Read Tunisian Arabic New Testament لُوقَا 23 Bible Online

لُوقَا 23 - Tunisian Arabic New Testament bible

لُوقَا 23

¹وْقَامُوا الكُلْهُمْ وْهَزُّوا يَسُوعْ لْبِيلاَطُسْ.

²وِبْدَاوْا يِتْهْمُوا فِيهْ وِيْقُولُوا: «هَاذَا لْقِينَاهْ يْغَلِّطْ فِي شَعْبْنَا، وِيْقُولْ الِّي مَا يِلْزِمْنَاشْ نَدْفْعُوا الضَّرَايِبْ لِلقَيْصَرْ وِيْقُولْ الِّي هُوَ المَسِيحْ المَلِكْ.»

³سِأْلُو بِيلاَطُسْ: «إِنْتِ مَلِكْ اليْهُودْ؟» جَاوْبُو يَسُوعْ: «إِنْتِ قُلْتْ!»

⁴قَالْ بِيلاَطُسْ لْرُؤَسَاءْ الكُهَّانْ وِالنَّاسْ: «مَا لْقِيتْ حَتَّى تُهْمَة فِي الرَّاجِلْ هَاذَا.»

⁵آمَا هُومَا شَدُّوا صْحِيحْ وْقَالُوا: «رَاهُو يْهَيِّجْ فِي الشَّعْبْ بِالتَّعْلِيمْ مْتَاعُو فِي مَنْطِقْةْ اليَهُودِيَّة الكُلْ مِالجَلِيلْ حَتَّى لِهْنَا.»

⁶وْكِسْمَعْ بِيلاَطُسْ كِلْمِةْ الجَلِيلْ سْإِلْ: «يَاخِي الرَّاجِلْ هَاذَا مِالجَلِيلْ؟»

⁷وْكِعْرَفْ الِّي يَسُوعْ تَابِعْ لْوِلاَيِةْ هِيرُودُسْ، بْعَثْهُولُو، وْهِيرُودُسْ بِيدُو كَانْ فِي أُورْشَلِيمْ فِي النْهَارَاتْ هَاذُوكُمْ.

⁸وْهِيرُودُسْ كَانْ يِتْمَنَّى مِنْ مُدِّةْ طْوِيلَة بَاشْ يْشُوفْ يَسُوعْ، هَاذَاكَا عْلاَشْ فْرَحْ بَرْشَة وَقْتِلِّي شَافُو عْلَى خَاطْرُو سْمَعْ عْلِيهْ بَرْشَة حَاجَاتْ وِيْحِبْ يْشُوفُوا يَعْمِلْ فِي مُعْجْزَة.

⁹وْسِأْلُو عْلَى بَرْشَة حَاجَاتْ آمَا يَسُوعْ مَا جَاوْبُوشْ.

¹⁰وْوُقْفُوا رُؤَسَاءْ الكُهَّانْ وِالكُتَّابْ مْتَاعْ اليْهُودْ وِبْدَاوْا يِتْهْمُوا فِيهْ بْقُوَّة.

¹¹وْهِيرُودُسْ وِالجُنُودْ مْتَاعُو تْمَسْخْرُوا عْلَى يَسُوعْ وْهَانُوهْ وْلَبّْسُو هِيرُودُسْ جِبَّة مُضْخْمَة وْرَجّْعُو لْبِيلاَطُسْ.

¹²وْفِي النْهَارْ هَاذَاكَا هِيرُودُسْ وْبِيلاَطُسْ وَلاَّوْ صْحَابْ بَعْدْ مَا كَانُوا قْبَلْ مِتْعَارْكِينْ.

¹³عَيِّطْ بِيلاَطُسْ عْلَى رُؤَسَاءْ الكُهَّانْ وِالأَعْيَانْ وِالنَّاسْ.

¹⁴وْقَالِلْهُمْ: «جِبْتُولِي الرَّاجِلْ هَاذَا عْلَى إِنُّو يْغَلِّطْ فِي النَّاسْ، وْهَاوْ آنَا بَعْدْ مَا ثَبِّتّْ فِي كُلْ شَيْء قُدَّامْكُمْ، مَا لْقِيتِشْ فِيهْ حَتَّى تُهْمَة مِالتُّهَمْ الِّي تْهِمْتُوهْ بِيهُمْ.

¹⁵وْهِيرُودُسْ زَادَا مَا لْقَاشْ عْلِيهْ حَتَّى تُهْمَة، وْرَجّْعُو لِينَا، إِمَّالاَ هُوَ مَا عْمَلْشْ حَتَّى شَيْء يِسْتَاهِلْ عْلِيهْ المُوتْ.

¹⁶وْآنَا بَاشْ نَضْرْبُوا بِالسُّوطْ وِنْسيّْبُو.»

¹⁷[وْفِي كُلْ عِيدْ كَانْ لاَزِمْ عْلَى بِيلاَطُسْ بَاشْ يْسَيّْبِلْهُمْ وَاحِدْ مِالحَبْسْ.]

¹⁸آمَا هُومَا الكُلْهُمْ صَاحُوا: «أُقْتُلْ هَاذَا! وْسَيّْبِلْنَا بَارَابَاسْ!»

¹⁹وْبَارَابَاسْ كَانْ فِي الحَبْسْ بِسْبَبْ خُوضَة تْعَمْلِتْ فِي المْدِينَة وْزَادَا بِسْبَبْ جْريمِةْ قْتَلْ.

²⁰يَاخِي كَلِّمْهُمْ بِيلاَطُسْ مَرَّة أُخْرَى وْهُوَ حَابِبْ يْسَيِّبْ يَسُوعْ.

²¹جَاوْبُوهْ وْهُومَا يْصِيحُوا: «اُصْلْبُو! اُصْلْبُو!»

²²وْعَاوِدْ سْإِلْهُمْ مَرَّة ثَالْثَة: «شْنُوَّة الشَّرْ الِّي عَمْلُو؟ مَا لْقِيتْ عْلِيهْ حَتَّى تُهْمَة يِسْتَاهِلْ عْلِيهَا المُوتْ.»

²³شَدُّوا صْحِيحْ وْطُلْبُوا مِنُّو بَاشْ يُصْلْبُو وْهُومَا يْصِيحُوا بْصُوتْ عَالِي وْغَلْبُوهْ بِصْيَاحْهُمْ.

²⁴وِحْكُمْ بِيلاَطُسْ بَاشْ الشَّيْء الِّي يْحِبُّوا عْلِيهْ يِتْعْمَلْ.

²⁵وْسَيِّبْ بَارَابَاسْ الِّي كَانْ فِي الحَبْسْ بِسْبَبْ الخُوضَة وِالقَتْلْ: هَاذَاكَا الِّي طَلْبُوا بَاشْ يِتْسَيِّبْ. وْسَلِّمْ يَسُوعْ بَاشْ يِتْحْكَمْ عْلِيهْ كِيفْ مَا حَبُّوا.

²⁶وَقْتِلِّي هُومَا هَازِّينُو بَاشْ يُصْلْبُوهْ شَدُّوا وَاحِدْ مِنْ مَنْطِقْةْ قِيرِينَة إِسْمُو سِمْعَانْ كَانْ جَايْ مِالرِّيفْ، حَطُّوا عْلِيهْ الصَّلِيبْ بَاشْ يْهِزُّو وْيِمْشِي وْرَاء يَسُوعْ.

²⁷وْكَانُوا يْتَبّْعُوا فِيهْ بَرْشَة نَاسْ وْفِيهُمْ نْسَاء يِبْكِيوْ وْيِنْدْبُوا

²⁸تْلَفّْتِلْهُمْ يَسُوعْ وْقَالِلْهُمْ: «يَا بْنَاتْ أُورْشَلِيمْ مَا تِبْكِيوْشْ عْلِيَّ آمَا ابْكِيوْ عْلَى رْوَاحْكُمْ وِعْلَى وْلاَدْكُمْ.

²⁹هَاوْ بَاشْ تْجِي أَيَّامَاتْ وَقْتِلِّي النَّاسْ يْقُولُوا: "صَحَّة لِلِّي مَا ضْنَاوْشْ وِلِلكْرُوشْ الِّي مَا وِلْدِتْشْ وِالصْدُورْ الِّي مَا رَضّْعِتْشْ."

³⁰وْوَقْتْهَا بَاشْ يْقُولُوا لِلجْبَالْ: طِيحْ عْلِينَا وْلِلبْلاَيِصْ العَالْيَة ارْدِمْنَا.

³¹وْإِذَا كَانُوا العُودْ الأَخْضَرْ يَعْمْلُوا فِيهْ هَكَّا، إِمَّالاَ العُودْ اليَابِسْ آشْ بَاشْ يَجْرَالُو؟»

³²وْهَزُّوا زَادَا زُوزْ مُجْرْمِينْ مْعَ يَسُوعْ بَاشْ يُقْتْلُوهُمْ.

³³وْكِوُصْلُوا لِلبُقْعَة الِّي تِتْسَمَّى الجُمْجْمَة، صَلْبُوهْ الغَادِي مْعَ زُوزْ مْجَرّْمَة وَاحِدْ عْلَى يْمِينُو وْوَاحِدْ عْلَى يْسَارُو.

³⁴وْقَالْ يَسُوعْ: «يَا بَابَا إِغْفْرِلْهُمْ رَاهُمْ مَا يَعْرْفُوشْ فَاشْ قَاعْدِينْ يَعْمْلُوا.» وْعَمْلُوا الجُنُودْ قُرْعَة عْلَى لِبْسْتُو وْقَسْمُوهَا.

³⁵وِالنَّاسْ وُقْفُوا الغَادِي يِتْفَرّْجُوا فِيهْ وِالشْيُوخْ مْتَاعْهُمْ يِتْمَسْخْرُوا عْلِيهْ وِيْقُولُوا: «خَلِّصْ الأُخْرِينْ، تْرَى خَلِّيهْ يْخَلِّصْ رُوحُو إِذَا كَانُو هُوَ المَسِيحْ الِّي خْتَارُو اللهْ.»

³⁶وْزَادُوا تْمَسْخْرُوا عْلِيهْ العَسْكِرْ وْكَانُوا يَطْلْعُولُو وْيَعْطِيوْ فِيهْ فِي الخَلْ.

³⁷وِيْقُولُوا: «إِذَا كُنْتْ إِنْتِ مَلِكْ اليْهُودْ خَلِّصْ رُوحِكْ.»

³⁸وْكَانِتْ ثَمَّة لُوحَة مْعَلّْقَة فُوقْ رَاسُو مَكْتُوبْ فِيهَا[٤]: «هَاذَا هُوَ مَلِكْ اليْهُودْ.»

³⁹وْوَاحِدْ مِالمُجْرْمِينْ الِّي تْصَلْبُوا مْعَاهْ بْدَا يَكْفِرْ بِيهْ وِيْقُولْ: «مُوشْ إِنْتِ المَسِيحْ؟ إِمَّالاَ خَلِّصْ رُوحِكْ وْخَلِّصْنَا.»

⁴⁰آمَا المُجْرِمْ الآخَرْ وَبّْخُو وْقَالُّو: «حَتَّى وْإِنْتِ مَحْكُومْ عْلِيكْ بِالمُوتْ كِيفُو بَاقِي مَاكِشْ خَايِفْ مِنْ رَبِّي.

⁴¹أَحْنَا تِحْكَمْ عْلِينَا بِالعَدْلْ وِلْقِينَا فِعْلْنَا. آمَا الرَّاجِلْ هَاذَا مَا عْمَلْ حَتَّى حَاجَة غَالْطَة.»

⁴²مِنْ بَعْدْ قَالْ: «يَا يَسُوعْ اتْذَكِّرْنِي وَقْتْ تْجِي فِي مَمْلِكْتِكْ.»

⁴³قَالُّو يَسُوعْ: «نْقُلِّكْ الحَقْ اليُومْ تْكُونْ مْعَايَا فِي الجَنَّة.»

⁴⁴وْتَقْرِيبْ مْعَ نُصْفْ نْهَارْ ظْلاَمِتْ الدِّنْيَا الكُلْهَا حَتَّى لِلثْلاَثَة مْتَاعْ العْشِيَّة.

⁴⁵وِتْشَقْ حْجَابْ الهَيْكِلْ مِالوُسْطْ.

⁴⁶وْصَاحْ يَسُوعْ بْصُوتْ عَالِي بَرْشَة وْقَالْ: «يَا بَابَا نْسَلِّمْ رُوحِي بِينْ يْدِيكْ!» وْكِقَالْ الكْلاَمْ هَاذَا طَلْعِتْ رُوحُو.

⁴⁷وْكِشَافْ القَايِدْ مْتَاعْ المْيَاةْ عَسْكْرِي آشْ صَارْ مَجِّدْ اللهْ وْقَالْ: «بِالحَقْ الإِنْسَانْ هَاذَا كَانْ بَارْ.»

⁴⁸وِالنَّاسْ الِّي تْلَمُّوا بَاشْ يْشُوفُوهْ وْهُومَا يُصْلْبُوا فِيهْ، وَقْتِلِّي شَافُوا الِّي جْرَى رَوّْحُوا لِدْيَارْهُمْ وْهُومَا يَضْرْبُوا فِي صْدُورَاتْهُمْ.

⁴⁹وِلِّي يَعْرْفُوهْ الكُلْهُمْ بْمَا فِيهُمْ النْسَاء الِّي تَبّْعُوهْ مِالجَلِيلْ، كَانُوا وَاقْفِينْ يِتْفَرّْجُوا مِالبْعِيدْ عْلَى الشَّيْء الِّي صَارْ الكُلُّو.

⁵⁰وْكَانْ ثَمَّة وَاحِدْ فِي المَجْلِسْ مْتَاعْ اليْهُودْ إِسْمُو يُوسُفْ وْكَانْ رَاجِلْ طَيِّبْ وْبَارْ.

⁵¹وْمَا كَانِشْ مْوَافِقْ عْلَى القَرَارْ مْتَاعْ أَعْضَاءْ المَجْلِسْ وْعَمْلِتْهُمْ. وْيُوسُفْ هَاذَا أَصْلُو مِالرَّامَة الِّي هِيَ وَحْدَة مِنْ المُدُنْ مْتَاعْ اليْهُودْ وْكَانْ يِسْتَنَّى فِي مَمْلِكْةْ اللهْ

⁵²مْشَى لْبِيلاَطُسْ وِطْلَبْ مِنُّو جُثِّةْ يَسُوعْ.

⁵³مِنْ بَعْدْ هَبّْطُو مِنْ فُوقْ الصَّلِيبْ وْكَفّْنُو وْحَطُّو فِي قْبَرْ مَحْفُورْ فِي الحْجَرْ مَا تِدْفِنْ فِيهْ حَتَّى وَاحِدْ قْبَلْ.

⁵⁴وِالشَّيْء هَاذَا كَانْ فِي يُومْ التَّحْضِيرْ لِلسِّبْتْ الِّي قْرِيبْ يِبْدَى.

⁵⁵وِالنْسَاء الِّي جَاوْ مْعَ يَسُوعْ مِالجَلِيلْ تَبّْعُوا يُوسُفْ، وْشَافُوا القْبَرْ وِالجُثَّة كِيفَاشْ تْحَطِّتْ فِيهْ.

⁵⁶رَجْعُوا وْحَضّْرُوا العْقَاقِرْ وِالقْوَارِصْ. وِرْتَاحُوا نْهَارْ السِّبْتْ كِيفْ مَا وَصَّاتْ الشَّرِيعَة.