Read Tunisian Arabic New Testament لُوقَا 15 Bible Online

لُوقَا 15 - Tunisian Arabic New Testament bible

لُوقَا 15

¹وْكَانُوا المَكَّاسَة الكُلْهُمْ وِالمِذْنْبِينْ يْجِيوْ لْيَسُوعْ بَاشْ يِسْمْعُوهْ.

²يَاخِي الفَرِّيسِيِّينْ وِالكُتَّابْ مْتَاعْ اليْهُودْ بْدَاوْا يِتْشَكُّوا وْقَالُوا: «الرَّاجِلْ هَاذَا يَفْرَحْ بِالمِذْنْبِينْ وْيَاكُلْ مْعَاهُمْ.»

³يَاخِي عْطَاهُمْ يَسُوعْ المَثَلْ هَاذَا وْقَالْ:

⁴«شْكُونْ مِنْكُمْ الِّي عَنْدُو مْيَاةْ عَلُّوشْ وْضَيَّعْ وَاحِدْ مِنْهُمْ مُوشْ بَاشْ يْخَلِّي التِّسْعَة وْتِسْعِينْ فِي الخْلاَء وْيِمْشِي يْلَوِّجْ عْلَى العَلُّوشْ الضَّايِعْ حَتَّى لِينْ يَلْقَاهْ؟

⁵وْبَعْدْ مَا يَلْقَاهْ يْهِزُّو عْلَى كْتَافُو وْهُوَ فَرْحَانْ.

⁶مِنْ بَعْدْ يَرْجَعْ لْدَارُو وْيِسْتَدْعَى الجِيرَانْ وِصْحَابُو وِيْقُولِلْهُمْ "أَفْرْحُوا مْعَايَا رَانِي لْقِيتْ عَلُّوشِي الِّي ضَاعْلِي!"

⁷نْقُولِلْكُمْ: هَكَّا تْكُونْ ثَمَّة فَرْحَة كْبِيرَة فِي السْمَاءْ وَقْتِلِّي مِذْنِبْ وَاحِدْ يْتُوبْ أَكْثِرْ مِنْ تِسْعَة وْتِسْعِينْ أَبْرَارْ مَا هُمْشْ فِي حَاجَة بَاشْ يْتُوبُوا.»

⁸«وِلاَّ شْكُونِي هِيَ المْرَا الِّي عِنْدْهَا عَشْرَة دِينَارَاتْ فِضَّة وْضَيّْعِتْ دِينَارْ مِنْهُمْ، مُوشْ بَاشْ تْشَعِّلْ الفْنَارْ وْتُكْنُسْ الدَّارْ بِلْقْدَا حَتَّى لِينْ تَلْقَاهْ؟

⁹وْبَعْدْ مَا تَلْقَاهْ، تِسْتَدْعَى جَارَاتْهَا وِصْحَابْهَا وِتْقُولِلْهُمْ: "أَفْرْحُوا مْعَايَا رَانِي لْقِيتْ الدِّينَارْ مْتَاعِي."

¹⁰نْقُولِلْكُمْ كِيفْ مَا هَكَّا يَفْرْحُوا المْلاَيْكَة مْتَاعْ اللهْ بْمِذْنِبْ وَاحِدْ وَقْتِلِّي يْتُوبْ.»

¹¹وْقَالْ يَسُوعْ: «كَانْ ثَمَّة وَاحِدْ عَنْدُو زُوزْ وْلاَدْ:

¹²قَالْ الصْغِيرْ فِيهُمْ لْبُوهْ: "يَا بَابَا أَعْطِينِي البَايْ مْتَاعِي مِالوَرْثَة." يَاخِي قْسِمِّلْهُمْ بُوهُمْ كُلْ مَا يِمْلِكْ.

¹³وْبَعْدْ أَيَّامَاتْ لَمْ الوْلِدْ الصْغِيرْ كُلْ مَا عَنْدُو وِمْشَى لِبْلاَدْ بْعِيدَة، وِالغَادِي صْرَفْ فْلُوسُو الكُلْ فِي الفْسَادْ.

¹⁴وْكِصْرَفْ الِّي عَنْدُو الكُلْ، جَاتْ مَجَاعَة كْبِيرَة عْلَى البْلاَدْ هَاذِيكَا وِصْبَحْ مِحْتَاجْ.

¹⁵وِمْشَى لْوَاحِدْ مِنْ امَّالِي البْلاَدْ، يَاخِي بَعْثُو يَسْرَحْلُو بِالحْلاَلِفْ مْتَاعُو.

¹⁶وْكَانْ دِيمَا يِشْتْهَى بَاشْ يِمْلَى كِرْشُو بِالخَرُّوبْ الِّي يَاكْلُوا فِيهْ الحْلاَلِفْ، آمَا حَتَّى وَاحِدْ مَا عْطَاهْ.

¹⁷وَلّى رْجَعْ عْلَى رُوحُو وْقَالْ: "قَدَّاشْ مِنْ خَدَّامْ عِنْدْ بَابَا، عَنْدُو الخُبْزْ بِالفَاضِلْ وْآنَا هْنَا قْرِيبْ نْمُوتْ بِالجُّوعْ.

¹⁸نْقُومْ وْنَرْجَعْ لْبَابَا وِنْقُلُّو: يَا بَابَا آنَا غْلُطْتْ فِي حَقْ رَبِّي وْفِي حَقِّكْ.

¹⁹وْمَا نِسْتْحَقِّشْ نِتْسَمَّى وِلْدِكْ، رُدّْنِي كِيمَا وَاحِدْ مِالخَدَّامَا مْتَاعِكْ."

²⁰قَامْ وِرْجَعْ لْبُوهْ، آمَا بُوهْ وَقْتِلِّي شَافُو مِنْ بْعِيدْ حَنْ عْلِيهْ وِجْرَالُو وْعَنّْقُو وْبَاسُو.

²¹وْقَالْ الوْلِدْ: "يَا بَابَا، آنَا غْلُطْتْ فِي حَقْ رَبِّي وْفِي حَقِّكْ وْمَا نِسْتْحَقِّشْ نِتْسَمَّى وِلْدِكْ."

²²آمَا البُو قَالْ لِلعَبِيدْ مْتَاعُو: "فِيسَعْ جِيبُوا أَحْسِنْ جِبَّة وْلَبّْسُوهَالُو، وْحُطُّولُو خَاتِمْ فِي صُبْعُو وْلَبّْسُوهْ صَبَّاطْ.

²³وْجِيبُوا العْجِلْ السْمِينْ وَاذْبْحُوهْ وْخَلِّينَا نَاكْلُوا وْنَفْرْحُوا.

²⁴رَاهُو وِلْدِي هَاذَا كَانْ مِيتْ وِحْيَى وْكَانْ ضَايِعْ وْتُوجِدْ." وِبْدَاوْا الحَفْلَة.

²⁵وْوِلْدُو الكْبِيرْ كَانْ فِي السَّانْيَة، كِجَا وِقْرُبْ مِالدَّارْ سْمَعْ صُوتْ الغْنَاء وِالشْطِيحْ.

²⁶عَيِّطْ عْلَى وَاحِدْ مِالخَدَّامَا وْسِأْلُو عَلِّي قَاعِدْ يْصِيرْ.

²⁷جَاوْبُو الخَدَّامْ: "خُوكْ رْجَعْ، وْبُوكْ ذْبَحْلُو العْجِلْ السْمِينْ عْلَى خَاطْرُو رْجَعْ لاَبَاسْ."

²⁸آمَا الوْلِدْ الكْبِيرْ تْغَشِشْ وْمَا حَبِّشْ يُدْخُلْ، خْرَجْلُو بُوهْ يِتْشَحِّتْ فِيهْ.

²⁹جَاوْبُو: "آنَا نِخْدِمْ فِيكْ السْنِينْ هَاذِي الكُلْهَا وْعُمْرِي مَا طَيِّحْتْلِكْ كِلْمْتِكْ آمَا إِنْتِ مَا عْطِيتْنِيشْ حَتَّى بِرْشْنِي بَاشْ نَفْرَحْ بِيهْ مْعَ صْحَابِي.

³⁰وْكِرْجَعْ وِلْدِكْ هَاذَا الِّي كْلاَلِكْ رِزْقِكْ مْعَ النْسَاء الفَاسْدِينْ ذْبَحْتْلُو العْجِلْ السْمِينْ."

³¹قَالُّو بُوهْ: "يَا وِلْدِي إِنْتِ دِيمَا مْعَايَا وِلِّي نِمْلْكُو رَاهُو الكُلُّو لِيكْ.

³²آمَا رَاهُو كَانْ لاَزِمْنَا بَاشْ نَفْرْحُوا وْنِتْهَنُّوا عْلَى خَاطِرْ خُوكْ هَاذَا كَانْ مِيتْ وِحْيَى وْكَانْ ضَايِعْ وْتُوجِدْ."»