Read Tunisian Arabic New Testament لُوقَا 17 Bible Online

لُوقَا 17 - Tunisian Arabic New Testament bible

لُوقَا 17

¹وْقَالْ لِتْلاَمِذْتُو: «العَثْرَاتْ لاَزِمْ بَاشْ تْجِي، آمَا يَا وِيلُو الِّي تْجِي عْلَى يِدُّو.

²لُوكَانْ حَجْرَة مْتَاعْ رْحَى تِتْعَلِّقْ فِي رَقْبْتُو وْيِتْرْمَى فِي البْحَرْ خِيرْلُو مِنْ إِنُّو يْكُونْ سْبَبْ عَثْرَة لْوَاحِدْ مِالصْغَارْ هَاذُمْ.

³رُدُّوا بَالْكُمْ. وَقْتِلِّي خُوكْ يُغْلُطْ فِي حَقِّكْ وَبّْخُو، وْإِذَا كَانْ تَابْ سَامْحُو.

⁴وْإِذَا كَانْ غْلُطْ فِي حَقِّكْ سَبْعَة مَرَّاتْ فِي النْهَارْ وِرْجَعْلِكْ سَبْعَة مَرَّاتْ وْقَالْ "آنَا تُبْتْ" مَاعْلِيكْ كَانْ تْسَامْحُو.»

⁵وْقَالُوا الرُّسُلْ لِلرَّبْ: «زِيدْنَا فِي الإِيمَانْ مْتَاعْنَا.»

⁶آمَا الرَّبْ قَالِلْهُمْ: «لُو كَانْ جَا عِنْدْكُمْ إِيمَانْ قَدْ زِرِّيعِةْ الخَرْدِلْ، رَاكُمْ قُلْتُوا لْشَجْرِةْ التُّوتْ هَاذِي: "اتْقَلِّعْ وِاتْغْرِسْ فِي البْحَرْ" وْرَاهِي طَاعِتْكُمْ.»

⁷«آمَا شْكُونْ فِيكُمْ الِّي عَنْدُو خَدَّامْ يَحْرِثْ وِلاَّ يَسْرِحْ وِيْقُلُّو وَقْتِلِّي يَرْجَعْ مِالسَّانْيَة: "إِيجَا تَوَّا كُولْ؟"

⁸يَاخِي مُوشْ يْقُلُّو: "حَضِّرْلِي العْشَاء، وِاتْحَزِّمْ وِاخْدِمْنِي حَتَّى لِينْ آنَا نَاكُلْ وْنُشْرُبْ وْمِنْ بَعْدْ إِنْتِ تَاكُلْ وْتُشْرُبْ."

⁹يَاخِي العَبْدْ يُشْكْرُوهْ عْلَى خَاطْرُو عْمَلْ الشَّيْء الِّي أَمْرُوهْ بِيهْ؟

¹⁰إِنْتُومَا زَادَا وَقْتِلِّي تَعْمْلُوا الشَّيْء الِّي يُأْمْرُوكُمْ بِيهْ قُولُوا: "أَحْنَا عَبِيدْ وْمَا مَا نِسْتَاهْلُوشْ وِعْمَلْنَا الشَّيْء الِّي وَاجِبْ عْلِينَا."»

¹¹وَقْتِلِّي يَسُوعْ كَانْ طَالِعْ لْأُورْشَلِيمْ تْعَدَّى بِينْ مَنْطِقْةْ السَّامْرَة وِالجَلِيلْ.

¹²وْكِدْخَلْ لْقَرْيَة مِالقُرَى، عَرْضُوهْ عَشْرَة رْجَالْ مُرْضَى بِالبْرَصْ، وْوُقْفُوا بْعِيدْ عْلِيهْ.

¹³وْنَادَاوْ بْصُوتْ عَالِي وْقَالُوا: «يَا يَسُوعْ، يَا سِيدْنَا، أَرْحِمْنَا.»

¹⁴شَافْهُمْ يَسُوعْ وْقَالِلْهُمْ: «إِمْشِيوْ وْوَرُّوا رْوَاحْكُمْ لِلكُهَّانْ.» وْكِهُومَا مَاشِينْ بْرَاوْ مِنْ مْرَضْهُمْ.

¹⁵وْثَمَّة وَاحِدْ مِنْهُمْ كِشَافْ رُوحُو بْرَى رْجَعْ وْهُوَ يْمَجِّدْ فِي اللهْ بْصُوتْ عَالِي.

¹⁶وِهْبَطْ عْلَى وِجْهُو قُدَّامْ سَاقِينْ يَسُوعْ وْشَكْرُو، وِالرَّاجِلْ هَاذَا كَانْ سَامْرِي.

¹⁷تْكَلِّمْ يَسُوعْ وْقَالْ: «يَاخِي مُوشْ ثَمَّة عَشْرَة رْجَالْ بْرَاوْ؟ وِينْهُمْ التِّسْعَة الأُخْرِينْ؟

¹⁸يَاخِي مَا ثَمَّاشْ شْكُونْ يَرْجَعْ يْمَجِّدْ اللهْ كَانْ البَرَّانِي هَاذَا؟»

¹⁹مِنْ بَعْدْ قَالُّو يَسُوعْ: «قُومْ وْإِمْشِي عْلَى رُوحِكْ، رَاهُو إِيمَانِكْ خَلّْصِكْ.»

²⁰وْسِأْلُوهْ الفَرِّيسِيِّينْ: «وَقْتَاشْ تْجِي مَمْلِكْةْ اللهْ؟» جَاوِبْهُمْ وْقَالْ: «رَاهِي مَمْلِكْةْ اللهْ مَا تْجِيشْ بْأَمَارَة تِتْشَافْ بِيهَا.

²¹وْمَا يِتْقَالِشْ: "هَايْ هْنَا! وِلاَّ هَايْ الغَادِي!" رَاهِي مَمْلِكْةْ اللهْ فِي قْلُوبْكُمْ.»

²²مِنْ بَعْدْ قَالْ لِتْلاَمِذْتُو: «بَاشْ تْجِي نْهَارَاتْ الِّي تِتْمَنَّاوْ فِيهُمْ بَاشْ تْشُوفُوا يُومْ وَاحِدْ مِنْ أَيَّامَاتْ إِبْنْ الإِنْسَانْ، وْمَا كُمْشْ بَاشْ تْشُوفُوهْ.

²³وِالنَّاسْ بَاشْ يْقُولُولْكُمْ: "هَاوْ الغَادِي! وِلاَّ هَاوْ لِهْنَا!" مَا تِمْشِيوِشْ وْرَاهُمْ، وْمَا اتَّبْعُوهُمْشْ.

²⁴رَاهُو كِيفْ مَا البَرْقْ يُبْرُقْ فِي جِيهَة مِنْ تَحْتْ السْمَاءْ وْيِضْوِي فِي جِيهَة أُخْرَى، هَكَّا بَاشْ نْكُونْ آنَا إِبْنْ الإِنْسَانْ نْهَارِتْ الِّي نَرْجَعْ.

²⁵آمَا فِي الأُوِّلْ لاَزِمْ نِتْعَذِّبْ بَرْشَة وِالجِيلْ هَاذَا يُرْفُضْنِي.

²⁶وْكِيفْ مَا وْقَعْ فِي زْمَانْ نُوحْ، هَكَّا بَاشْ يَاقَعْ فِي زْمَانِي آنَا إِبْنْ الإِنْسَانْ.

²⁷كَانُوا النَّاسْ يَاكْلُوا وْيُشْرْبُوا وِيْعَرّْسُوا وِيْعَرّْسُوا بِيهُمْ حَتَّى لِينْ جَا النْهَارْ الِّي دْخَلْ فِيهْ نُوحْ لِلسْفِينَة وْجَاتْ الفَيَضَانَاتْ وْهِلْكِتْ النَّاسْ الكُلْ.

²⁸وْكِيمَا صَارْ زَادَا فِي زْمَانْ لُوطْ: كَانُوا يَاكْلُوا وْيُشْرْبُوا، يِشْرِيوْ وِيْبِيعُوا وْيَزْرْعُوا وْيِبْنِيوْ.

²⁹آمَا فِي النْهَارْ الِّي خْرَجْ فِيهْ لُوطْ مِنْ مْدِينِةْ سَدُومْ اللهْ هَبِّطْ مْطَرْ مْتَاعْ نَارْ وِحْجَرْ شَاعِلْ مِالسْمَاء وِهْلِكْ النَّاسْ الكُلْ.

³⁰هَاذَا الِّي بَاشْ يْصِيرْ فِي النْهَارْ الِّي بَاشْ نُظْهُرْ فِيهْ آنَا إِبْنْ الإِنْسَانْ.

³¹فِي النْهَارْ هَاذَاكَا، الِّي يْكُونْ فُوقْ السْطَحْ وْدَبْشُو فِي الدَّارْ، مُوشْ لاَزِمْ يَهْبِطْ بَاشْ يْهِزُّو. وِلِّي مُوجُودْ فِي السَّانْيَة مُوشْ لاَزِمْ يَرْجَعْ عْلَى جُرّْتُو.

³²اتْذَكّْرُوا مَرْتْ لُوطْ.

³³الِّي يْشِدْ صْحِيحْ فِي حْيَاتُو بَاشْ يْحَافِظْ عْلِيهَا رَاهُو بَاشْ يِخْسِرْهَا، آمَا الِّي يِخْسِرْهَا رَاهُو بَاشْ يْحَافِظْ عْلِيهَا.

³⁴نْقُولِلْكُمْ: فِي اللِّيلَة هَاذِيكَا يْكُونُوا زُوزْ مِالنَّاسْ رَاقْدِينْ فِي فَرْشْ وَاحِدْ، يِتْهَزْ وَاحِدْ وْيَبْقَى الآخَرْ.

³⁵وْزُوزْ نْسَاء يِرْحِيوْ فِي القَمْحْ مْعَ بْعَضْهُمْ، وَحْدَة تِتْهَزْ وِالأُخْرَى تَبْقَى.»

³⁶[وِيْكُونُوا زُوزْ رْجَالْ فِي السَّانْيَة، يِتْهَزْ وَاحِدْ وِالآخَرْ يَبْقَى.]

³⁷جَاوْبُوهْ التْلاَمْذَة وْقَالُولُو: «وِينْ يَا رَبْ؟» قَالِلْهُمْ يَسُوعْ: «وِينْ تْكُونْ ثَمَّة جِيفَة ثَمَّة تِتْلَمْ النْسُورَا.»