ فِي نْهَارْ السِّبْتْ وِلاَّ لاَ؟»

⁴آمَا هُومَا بْقَاوْ سَاكْتِينْ، يَاخِي هَزُّو وِشْفَاهْ وْخَلاَّهْ مْشَى عْلَى رُوحُو.

⁵مِنْ بَعْدْ عَاوِدْ سْإِلْهُمْ: «شْكُونْ مِنْكُمْ الِّي البْهِيمْ وِلاَّ الثُّورْ مْتَاعُو يْطِيحْ فِي بِيرْ نْهَارْ السِّبْتْ وْمَا يْخَرّْجُوشْ بِالوَقْتْ؟»

⁶وْمَا نَجّْمُوشْ يْجَاوْبُوهْ عْلَى السُّؤاَلْ هَاذَا.

⁷وِعْطَى مَثَلْ لِلنَّاسْ المِسْتَدْعِينْ بَعْدْ مَا شَافْهُمْ كِيفَاشْ خْتَارُوا البْقَايِعْ لُولَى، وْقَالِلْهُمْ:

⁸«وَقْتِلِّي يِسْتَدْعَاكْ وَاحِدْ لْعِرْسْ مَا تُقْعِدْشْ فِي البُقْعَة الأُولَى، مُمْكِنْ يْكُونْ مْحَضِّرْهَا لْوَاحِدْ أَكْثِرْ مِنِّكْ قْدَرْ.

⁹وِيْجِي الِّي سْتَدْعَاكْ وِاسْتَدْعَاهْ وِيْقُلِّكْ: "خَلِّي البُقْعَة لِلرَّاجِلْ هَاذَا" وَقْتْهَا تْقُومْ وْإِنْتِ حَاشِمْ وْتُقْعُدْ فِي البُقْعَة الإِخْرَانِيَّة.

¹⁰آمَا وَقْتِلِّي يِسْتَدْعَاوْكْ إِمْشِي وْأُقْعُدْ فِي البُقْعَة الإِخْرَانِيَّة، بَاشْ كِيْجِي الِّي سْتَدْعَاكْ يْقُلِّكْ: "يَا صَاحْبِي إِيجَا وْأُقْعُدْ القُدَّامْ" وَقْتْهَا قَدْرِكْ يْزِيدْ قُدَّامْ النَّاسْ المُوجُودِينْ مْعَاكْ.

¹¹الِّي يْعَلِّي رُوحُو يَهْبِطْ، وِلِّي يْنَقِّصْ مِنْ رُوحُو يَعْلَى.»

¹²وْقَالْ زَادَا لِلِّي سْتَدْعَاهْ: «وَقْتِلِّي تَعْمِلْ فْطُورْ وِلاَّ عْشَاء مَا تِسْتَدْعَاشْ صْحَابِكْ وِلاَّ إِخْوْتِكْ وِلاَّ أَقَارْبِكْ وِلاَّ جِيرَانِكْ الغُنْيَا، بَاشْ مَا يِسْتَدْعَاوْكْشْ هُومَا زَادَا، وْهَكَّا تْكُونْ خْذِيتْ حَقِّكْ.

¹³آمَا وَقْتِلِّي تَعْمِلْ حَفْلَة سْتَدْعَى الفُقَرَاءْ وِالمُعَاقِينْ وِالعَايْبِينْ وِالعِمْيَانْ.

¹⁴وَقْتْهَا تِتْبَارِكْ عْلَى خَاطِرْ هَاذُمْ مَا عِنْدْهُمْشْ بَاشْ يْضَيّْفُوكْ: وَقْتْهَا تَاخُذْ أَجْرِكْ فِي يُومْ القْيَامَة مْتَاعْ الأَبْرَارْ.»

¹⁵ثَمَّة وَاحِدْ مِالشْيُوخْ وَقْتِلِّي سْمَعْ الكْلاَمْ هَاذَا قَالْ: «صَحَّة لِلِّي بَاشْ يَاكُلْ المَاكْلَة فِي مَمْلِكْةْ اللهْ.»

¹⁶لَكِنْ يَسُوعْ قَالُّو: «ثَمَّة وَاحِدْ عْمَلْ عْشَاء كْبِيرْ بَرْشَة، وِاسْتَدْعَى بَرْشَة نَاسْ.

¹⁷مِنْ بَعْدْ وَقْتِلِّي حْضَرْ العْشَاء بْعَثْ العَبْدْ مْتَاعُو بَاشْ يْقُولْ لِلمِسْتَدْعِينْ: "إِيجَاوْ رَاهُو كُلْ شَيْء حَاضِرْ."

¹⁸يَاخِي بْدَاوْا الكُلْهُمْ يُطْلْبُوا فِي السْمَاحْ، وْقَالْ الأُوِّلْ: "آنَا شْرِيتْ سَانْيَة وْلاَزِمْنِي نِمْشِي نْشُوفْهَا، مِنْ فَضْلِكْ إِعْفِينِي."

¹⁹وِالآخَرْ قَالْ: "آنَا شْرِيتْ عَشْرَة بَقْرَاتْ وْآنَا تَوَّا مَاشِي بَاشْ نْجَرِّبْهُمْ، مِنْ فَضْلِكْ إِعْفِينِي."

²⁰وْوَاحِدْ آخَرْ قَالْ: "آنَا تْزَوِّجْتْ بِمْرَا هَاذَاكَا عْلاَشْ مَا انَّجِّمْشْ نْجِي."

²¹رْجَعْ العَبْدْ وْقَالْ لْسِيدُو عْلَى الشَّيْء الِّي وْقَعْ وَقْتْهَا تْغَشِشْ مُولَى الدَّارْ وْقَالْ لِلعَبْدْ مْتَاعُو: "فِيسَعْ اخْرُجْ لِشْوَارِعْ المْدِينَة وِزْنِقْهَا وْجِيبْ الفُقَرَاءْ وِالمُعَاقِينْ وِالعَايْبِينْ وِالعِمْيَانْ لِهْنَا.

²²رْجَعْ العَبْدْ وْقَالْ: يَا سِيدِي الِّي قُلْتْ عْلِيهْ صَارْ وْمَازَالِتْ ثَمَّة بْقَايِعْ فَارْغَة."

²³يَاخِي قَالُّو مُولَى الدَّارْ: "إِمْشِي لِلثْنَايَا وِلِلأَسْوَارْ وْجِيبْ النَّاسْ وْدَخِّلْهُمْ بِالسِّيفْ حَتَّى لِينْ دَارِي تِتْمْلَى.

²⁴رَانِي نْقُولِلْكُمْ حَتَّى وَاحِدْ مِلِّي سْتَدْعِيتْهُمْ قْبَلْ مَاهُو بَاشْ يْذُوقْ مِالعْشَاء مْتَاعِي."»

²⁵وْكَانُوا بَرْشَة نَاسْ يِمْشِيوْ مْعَاهْ تْلَفّْتِلْهُمْ وْقَالْ:

²⁶«إِذَا كَانْ وَاحِدْ يْجِينِي وْهُوَ مَا يْحِبّْنِيشْ أَكْثِرْ مِنْ بُوهْ وْأُمُّو وْمَرْتُو وِوْلاَدُو وْإِخْوْتُو وِخْوَاتُو وْحَتَّى أَكْثِرْ مِنْ حْيَاتُو، مَا يْنَجِّمْشْ يْكُونْ تِلْمِيذِي.

²⁷وِلِّي مَا يْهِزِّشْ الصَّلِيبْ مْتَاعُو وِيْتَبَّعْنِي مَا يْنَجِّمْشْ يْكُونْ تِلْمِيذِي.

²⁸شْكُونُو فِيكُمْ الِّي يْحِبْ يِبْنِى نَاظُورْ مِنْ غِيرْ مَا يُقْعُدْ وْيَعْمِلْ الحْسَابْ مْتَاعْ المْصَارِيفْ، بَاشْ يَعْرِفْ إِذَا كَانْ عَنْدُو مَا يِكْفِي بَاشْ يْكَمِّلْ البَنْيْ وِلاَّ لاَ.

²⁹بَاشْ مَا يِبْنِيشْ السَّاسْ وِمْبَاعِدْ مَا يِقْدِرْشْ يْكَمِّلْ، وِلِّي يْشُوفُوهْ الكُلْهُمْ يَبْدُوا يَضْحْكُوا عْلِيهْ.

³⁰وِيْقُولُوا: "الرَّاجِلْ هَاذَا بْدَا يِبْنِي وْمَا نَجِّمْشْ يْكَمِّلْ؟"

³¹وِلاَّ شْكُونُو المَلِكْ الِّي مَاشِي يْحَارِبْ فِي مَلِكْ آخَرْ، مِنْ غِيرْ مَا يُقْعُدْ قْبَلْ وِيْثَبِّتْ، بَاشْ يَعْرِفْ إِذَا كَانُو قَادِرْ يْحَارِبْ بعَشْرَة آلاَفْ الجَيْشْ هَاذَاكَا الِّي هَاجِمْ عْلِيهْ بْعِشْرِينْ أَلْفْ عَسْكْرِي؟

³²مَا كَانِشْ مَا دَامُو العْدُو مَازَالْ بْعِيدْ يَبْعِثْلُو مَرْسُولْ وْإِذَا كَانْ مُمْكِنْ يُطْلُبْ بَاشْ يِتْصَالْحُوا.

³³وْزَادَا، إِذَا كَانْ كُلْ وَاحِدْ فِيكُمْ مَا يْخَلِّيشْ كُلْ مَا يِمْلِكْ، رَاهُو مَا يْنَجِّمْشْ يْكُونْ التِّلْمِيذْ مْتَاعِي.»

³⁴«المِلْحْ بَاهِي، آمَا إِذَا كَانْ المِلْحْ مَا عَادِشْ عَنْدُو مَطْعِمْ، كِيفَاشْ بَاشْ تْرَجّْعُولُو مَطْعْمُو؟

³⁵لاَ عَادْ يُصْلُحْ لاَ لِلتُّرْبَة وْلاَ لِلغْبَارْ، وْيِتْرْمَى البَرَّا، الِّي عَنْدُو وِذْنِينْ خَلِّيهْ يِسْمَعْ!»