Read Tunisian Arabic New Testament لُوقَا 18 Bible Online

لُوقَا 18 - Tunisian Arabic New Testament bible

لُوقَا 18

¹وِعْطَاهُمْ مَثَلْ عْلَى كِيفَاشْ يِلْزِمْهُمْ يْصَلِّيوْ دِيمَا وْمَا يِفْشْلُوشْ

²وْقَالْ: «كَانِتْ ثَمَّة مْدِينَة فِيهَا قَاضِي مَا يْخَافِشْ رَبِّي وْمَا يِحْتَرَمْ حَتَّى إِنْسَانْ.

³وْفِي المْدِينَة هَاذِيكَا كَانِتْ ثَمَّة مْرَا رَاجِلْهَا مِيتْ دِيمَا تْجِيهْ وِتْقُلُّو: "خُوذْلِي حَقِّى مِلِّي ظَالِمْنِي."

⁴وِبْقَى مُدَّة مِالزْمَانْ مِنْ غِيرْ مَا يَاخْذُلْهَا حَقّْهَا، آمَا مِنْ بَعْدْ قَالْ بِينُو وْبِينْ رُوحُو: "حَتَّى لُوكَانْ آنَا مَا نْخَافِشْ مِنْ رَبِّي وْمَا نِحْتَرِمْ حَتَّى بَشَرْ.

⁵آمَا عْلَى خَاطِرْ المْرَا هَاذِي تْقَلِّقْ فِيَّ، بَاشْ نَعْطِيهَا حَقْهَا وْهَكَّا مَا عَادِشْ تْجِي دِيمَا وِتْوَجِّعْلِي رَاسِي."»

⁶وْقَالْ الرَّبْ زَادَا: «اسْمْعُوا القَاضِي الظَّالِمْ آشْ قَالْ.

⁷إِمَّالاَ اللهْ مَا يُحْكُمْشْ بِالعَدْلْ لِلنَّاسْ الِّي خْتَارْهُمْ وَقْتِلِّي يُطْلْبُوهْ لِيلْ مْعَ نْهَارْ؟ رَغْمْ اللِّي يُصْبُر عْلِيهِمْ بَرْشَا؟

⁸نْقُولِلْكُمْ: رَاهُو بَاشْ يَاخْذُلْهُمْ حَقْهُمْ فِيسَعْ، آمَا وَقْتِلِّي آنَا إِبْنْ الإِنْسَانْ نَرْجَعْ زَعْمَة بَاشْ نَلْقَى إِيمَانْ عْلَى الأَرْضْ؟»

⁹وِعْطَاهُمْ مَثَلْ آخَرْ عْلَى نَاسْ عِنْدْهُمْ ثِقَة فِي رْوَاحْهُمْ الِّي هُومَا أَبْرَارْ وْيَحْقْرُوا فِي النَّاسْ الأُخْرِينْ.

¹⁰«طَلْعُوا زُوزْ مِالنَّاسْ لِلهَيْكِلْ بَاشْ يْصَلِّيوْ، وَاحِدْ فَرِّيسِي وِالآخَرْ يْلِمْ فِي الضَّرَايِبْ.

¹¹وْقُفْ الفَرِّيسِي يْصَلِّي وْقَالْ بِينُو وْبِينْ رُوحُو: "نُشْكْرِكْ يَا اللهْ الِّي آنَا مَا نِيشْ كِيمَا بْقِيِّةْ النَّاسْ الأُخْرِينْ الطَّمَّاعِينْ وِالظَّالْمِينْ وِلِّي يَزْنُوا، وِلاَّ كِيمَا الِّي يْلِمْ فِي الضَّرَايِبْ هَاذَا.

¹²نْصُومْ مَرّْتِينْ فِي الجِّمْعَة وْنَعْطِي العْشُرْ عْلَى كُلْ مَا نِكْسِبْ."

¹³آمَا الِّي يْلِمْ فِي الضَّرَايِبْ وْقُفْ مِنْ بْعِيدْ وْمَا حَبِّشْ حَتَّى يْهِزْ عِينِيهْ لِلسْمَاء، آمَا ضْرَبْ صَدْرُو وْقَالْ: "يَا اللهْ ارْحِمْنِي رَانِي مِذْنِبْ."

¹⁴نْقُولِلْكُمْ رَاهُو الإِنْسَانْ هَاذَا رْجَعْ لْدَارُو طَاهِرْ مِالذْنُوبْ عَكْسْ الآخَرْ. رَاهُو الِّي يْعَلِّي مِنْ رُوحُو يَهْبِطْ، وِلِّي يْنَقِّصْ مِنْ رُوحُو يَعْلَى.»

¹⁵وْثَمَّة نَاسْ جَابُولُو وْلاَدْ صْغَارْ بَاشْ يْحُطْ عْلِيهُمْ يِدُّو وِيْبَارِكْهُمْ، يَاخِي كِشَافُوهُمْ التْلاَمْذَة لاَمُوا عْلِيهُمْ.

¹⁶آمَا يَسُوعْ عَيّْطِلْهُمْ وْقَالْ: «خَلُّوا الصْغَارْ يْجِيوْنِي وْمَا تْحُوزُوهُمْشْ، رَاهِي مَمْلِكْةْ اللهْ لِلنَّاسْ الِّي كِيفْهُمْ.

¹⁷نْقُولِلْكُمْ الحَقْ الِّي مَا يِقْبِلْشْ مَمْلِكْةْ اللهْ كِيفْ وْلِدْ صْغِيرْ، عُمْرُو مَا يُدْخْلِلْهَا.»

¹⁸وْسِأْلُو رَاجِلْ غْنِي وْقَالْ: «يَا مُعَلِّمْ يَا بَاهِي، آشْ نَعْمِلْ بَاشْ نُورِثْ الحَيَاةْ الأَبَدِيَّة؟»

¹⁹قَالُّو يَسُوعْ: «عْلاَشْ تْقُلِّي يَا بَاهِي؟ مَا ثَمَّة حَتَّى حَدْ بَاهِي كَانْ اللهْ وَحْدُو.

²⁰إِنْتِ تَعْرِفْ الوْصَايَا: "مَا تَزْنَاشْ، مَا تُقْتُلْشْ، مَا تِسْرِقْشْ، مَا تِشْهِدْشْ بِالكِذْبْ، إِكْرِمْ بُوكْ وْأُمِّكْ."»

²¹قَالْ: «الحَاجَاتْ هَاذُومَا الكُلْهُمْ نَعْمِلْ فِيهُمْ مِلِّي كُنْتْ صْغِيرْ.»

²²وْكِسْمَعْ يَسُوعْ الكْلاَمْ هَاذَا قَالُّو: «مَا زَالِتْ نَاقْصِتِّكْ حَاجَة وَحْدَة، بِيعْ كُلْ مَا تِمْلِكْ وْفَرّْقُو عْلَى الفُقَرَاءْ، وْهَكَّا يْوَلِّي عِنْدِكْ كَنْزْ فِي السْمَاءْ وِمْبَاعِدْ إِيجَا وْتَبَّعْنِي.»

²³آمَا الرَّاجِلْ كِسْمَعْ كْلاَمْ يَسُوعْ حْزِنْ بَرْشَة عْلَى خَاطْرُو كَانْ غْنِي بَرْشَة.

²⁴وْكِشَافْ يَسُوعْ الشَّيْء هَاذَا قَالْ: «قَدَّاشْ صْعِيبْ عْلَى النَّاسْ الغُنْيَا بَاشْ يُدْخْلُوا لْمَمْلِكْةْ اللهْ.

²⁵رَاهُو دْخُولْ الجْمَلْ فِي نُقْبَة مْتَاعْ إِبْرَة أسْهِلْ مِنْ إِنُّو وَاحِدْ غْنِي يُدْخُلْ لْمَمْلِكْةْ اللهْ.»

²⁶يَاخِي الِّي يِسْمْعُوا فِي الكْلاَمْ هَاذَا قَالُوا: «إِمَّالاَ شْكُونْ يْنَجِّمْ يُخْلُصْ؟»

²⁷قَالْ يَسُوعْ: «المُسْتَحِيلْ عِنْدْ النَّاسْ، مُمْكِنْ عِنْدْ اللهْ.»

²⁸يَاخِي قَالْ بُطْرُسْ: «هَاوْ أَحْنَا خَلِّينَا كُلْ شَيْء وْتَبِّعْنَاكْ.»

²⁹يَاخِي قَالِلْهُمْ يَسُوعْ: «نْقُلْكُمْ الحَقْ: كُلْ مِنْ خَلَّى دَارْ، وِلاَّ مْرَا، وِلاَّ إِخْوَة، وِلاَّ وَالْدِينْ، وِلاَّ وْلاَدْ عْلَى خَاطِرْ مَمْلِكْةْ اللهْ.

³⁰رَاهُو تَرْجِعْلُو قَدّْهَا بَرْشَة مَرَّاتْ فِي الزْمَانْ هَاذَا، وْيَاخُذْ فِي الزْمَانْ الجَّايْ الحَيَاةْ الأَبَدِيَّة.»

³¹مِنْ بَعْدْ قْعَدْ مْعَ تْلاَمِذْتُو الأَثْنَاشْ وَحَّدْهُمْ وْقَالِلْهُمْ: «هَاوْ بَاشْ نَطْلْعُوا لْأُورْشَلِيمْ وِالحَاجَاتْ الِّي كِتْبُوهَا الأَنْبِيَاءْ عْلِيَّ آنَا إِبْنْ الإِنْسَانْ الكُلْهَا بَاشْ اتِّمْ.

³²رَاهُو بَاشْ يْسَلّْمُونِي لِيْدِينْ الشْعُوبْ الأُخْرِينْ وْيِتْمَسْخْرُوا عْلِيَّ وْنِتْهَانْ وْيِبْصْقُوا عْلِيَّ.

³³وْيُقْتْلُونِي بَعْدْ مَا يَضْرْبُونِي بِالسُّوطْ وْفِي النْهَارْ الثَّالِثْ نْقُومْ.»

³⁴آمَا هُومَا مَا فِهْمُوا حَتَّى شَيْء، وِالحَاجَاتْ هَاذِي كَانِتْ مَحْجُوبَة عْلِيهُمْ وْمَا فَهْمُوشْ الشَّيْء الِّي تْقَالْ.

³⁵وْكِوْصُلْ بِحْذَا أَرِيحَا، كَانْ ثَمَّة وَاحِدْ أَعْمَى قَاعِدْ بِجْنَبْ الطْرِيقْ يُطْلُبْ.

³⁶وْكِسْمَعْ النَّاسْ مِتْعَدِّينْ، سْإِلْ شْنُوَّة الِّي قَاعِدْ يْصِيرْ.

³⁷قَالُولُو: «يَسُوعْ النَّاصْرِي مِتْعَدِّي مِنْ هْنَا.»

³⁸بْدَا يْعَيِّطْ وِيْقُولْ: «يَا يَسُوعْ وِلْدْ دَاوُدْ، ارْحِمْنِي.»

³⁹لَكِنْ النَّاسْ الِّي قَاعْدِينْ يِمْشِيوْ مِالقُدَّامْ صَاحُوا عْلِيهْ بَاشْ يُسْكُتْ، آمَا هُوَ زَادْ صَاحْ وْقَالْ: «يَا وِلْدْ دَاوُدْ ارْحِمْنِي.»

⁴⁰وْقُفْ يَسُوعْ وِأْمَرْ بَاشْ يْجِيبُوهُولُو، وْكِقْرُبْ مِنُّو سِأْلُو:

⁴¹«شْنُوَّة تْحِبّْنِي نَعْمِلِّكْ؟» قَالْ: «يَا سِيدِي، نْحِبْ نَرْجَعْ نْشُوفْ!»

⁴²قَالُّو يَسُوعْ: «أَرْجِعْ شُوفْ مِنْ جْدِيدْ، إِيمَانِكْ شْفَاكْ.»

⁴³وْبِالوَقْتْ وَلَّى يْشُوفْ، وْتَبّْعُو وْهُوَ يْسَبَّحْ فِي اللهْ، وِالنَّاسْ الكُلْهُمْ كِشَافُوا الشَّيْء هَاذَا مَجّْدُوا اللهْ.