Read Tunisian Arabic New Testament لُوقَا 24 Bible Online

لُوقَا 24 - Tunisian Arabic New Testament bible

لُوقَا 24

¹وِنْهَارْ الأَحَدْ فِي الصْبَاحْ بِكْرِي جَاوْ النْسَاء لِلقْبَرْ هَازِّينْ القْوَارِصْ الِّي حَضّْرُوهَا.

²يَاخِي لْقَاوْ الحَجْرَة تْكَرْكْبِتْ مِنْ فُمْ القْبَرْ.

³وْكِدَخْلُوا مَا لْقُوشْ البْدَنْ مْتَاعْ الرَّبْ يَسُوعْ.

⁴وَقْتِلِّي هُومَا حَايْرِينْ فِي الِّي صَارْ إِذَا بْزُوزْ رْجَالْ لاَبْسِينْ حْوَايِجْ تِلْمَعْ وُقْفُوا بِجْنَبْهُمْ.

⁵خَافُوا وْهَبّْطُوا رُوسْهُمْ فِي اللأَرْضْ، وَقْتْهَا قَالُولْهُمْ الزُّوزْ الرْجَالْ: «عْلاَشْ تْلَوّْجُوا عْلَى الحَيْ بِينْ المُوتَى؟

⁶هُوَ مُوشْ هْنَا، آمَا رَاهُو قَامْ، تْذَكّْرُوا آشْ قَالِلْكُمْ وَقْتِلِّي كَانْ فِي الجَلِيلْ؟

⁷وَقْتِلِّي قَالْ الِّي هُوَ إِبْنْ الإِنْسَانْ لاَزْمُو يْسَلّْمُوهْ لْنَاسْ مِذْنْبِينْ وْيِتْصْلَبْ وْفِي النْهَارْ الثَّالِثْ يْقُومْ.»

⁸يَاخِي تْذَكّْرُوا كْلاَمُو.

⁹وَقْتِلِّي رَجْعُوا مِالقْبَرْ خَبّْرُوا الرُّسُلْ لِحْدَاشْ وِالأُخْرِينْ الكُلْهُمْ بِالحَاجَاتْ الِّي صَارُوا.

¹⁰وِلِّي خَبّْرُوا الرُّسُلْ بِالشَّيْء هَاذَا هُومَا مَرْيَمْ المَجْدَلِيَّة، وْيُوَنَّا وْمَرْيِمْ أُمْ يَعْقُوبْ وِالنْسَاء الأُخْرِينْ الِّي مْشَاوْ مْعَاهُمْ لِلقْبَرْ.

¹¹وِالرُّسُلْ ظْهَرِّلْهُمْ الِّي هُومَا يَحْكِيوْ فِي حْكَايَاتْ فَارْغَة وْمَا صَدّْقُوهُمْشْ.

¹²آمَا بُطْرُسْ قَامْ وِجْرَى لِلقْبَرْ، طَلْ وْشَافْ الكْفَنْ مَلْفُوفْ وَحْدُو وْمِنْ بَعْدْ رَوِّحْ وْهُوَ مِتْعَجِّبْ مِلِّي صَارْ.

¹³وْفِي النْهَارْ هَاذَاكَا بِيدُو ثَمَّة زُوزْ مِالتْلاَمْذَة كَانُوا مَاشِينْ لْقَرْيَة تِبْعِدْ حْدَاشِنْ كِيلُومِتْرْ عْلَى أُورْشَلِيمْ اسْمْهَا عِمْوَاسْ.

¹⁴وْكَانُوا مَاشِينْ وْيِتْكَلّْمُوا عَلِّي صَارْ الكُلُّو.

¹⁵وْوَقْتِلِّي هُومَا يِتْحَدّْثُوا وْيِتْنَاقْشُوا إِذَا بْيَسُوعْ قْرُبِّلْهُمْ وِمْشَى مْعَاهُمْ.

¹⁶شَافُوهْ آمَا مَا عَرْفُوهِشْ.

¹⁷وِسْإِلْهُمْ: «فَاشْ قَاعْدِينْ تِتْحَدّْثُوا وْإِنْتُومَا مَاشِينْ؟» وُقْفُوا وْظَاهِرْ عْلَى وْجُوهْهُمْ الحُزْنْ.

¹⁸وْجَاوِبْ وَاحِدْ مِنْهُمْ إِسْمُو كْلِيُوبَاسْ وْقَالُّو: «يَاخِي إِنْتِ وَحْدِكْ البَرَّانِي الِّي جِيتْ لْأُورْشَلِيمْ وْمَا تَعْرِفْشْ آشْ وْقَعْ فِي النْهَارَاتْ هَاذُومَا؟»

¹⁹قَالِلْهُمْ: «شْنُوَّة الِّي صَارْ؟» قَالُوا: «الحَاجَاتْ الِّي وُقْعِتْ لْيَسُوعْ النَّاصْرِي الِّي كَانْ نَبِي قَادِرْ بِالقَوْلْ وْبِالفِعْلْ قُدَّامْ اللهْ وْقُدَّامْ النَّاسْ الكُلْ.

²⁰وْكِيفَاشْ رُؤَسَاءْ الكُهَّانْ وِالأَعْيَانْ مْتَاعْنَا سَلّْمُوهْ بَاشْ يِتْحْكَمْ عْلِيهْ بِالمُوتْ وْصَلْبُوهْ.

²¹آمَا أَحْنَا كَانْ عِنْدْنَا أَمَلْ الِّي هُوَ بَاشْ يِفْدِي بَنِي إِسْرَائِيلْ، وْزِيدْ عْلَى هَاذَا الكُلْ، اليُومْ هُوَ النْهَارْ الثَّالِثْ مِلِّي صَارْ الشَّيْء هَاذَا.

²²وْأَكْثِرْ مِنْ هَاذَا ثَمَّة نْسَاء مِنْ جْمَاعِتْنَا حَيّْرُونَا وَقْتِلِّي مْشَاوْ لِلقْبَرْ فِي الصْبَاحْ بِكْرِي.

²³وْمَا لْقَاوْشْ الجُثَّة مْتَاعُو، رَجْعُوا وْقَالُولْنَا الِّي هُومَا شَافُوا رُؤْيَا مْتَاعْ زُوزْ مْلاَيْكَة يْقُولُوا عْلِيهْ الِّي هُوَ حَيْ.

²⁴مْشَاوْ جْمَاعَة مِنَّا لِلقْبَرْ وِلْقَاوْ الحْكَايَة صْحِيحَة كِيمَا قَالُوا النْسَاء زَادَا، آمَا هُوَ مَا شَافُوهِشْ.»

²⁵يَاخِي قَالِلْهُمْ: «يَلِّي مَا تِفْهْمُوشْ وْيَلِّي قْلُوبْكُمْ المْسَكّْرَة مَا تِمِّنْشْ بِالشَّيْء الِّي قَالُوهْ الأَنْبِيَاءْ.

²⁶يَاخِي المَسِيحْ مُوشْ كَانْ لاَزْمُو يْعَانِى مِالوْجَايِعْ هَاذِي وْمِنْ بَعْدْ يُدْخُلْ لِلمَجْدْ مْتَاعُو؟»

²⁷مِنْ بَعْدْ بْدَا يْفَسّْرِلْهُمْ فِي الِّي تِكْتِبْ عْلِيهْ فِي الكْتُبْ الكُلْهَا مِنْ مُوسَى حَتَّى لِلأَنْبِيَاءْ الكُلْهُمْ.

²⁸وْ قُرْبُوا لِلقَرْيَة الِّي التْلاَمْذَة الزُّوزْ مَاشِينْ لِيهَا آمَا يَسُوعْ ظْهَرِّلْهُمْ الِّي هُوَ مَاشِي لِبْلاَصَة أَبْعِدْ.

²⁹وْشَدُّوا فِيهْ صْحِيحْ وْقَالُوا: «أُقْعُدْ مْعَانَا عْلَى خَاطِرْ النْهَارْ قْرِيبْ يُوفَى وِالدِّنْيَا بْدَاتْ تِظْلاَمْ» وِدْخَلْ وِقْعَدْ مْعَاهُمْ.

³⁰وْكِقْعَدْ مْعَاهُمْ بَاشْ يَاكْلُوا خْذَا الخُبْزْ وْشْكَرْ اللهْ وِقْسِمْ وِعْطَاهُمْ.

³¹تْحَلّتْ عِينِيهُمْ وْعَرْفُوهْ، آمَا هُوَ غَابْ عْلَى عِينِيهُمْ وْمَا عَادُوشْ يْشُوفُوا فِيهْ.

³²قَالْ وَاحِدْ مِنْهُمْ لِلآخَرْ: «مُوشْ قْلُوبْنَا شِعْلِتْ فِيهَا النَّارْ وَقْتِلِّي كَانْ يْكَلِّمْ فِينَا فِي الطْرِيقْ وِيْفَسّْرِلْنَا فِي الكْتُبْ؟»

³³وْفِي الوَقْتْ هَاذَاكَا بِالضَّبْطْ قَامُوا وْرَجْعُوا لْأُورْشَلِيمْ وِلْقَاوْ الرُّسُلْ لِحْدَاشْ وِالأُخْرِينْ الِّي مْعَاهُمْ مُجْتَمْعِينْ.

³⁴وْكَانُوا يْقُولُوا: «بِالحَقْ الرَّبْ قَامْ مِالمُوتْ وِظْهُرْ لْسِمْعَانْ.»

³⁵وْقَالُولْهُمْ عْلَى الشَّيْء الِّي صَارْ فِي الطْرِيقْ وْكِيفَاشْ عَرْفُوا يَسُوعْ بَعْدْ مَا قْسِمْ الخُبْزْ.

³⁶وَقْتْ يَحْكِيوْ عْلَى الحَاجَاتْ هَاذِي، وْقُفْ يَسُوعْ بِيدُو فِي وُسْطْهُمْ وْقَالِلْهُمْ: «السَّلاَمْ عْلِيكُمْ!»

³⁷آمَا هُومَا تْفَجْعُوا وْخَافُوا وِمْشَى فِي بَالْهُمْ الِّي هُومَا قَاعْدِينْ يْشُوفُوا فِي عُبِّيثَة.

³⁸يَاخِي قَالِلْهُمْ: «شْبِيكُمْ دَاخْلِينْ بْعَضْكُمْ وْمَفْجُوعِينْ؟ وِعْلاَشْ تْشِكُّوا فِي قْلُوبْكُمْ؟

³⁹شُوفُوا يْدَيَّا وْسَاقَيَّ، آنَا هُوَ بِيدِي، مِسُّونِي وِتْأَكّْدُوا، رَاهِي العُبِّيثَة لاَ عِنْدْهَا لاَ لْحَمْ وْلاَ دَمْ كِيفْ مَا آنَا عِنْدِي.»

⁴⁰وْكِقَالْ الشَّيْء هَاذَا وَرَّاهُمْ يْدِيهْ وْسَاقِيهْ.

⁴¹وْكِمَا صَدّْقُوشْ مِالفَرْحَة وِبْقَاوْ مِتْعَجّْبِينْ قَالِلْهُمْ: «عِنْدْكُمْشْ مَا يِتَّاكِلْ؟»

⁴²عْطَاوْهْ طَرْفْ حُوتْ مِشْوِي.

⁴³خْذَاهْ وِكْلاَهْ قُدَّامْهُمْ.

⁴⁴مِنْ بَعْدْ قَالِلْهُمْ: «هَاذَا هُوَ الكْلاَمْ الِّي قُلْتْهُولْكُمْ وْآنَا مَازِلْتْ مْعَاكُمْ، إِنُّو الِّي تِكْتِبْ عْلِيَّ فِي شَرِيعِةْ مُوسَى وِكْتُبْ الأَنْبِيَاءْ وِالمَزَامِيرْ لاَزْمُو الكُلُّو يْتِمْ.»

⁴⁵مِنْ بَعْدْ نَوّْرِلْهُمْ عْقُولْهُمْ بَاشْ يِفْهْمُوا الكْتُبْ.

⁴⁶وْقَالِلْهُمْ: «هَاذَا الِّي تِكْتِبْ، الِّي المَسِيحْ لاَزْمُو يِتْعَذِّبْ وِيْقُومْ مِنْ بِينْ المُوتَى فِي النْهَارْ الثَّالِثْ.

⁴⁷وِيْبَشّْرُوا الشْعُوبْ الكُلْهَا بِالتَّوْبَة وْغُفْرَانْ الذْنُوبْ بْإِسْمُوا وْيَبْدَاوْا بِمْدِينِةْ أُورْشَلِيمْ.

⁴⁸وْإِنْتُومَا شَاهْدِينْ عْلَى الحَاجَاتْ هَاذِي.

⁴⁹وْآنَا بَاشْ نَبْعْثِلْكُمْ الِّي وْعِدْ بِيهْ بَابَا. آمَا أُقْعْدُوا فِي المْدِينَة حَتَّى لِينْ تَاخْذُوا قُوَّة مِالسْمَاءْ.»

⁵⁰مِنْ بَعْدْ هَزّْهُمْ لْبَرَّة مِالمْدِينَة لْبِيتْ ‌عَنْيَا، وْهَزْ يْدِيهْ وْبَارِكْهُمْ.

⁵¹وَقْتِلِّي كَانْ يْبَارِكْ فِيهُمْ، بْعِدْ عْلِيهُمْ وْتِرْفَعْ لِلسْمَاء.

⁵²يَاخِي سِجْدُولُو الكُلْهُمْ، وْمِنْ بَعْدْ رُجْعُوا لْأُورْشَلِيمْ وْهُومَا فَرْحَانِينْ بَرْشَة.

⁵³وْكَانُوا دِيمَا مُوجُودِينْ فِي الهَيْكِلْ يْسَبّْحُوا فِي اللهْ.