Read Tunisian Arabic New Testament لُوقَا 22 Bible Online

لُوقَا 22 - Tunisian Arabic New Testament bible

لُوقَا 22

¹وِقْرُبْ عِيدْ الفْطِيرْ الِّي يِتْسَمَّى عِيدْ الفِصْحْ.

²وْرُؤَسَاءْ الكُهَّانْ وِالكُتَّابْ مْتَاعْ اليْهُودْ مَازَالُوا يِتْحَيّْلُوا بَاشْ يُقْتْلُوا يَسُوعْ، آمَا كَانُوا خَايْفِينْ مِالنَّاسْ.

³وِدْخَلْ الشِّيطَانْ فِي يَهُوذَا الإِسْخَرْيُوطِي وْهُوَ وَاحِدْ مِالأَثْنَاشِنْ تِلْمِيذْ.

⁴مْشَى لْرُؤَسَاءْ الكُهَّانْ وِالقَادَة مْتَاعْ حَرَسْ الهَيْكِلْ وِحْكَى مْعَاهُمْ كِيفَاشْ بَاشْ يْخُونْ يَسُوعْ.

⁵فَرْحُوا وِتْفَاهْمُوا بَاشْ يَعْطِيوْهْ فْلُوسْ.

⁶يَهُوذَا رْضَى وِقْعَدْ يِسْتَنَّى فِي الفُرْصَة بَاشْ يْخُونُو وَقْتِلِّي النَّاسْ مَا يْكُونُوشْ مُوجُودِينْ.

⁷وْجَا نْهَارْ عِيدْ الفْطِيرْ الِّي كَانْ لاَزِمْ يِتْذْبَحْ فِيهْ عَلُّوشْ عِيدْ الفِصْحْ.

⁸بْعَثْ يَسُوعْ بُطْرُسْ وْيُوحَنَّا وْقَالْ: «إِمْشِيوْ وْحَضّْرُولْنَا مَا نَاكْلُوا فِي عْشَاء الفِصْحْ.»

⁹سِأْلُوهْ: «وِينْ تْحِبْ نْحَضّْرُوهْ؟»

¹⁰قَالِلْهُمْ: «دُوبْ مَا تُدْخْلُوا لِلمْدِينَة يُعْرِضْكُمْ وَاحِدْ هَازْ قُلَّة مْتَاعْ مَاء، تَبّْعُوهْ لِلدَّارْ الِّي يُدْخْلِلْهَا.

¹¹وْقُولُوا لْمُولَى الدَّارْ هَاذِيكَا: "قَالِّكْ المُعَلِّمْ وِينْ بِيتْ الضْيُوفْ الِّي بَاشْ نَاكُلْ فِيهَا عْشَاء الفِصْحْ مْعَ تْلاَمِذْتِي."

¹²وْهُوَ بَاشْ يْوَرِّيكُمْ بِيتْ كْبِيرَة فِي الطَّاقْ الفُوقَانِي فِيهَا دْبَشْ وْحَاضْرَة، فِي البِيتْ هَاذِيكَا حَضّْرُولْنَا عْشَاء عِيدْ الفِصْحْ.»

¹³مْشَاوْ، وِلْقَاوْ كُلْ شَيْء كِيفْ مَا قَالِلْهُمْ، وْحَضّْرُوا عْشَاء الفِصْحْ.

¹⁴وْكِجَا الوَقْتْ قْعَدْ يَسُوعْ بَاشْ يَاكُلْ هُوَ وِالرُّسُلْ.

¹⁵وْقَالِلْهُمْ: «شْتْهِيتْ بَرْشَة بَاشْ نَاكُلْ مِنْ عِيدْ الفِصْحْ مْعَاكُمْ قْبَلْ مَا نِتْعَذِّبْ.

¹⁶رَانِي نْقُولِلْكُمْ: مَا عَادِشْ بَاشْ نَاكُلْ مِنُّو مَرَّة أُخْرَى حَتَّى لِينْ يْتِمْ الشَّيْء المَقْصُودْ بِيهْ فِي مَمْلِكْةْ اللهْ.»

¹⁷وْكِخْذَا الكَاسْ شْكَرْ وْقَالْ: «خُوذُوا هَاذَا وْإِقْسْمُوهْ مَا بِينَاتْكُمْ.

¹⁸نْقُولِلْكُمْ: مِنْ تَوْ مَا عَادِشْ بَاشْ نُشْرُبْ مِنْ العَصِيرْ مْتَاعْ العْنِبْ حَتَّى لِينْ تْجِي مَمْلِكْةْ اللهْ.»

¹⁹وْكِخْذَا الْخُبْزْشْكَرْ اللهْ وِقْسِمْ وِعْطَاهُمْ وْقَالْ: «هَاذَا بَدْنِي الِّي يِتْعْطَى عْلَى خَاطِرْكُمْ. أَعْمْلُوا الشَّيْء هَاذَا بَاشْ تِتْذَكّْرُونِي.»

²⁰وِخْذَا كَاسْ بَعْدْ العْشَاء وْقَالْ: «الكَاسْ هَاذَا هُوَ العَهْدْ الجْدِيدْ بْدَمِّي الِّي سَالْ عْلَى خَاطِرْكُمْ.

²¹وْرَاهِي اليِدْ الِّي بَاشْ تْسَلِّمْنِي مُوجُودَة مْعَايَا عْلَى المِيدَة.

²²رَانِي آنَا إِبْنْ الإِنْسَانْ لاَزِمْنِي نْمُوتْ كِيفْ مَا تْقَدِّرْلِي وْيَا وِيلُو الرَّاجِلْ الِّي بَاشْ يْخُونِّي! الرَّاجِلْ هَاذَاكَا خِيرْلُو لُوكَانْ مَا تُولِدْشْ.»

²³يَاخِي بْدَاوْا التْلاَمْذَة يِسْأْلُوا فِي بْعَضْهُمْ عْلَى شْكُونُو فِيهُمْ الِّي بَاشْ يَعْمِلْ العَمْلَة هَاذِي.

²⁴وِبْدَاوْا يِتْنَاقْشُوا عْلَى شْكُونُو فِيهُمْ الِّي أَعْظِمْ مِالأُخْرِينْ.

²⁵يَاخِي قَالِلْهُمْ يَسُوعْ: «المُلُوكْ مْتَاعْ الشْعُوبْ يِتْحَكّْمُوا فِيهُمْ وِلِّي عِنْدْهُمْ سُلْطَة يْحِبُّوهُمْ يْقُولُوا عْلِيهُمْ الِّي هُومَا لاَهِينْ بِيهُمْ.

²⁶آمَا إِنْتُومَا مَا يِلْزِمْشْ الشَّيْء هَاذَا يْكُونْ مَا بِينَاتْكُمْ. بِالعَكْسْ خَلِّي الكْبِيرْ فِيكُمْ يْكُونْ كِيفْ الصْغِيرْ، وِلِّي يْقُودْ كِيفْ الِّي يِخْدِمْ.

²⁷شْكُونْ هُوَ الكْبِيرْ: الِّي قَاعِدْ عْلَى المِيدَة وِلاَّ الِّي يِخْدِمْ فِيهْ؟ يَاخِي مُوشْ الِّي قَاعِدْ عْلَى المِيدَة؟ آمَا آنَا فِي وُسْطْكُمْ كِيفْ الِّي يِخْدِمْ.

²⁸إِنْتُومَا الِّي ثْبِتُّوا مْعَايَا فِي وَقْتْ الشِّدَّة.

²⁹آنَا نَعْطِيكُمْ مَمْلْكَة كِيفْ مَا بَابَا عْطَانِي مَمْلْكَة.

³⁰بَاشْ تَاكْلُوا وْتُشْرْبُوا عْلَى طَاوِلْتِي فِي المَمْلْكَة مْتَاعِي وْتُقْعْدُوا عْلَى العَرْشْ وْتُحْكْمُوا عْلَى العْرُوشَاتْ الأَثْنَاشْ مْتَاعْ بَنِي إِسْرَائِيلْ.»

³¹وْقَالْ الرَّبْ: «سِمْعَانْ! سِمْعَانْ! هَاوْ اللهْ سْمَحْ لِلشِّيطَانْ بَاشْ يْغَرْبِلْكُمْ كِيمَا يِتْغَرْبِلْ القَمْحْ.

³²آمَا آنَا صَلِّيتْ مِنْ أَجْلِكْ بَاشْ إِيمَانِكْ مَا يْضِيعِشْ، وْإِنْتِ وَقْتِلِّي تَرْجِعْ قَوِّي إِخْوْتِكْ.»

³³يَاخِي قَالُّو بُطْرُسْ: «يَا رَبْ آنَا مُسْتْعَدْ حَتَّى بَاشْ نِمْشِي مْعَاكْ لِلحَبْسْ وْلِلمُوتْ زَادَا.»

³⁴قَالْ يَسُوعْ: «آنَا نْقُلِّكْ يَا بُطْرُسْ، رَاهُو اليُومْ مَا يْصِيحْ السَّرْدُوكْ إِلاَّ بَعْدْ مَا تْكُونْ نْكَرْتْ ثْلاَثَة مَرَّاتْ الِّي إِنْتِ تَعْرِفْنِي.»

³⁵وْمِنْ بَعْدْ قَالِلْهُمْ: «كِبْعَثْتْكُمْ من غِيرْ فْلُوسْ وْلاَ صُرَّة وْلاَ صَنْدَالْ، اسْتْحَقِّيتُوشْ لْحَاجَة؟» قَالُوا: «لاَ!»

³⁶قَالِلْهُمْ: «إِمَّالاَ تَوَّا الِّي عَنْدُو فْلُوسْ، يْهِزّْهُمْ وِلِّي عَنْدُو صُرَّة كِيفْ كِيفْ، وِلِّي مَاعَنْدُوشْ يْبِيعْ الكَبُّوطْ مْتَاعُو وْيِشْرِي سِيفْ.

³⁷رَانِي نْقُولِلْكُمْ الِّي لاَزِمْ يْتِمْ الِّي تِكْتِبْ عْلِيَّ فِي الكْتَابْ المُقَدَّسْ: "وْحِسْبُوهْ وَاحِدْ مِالمُجْرْمِينْ" رَاهِي الحَاجَاتْ الِّي تْكِتْبِتْ عْلِيَّ لاَزِمْهَا اتِّمْ.»

³⁸قَالُوا التْلاَمْذَة: «يَا رَبْ هَاوْ عِنْدْنَا زُوزْ سْيُوفَا» قَالِلْهُمْ يَسُوعْ: «يِكْفِي!»

³⁹مِنْ بَعْدْ قَامْ يَسُوعْ وِمْشَى كِعَادْتُو لِجْبَلْ الزِّيتُونْ وْتَبّْعُوهْ التْلاَمْذَة زَادَا.

⁴⁰وْكِوْصُلْ لِلبُقْعَة قَالِلْهُمْ: «صَلِّيوْ بَاشْ مَا تُحْصْلُوشْ فِي تَجْرْبَة.»

⁴¹وِبْعِدْ عْلِيهُمْ شْوَيَّة، وِرْكَعْ وِبْدَا يْصَلِّي.

⁴²وْقَالْ: «يَا بَابَا كَانْ تْحِبْ بَعِّدْ عْلِيَّ كَاسْ المُرْ هَاذَا، آمَا خَلِّي يْكُونْ الشَّيْء الِّي تْحِبْ عْلِيهْ إِنْتِ، مُوشْ الِّي نْحِبْ عْلِيهْ آنَا.»

⁴³[وِظْهُرْلُو مَلاَكْ مِالسْمَاءْ يْقَوِّي فِيهْ.

⁴⁴وَقْتِلِّي كَانْ فِي غَصْرَة كْبِيرَة بْدَا يْصَلِّي بْقُوَّة حَتَّى لِينْ وَلَّى العْرَقْ مْتَاعُو هَابِطْ عْلَى الأَرْضْ كِيفْ قَطْرَاتْ الدَّمْ.]

⁴⁵مِنْ بَعْدْ قَامْ مِالصَّلاَةْ وِرْجَعْ لِتْلاَمِذْتُو، يَاخِي لْقَاهُمْ رَاقْدِينْ مِنْ كَثْرِةْ مَا كَانُوا حْزَانَى.

⁴⁶وْقَالِلْهُمْ: «شْبِيكُمْ رَاقْدِينْ؟ قُومُوا صَلِّيوْ بَاشْ مَا تُحْصْلُوشْ فِي تَجْرْبَة.»

⁴⁷وَقْتِلِّي يَسُوعْ كَانْ يِتْكَلِّمْ إِذَا بِيهُمْ نَاسْ جَايِينُو وِمْعَاهُمْ يَهُوذَا الِّي هُوَ وَاحِدْ مِالأَثْنَاشْ وْكَانْ يِمْشِي مِالقُدَّامْ وِقْرُبْ مِنْ يَسُوعْ بَاشْ يْسَلِّمْ عْلِيهْ بِالوِجْهْ.

⁴⁸قَالُّو يَسُوعْ: «يَا يَهُوذَا يَاخِي بْبُوسَة تْسَلِّمْنِي آنَا إِبْنْ الإِنْسَانْ؟»

⁴⁹وِالتْلاَمْذَة الِّي مْعَاهْ وَقْتِلِّي شَافُوا شْنُوَّة الِّي يَاقَعْ، قَالُوا: «يَا رَبْ نَضْرْبُوا بِالسْيُوفَا؟»

⁵⁰وِضْرَبْ وَاحِدْ مِنْهُمْ عَبْدْ مْتَاعْ كْبِيرْ الكُهَّانْ وْقَصّْلُو وِذْنُو لِيمِينْ.

⁵¹جَاوِبْ يَسُوعْ وْقَالْ: «يِكْفِي، حَدّْكُمْ هْنَا!» وْمَسْ وْذِنْ العَبْدْ وِشْفَاهْ.

⁵²وْقَالْ يَسُوعْ لْرُؤَسَاءْ الكُهَّانْ وِالقَادَة مْتَاعْ حَرَسْ الهَيْكِلْ وِالشْيُوخْ الِّي جَاوْهْ: «يَاخِي رَدِّيتُونِي مُجْرِمْ جَايِينِّي بِالسْيُوفَا وِالعْصِي؟

⁵³كُلْ يُومْ كُنْتْ مَا بِينَاتْكُمْ نْعَلِّمْ فِي الهَيْكِلْ وْمَا حَطِّيتُوشْ يْدِيكُمْ عْلِيَّ، آمَا هَاذَا رَاهُو الوَقْتْ الِّي تْسَيْطْرُوا فِيهْ إِنْتُومَا وْقُوِّةْ الظْلاَمْ.»

⁵⁴وْكِشَدُّوهْ هَزُّوهْ وِمْشَاوْ حَتَّى لِينْ دَخْلُوا بِيهْ لْدَارْ كْبِيرْ الكُهَّانْ وْبُطْرُسْ كَانْ يْتَبَّعْ فِيهْ مِنْ بْعِيدْ.

⁵⁵وَقْتِلِّي شَعّْلُوا النَّارْ فِي الوُسْطِيَّة مْتَاعْ الدَّارْ وْقَعْدُوا بِحْذَاهَا، قْعَدْ بُطْرُسْ مْعَاهُمْ.

⁵⁶يَاخِي ثَمَّة خْدِيمَة شَافِتُّو قَاعِدْ بِحْذَا النَّارْ، ثَبّْتِتْ فِيهْ وْقَالِتْ: «هَاذَا زَادَا كَانْ مْعَاهْ.»

⁵⁷آمَا بُطْرُسْ نْكَرْ وْقَالْ: «يَا مْرَا آنَا مَا نَعْرْفُوشْ!»

⁵⁸وْبَعْدْ شْوَيَّة شَافُو وَاحِدْ آخَرْ وْقَالْ: «إِنْتِ زَادَا مِنْهُمْ.» آمَا بُطْرُسْ قَالْ: «يَا بَشَرْ مَا نِيشْ آنَا!»

⁵⁹وْبَعْدْ مَا تْعَدَّاتْ سَاعَة تَقْرِيبْ ثَمَّة وَاحِدْ آخَرْ شَدْ صْحِيحْ وْقَالْ: «بِالحَقْ هَاذَا زَادَا كَانْ مْعَاهْ، عْلَى خَاطْرُو مِالجَلِيلْ.»

⁶⁰قَالْ بُطْرُسْ: «يَا بَشَرْ مَا نِيشْ فَاهْمِكْ فَاشْ قَاعِدْ تْقُولْ!» وْبِالوَقْتْ وْهُوَ مَازَالْ يِتْكَلِّمْ السَّرْدُوكْ صَاحْ.

⁶¹تْلَفِّتْ الرَّبْ وِخْزَرْ لْبُطْرُسْ، يَاخِي تْذَكِّرْ بُطْرُسْ كِلْمِةْ الرَّبْ كِقَلُّو: «قْبَلْ مَا يْصِيحْ السَّرْدُوكْ تْكُونْ إِنْتِ نْكَرْتْنِي ثْلاَثَة مَرَّاتْ.»

⁶²وْقَامْ بُطْرُسْ وِخْرَجْ لْبَرَّة وِبْكَى بَرْشَة.

⁶³وِالرْجَالْ الِّي كَانُوا يْعِسُّوا عْلَى يَسُوعْ، بْدَاوْا يِتْمَسْخْرُوا عْلِيهْ وْيَضْرْبُوا فِيهْ.

⁶⁴وِيْغَمّْضُولُو فِي عِينِيهْ وْيِسْأْلُوا فِيهْ: «تْرَا تْنَبَّأ وْطَلِّعْ شْكُونْ الِّي ضَرْبِكْ؟»

⁶⁵وْكَانُوا يْعَايْرُوا فِيهْ ابَّرْشَة حَاجَاتْ خَايْبَة.

⁶⁶وْكِطْلَعْ النْهَارْ عَمْلُوا رُؤَسَاءْ الكُهَّانْ وِالكُتَّابْ مْتَاعْ اليْهُودْ إِجْتِمَاعْ المَجْلِسْ مْتَاعْ اليْهُودْ وْهَزُّوهْ لْغَادِي.

⁶⁷وْقَالُوا: «إِذَا كَانِكْ إِنْتِ المَسِيحْ قُلْنَا!» قَالِلْهُمْ: «إِذَا قُلْتِلْكُمْ مَا كُمْشْ بَاشْ تْصَدّْقُونِي.

⁶⁸وْإِذَا سْإِلْتْكُمْ مَا كُمْشْ بَاشْ تْجَاوْبُونِي.

⁶⁹آمَا آنَا إِبْنْ الإِنْسَانْ مِنْ تَوَّا بَاشْ نْكُونْ قَاعِدْ عْلَى يْمِينْ اللهْ القَادِرْ عْلَى كُلْ شَيْء.»

⁷⁰يَاخِي قَالُوا الكُلْهُمْ: «إِمَّالاَ إِنْتِ إِبْنْ اللهْ؟» قَالِلْهُمْ: «إِنْتُومَا قُلْتُوا الِّي آنَا هُوَ!»

⁷¹يَاخِي قَالُوا: «مَازِلْنَاشْ نِحْتَاجُوا تَوَّا لِشْهُودْ؟ هَانَا سْمَعْنَاهْ شْهِدْ عْلَى رُوحُو بْفُمُّو.»