Read Tunisian Arabic New Testament لُوقَا 4 Bible Online

لُوقَا 4 - Tunisian Arabic New Testament bible

لُوقَا 4

¹وِرْجَعْ يَسُوعْ مِالأُرْدُنْ مَلْيَانْ بِالرُّوحْ القُدُسْ، وْهَزُّو الرُّوحْ القُدُسْ لِلخْلاَء.

²وِلْمُدِّةْ أَرْبْعِينْ يُومْ وِبْلِيسْ يْجَرَّبْ فِيهْ وِالمُدَّةْ هَاذِيكَا الكُلْهَا مَا كْلَى حَتَّى شَيْء، وْكِوْفَاوْ الأَرْبْعِينْ يُومْ جَاعْ.

³يَاخِي قَالُّو بْلِيسْ: «إِذَا كَانِكْ إِنْتِ إِبْنْ اللهْ قُولْ لِلحَجْرَة هَاذِي تْوَلِّي خُبْزْ.»

⁴جَاوْبُو يَسُوعْ وْقَالْ: «مَكْتُوبْ فِي الكْتَابْ المُقَدَّسْ: "مُوشْ بِالخُبْزْ بَرْكْ يْعِيشْ الإِنْسَانْ."»

⁵مِنْ بَعْدْ طَلّْعُو بْلِيسْ لْبُقْعَة عَالْيَة وْوَرَّاهْ المَمَالِكْ الكُلْهَا مْتَاعْ الدِّنْيَا فِي لَحْظَة مِالزْمَانْ.

⁶وْقَالُّو: «نَعْطِيكْ السُّلْطَة عْلَى المَمَالِكْ هَاذِي الكُلْهَا، وِالمَجْدْ الِّي فِيهَا الكُلُّو، هِيَ تِعْطَاتْلِي، وْآنَا نَعْطِيهَا لِلِّي نْحِبْ.

⁷إِذَا تُسْجُدْ قُدَّامِي وْتِعْبِدْنِي الكُلْهَا تْوَلِّي مِلْكِكْ.»

⁸جَاوْبُو يَسُوعْ وْقَالْ: «رَاهُو مَكْتُوبْ فِي الكْتَابْ المُقَدَّسْ مَا تُسْجُدْ كَانْ لِلرَّبْ إِلاَهِكْ وَحْدُو هُوَ اللِّي تِعْبْدُو.»

⁹مِنْ بَعْدْ هَزُّو بْلِيسْ لْأُورْشَلِيمْ وْوَقّْفُو عْلَى حَرْفْ السْطَحْ مْتَاعْ الهَيْكِلْ وْقَالُّو: «إِذَا كَانِكْ إِنْتِ إِبْنْ اللهْ ارْمِي رُوحِكْ مِنْ هْنَا.

¹⁰عْلَى خَاطِرْ مَكْتُوبْ فِي الكْتَابْ المُقَدَّسْ: يْوَصِّى عْلِيكْ المْلاَيْكَة مْتَاعُو بَاشْ يَحْفْظُوكْ.

¹¹يْهِزُّوكْ فِي يْدِيهُمْ بَاشْ رِجْلِكْ مَا تِتْضْرَبْشْ فِي حَجْرَة.»

¹²يَاخِي جَاوْبُو يَسُوعْ وْقَالْ: «تْقَالْ زَادَا فِي الكْتَابْ المُقَدَّسْ: "مَا تْجَرِّبْشْ الرَّبْ إِلاَهِكْ."»

¹³وْبَعْدْ مَا كَمِّلْ بْلِيسْ التَّجَارِبْ الكُلْهَا بْعِدْ عْلَى يَسُوعْ لْمُدَّة مِالزْمَانْ.

¹⁴وِرْجَعْ يَسُوعْ لْمَنْطِقْةْ الجَلِيلْ مَلْيَانْ بْقُوِّةْ الرُّوحْ القُدُسْ وْتِنْشَرْ خَبْرُو فِي المَنَاطِقْ الِّي دَايْرَة بِيهَا الكُلْهَا.

¹⁵وْكَانْ يْعَلِّمْ فِي المَجَامِعْ مْتَاعْ اليْهُودْ، وِالكُلْهُمْ كَانُوا يَحْكِيوْ عْلِيهْ بِالبَاهِي.

¹⁶وْجَا لِمْدِينِةْ النَّاصْرَة الِّي تْرَبَّى فِيهَا وْكِالعَادَة دْخَلْ لِلمَجْمَعْ نْهَارْ السِّبْتْ وِوْقُفْ بَاشْ يَقْرَى فِي الكْتَابْ المُقَدَّسْ.

¹⁷وِعْطَاوْهْ كْتَابْ النَّبِي إِشَعْيَاءْ، وْكِحَلُّو لْقَى البُقْعَة الِّي مَكْتُوبْ فِيهَا:

¹⁸رُوحْ الرَّبْ عْلِيَّ مْسَحْنِي بَاشْ نْبَشِّرْ المْسَاكِينْ. بْعَثْنِي بَاشْ نْخَبِّرْ المْرَابِيطْ بِالحُرِّيَّة، وِالعِمْيَانْ يْوَلُّوا يْشُوفُوا، وِنْحَرِّرْ المَظْلُومِينْ.

¹⁹وِنْخَبِّرْ عْلَى العَامْ الْمَقْبُولْ عِنْدْ رَبِّي.

²⁰وْمِنْ بَعْدْ سَكِّرْ يَسُوعْ الكْتَابْ المُقَدَّسْ وِعْطَاهْ لِلرَّاجِلْ الِّي يِخْدِمْ فِي المَجْمَعْ وِقْعَدْ. وِالنَّاسْ الِّي فِي المَجْمَعْ الكُلْهُمْ بْقَاوْ يُخْزْرُولُو.

²¹وِبْدَا يْكَلِّمْ فِيهُمْ وْقَالِلْهُمْ: «الآيَاتْ الِّي سْمَعْتُوهُمْ تَمُّوا اليُومْ.»

²²وِالحَاضْرِينْ الكُلْهُمْ كَانُوا يَحْكِيوْ عْلِيهْ بِالبَاهِي وْهُومَا مِتْعَجّْبِينْ مِنْ الكْلاَمْ البَاهِي الِّي خَارِجْ مِنْ فُمُّو وْكَانُوا يْقُولُوا: يَاخِي هَاذَا مُوشْ وِلْدْ يُوسُفْ؟

²³يَاخِي قَالِلْهُمْ يَسُوعْ: «أَكِيدْ رَاكُمْ بَاشْ تْقُولُوا المَثَلْ هَاذَا: "يَا طْبِيبْ دَاوِي رُوحِكْ! الشَّيْء الِّي سْمَعْنَا بِيكْ عْمَلْتُو فِي كَفْرْنَاحُومْ، أَعْمْلُو هْنَا زَادَا فِي بْلاَدِكْ."»

²⁴وْزَادْ قَالْ: «نْقُلْكُمْ الحَقْ: حَتَّى نَبِي مَا هُوَ مَقْبُولْ فِي بْلاَدُو.

²⁵وِنْقُلْكُمْ الحَقْ: كَانُوا ثَمَّة بَرْشَة نْسَاء رْجَالْهُمْ مُوتَى فِي بَنِي إِسْرَائِيلْ فِي وَقْتْ النَّبِي إِيلِيَّا، وَقْتْهَا المْطَرْ مَا صَبِّتْشْ لْمُدِّةْ ثْلاَثَة سْنِينْ وْسِتَّة شْهُرْ حَتَّى لِينْ وَلاَّتْ ثَمَّة مَجَاعَة كْبِيرَة فِي الأَرْضْ الكُلْهَا.

²⁶وْإِيلِيَّا مَا تِبْعَثْشْ لْحَتَّى وَحْدَة مِنْهُمْ كَانْ لِمْرَا رَاجِلْهَا مِيتْ فِي صَرْفَةْ ‌صَيْدَا.

²⁷وْكَانُوا ثَمَّة بَرْشَة نَاسْ فِي بَنِي إِسْرَائِيلْ مُرْضَى بِالبْرَصْ فِي وَقْتْ النَّبِي أَلِيشَعْ آمَا أَلِيشَعْ مَا شْفَى حَتَّى وَاحِدْ مِنْهُمْ كَانْ نُعْمَانْ الِّي مِنْ سُورْيَة.»

²⁸وِالحَاضْرِينْ فِي المَجْمَعْ الكُلْهُمْ تْغَشَشُوا بَرْشَة كِسَمْعُوا الكْلاَمْ هَاذَا.

²⁹وْخَرّْجُوهْ لْبَرَّة مِالمْدِينَة وْهَزُّوهْ لْحَرْفْ الجْبَلْ الِّي تِبْنَاتْ عْلِيهْ مْدِينِتْهُمْ بَاشْ يُرْمُوهْ اللُّوطَا.

³⁰آمَا يَسُوعْ تْعَدَّى فِي وُسْطْهُمْ وِمْشَى.

³¹وِهْبَطْ يَسُوعْ لْكَفْرْنَاحُومْ الِّي هِيَ مْدِينَة فِي مَنْطِقْةْ الجَلِيلْ وْكَانْ يْعَلِّمْ فِي النَّاسْ فِي أَيَّامَاتْ السِّبْتْ.

³²وِبْقَاوْ مِتْعَجّْبِينْ مِنْ التَّعْلِيمْ مْتَاعُو عْلَى خَاطِرْ كْلاَمُو كَانِتْ فِيهْ سُلْطَة.

³³وْكَانْ ثَمَّة رَاجِلْ فِي المَجْمَعْ سَاكْنُو رُوحْ مَنْزُوسْ صَاحْ بْصُوتْ عَالِي:

³⁴«آهْ، آشْ بِينَّا وْبِينِكْ يَا يَسُوعْ النَّاصْرِي؟ يَاخِي جِيتْ بَاشْ تِهْلِكْنَا؟ آنَا نَعْرِفْ إِنْتِ شْكُونْ، إِنْتِ قُدُّوسْ اللهْ.»

³⁵يَاخِي يَسُوعْ أُمْرُو وْقَالُّو: «اسْكُتْ وْأُخْرُجْ مِنُّو.» وَلّى الشِّيطَانْ طَيِّحْ الرَّاجِلْ فِي وُسْطْ النَّاسْ وِخْرَجْ مِنُّو مِنْ غِيرْ مَا ضَرُّو.

³⁶وِالنَّاسْ الكُلْهُمْ بْقَاوْ مِتْعَجّْبِينْ وْوَلُّوا يِحْكُوا مْعَ بْعَضْهُمْ وِيْقُولُوا «شْنُوَّة الكْلاَمْ هَاذَا؟ رَاهُو يُأْمُرْ فِي الأَرْوَاحْ المَنْزُوسَة بْسُلْطَة وِبْقُوَّة وْهُومَا يُخْرْجُوا.»

³⁷وْتِنْشَرْ خَبْرُو فِي المَنَاطِقْ القْرِيبَة الكُلْهَا.

³⁸وِخْرَجْ يَسُوعْ مِالمَجْمَعْ وِدْخَلْ لْدَارْ سِمْعَانْ. وِنْسِيبِةْ بُطْرُسْ كَانِتْ مْرِيضَة وْعَنْدْهَا بَرْشَة سْخَانَة وْهُومَا طَلْبُوا مِنُّو بَاشْ يِشْفِيهَا.

³⁹وْقُفْ بِجْنَبْ فَرْشْهَا، أْمَرْ السْخَانَة وْهِيَ مْشَاتْ عْلِيهَا وْبِالوَقْتْ قَامِتْ وِبْدَاتْ تِخْدِمْ فِيهُمْ.

⁴⁰وِمْعَ غْرُوبْ الشَّمْسْ الِّي عِنْدْهُمْ نَاسْ مُرْضَى بْبَرْشَة أَمْرَاضْ جَابُوهُمْلُو وْكَانْ يْحُطْ عْلِيهُمْ فِي يْدِيهْ وْيِشْفِي فِيهُمْ.

⁴¹وْبَرْشَة شْوَاطِنْ خَرْجُوا مِنْ بَرْشَة نَاسْ وْهُومَا يْصِيحُوا: «إِنْتِ إِبْنْ اللهْ!» وْكَانْ يَسُوعْ يُأْمُرْ فِيهُمْ بَاشْ يُسْكْتُوا وْمَا خَلاَّهُمْشْ يِتْكَلّْمُوا، عْلَى خَاطِرْهُمْ عَرْفُوا الِّي هُوَ المَسِيحْ.

⁴²وْكِطْلَعْ النْهَارْ خْرَجْ يَسُوعْ وِمْشَى لْبُقْعَة خَالْيَة، وْلَوّْجُوا عْلِيهْ النَّاسْ حَتَّى لِينْ لْقَاوْهْ وْشَدُّوا فِيهْ صْحِيحْ وْطُلْبُوا مِنُّو بَاشْ مَا يِمْشِيشْ مِنْ بِحْذَاهُمْ.

⁴³آمَا يَسُوعْ قَالِلْهُمْ: «لاَزِمْ نِمْشِي لِلمُدُنْ الأُخْرِينْ وِنْبَشِّرْ فِيهُمْ بْمَمْلِكْةْ اللهْ، عْلَى خَاطِرْ هَاذَا هُوَ الشَّيْء الِّي تِبْعَثْتْ عْلَى خَاطْرُو.»

⁴⁴وِمْشَى يْبَشِّرْ فِي المَجَامِعْ مْتَاعْ مَنْطِقْةْ اليَهُودِيَّة.