Read Tunisian Arabic New Testament لُوقَا 16 Bible Online

لُوقَا 16 - Tunisian Arabic New Testament bible

لُوقَا 16

¹وْقَالْ زَادَا لِتْلاَمِذْتُو: «كَانْ ثَمَّة وَاحِدْ غْنِي عَنْدُو وْكِيلْ، سْمَعْ عْلِيهْ كْلاَمْ الِّي هُوَ يْفَسِّدْلُو فِي رِزْقُو.

²نَادَاهْ وْسِأْلُو: "شْنُوَّة الِّي قَاعِدْ نِسْمَعْ فِيهْ عْلِيكْ، صَفِّي حْسَابْ الوْكَالَة مْتَاعِكْ، رَاكْ مَا عَادِشْ بَاشْ تْكُونْ وْكِيلْ عِنْدِي."

³يَاخِي قَالْ الوْكِيلْ بِينُو وْبِينْ رُوحُو: "شْنُوَّة بَاشْ نَعْمِلْ، سِيدِي بَاشْ يْنَحِّيلِي الوْكَالَة، وْآنَا مَا انَّجِّمْشْ نِخْدِمْ الأَرْضْ وْنَحْشِمْ بَاشْ نُطْلُبْ.

⁴آنَا نَعْرِفْ آشْ بَاشْ نَعْمِلْ، بَاشْ وَقْتِلِّي نِتْنَحَّى مِالوْكَالَة، النَّاسْ يِسْتَقْبْلُونِي فِي دْيَارْهُمْ."

⁵يَاخِي نَادَى النَّاسْ المُسَالِينْ لْسِيدُو الكُلْهُمْ كُلْ وَاحِدْ وَحْدُو، وِسْإِلْ الأُوِّلْ: "قَدَّاشْ مُوسَالْ لْسِيدِي؟"

⁶جَاوِبْ المُوسَالْ: "مْيَاةْ بِرْمِيلْ زِيتْ" يَاخِي قَالُّو: "خُوذْ التَّوْصِيلْ مْتَاعِكْ وْأُقْعُدْ وْإِكْتِبْ خَمْسِينْ بَرْكْ."

⁷مِنْ بَعْدْ قَالْ لْوَاحِدْ آخَرْ: "وْإِنْتِ قَدَّاشْ مُوسَالْ؟" جَاوِبْ: "مْيَاةْ قَلْبَة قَمْحْ" يَاخِي قَالُّو: "خُوذْ التَّوْصِيلْ مْتَاعِكْ وْإِكْتِبْ ثْمَانِينْ بَرْكْ."

⁸وِالرَّاجِلْ الغْنِي شْكَرْ الوْكِيلْ الخَايِنْ عْلَى الذْكَاءْ مْتَاعُو كِعْمَلْ الشَّيْء هَاذَاكَا، رَاهُمْ وْلاَدْ الدِّنْيَا هَاذِي وَقْتِلِّي يِتْصَرّْفُوا مْعَ وْلاَدْ جِيلْهُمْ أَذْكَى مِنْ وْلاَدْ النُّورْ.

⁹وِنْقُولِلْكُمْ: أَعْمْلُوا صْحَابْ بِالفْلُوسْ مْتَاعْ الظُّلْمْ، بَاشْ وَقْتِلِّي تُوفَى فْلُوسْكُمْ يِقْبْلُوكُمْ فِي الدْيَارْ الدَّايْمَة.

¹⁰الِّي هُوَ ثِيقَة فِي الشْوَيَّة، رَاهُو زَادَا ثِقَة فِي البَرْشَة، وِالخَايِنْ فِي الشْوَيَّة رَاهُو زَادَا خَايِنْ فِي البَرْشَة.

¹¹إِذَا مَا تْكُونُوشْ ثِيقَة فِي فْلُوسْ الحْرَامْ إِمَّالاَ شْكُونْ بَاشْ يِمِّنْكُمْ عْلَى فْلُوسْ الحْلاَلْ.

¹²وْإِذَا مَا تْكُونُوشْ ثِيقَة فِي الحَاجَاتْ مْتَاعْ غِيرْكُمْ، إِمَّالاَ شْكُونْ بَاشْ يَعْطِيكُمْ الحَاجَاتْ مْتَاعْكُمْ.

¹³حَتَّى خْدِيمْ مَا يْنَجِّمْ يِخْدِمْ زُوزْ أَسْيَادْ، رَاهُو يَا إِمَّا بَاشْ يَكْرَهْ وَاحِدْ مِنْهُمْ وِيْحِبْ الآخَرْ، وِلاَّ بَاشْ يْتَبَّعْ وَاحِدْ مِنْهُمْ وْيَحْقِرْ الآخَرْ. مَا تْنَجّْمُوشْ تِخْدْمُوا اللهْ وِالفْلُوسْ.»

¹⁴وِالفَرِّيسِيِّينْ كَانُوا يْحِبُّوا الفْلُوسْ، كِسَمْعُوا الكْلاَمْ هَاذَا تْمَسْخْرُوا عْلِيهْ.

¹⁵يَاخِي قَالِلْهُمْ: «إِنْتُومَا تْوَرُّوا فِي رْوَاحْكُمْ لِلنَّاسْ الِّي إِنْتُومَا صَالْحِينْ، آمَا اللهْ يَعْرِفْ قْلُوبْكُمْ، الشَّيْء الِّي النَّاسْ يْشُوفُوهْ حَاجَة كْبِيرَة رَاهُو اللهْ يْرَاهْ نْجَاسَة.

¹⁶الشَّيْء الِّي تِكْتِبْ فِي الشَّرِيعَة وِكْتُبْ الأَنْبِيَاءْ بْقَى حَتَّى لِينْ جَا يُوحَنَّا المَعْمَدَانْ، وْمِنْ الوَقْتْ هَاذَاكَا وْمَمْلِكْةْ اللهْ قَاعْدِينْ يْبَشّْرُوا بِيهَا، وِالنَّاسْ الكُلْ يْحَاوْلُوا يُدْخْلُولْهَا بِالقُوَّة.

¹⁷آمَا رَاهُو فَنْيَانْ السْمَاءْ وِالأَرْضْ أسْهِلْ مِنْ إِنُّو حَرْفْ وَاحِدْ مِالشَّرِيعَة يْطِيحْ.»

¹⁸«الِّي يْطَلِّقْ مَرْتُو، وِيْعَرِّسْ بِمْرَا أُخْرَى رَاهُو زْنَى، الِّي يْعَرِّسْ بِمْرَا مْطَلّْقَة مِنْ رَاجِلْهَا رَاهُو زَادَا يِسَّمَّى زْنَى.»

¹⁹«كَانْ ثَمَّة رَاجِلْ غْنِى وْكَانْ دِيمَا يِلْبِسْ فِي لِبْسَة حَمْرَاء وْلِبْسَة غَالْيَة وْكَانْ دِيمَا يَعْمِلْ فِي الحَفْلاَتْ.

²⁰وْكَانْ ثَمَّة وَاحِدْ آخَرْ مِسْكِينْ إِسْمُو لَعَازَرْ مَرْمِي بِحْذَا البَابْ مْتَاعُو وْكَانْ عَنْدُو الدِّمَّالْ فِي بَدْنُو.

²¹يِشْتْهَى بَاشْ يِشْبَعْ مِالفِتْفَاتْ الِّي يْطِيحْ مِالمِيدَة مْتَاعْ الغْنِي، حَتَّى مِالكْلاَبْ كَانِتْ دِيمَا تْجِي وْتَلْحِسْلُو فِي الدِّمَّالْ.

²²وْمَاتْ الرَّاجِلْ المِسْكِينْ وْهَزِّتُّو المْلاَيْكَة بِحْذَا إِبْرَاهِيمْ، وْمِنْ بَعْدْ مَاتْ الغْنِي زَادَا وْتِدْفِنْ.

²³وْوَقْتِلِّي كَانْ يِتْعَذِّبْ فِي الهَاوْيَة هَزْ عِينِيهْ، يَاخِي شَافْ إِبْرَاهِيمْ مِنْ بْعِيدْ وْلَعَازَرْ قَاعِدْ فِي حَمْلْتُو.

²⁴يَاخِي صَاحْ وْقَالْ: "يَا بَابَا إِبْرَاهِيمْ ارْحِمْنِي وْأَبْعِثْ لَعَازَرْ بَاشْ يْغَطِّسْ صُبْعُو فِي المَاء وِيْبَرِّدْلِي لْسَانِي، رَانِي قَاعِدْ نِتْعَذِّبْ فِي النَّارْ هَاذِي."

²⁵آمَا إِبْرَاهِيمْ قَالْ: "يَا وِلْدِي اتْذَكِّرْ الِّي إِنْتِ خْذِيتْ الخِيرَاتْ الِّي حَبِّيتْ عْلِيهَا الكُلْ وَقْتِلِّي كُنْتْ عَايِشْ وْلَعَازَرْ خْذَا المْصَايِبْ، آمَا تَوَّا هُوَ قَاعِدْ يِتْعَزَّى هْنَا، وْإِنْتِ تِتْعَذِّبْ.

²⁶وْزِيدْ عْلَى هَاذَا، بِينَاتْنَا هَاوْيَة كْبِيرَة تْعَمْلِتْ بَاشْ الِّي يْحِبُّوا يِتْعَدَّاوْ مِنْ هْنَا الغَادِي مَا يْنَجّْمُوشْ وِلِّي يْحِبُّوا يِتْعَدَّاوْ مِالغَادِي لِهْنَا مَا يْنَجّْمُوشْ زَادَا."

²⁷يَاخِي قَالْ: "إِمَّالاَ نُطْلُبْ مِنِّكْ يَا بَابَا إِبْرَاهِيمْ بَاشْ تَبْعِثْ لَعَازَرْ لْدَارْ بَابَا.

²⁸رَاهُو عِنْدِي خَمْسَة إِخْوَة، خَلِّيهْ يِشْهْدِلْهُمْ وِيْنَبِّهُّمْ بَاشْ مَا يْجُوشْ هُومَا زَادَا لْبُقْعِةْ العْذَابْ هَاذِي."

²⁹آمَا إِبْرَاهِيمْ قَالُّو: "عِنْدْهُمْ مُوسَى وِالأَنْبِيَاءْ! تَوْ يِسْمْعُوا كْلاَمْهُمْ."

³⁰يَاخِي قَالُّو: "لاَ يَا بَابَا إِبْرَاهِيمْ رَاهُو إِذَا كَانْ يِمْشِيلْهُمْ وَاحِدْ مِنْ المُوتَى تَوْ يْتُوبُوا."

³¹يَاخِي قَالُّو إِبْرَاهِيمْ: "إِذَا كَانْ مَا سَمْعُوشْ كْلاَمْ مُوسَى وِالأَنْبِيَاءْ، مَا هُمْشْ بَاشْ يِقْتَنْعُوا حَتَّى لُوكَانْ يْقُومْ وَاحِدْ مِنْ بِينْ المُوتَى!"»