Read Tunisian Arabic New Testament لُوقَا 5 Bible Online

لُوقَا 5 - Tunisian Arabic New Testament bible

لُوقَا 5

¹وَقْتِلِّي النَّاسْ كَانُوا يِتْزَاحْمُوا بَاشْ يِسْمْعُوا كِلْمِةْ اللهْ، كَانْ يَسُوعْ وَاقِفْ عْلَى الشَّطْ مْتَاعْ بُحَيْرِةْ جَنِّيسَارْتْ

²شَافْ زُوزْ فْلاَيِكْ وَاقْفِينْ عْلَى جْنَبْ الشَّطْ، خَلاَّوْهُمْ الصَّيَّادَة وِمْشَاوْ يَغْسْلُوا فِي الشْبَاكْ.

³رْكِبْ فِي فْلُوكِةْ سِمْعَانْ وِطْلَبْ مِنُّو بَاشْ يِبْعِدْ بِالفْلُوكَة شْوَيَّة عْلَى البَرْ، وْمِنْ بَعْدْ قْعَدْ يْعَلِّمْ فِي النَّاسْ وْهُوَ فِي الفْلُوكَة.

⁴وْكِكَمِّلْ يَسُوعْ كْلاَمُو قَالْ لْسِمْعَانْ: «ادْخُلْ لِلغْرِيقْ وْأَرْمِيوْ الشْبَاكْ مْتَاعْكُمْ بَاشْ تِصْطَادُوا.»

⁵يَاخِي جَاوْبُو سِمْعَانْ: «يَا سِيدْنَا رَانَا تْعِبْنَا اللِّيلْ الكُلُّو وْمَا شَدِّينَا حَتَّى شَيْء، آمَا عْلَى خَاطِرْ الكِلْمَة مْتَاعِكْ بَاشْ نَرْمِي الشْبَاكْ.»

⁶وْوَقْتِلِّي عَمْلُوا الشَّيْء هَاذَا صْطَادُوا بَرْشَة حُوتْ حَتَّى لِينْ الشْبَاكْ مْتَاعْهُمْ بْدَاتْ تِتْقَطِّعْ.

⁷يَاخِي شَارُوا بِيدْهُمْ لِلمِتْشَارْكِينْ مْعَاهُمْ فِي الفْلُوكَة الأُخْرَى بَاشْ يْجِيوْ وِيْعَاوْنُوهُمْ، جَاوْ وْعَبَّاوْ الزُّوزْ فْلاَيِكْ بِالحُوتْ حَتَّى لِينْ قْرِيبْ يُغْرْقُوا.

⁸وْكِشَافْ سِمْعَانْ بُطْرُسْ الشَّيْء هَاذَا رْكَعْ قُدَّامْ رِجْلِينْ يَسُوعْ وْقَالْ: «يَا رَبْ اخْرُجْ مِنْ فْلُوكْتِي رَانِي إِنْسَانْ مِذْنِبْ!»

⁹وْسِمْعَانْ وِلِّي مْعَاهْ تْعَجّْبُوا مِنْ كَثْرِةْ الحُوتْ الِّي صْطَادُوهْ.

¹⁰وْنَفْسْ الشَّيْء وْقَعْ لْيَعْقُوبْ وْيُوحَنَّا وْلاَدْ زَبَدِي الِّي كَانُوا مِتْشَارْكِينْ مْعَ سِمْعَانْ فِي المَصْيِدْ وْقَالْ يَسُوعْ لْسِمْعَانْ: «مَا تْخَافِشْ، مِالوَقْتْ هَاذَا بَاشْ تْوَلِّي تِصْطَادْ النَّاسْ.»

¹¹وْوَقْتِلِّي رَجْعُوا لِلبَرْ خَلُّوا كُلْ شَيْء وْتَبّْعُوا يَسُوعْ.

¹²وَقْتِلِّي كَانْ يَسُوعْ فِي مْدِينَة مِالمُدُنْ جَاهْ وَاحِدْ بَدْنُو الكُلْ مْرِيضْ بِالبْرَصْ، دُوبْ مَا شَافْ يَسُوعْ رْكَعْلُو وِاشَّحْتُو وْقَالُّو: «يَا سِيدِي، إِذَا إِنْتِ تْحِبْ رَاكْ تِقْدِرْ تِشْفِينِى.»

¹³مَدْ يَسُوعْ يِدُّو وْمَسُّو وْقَالْ: «آنَا نْحِبْ، اتْشْفَى!» وْبِالوَقْتْ تْنَحَّى عْلِيهْ البْرَصْ.

¹⁴وْوَصَّاهْ يَسُوعْ وْقَالُّو: «مَا تْقُولِشْ لْحَتَّى حَدْ. آمَا إِمْشِي لِلكَاهِنْ خَلِّيهْ يْشُوفِكْ، وْقَدِّمْ القُرْبَانْ الِّي أْمَرْ بِيهْ مُوسَى، بَاشْ يْكُونْ الشَّيْء هَاذَا شْهَادَة لِيهُمْ الِّي إِنْتِ تِشْفِيتْ مِالمْرَضْ.»

¹⁵آمَا الخْبَرْ مْتَاعْ يَسُوعْ زَادْ تِنْشَرْ أَكْثِرْ، وْجَاوْ بَرْشَة نَاسْ بَاشْ يِسْمْعُوهْ وْيِتْشْفَاوْ مِنْ أَمْرَاضْهُمْ.

¹⁶آمَا هُوَ كَانْ يِمْشِي لِبْقَايِعْ خَالْيَة بَاشْ يْصَلِّي.

¹⁷فِي نْهَارْ مِالنْهَارَاتْ هَاذُوكُمْ وَقْتِلِّي كَانْ يَسُوعْ يْعَلِّمْ كَانُوا ثَمَّة جْمَاعَة مِالفَرِّيسِيِّينْ وِالمُعَلّْمِينْ مْتَاعْ الشَّرِيعَة قَاعْدِينْ مْعَ النَّاسْ وْجَاوْهْ مِنْ كُلْ قَرْيَة فِي مَنْطِقْةْ الجَلِيلْ وِاليَهُودِيَّة وْأُورْشَلِيمْ الكُلْهَا وْقُوِّةْ الرَّبْ كَانِتْ مْعَاهْ بَاشْ يِشْفِيهُمْ.

¹⁸وِجْمَاعَة مِنْهُمْ جَابُولُو وَاحِدْ مَشْلُولْ، هَازِّينُو فِي فْرَاشْ وْحَاوْلُوا يُدْخْلُوا بِيهْ وِيْحُطُّوهْ قُدَّامُو.

¹⁹آمَا وَقْتِلِّي مَا نَجّْمُوشْ يُدْخْلُوا بِيهْ بِسْبَبْ الزَّحْمَة الكْبِيرَة طَلْعُوا بِيهْ لِلسْطَحْ وْهَبّْطُوهْ مَا بِينْ القَرْمُودْ وْهُوَ فِي فْرَاشُو وْحَطُّوهْ فِي الوُسْطْ قُدَّامْ يَسُوعْ.

²⁰وْكِشَافْ يَسُوعْ إِيمَانْهُمْ قَالْ لِلمَشْلُولْ: «يَا رَاجِلْ رَاهِي ذْنُوبِكْ تْغِفْرِتْ.»

²¹يَاخِي بْدَاوْا الكُتَّابْ مْتَاعْ اليْهُودْ وِالفَرِّيسِيِّينْ يْفَكّْرُوا بِينْهُمْ وْبِينْ رْوَاحْهُمْ وِيْقُولُوا: «شْكُونُو هَاذَا الِّي قَاعِدْ يَكْفِرْ؟ شْكُونْ غِيرْ اللهْ وَحْدُو يِقْدِرْ يِغْفِرْ الذْنُوبْ؟»

²²آمَا يَسُوعْ عْرَفْهُمْ فَاشْ قَاعْدِينْ يْفَكّْرُوا يَاخِي جَاوِبْهُمْ وْقَالْ: «عْلاَشْ تْفَكّْرُوا فِي الشَّيْء هَاذَا؟

²³آمَا أسْهِلْ؟ إِنُّو يِتْقَالْ: "ذْنُوبِكْ تْغِفْرِتْ" وِلاَّ: "قُومْ وْإِمْشِي؟"

²⁴آمَا هَكَّا تَعْرْفُوا الِّي آنَا إِبْنْ الإِنْسَانْ عِنْدِي السُّلْطَة فِي الأَرْضْ بَاشْ نِغْفِرْ الذْنُوبْ.» وْقَالْ يَسُوعْ لِلمَشْلُولْ: «آنَا نْقُلِّكْ قُومْ وْهِزْ فْرَاشِكْ وْإِمْشِي لْدَارِكْ!»

²⁵وْبِالوَقْتْ قَامْ قُدَّامْهُمْ وْهَزْ فْرَاشُو، وِمْشَى لْدَارُو وْهُوَ يْمَجِّدْ فِي اللهْ.

²⁶يَاخِي الكُلْهُمْ بْقَاوْ مِتْعَجّْبِينْ وْمَجّْدُوا اللهْ وْخَافُوا بَرْشَة وْقَالُوا: «اليُومْ شُفْنَا العْجَايِبْ.»

²⁷وْبَعْدْ هَاذَا خْرَجْ يَسُوعْ وْشَافْ وَاحِدْ إِسْمُو لاَوِي قَاعِدْ فِي المَكْتِبْ مْتَاعُو وِيْلِمْ فِي الضَّرَايِبْ يَاخِي قَالُّو: «تَبَّعْنِي!»

²⁸قَامْ لاَوِي وْخَلَّى كُلْ شَيْء وْتَبّْعُو.

²⁹وِعْمَلْ لاَوِي عْشَاء كْبِيرْ لْيَسُوعْ فِي دَارُو حَضْرُوا فِيهْ بَرْشَة مِلِّي يْلِمُّوا فِي الضَّرَايِبْ وْنَاسْ أُخْرِينْ.

³⁰يَاخِي الكُتَّابْ مْتَاعْ اليْهُودْ وِالفَرِّيسِيِّينْ تْغَشَشُوا عْلَى تْلاَمِذْةْ يَسُوعْ وْقَالُوا: «عْلاَشْ تَاكْلُوا وْتُشْرْبُوا مْعَ الِّي يْلِمُّوا فِي الضَّرَايِبْ وِالمِذْنْبِينْ؟»

³¹جَاوِبْهُمْ يَسُوعْ وْقَالْ: «مُوشْ الصْحَاحْ هُومَا المِحْتَاجِينْ لِلطْبِيبْ آمَا رَاهُمْ المُرْضَى.

³²آنَا جِيتْ بَاشْ نِدْعِي المِذْنْبِينْ بَاشْ يْتُوبُوا مِنْ ذْنُوبْهُمْ مُوشْ الأَبْرَارْ.»

³³وْقَالُوا الفَرِّيسِيِّينْ لْيَسُوعْ: «تْلاَمِذْةْ يُوحَنَّا يْصُومُوا وِيْصَلِّيوْ بَرْشَة، وْنَفْسْ الشَّيْء يَعْمْلُوا فِيهْ التْلاَمْذَة مْتَاعْ الفَرِّيسِيِّينْ، آمَا تْلاَمِذْتِكْ دِيمَا يَاكْلُوا وْيُشْرْبُوا.»

³⁴قَالِلْهُمْ يَسُوعْ: «يَاخِي تْنَجّْمُوا تْلَزّْمُوا عْلَى المِسْتَدْعِينْ لِلعِرْسْ بَاشْ يْصُومُوا وَقْتِلِّي العْرِيسْ مَازَالْ مْعَاهُمْ؟

³⁵آمَا بَاشْ يْجِيوْ نْهَارَاتْ يِتْهَزْ العْرِيسْ بْعِيدْ عْلِيهُمْ وِالوَقْتْ هَاذَاكَا بَاشْ يْصُومُوا.»

³⁶وْقَالِلْهُمْ مَثَلْ آخَرْ: «مَا ثَمَّاشْ حَتَّى وَاحِدْ يْقَطِّعْ قَطْعَة قْمَاشْ مِنْ لِبْسَة جْدِيدَة بَاشْ يْرَقِّعْ بِيهَا قْمَاشْ قْدِيمْ مَا كَانِشْ الطَّرْفْ الجْدِيدْ بَاشْ يِتْكَمِّشْ وْيَاكُلْ مِالقْدِيمْ وِتْوَلِّي التَّقْطِيعَة أَكْبِرْ.

³⁷وْمَا ثَمَّاشْ حَتَّى وَاحِدْ يْحُطْ شْرَابْ جْدِيدْ فِي قْرِبْ قْدِيمَة بَاشْ الشْرَابْ الجْدِيدْ مَا يِفْلِقْشْ القْرِبْ القْدِيمَة وْيِتْكَبْ وِالقْرِبْ تِتْقَطِّعْ.

³⁸هَاذَاكَا عْلاَشْ الشْرَابْ الجْدِيدْ يِلْزْمُو يِتْحَطْ فِي قْرِبْ جْدِيدَة.

³⁹وْمَا ثَمَّاشْ شْكُونْ يُشْرُبْ شْرَابْ قْدِيمْ وْمَازَالْ بَاشْ يْلَوِّجْ عْلَى الشْرَابْ الجْدِيدْ عْلَى خَاطْرُو بَاشْ يْقُولْ: الشْرَابْ القْدِيمْ أَحْسِنْ.»