Read Tunisian Arabic New Testament لُوقَا 2 Bible Online

لُوقَا 2 - Tunisian Arabic New Testament bible

لُوقَا 2

¹وْفِي الأَيَّامَاتْ هَاذُوكُمْ أْمَرْ القَيْصِرْ أُغُسْطُسْ بَاشْ يَعْمْلُو إحْصَاءْ لْسُّكَّانْ الإِمْبْرَاطُورِيَّة.

²وْهَاذَا كَانْ أَوِّلْ إِحْصَاءْ يَاقَعْ فِي زْمَانْ كِيرِينْيُوسْ الوَالِي مْتَاعْ سُورْيَة.

³وِمْشَاوْ النَّاسْ الكُلْ بَاشْ يْسَجّْلُوا أَسَامِيهُمْ، كُلْ وَاحِدْ فِي بْلاَدُو.

⁴وِمْشَى يُوسُفْ زَادَا مِنْ مْدِينِةْ النَّاصْرَة المُوجُودَة فِي مَنْطِقْةْ الجَلِيلْ لِمْدِينِةْ دَاوُدْ الِّي تِتْسَمَّى بِيتْ ‌لَحْمْ المُوجُودَة فِي مَنْطِقْةْ اليَهُودِيَّة عْلَى خَاطْرُو كَانْ مِنْ ذُرِّيِّةْ دَاوُدْ.

⁵بَاشْ يِتْسَجِّلْ غَادِي هُوَ وْخَطِيبْتُو مَرْيَمْ الِّي كَانِتْ حِبْلَى.

⁶وَقْتِلِّي كَانُوا مُوجُودِينْ الغَادِي جَا وَقْتْهَا بَاشْ تُولِدْ.

⁷وْجَابِتْ وِلْدْهَا الأُوِّلْ وْقَمّْطِتُّو وْرَقّْدِتُّو فِي كُورِي عْلَى خَاطِرْ مَا كَانِشْ ثَمَّة بُقْعَة فَاضْيَة فِي الوْكَالَة.

⁸وْكَانُوا ثَمَّة سُرَّاحْ فِي المَنْطْقَة هَاذِيكَا يْبَاتُوا البَرَّة فِي اللِّيلْ وْكَانُوا يْعِسُّوا عْلَى الغْنَمْ.

⁹وْإِذَا بْمَلاَكْ مِنْ عِنْدْ الرَّبْ ظْهَرِّلْهُمْ، وْمَجْدْ الرَّبْ ضْوَى عْلِيهُمْ، خَافُوا بَرْشَة.

¹⁰وْقَالِلْهُمْ المَلاَكْ: «مَا تْخَافُوشْ! هَانِي نْبَشِّرْكُمْ بْفَرْحَة كْبِيرَة تْكُونْ لِلشَّعْبْ الكُلُّو

¹¹رَاهُو تِوْلِدِّلْكُمْ اليُومْ مُخَلِّصْ فِي مْدِينِةْ دَاوُدْ هُوَ المَسِيحْ الرَّبْ

¹²وْبِشْ تْكُونِلْكُمْ العَلاَمَة هَاذِي: تَلْقَاوْ طْفُلْ مَلْفُوفْ بِقْمَاطَة وْرَاقِدْ فِي كُورِي.»

¹³وْجَا مْعَ المَلاَكْ هَاذَاكَا جَيْشْ كْبِيرْ مِالمْلاَيْكَة مْتَاعْ السْمَاءْ يْسَبّْحُوا فِي اللهْ وِيْقُولُوا:

¹⁴«المَجْدْ للهْ فِي السْمَاءْ وْسَلاَمْ عْلَى الأَرْضْ وِمْسَرَّة للنَّاسْ.»

¹⁵وْبَعْدْ مَا طَلْعُوا المْلاَيْكَة لِلسْمَاء، قَالُوا سُرَّاحْ الغْنَمْ لِبْعَضْهُمْ: «هَيَّا نِمْشِيوْا لْبِيتْ ‌لَحْمْ وِنْشُوفُوا الشَّيْء الِّي صَارْ وِلِّي قَالِلْنَا عْلِيهْ رَبِّي.»

¹⁶وْجُوا فِيسَعْ، وِلْقَاوْ مَرْيَمْ وْيُوسُفْ، وِالطْفُلْ رَاقِدْ فِي الكُورِي.

¹⁷وَقْتِلِّي شَافُوهُمْ بْدَاوْا يَحْكِيوْ عْلَى الشَّيْء الِّي تقَالِلْهُمْ عْلَى الطْفُلْ هَاذَا.

¹⁸وِلِّي سَمْعُوا الكُلْهُمْ بْقَاوْ مِسْتَغْرْبِينْ مِالشَّيْء الِّي قَالُوهُولْهُمْ سُرَّاحْ الغْنَمْ.

¹⁹آمَا مَرْيَمْ حَطِّتْ الحْكَايَة هَاذِي فِي بَالْهَا وِبْقَاتْ تْفَكِّرْ فِيهَا دِيمَا.

²⁰وْمِنْ بَعْدْ رَجْعُوا سُرَّاحْ الغْنَمْ وْهُومَا يْمَجّْدُوا فِي اللهْ وِيْسَبّْحُوا فِيهْ عْلَى خَاطِرْ الِّي سَمْعُوهْ وْشَافُوهْ الكُلُّو كَانْ بِالضَّبْطْ كِيفْ مَا قَالِلْهُمْ المَلاَكْ.

²¹وْكِكِمْلُوا الثْمَنْيَة أَيَّامْ بَاشْ يْطَهّْرُوا الطْفُلْ تْسَمَّى يَسُوعْ كِيمَا قَالْ المَلاَكْ قْبَلْ مَا تِحْبِلْ بِيهْ أُمُّو.

²²وَقْتِلِّي كْمِلْ وَقْتْ التَّطْهِيرْ مْتَاعْهُمْ كِيفْ مَا قَالِتْ الشَّرِيعَة مْتَاعْ مُوسَى، طَلْعُوا بِيهْ لْأُورْشَلِيمْ بَاشْ يْقَدّْمُوهْ لْرَبِّي.

²³بِالضَّبْطْ كِيفْ مَا هُو مَكْتُوبْ فِي شَرِيعِةْ اللهْ: الِّي يِتْوْلِدْ الأُوِّلْ مِالذْكُورَا يْكُونْ مُقَدَّسْ لْرَبِّي

²⁴وِيْقَدّْمُوا ذْبِيحَة لْرَبِّي كِيفْ مَا وَصَّاتْ الشَّرِيعَة: زُوزْ طْيُورْ يْمَامْ وِلاَّ زُوزْ فْرُوخْ حْمَامْ.

²⁵وْكَانْ ثَمَّة رَاجِلْ فِي أُورْشَلِيمْ إِسْمُو سِمْعَانْ، الرَّاجِلْ هَاذَا بَارْ وِيْخَافْ رَبِّي وْكَانْ يِسْتَنَّى فِي إِنُّو اللهْ بَاشْ يْعَزِّي شَعْبْ إِسْرَائِيلْ، وْكَانْ الرُّوحْ القُدُسْ مْعَاهْ.

²⁶وِالرُّوحْ القُدُسْ وَرَّاهْ الِّي هُوَ مَا يْمُوتْ إِلاَّ مَا يْشُوفْ مَسِيحْ رَبِّي.

²⁷وِالرُّوحْ أَوْحَالُو بَاشْ يْجِي لِلهَيْكِلْ وْوَقْتِلِّي يُوسُفْ وْمَرْيِمْ جَابُوا وِلْدْهُمْ يَسُوعْ بَاشْ يَعْمْلُولُو الشَّيْء الِّي تْقُولْ عْلِيهْ الشَّرِيعَة

²⁸هَزُّو سِمْعَانْ بِينْ يْدِيهْ وْمَجِّدْ اللهْ وْقَالْ:

²⁹«يَا رَبِّي خَلِّي عَبْدِكْ يِمْشِي بْسَلاَمْ كِيفْ مَا قُتْلُو

³⁰رَاهِي عِينَيَّ شَافِتْ خَلاَصِكْ.

³¹الِّي حَضِّرْتُو لِلنَّاسْ الكُلْ.

³²نُورْ لِلشْعُوبْ الأُخْرِينْ وْمَجْدْ لْبَنِي إِسْرَائِيلْ شَعْبِكْ.»

³³وْبُوهْ وْأُمُّو كَانُوا مِتْعَجّْبِينْ مِالكْلاَمْ الِّي تْقَالْ عْلِيهْ.

³⁴وْبَارِكْهُمْ سِمْعَانْ وْقَالْ لْمَرْيَمْ أُمُّو: «شُوفْ، الطْفُلْ هَاذَا تِبْعَثْ بَاشْ يْهَبِّطْ بَرْشَة نَاسْ وِيْعَلِّي بَرْشَة نَاسْ فِي بَنِي إِسْرَائِيلْ وِيْكُونْ أَمَارَة مِنْ عِنْدْ اللهْ بَاشْ يْعَارْضُوهَا.

³⁵وْإِنْتِ يَا مَرْيَمْ بَاشْ يُدْخُلْ فِي قَلْبِكْ سِيفْ، بَاشْ تِتْكْشِفْ النِّيَّاتْ مْتَاعْ بَرْشَة قْلُوبْ.»

³⁶وْكَانِتْ ثَمَّة مْرَا نَبِيَّة اسْمْهَا حَنَّة بِنْتْ فَنُوئِيلْ مِنْ عَرْشْ أَشِيرْ وْكَانِتْ كْبِيرَة فِي العْمُرْ وْمَا عَاشِتْ مْعَ رَاجِلْهَا كَانْ سَبْعَة سْنِينْ بَعْدْ مَا عَرّْسُوا

³⁷وْعَنْدْهَا أَرْبْعَة وِثْمَانِينْ سْنَة مِلِّي مَاتْ رَاجِلْهَا وْمَا عَرّْسِتْشْ وِعْمُرْهَا مَا بِعْدِتْ عْلَى الهَيْكِلْ وْكَانِتْ تِعْبِدْ فِي رَبِّي لِيلْ وِنْهَارْ وْهِيَ تْصَلِّي وِتْصُومْ.

³⁸جَاتْ فِي الوَقْتْ هَاذَاكَا وِبْدَاتْ تْسَبِّحْ فِي اللهْ وْتِتْكَلِّمْ عْلَى يَسُوعْ مْعَ النَّاسْ الكُلْ الِّي قَاعْدِينْ يِسْتَنَّاوْ فِي رَبِّي بَاشْ يَصْنِعْ فِدَاءْ فِي أُورْشَلِيمْ.

³⁹وْبَعْدْ مَا عَمْلُوا يُوسُفْ وْمَرْيِمْ الحَاجَاتْ الكُلْهُمْ الِّي قَالِتْ عْلِيهُمْ الشَّرِيعَة مْتَاعْ رَبِّي رَجْعُوا لِلنَّاصْرَة، المْدِينَة مْتَاعْهُمْ الِّي فِي الجَلِيلْ.

⁴⁰الوْلَدْ كَانْ يِكْبِرْ وْيِتْقَوَّى، وْكَانْ مَلْيَانْ بِالحِكْمَة وِالله نْعِمْ عْلِيهْ.

⁴¹وْوَالْدِيهْ كَانُوا كُلْ عَامْ يِمْشِيوْ لْأُورْشَلِيمْ فِي عِيدْ الفِصْحْ

⁴²وْكِالوْلِدْ وْصُلْ عُمْرُو ثْنَاشِنْ سْنَة مْشَاوْ كِالعَادَة لْأُورْشَلِيمْ فِي العِيدْ.

⁴³وْكِوْفَاوْ نْهَارَاتْ العِيدْ، رَجْعُوا وِالوْلَدْ يَسُوعْ بْقَى فِي أُورْشَلِيمْ وْهُومَا مَا كَانُوشْ يَعْرْفُوا.

⁴⁴آمَا هُومَا مْشَى فِي بَالْهُمْ الِّي هُوَ مُوجُودْ مْعَ بْقِيِّةْ النَّاسْ وِمْشَاوْ مْسَافِةْ نْهَارْ كَامِلْ وْمِنْ بَعْدْ بْدَاوْا يْلَوّْجُوا عْلِيهْ بِينْ الأقَارِبْ وِالنَّاسْ الِّي يَعْرْفُوهُمْ.

⁴⁵وْكِمَا لْقَاوْهِشْ رَجْعُوا لْأُورْشَلِيمْ يْلَوّْجُوا عْلِيهْ.

⁴⁶وْبَعْدْ ثْلاَثَة أَيَّامْ لْقُوهْ فِي الهَيْكِلْ قَاعِدْ وُسْطْ المُعَلّْمِينْ يِسْمَعْ فِيهُمْ وْيِسْإِلْ فِيهُمْ

⁴⁷وِلِّي سَمْعُوهْ الكُلْهُمْ بْقَاوْ بَاهْتِينْ فِي عِلْمُو وِالأَجْوْبَة مْتَاعُو.

⁴⁸وِسْتَغْرْبُوا وَالْدِيهْ وَقْتِلِّي شَافُوهْ وْأُمُّو قَالِتْ: «يَا وْلِيدِي عْلاَشْ عْمَلْتْ فِينَا هَكَّا؟ رَانِي آنَا وْبُوكْ كُنَّا نلَوّْجُوا عْلِيكْ وْإِحْنَا مِتْحَيّْرِينْ!»

⁴⁹جَاوِبْهُمْ وْقَالْ: «عْلاَشْ تْلَوّْجُوا عْلِيَّ؟ يَاخِي مَا تَعْرْفُوشْ الِّي آنَا يِلْزِمْنِي نْكُونْ فِي مُلْكْ بَابَا؟»

⁵⁰آمَا هُومَا مَا فِهْمُوا حَتَّى شَيْء مِلِّي قَالْهُولْهُمْ.

⁵¹مِنْ بَعْدْ هْبَطْ مْعَاهُمْ وْرَجْعُوا لِلنَّاصْرَة وْكَانْ يْطِيعْ فِيهُمْ، وِالحَاجَاتْ هَاذِي الكُلْ بْقَاتْ فِي بَالْ أُمُّو.

⁵²وْيَسُوعْ قَاعِدْ يِكْبِرْ فِي الحِكْمَة وِالقَامَة وِالنِّعْمَة عِنْدْ اللهْ وْعِنْدْ النَّاسْ.