Read Tunisian Arabic New Testament لُوقَا 20 Bible Online

لُوقَا 20 - Tunisian Arabic New Testament bible

لُوقَا 20

¹وْفِي نْهَارْ مِنْ النْهَارَاتْ كَانْ يْعَلِّمْ وِيْبَشِّرْ فِي النَّاسْ فِي الهَيْكِلْ. جَاوْ رُؤَسَاءْ الكُهَّانْ وِالكُتَّابْ مْتَاعْ اليْهُودْ وِالشْيُوخْ.

²وْقَالُوا: «قُولِلْنَا بْأَيْ سُلْطَة قَاعِدْ تَعْمِلْ فِي الشَّيْء هَاذَا؟ وِشْكُونْ عْطَاكْ السُّلْطَة هَاذِي؟»

³جَاوِبْهُمْ يَسُوعْ وْقَالْ: «وْآنَا زَادَا نِسْإِلْكُمْ سُؤَالْ وَاحِدْ وْجَاوْبُونِي عْلِيهْ.

⁴مْنِينْ جَاتْ المَعْمُودِيَّة مْتَاعْ يُوحَنَّا؟ مِالسْمَاءْ وِلاَّ مِنْ عِنْدْ النَّاسْ؟»

⁵يَاخِي تْفَاهْمُوا مَا بِينَاتْهُمْ وْقَالُوا: «إِذَا قُلْنَا "مِالسْمَاءْ" بَاشْ يْقُلْنَا: "إِمَّالاَ عْلاَشْ مَا امِّنْتُوشْ بِيهْ."

⁶وْإِذَا قُلْنَا "مِنْ عِنْدْ النَّاسْ" النَّاسْ الكُلْهُمْ بَاشْ يُرْجْمُونَا عْلَى خَاطِرْهُمْ مُقْتَنْعِينْ الِّي يُوحَنَّا نَبِي.»

⁷وَلاَّوْ قَالُوا الِّي هُومَا مَا يَعْرْفُوشْ عْلِيهَا مْنِينْ جَاتْ.

⁸قَالِلْهُمْ يَسُوعْ: «حَتَّى آنَا مَا نْقُلْكُمْشْ بْأَيْ سُلْطَة نَعْمِلْ فِي الشَّيْء هَاذَا.»

⁹وْقَالْ المَثَلْ هَاذَا لِلشَّعْبْ: «ثَمَّة وَاحِدْ زْرَعْ سَانْيَة مْتَاعْ عْنِبْ وِكْرَاهَا لِجْمَاعَة خَمَّاسَا وْسَافِرْ لِبْلاَدْ أُخْرَى لْمُدَّة طْوِيلَة.

¹⁰وْكِطَابْ العْنِبْ بْعَثْ وَاحِدْ مِالخُدَّامْ مْتَاعُو لِلخَمَّاسَا بَاشْ يَاخُذْ بَايُو مِنْ الصَّابَة مْتَاعْ العْنِبْ، آمَا الخَمَّاسَا ضَرْبُوهْ وْرَجّْعُوهْ يْدِيهْ فَارْغَة.

¹¹وَلَّى بْعَثِّلْهُمْ خْدِيمْ آخَرْ، آمَا هُومَا ضَرْبُوهْ هُوَ زَادَا وْهَانُوهْ وْرَجّْعُوهْ يْدِيهْ فَارْغَة.

¹²زَادْ عَاوِدْ بْعَثِّلْهُمْ عَبْدْ ثَالِثْ يَاخِي جَرْحُوهْ وِرْمُوهْ البَرَّا مِنْ السَّانْيَة مْتَاعْ العْنِبْ.

¹³قَالْ مُولَى العْنِبْ: "شْنُوَّة نَعْمِلْ؟ هَاوْ تَوْ نَبْعْثِلْهُمْ وِلْدِي العْزِيزْ عْلِيَّ بَالِكْشِي يْقَدّْرُوهْ."

¹⁴آمَا الخَمَّاسَا دُوبْ مَا شَافُوهْ قَالُوا لِبْعَضْهُمْ: "هَاذَا هُوَ الِّي بَاشْ يُورِثْ. هَيَّا نُقْتْلُوهْ بَاشْ الوَرْثَة تْوَلِّي مْتَاعْنَا!"

¹⁵وْخَرّْجُوهْ لْبَرَّة مِنْ السَّانْيَة مْتَاعْ العْنِبْ وْقَتْلُوهْ. إِمَّالاَ آشْ بَاشْ يَعْمِلْ مْعَاهُمْ مُولَى العْنِبْ؟

¹⁶بَاشْ يْجِي وْيِهْلِكْ الخَمَّاسَا وْيَعْطِى السَّانْيَة مْتَاعْ العْنِبْ لْغِيرْهُمْ.» وَقْتِلِّي النَّاسْ سَمْعُوا الكْلاَمْ هَاذَا قَالُوا: «لاَ، اللهْ لاَ يْقَدِّرْ.»

¹⁷آمَا يَسُوعْ خْزَرِّلْهُمْ وْقَالْ: «إِمَّالاَ آشْ يُقْصُدْ الكْتَابْ كِقَالْ: الحَجْرَة الِّي رَفْضُوهَا البَنَّايَا، وَلاَّتْ هِيَ حَجْرِةْ السَّاسْ.

¹⁸الِّي يْطِيحْ عْلَى الحَجْرَة هَاذِي يِتْكَسِّرْ، وِلِّي اطِّيحْ عْلِيهْ الحَجْرَة يِتْرْحَى.»

¹⁹وْفِي الوَقْتْ هَاذَاكَا رُؤَسَاءْ الكُهَّانْ وِالكُتَّابْ مْتَاعْ اليْهُودْ حَاوْلُوا بَاشْ يْشِدُّوهْ، عْلَى خَاطِرْهُمْ عَرْفُوا الِّي هُوَ كَانْ يُقْصُدْ فِيهُمْ هُومَا بِالمَثَلْ هَاذَا آمَا خَافُوا مِالشَّعْبْ.

²⁰وْوَلاَّوْ يْعِسُّوا عْلِيهْ، وْبَعْثُوا نَاسْ يْتَبّْعُوا فِيهْ وْحَاسْبِينْ رْوَاحْهُمْ الِّي هُومَا عْلَى نِيِّتْهُمْ، بَاشْ يْحَصّْلُوهْ بْكِلْمَة يْقُولْهَا وِيْسَلّْمُوهْ لِلوَالِي الِّي كَانِتْ عَنْدُو القُوَّة وِالسُّلْطَة بَاشْ يُحْكُمْ عْلِيهْ.

²¹يَاخِي سِأْلُوهْ وْقَالُوا: «يَا مُعَلِّمْ، نَعْرْفُوا الِّي إِنْتِ تِتْكَلِّمْ وِتْعَلِّمْ بِالصْحِيحْ، وِلِّي إِنْتِ مَا تْعَامِلْشْ النَّاسْ بِالمَظَاهِرْ وِتْعَلِّمْ فِي طْرِيقْ اللهْ بِالحَقْ.

²²يَاخِي حْلاَلْ بَاشْ نَدْفْعُوا الضَّرَايِبْ لِلقَيْصَرْ وِلاَّ لاَ؟»

²³آمَا يَسُوعْ عْرَفْ الخُبْثْ مْتَاعْهُمْ وْقَالِلْهُمْ:

²⁴«وَرِّيوْنِي بْيَاسَة مْتَاعْ فِضَّة. مْتَاعْ شْكُونْ التَّصْوِيرَة هَاذِي وِالإِسْمْ هَاذَا؟» جَاوْبُوا: «مْتَاعْ القَيْصَرْ.»

²⁵قَالِلْهُمْ: «إِمَّالاَ، أَعْطِيوْ الحَاجَاتْ مْتَاعْ القَيْصَرْ لِلقَيْصَرْ، وِالحَاجَاتْ مْتَاعْ اللهْ للهْ.»

²⁶وْمَا نَجّْمُوشْ يْحَصّْلُوهْ بْحَتَّى كِلْمَة قُدَّامْ النَّاسْ، وِبْقَاوْ مِتْعَجّْبِينْ مِلِّي سَمْعُوهْ، وْسِكْتُوا.

²⁷وْجَاوْ ضِدُّو جْمَاعَة مِالصَّدُّوقِيِّينْ الِّي يْقُولُوا الِّي مَا ثَمَّاشْ قْيَامَة بَعْدْ المُوتْ وْسِأْلُوهْ،

²⁸وْقَالُوا: «يَا مُعَلِّمْ! مُوسَى كْتِبِّلْنَا: "إِذَا كَانْ وَاحِدْ عَنْدُو خُوهْ مْعَرِّسْ وْمَاتْ وْمَا خَلاَّشْ وْلاَدْ يِلْزْمُو هُوَ يْعَرِّسْ بمَرْةْ خُوهْ وِيْجِيبْ لْخُوهْ وْلاَدْ."

²⁹وْهُومَا كَانُوا سَبْعَة إِخْوَة، الأُولاَنِي فِيهُمْ عَرِّسْ بِمْرَا وْمَاتْ مِنْ غِيرْ مَا جَابْ وْلاَدْ.

³⁰وْعَرِّسْ بِيهَا الثَّانِي.

³¹وْمِنْ بَعْدْ عَرِّسْ بِيهَا الثَّالِثْ، حَتَّى لِينْ تْزَوّْجُوهَا السَّبْعَة وْمَاتُوا مِنْ غِيرْ مَا جَابُوا وْلاَدْ

³²وْبَعْدْهُمْ الكُلْ مَاتِتْ المْرَا زَادَا.

³³إِمَّالاَ فِي يُومْ القْيَامَة المْرَا هَاذِيكَا بَاشْ تْكُونْ مَرْةْ شْكُونْ فِيهُمْ، عْلَى خَاطِرْهَا عَرّْسِتْ بِيهُمْ الكُلْهُمْ؟»

³⁴جَاوِبْهُمْ يَسُوعْ: «النَّاسْ فِي الزْمَانْ هَاذَا يْعَرّْسُوا وِيْعَرّْسُوا بِيهُمْ.

³⁵آمَا النَّاسْ الِّي يِسْتْحَقُّوا بَاشْ يَحْيَاوْ فِي الزْمَانْ هَاذَاكَا وِيْقُومُوا مِنْ بِينْ المُوتَى، رَاهُمْ لاَ يْعَرّْسُوا وْلاَ يْعَرّْسُوا بِيهُمْ

³⁶وْمُوشْ مُمْكِنْ يْمُوتُوا بَعْدْ هَاذَا كِيفْ المْلاَيْكَة، وْهُومَا وْلاَدْ اللهْ، عْلَى خَاطِرْهُمْ قَامُوا مِالمُوتْ.

³⁷وْمُوسَى بِيدُو فِي حْكَايِةْ الْعُلِّيقَة وَرَّى الِّي المُوتَى يْقُومُوا وْقَالْ: رَبِّي هُوَ إِلاَهْ إِبْرَاهِيمْ وْإِلاَهْ إِسْحَاقْ وْإِلاَهْ يَعْقُوبْ.

³⁸آمَا اللهْ رَاهُو مُوشْ إِلاَهْ مُوتَى، رَاهُو إِلاَهْ الحَيِّينْ، وْهُومَا الكُلْهُمْ حَيِّينْ عَنْدُو.»

³⁹يَاخِي قَالُوا الكُتَّابْ مْتَاعْ اليْهُودْ: «يَا مُعَلِّمْ، رَاكْ تْكَلِّمْتْ بِالقْدَا.»

⁴⁰وْبَعْدْ هَاذَا حَتَّى حَدْ مَا عَادْ يْنَجِّمْ يِسْأْلُو مِنْ جْدِيدْ عْلَى أَيْ حَاجَة أُخْرَى.

⁴¹وْقَالِلْهُمْ: «كِيفَاشْ يْقُولُوا الِّي المَسِيحْ هُوَ وِلْدْ دَاوُدْ؟

⁴²وَقْتِلِّي دَاوُدْ بِيدُو يْقُولْ فِي كْتَابْ المَزَامِيرْ: رَبِّي يْقُولْ لْرَبِّي: أُقْعُدْ عْلَى يْمِينِي

⁴³حَتَّى لِينْ نْحُطْ أَعْدَاءِكْ تَحْتْ سَاقِيكْ.

⁴⁴إِذَا كَانْ دَاوُدْ يْنَادِيلُو رَبّْنَا، إِمَّالاَ كِيفَاشْ يْكُونْ وِلْدُو؟»

⁴⁵وَقْتِلِّي كَانُوا النَّاسْ يِسْمْعُوا فِيهْ، قَالْ يَسُوعْ لِتْلاَمِذْتُو:

⁴⁶«رُدُّوا بَالْكُمْ مِنْ الكُتَّابْ مْتَاعْ اليْهُودْ الِّي يْحِبُّوا يْدُورُوا فِي جْبَايِبْ طْوَالْ وِيْحِبُّوا النَّاسْ تْسَلِّمْ عْلِيهُمْ فِي الأَسْوَاقْ، وْكِيُدْخْلُوا لِلمَجَامِعْ وِلاَّ يِمْشِيوْ لِلسَّهْرِيَّاتْ يْحِبُّوا يُقْعْدُوا فِي البْقَايِعْ الأُولَى.

⁴⁷هَاكَا الِّي يْغُمُّوا عْلَى دْيَارْ النْسَاء الِّي رْجَالْهُمْ مُوتَى وِيْوَرِّيوْ رْوَاحْهُمْ الِّي هُومَا بَاهِينْ كِيْطَوّْلُوا فِي الصَّلاَةْ. هَاذُوكُمْ بَاشْ يِتْحَاسْبُوا أَكْبِرْ حْسَابْ!»