Read Tunisian Arabic New Testament لُوقَا 3 Bible Online

لُوقَا 3 - Tunisian Arabic New Testament bible

لُوقَا 3

¹وْبَعْدْ خُمْسْتَاشِنْ سْنَة مِلِّي وَلَّى طِيبَارْيُوسْ هُوَ القَيْصَرْ، وَقْتِلِّي كَانْ بِيلاَطُسْ البُنْطِي الوَالِي مْتَاعْ مَنْطِقْةْ اليَهُودِيَّة، وْهِيرُودُسْ الوَالِي مْتَاعْ الجَلِيلْ. وْخُوهْ فِيلِيبُّسْ الوَالِي مْتَاعْ إِيطُورِيَّة وْجِيهِةْ تْرَاخُونِيتِسْ، وْلِيسَانْيُوسْ وَالِي الأَبِلِّيَّة.

²وْفِي الوَقْتْ هَاذَا كَانُوا حَنَّانْ وْقِيَافَا هُومَا رُؤَسَاءْ الكُهَّانْ، جَاتْ كِلْمِةْ اللهْ لْيُوحَنَّا وِلْدْ زَكَرِيَّا وَقْتِلِّي كَانْ فِي الخْلاَء.

³وِمْشَى لِلبْقَايِعْ الكُلْهَا الِّي بِجْنَبْ نَهْرْ الأُرْدُنْ يْنَادِي فِي النَّاسْ لِلمَعْمُودِيَّة مْتَاعْ التَّوْبَة بَاشْ ذْنُوبْهُمْ تِتْغْفِرْ.

⁴كِيمَا تِكْتِبْ فِي كْتَابْ النَّبِي إِشَعْيَاءْ: صُوتْ يْنَادِي فِي الخْلاَء: حَضّْرُوا طْرِيقْ الرَّبْ، وْخَلُّوا الثْنَايَا مْتَاعُو تِتْسْوَى.

⁵الوِدْيَانْ الكُلْهُمْ بَاشْ يِتْرِدْمُوا وِالجْبَالْ الكُلْهُمْ يِسْهَالُوا الثْنَايَا المْعَوّْجِينْ يِصْوَابُوا وِالبْلاَيِصْ الوَاعْرِينْ يِسْهَالُوا.

⁶وِالنَّاسْ الكُلْ بَاشْ يْشُوفُوا خَلاَصْ اللهْ.

⁷كَانْ يْقُولْ لِلنَّاسْ الِّي جَاوْهْ بَاشْ يِتْعَمّْدُوا عْلَى يْدِيهْ: «يَا وْلاَدْ اللْفَاعِي، شْكُونْ الِّي نَبِّهْكُمْ بَاشْ تُهْرْبُوا مِنْ الغَضَبْ الِّي جَايْ مْتَاعْ اللهْ؟

⁸أَعْمْلُوا حَاجَاتْ تْوَرِّي أَثْمَارْ التَّوْبَة وْمَا تْبْدُوشْ تْقُولُوا فِي قْلُوبْكُمْ: "أَحْنَا وْلاَدْ إِبْرَاهِيمْ، رَانِي نْقُلْكُمْ الِّي اللهْ قَادِرْ بَاشْ يَعْمِلْ مِالحْجَرْ هَاذَا وْلاَدْ لْإِبْرَاهِيمْ."

⁹الفَاسْ تَوَّا مَحْطُوطْ عْلَى عْرُوقْ الشَّجَرْ، الشَّجْرَة الِّي مَا تْجِيبِشْ غَلَّة بَاهْيَة تِتْقَصْ وْتِتْرْمَى فِي النَّارْ.»

¹⁰يَاخِي سِأْلُوهْ النَّاسْ: «إِمَّالاَ آشْ نَعْمْلُوا؟»

¹¹جَاوِبْهُمْ: «الِّي عَنْدُو لِبْسْتِينْ يَعْطِي لِلِّي مَا عِنْدُوشْ، وِلِّي عَنْدُو مَاكْلَة يَعْطِي لِلِّي مَاعَنْدُوشْ زَادَا.»

¹²وْجَاوْهْ الِّي يْلِمُّوا فِي الضَّرَايِبْ زَادَا بَاشْ يِتْعَمّْدُوا وْقَالُولُو: «يَا مُعَلِّمْ، وْإِحْنَا شْنُوَّة نَعْمْلُوا؟»

¹³قَالِلْهُمْ: «مَا تَاخْذُوشْ أَكْثِرْ مِلِّي قَالُولْكُمْ عْلِيهْ.»

¹⁴وْسِأْلُوهْ جْمَاعَة مِالعَسْكِرْ: «وْإِحْنَا شْنُوَّة نَعْمْلُوا؟» جَاوِبْهُمْ: «مَا تِتْهْمُوشْ حَتَّى حَدْ بِالكِذْبْ وْمَا تْفُكُّوشْ فْلُوسْ النَّاسْ بِالقُوَّة، وِاقْتَنْعُوا بِشْهَارِيكُمْ.»

¹⁵النَّاسْ الكُلْ كَانُوا يِسْتَنُّوا فِي المَسِيحْ وْيِسْأْلُوا فِي رْوَاحْهُمْ عْلَى يُوحَنَّا: «زَعْمَة هُوَ المَسِيحْ؟»

¹⁶جَاوِبْ يُوحَنَّا وْقَالْ لِلنَّاسْ الكُلْ: «آنَا نْعَمِّدْكُمْ بِالمَاء، آمَا الِّي بَاشْ يْجِي بَعْدِي رَاهُو أَقْوَى مِنِّي، وْآنَا مَا نِسْتْحَقِّشْ نْحِلْلُو خْيُوطْ صَنْدَالُو، هُوَ بَاشْ يْعَمِّدْكُمْ بِالرُّوحْ القُدُسْ وْبِالنَّارْ.

¹⁷وِيْهِزْ البَالَة مْتَاعْ اللُّوحْ فِي يِدُّو وِيْصَفِّي الصَّابَة فِي القَاعَة، يْلِمْ القَمْحْ فِي المَخْزِنْ، آمَا التْبِنْ رَاهُو يَحْرْقُو بْنَارْ مَا تَطْفَاشْ.»

¹⁸وِبَّرْشَة حَاجَاتْ أُخْرِينْ كَانْ يِنْصَحْ فِي النَّاسْ وِيْبَشِّرْ فِيهُمْ.

¹⁹وْوَبِّخْ يُوحَنَّا المَلِكْ هِيرُودُسْ بِسْبَبْ هِيرُودِيَّة مَرْتْ خُوهْ وْبِسْبَبْ الحَاجَاتْ الخَايْبَة الِّي عْمَلْهَا.

²⁰وِزْيَادَة عْلَى الحَاجَاتْ الخَايْبِينْ الِّي عْمَلْهُمْ زَادْ رْبَطْ يُوحَنَّا فِي الحَبْسْ.

²¹وْبَعْدْ مَا النَّاسْ الكُلْ تْعَمّْدُوا زَادْ يَسُوعْ تْعَمِّدْ، وَقْتِلِّي صَلَّى السْمَاءْ تْحَلِّتْ

²²وِهْبَطْ عْلِيهْ الرُّوحْ القُدُسْ فِي هَيْئِةْ حْمَامَة، وْجَا صُوتْ مِالسْمَاءْ يْقُولْ: «إِنْتِ إِبْنِي الِّي نْحِبُّو وْآنَا فَرْحَانْ بِيكْ.»

²³وْكِبْدَا يَسُوعْ خِدْمْتُو كَانْ عُمْرُو تَقْرِيبْ ثْلاَثِينْ سْنَة وْكَانْ مَعْرُوفْ الِّي هُوَ وِلْدْ يُوسُفْ وِلْدْ هَالِي:

²⁴وِلْدْ مَتْثَاتْ وِلْدْ لاَوِي وِلْدْ مَلْكِي وِلْدْ يَنَّا، وِلْدْ يُوسُفْ،

²⁵وِلْدْ مَتَّاثِيَا وِلْدْ عَامُوصْ وِلْدْ نَاحُومْ، وِلْدْ حَسْلِي وِلْدْ نَجَّايْ،

²⁶وِلْدْ مَآثْ وِلْدْ مَتَّاثِيَا، وِلْدْ شِمْعِي وِلْدْ يُوسُفْ وِلْدْ يَهُوذَا،

²⁷وِلْدْ يُوحَنَّا، وِلْدْ رِيسَا وِلْدْ زَرُبَّابِلْ، وِلْدْ شَأَلْتِئِيلْ وِلْدْ نِيرِي،

²⁸وِلْدْ مَلْكِي وِلْدْ أَدِّي، وِلْدْ قُصَمْ وِلْدْ ألْمُودَامْ وِلْدْ عِيرْ،

²⁹وِلْدْ يُوسِي، وِلْدْ أَلِيعَازَرْ وِلْدْ يُورِيمْ، وِلْدْ مَتْثَاتْ وِلْدْ لاَوِي،

³⁰وِلْدْ شَمْعُونْ وِلْدْ يَهُوذَا، وِلْدْ يُوسُفْ وِلْدْ يُونُسْ، وِلْدْ أَلِيَاقِيمْ،

³¹وِلْدْ مَلَيَا وِلْدْ مَيْنَانْ، وِلْدْ متَّاثَا وِلْدْ نَاثَانْ، وِلْدْ دَاوُدْ،

³²وِلْدْ يَسَّى وِلْدْ عُوبِيدْ وِلْدْ بُوعَزْ، وِلْدْ سَلْمُونْ وِلْدْ نَحْشُونْ،

³³وِلْدْ عَمِّينَادَابْ وِلْدْ أَدْمِي وِلْدْ عَرْنِي وِلْدْ حَصْرُونْ، وِلْدْ فَارِصْ وِلْدْ يَهُوذَا،

³⁴وِلْدْ يَعْقُوبْ وِلْدْ إِسْحَاقْ، وِلْدْ إِبْرَاهِيمْ وِلْدْ تَارَحْ، وِلْدْ نَاحُورْ،

³⁵وِلْدْ سَرُوجْ وِلْدْ رَعُو وِلْدْ فَالَجْ، وِلْدْ عَابِرْ وِلْدْ شَالَحْ

³⁶وِلْدْ قِينَانْ وِلْدْ أَرْفَكْشَادْ، وِلْدْ سَامْ وِلْدْ نُوحْ، وِلْدْ لاَمَكْ

³⁷وِلْدْ مَتُوشَالَحْ وِلْدْ أَخْنُوخْ وِلْدْ يَارِدْ، وِلْدْ مَهْلَلْئِيلْ وِلْدْ قِينَانْ،

³⁸وِلْدْ أَنُوشْ وِلْدْ شِيثْ، وِلْدْ آدَمْ إِبْنْ اللهْ.