Read Tunisian Arabic New Testament لُوقَا 19 Bible Online

لُوقَا 19 - Tunisian Arabic New Testament bible

لُوقَا 19

¹مِنْ بَعْدْ دْخَلْ يَسُوعْ لِمْدِينِةْ أَرِيحَا وِتْعَدَّى فِي وُسْطْهَا.

²وْكَانْ ثَمَّة رَاجِلْ إِسْمُو زَكَّا يِخْدِمْ الأَمِينْ مْتَاعْ المَكَّاسَة وْكَانْ غْنِى.

³وْحَبْ يْشُوفْ شْكُونْ هُوَ يَسُوعْ، آمَا مَا نَجِّمْشْ عْلَى خَاطِرْ كَانُوا ثَمَّة بَرْشَة نَاسْ وْزِيدْ عْلَى هَاذَا هُوَ قْصِيرْ.

⁴يَاخِي جَا فِيسَعْ وِطْلَعْ فُوقْ كَرْمَة بَالِكْشِي يْشُوفْ يَسُوعْ الِّي كَانْ مِتْعَدِّى مِالغَادِي.

⁵وْكِوْصُلْ يَسُوعْ لِلبُقْعَة هَاذِيكَا، هَزْ رَاسُو وْشَافُو وْقَالُّو: «يَا زَكَّا أَهْبِطْ فِيسَعْ، آنَا اليُومْ لاَزِمْنِي نُقْعُدْ فِي دَارِكْ.»

⁶هْبَطْ فِيسَعْ وِفْرَحْ بِيهْ بَرْشَة.

⁷وِالنَّاسْ بْدَاوْا يِتْشَكَّاوْ كِشَافُوا الشَّيْء هَاذَا وْقَالُوا: «دْخَلْ بَاشْ يُقْعُدْ بِحْذَا رَاجِلْ مِذْنِبْ.»

⁸آمَا زَكَّا وْقُفْ وْقَالْ لِلرَّبْ: «يَا رَبْ آنَا نَعْطِي نُصْ ثَرْوْتِي لِلفُقَرَاءْ وْإِذَا كَانْ فَكِّيتْ حَاجَة لْوَاحِدْ آنَا نْرَجَّعْلُو أَرْبْعَة مَرَّاتْ قَدْ الِّي فَكِّيتْهُولُو.»

⁹يَاخِي قَالُّو يَسُوعْ: «اليُومْ الخَلاَصْ جَا لِلدَّارْ هَاذِي عْلَى خَاطْرُو هُوَ زَادَا وِلْدْ إِبْرَاهِيمْ.

¹⁰رَانِي آنَا إِبْنْ الإِنْسَانْ جِيتْ بَاشْ نْلَوِّجْ عْلَى الضَّايْعِينْ وِنْخَلِّصْهُمْ.»

¹¹وَقْتِلِّي كَانُوا يِسْمْعُوا فِي الكْلاَمْ هَاذَا، زَادْ يَسُوعْ عْطَاهُمْ مَثَلْ عْلَى خَاطْرُو قْرُبْ مِنْ أُورْشَلِيمْ وِالنَّاسْ كَانُوا يْفَكّْرُوا الِّي مَمْلِكْةْ اللهْ بَاشْ تُظْهُرْ بِالوَقْتْ.

¹²قَالْ يَسُوعْ: «ثَمَّة رَاجِلْ مِنْ عَايِلْةْ المَلِكْ مْشَى لِبْلاَدْ بْعِيدَة بَاشْ يْحُطُّوهْ مَلِكْ عْلَى بْلاَدُو وِمْبَاعِدْ يَرْجَعْ.

¹³عَيِّطْ لِلعَشْرَة خُدَّامْ مْتَاعُو وِعْطَاهُمْ عَشْرَة وَزْنَاتْ فْلُوسْ وْقَالِلْهُمْ: "تَاجْرُوا بِيهُمْ حَتَّى لِينْ نَرْجَعْ."

¹⁴آمَا وْلاَدْ بْلاَدُو كَانُوا يَكْرْهُوهْ وْبَعْثُوا وْرَاهْ جْمَاعَة يْمَثّْلُوهُمْ وْقَالُوا: "هَاذَا مَا نْحِبُّوهِشْ يْوَلِّي مَلِكْ عْلِينَا."

¹⁵وْوَقْتِلِّي رْجَعْ، بَعْدْ مَا وَلَّى مَلِكْ، أْمَرْ بَاشْ يْعَيّْطُوا عْلَى الخُدَّامْ هَاذُوكُمْ الِّي عْطَاهُمْ الوَزْنَاتْ بَاشْ يَعْرِفْ قَدَّاشْ رِبْحُوا فِي التِّجَارَة.

¹⁶جَا الأُوِّلْ وْقَالْ: "يَا سِيدِي فْلُوسِكْ جَابِتْ عَشْرَة وَزْنَاتْ."

¹⁷يَاخِي قَالُّو: "صَحِّيتْ يَا خْدِيمْ يَا صَالِحْ، عْلَى خَاطْرِكْ كُنْتْ ثِيقَة فِي القْلِيلْ إِمَّالاَ رَاكْ بَاشْ تْوَلِّي وَالِي عْلَى عَشْرَة مُدُنْ."

¹⁸وْجَا الثَّانِي وْقَالْ: "يَا سِيدِي الوَزْنَة مْتَاعِكْ جَابْ خَمْسَة وَزْنَاتْ."

¹⁹قَالُّو: "إِنْتِ زَادَا بَاشْ تْوَلِّي وَالِي عْلَى خَمْسَة مُدُنْ."

²⁰وْجَا الثَّالِثْ وْقَالْ: "يَا سِيدِي هَايْ الْوَزْنَة مْتَاعِكْ مْخَبِّية فِي مِنْدِيلَة

²¹رَانِي خُفْتْ مِنِّكْ عْلَى خَاطْرِكْ إِنْسَانْ صْعِيبْ تَاخُذْ الِّي مَا عْطِيتُوشْ وْتَحْصِدْ الِّي مَا زْرَعْتُوشْ."

²²قَالُّو: "بِكْلاَمِكْ هَاذَا بَاشْ نُحْكُمْ عْلِيكْ، يَا خْدِيمْ يَا شِرِّيرْ. كِعْرَفْتْ الِّي آنَا إِنْسَانْ صْعِيبْ، نَاخُذْ الِّي مَا عْطِيتُوشْ، وْنَحْصِدْ الِّي مَا زْرَعْتُوشْ.

²³إِمَّالاَ عْلاَشْ مَا حَطِّيتْلِيشْ فْلُوسِي فِي البَانْكَا، تَالِي رَانِي خْذِيتْهَا مْعَ الفَايْدَة وَقْتِلِّي نَرْجَعْ؟"

²⁴مِنْ بَعْدْ قَالْ لِلمُوجُودِينْ الغَادِي: "خُوذُوا مِنْ عَنْدُو الْوَزْنَة وِاعْطِيوْها لِلِّي عَنْدُو العَشْرَة وَزْنَاتْ."

²⁵قَالُولُو: "يَا سِيدْنَا رَاهُو عَنْدُو عَشْرَة وَزْنَاتْ."

²⁶يَاخِي قَالْ: "آنَا نْقُلْكُمْ رَاهُو الِّي عَنْدُو بَاشْ يِتْزَادْلُو أَكْثِرْ، وِلِّي مَا عِنْدُوشْ، حَتَّى الِّي عَنْدُو بَاشْ يِتْفَكّْلُو.

²⁷آمَا الأَعْدَاءْ مْتَاعِي الِّي مَا حَبُّونِيشْ نِمْلِكْ عْلِيهُمْ جِيبُوهُمْ لِهْنَا وْأَذْبْحُوهُمْ قُدَّامِي."»

²⁸وْبَعْدْ مَا قَالْ الكْلاَمْ هَاذَا، مْشَى وِطْلَعْ لْأُورْشَلِيمْ وِالنَّاسْ يْتَبّْعُوا فِيهْ.

²⁹وْكِقْرُبْ مِنْ قَرْيِةْ بِيتْ ‌فَاجِي وْبِيتْ‌ عَنْيَا بِحْذَا الجْبَلْ المَعْرُوفْ بِجْبَلْ الزِّيتُونْ بْعَثْ زُوزْ مِنْ تْلاَمِذْتُو.

³⁰وْقَالْ: «امْشِيوْ لِلقَرْيَة الِّي مْقَابْلِتْكُمْ وْدُوبْ مَا تُدْخْلُوهَا تَلْقَاوْ جَحْشْ مَرْبُوطْ مَا رْكِبْ عْلِيهْ حَتَّى حَدْ، حِلُّولُو الرْبَاطْ وْجِيبُوهْ لِهْنَا.

³¹وْإِذَا كَانْ وَاحِدْ سْإِلْكُمْ عْلاَشْ سَيِّبْتُوهْ، قُولُولُو: "الرَّبْ مِحْتَاجْ لِيهْ."»

³²مْشَاوْ التْلاَمْذَة الإِثْنِينْ الِّي بْعَثْهُمْ يَسُوعْ وِلْقَاوْ الجَّحْشْ كِيفْ مَا قَالِلْهُمْ.

³³وَقْتِلِّي كَانُوا يْحِلُّولُو فِي الرْبَاطْ، سِأْلُوهُمْ امَّالِي الجَّحْشْ: «عْلاَشْ تْحِلُّولُو فِي الرْبَاطْ؟»

³⁴قَالُوا: «الرَّبْ حَاجْتُو بِيهْ.»

³⁵مِنْ بَعْدْ جَابُوا الجَّحْشْ لْيَسُوعْ وْحَطُّوا عْلِيهْ كْبَابِطْهُمْ وْرَكّْبُوا يَسُوعْ.

³⁶وَقْتِلِّي هُوَ مَاشِي بْدَاوْا النَّاسْ يِفْرْشُوا فِي اللِّبْسَة مْتَاعْهُمْ فِي الطْرِيقْ.

³⁷وْكِقْرُبْ مِنْ أُورْشَلِيمْ وِوْصُلْ لِلثْنِيَّة الِّي تْهَبِّطْ لِجْبَلْ الزِّيتُونْ بْدَاوْا التْلاَمْذَة الكُلْهُمْ يْسَبّْحُوا فِي اللهْ بْصُوتْ عَالِي عْلَى المُعْجْزَاتْ الِّي شَافُوهَا الكُلْهَا.

³⁸وِيْقُولُوا: مُبَارَكْ المَلِكْ الِّي جَايْ بْإِسْمْ الرَّبْ، سَلاَمْ فِي السْمَاءْ، وْمَجْدْ فِي الأَعَالِي.

³⁹آمَا ثَمَّة جْمَاعَة مِالفَرِّيسِيِّينْ المُوجُودِينْ الغَادِى قَالُوا: «يَا مُعَلِّمْ سَكِّتْ تْلاَمِذْتِكْ.»

⁴⁰جَاوِبْهُمْ يَسُوعْ وْقَالْ: «نْقُولِلْكُمْ: إِذَا كَانْ هَاذُمْ يُسْكْتُوا الحْجَرْ بَاشْ يَنْطِقْ.»

⁴¹وْكِقْرُبْ وْشَافْ أُورْشَلِيمْ بْكَى عْلِيهَا.

⁴²وْقَالْ: «يَا لِيتِكْ إِنْتِ زَادَا عْرَفْتْ فِي نْهَارِكْ هَاذَا، الحَاجَاتْ اللّي تَعْطِيكْ سَلاَمْ، آمَا رَاهُو الشَّيْء هَاذَاكَا تَوْ مَحْجُوبْ عْلَى عِينِيكْ.

⁴³وْبِشْ تْجِي عْلِيكْ نْهَارَاتْ وَقْتِلِّي أَعْدَاءِكْ يْدَوّْرُوا بِيكْ الأَسْوَارْ وْيَحْصْرُوكْ وِيْضَيّْقُوا عْلِيكْ مِنْ الجِيهَاتْ الكُلْ

⁴⁴وِيْهَدّْمُوكْ وِوْلاَدِكْ فِي وُسْطِكْ، وْمَا يْخَلِّيوْشْ فِيكْ حَجْرَة فُوقْ الأُخْرَى عْلَى خَاطْرِكْ مَا عْرَفْتِشْ الوَقْتْ الِّي بَاشْ يْجِي فِيهْ اللهْ وِيْخَلّْصِكْ.»

⁴⁵وْكِدْخَلْ لِلهَيْكِلْ بْدَا يْطَرِّدْ فِي البَيَّاعَة.

⁴⁶وْقَالِلْهُمْ: «مَكْتُوبْ فِي الكْتَابْ: بِيتِي بَاشْ تْكُونْ بِيتْ صْلاَةْ، آمَا إِنْتُومَا رَدِّيتُوهَا دَامُوسْ السُّرَّاقْ.»

⁴⁷وْكَانْ يْعَلِّمْ فِي الهَيْكِلْ كُلْ يُومْ، وْحَاوْلُوا رُؤَسَاءْ الكُهَّانْ وِالكُتَّابْ مْتَاعْ اليْهُودْ وِالأَعْيَانْ مْتَاعْ الشَّعْبْ بَاشْ يُقْتْلُوهْ.

⁴⁸آمَا مَا عَرْفُوشْ كِيفَاشْ. عْلَى خَاطِرْ الشَّعْبْ الكُلْهُمْ كَانُوا يْحِبُّوا يِسْمْعُوا كْلاَمُو.