Read Tunisian Arabic New Testament لُوقَا 6 Bible Online

لُوقَا 6 - Tunisian Arabic New Testament bible

لُوقَا 6

¹وْفِي سِبْتْ مِالأَسْبَاتْ تْعَدَّى يَسُوعْ وُسْطْ الزَّرْعْ وِتْلاَمِذْتُو كَانُوا يْنَحِّيوْ فِي السْبُولْ وْيَاكْلُوا فِيهْ.

²آمَا ثَمَّة جْمَاعَة مِالفَرِّيسِيِّينْ قَالُوا: «عْلاَشْ تَعْمْلُوا فِي حَاجَاتْ مَمْنُوعْ بَاشْ تِتْعْمَلْ فِي نْهَارْ السِّبْتْ؟»

³جَاوِبْهُمْ يَسُوعْ وْقَالْ: «يَاخِي مَا قْرِيتُوشْ شْنُوَّة الِّي عَمْلُو دَاوُدْ وِالنَّاسْ الِّي مْعَاهْ وَقْتِلِّي جَاعُوا؟

⁴كِيفَاشْ دْخَلْ لْبِيتْ اللهْ وِكْلَى مِنْ خُبْزْ القُرْبَانْ وِلِّي الكُهَّانْ بَرْكَة عِنْدْهُمْ الحَقْ بَاشْ يَاكْلُوهْ وْزَادْ عْطَى لِلِّي مْعَاهْ.»

⁵وْمِنْ بَعْدْ قَالِلْهُمْ: «رَانِي آنَا إِبْنْ الإِنْسَانْ الِّي نُحْكُمْ فِي نْهَارْ السِّبْتْ.»

⁶وْفِي سِبْتْ آخَرْ دْخَلْ يَسُوعْ لِلمَجْمَعْ وِبْدَا يْعَلِّمْ، وْكَانْ مُوجُودْ الغَادِي رَاجِلْ يِدُّو اليْمِينْ يَابْسَة.

⁷بْدَاوْا الكُتَّابْ مْتَاعْ اليْهُودْ وِالفَرِّيسِيِّينْ يْرَاقْبُوا فِي يَسُوعْ ثَمَّاشْ مَا يِشْفِي الرَّاجِلْ هَاذَا فِي نْهَارْ السِّبْتْ وْهَكَّا يْنَجّْمُوا يِتْهْمُوهْ.

⁸وِعْرَفْ يَسُوعْ نِيِّةْ قْلُوبْهُمْ وْقَالْ لِلرَّاجِلْ الِّي يِدُّو يَابْسَة: «قُومْ وْآقِفْ فِي الوُسْطْ.» وْقَامْ وِوْقُفْ الغَادِي.

⁹يَاخِي قَالِلْهُمْ يَسُوعْ: «نِسْإِلْكُمْ سُؤَالْ: آمَا خِيرْ نَعْمْلُوا الخِيرْ فِي نْهَارْ السِّبْتْ وِلاَّ نَعْمْلُوا الشَّرْ؟ نْمَنّْعُوا رُوحْ وِلاَّ نُقْتْلُوهَا؟»

¹⁰وْبَعْدْ مَا خْزَرِّلْهُمْ الكُلْ قَالْ لِلرَّاجِلْ: «مِدْ يِدِّكْ.» وِعْمَلْ كِيمَا قَالُّو، وْإِذَا بِيهَا رَجْعِتْ صْحِيحَة.

¹¹وِتْغَشَشُوا بَرْشَة وِبْدَاوْا يِتْفَاهْمُوا مَا بِينَاتْ بْعَضْهُمْ شْنُوَّة بَاشْ يَعْمْلُوا لْيَسُوعْ.

¹²وْفِي الوَقْتْ هَاذَاكَا طْلَعْ يَسُوعْ لِلجْبَلْ بَاشْ يْصَلِّي وْعَدَّى اللِّيلْ الكُلُّو وْهُوَ يْصَلِّي للهْ.

¹³وْكِطْلَعْ النْهَارْ عَيِّطْ لِتْلاَمِذْتُو وِاخْتَارْ مِنْهُمْ ثْنَاشِنْ وَاحِدْ وْسَمَّاهُمْ رُسُلْ.

¹⁴وْهُومَا: سِمْعَانْ وْسَمَّاهْ زَادَا بُطْرُسْ، وْأَنْدَرَاوُسْ خُوهْ وْيَعْقُوبْ وْيُوحَنَّا وْفِيلِبُّسْ وْبَرْثُلْمَاوُسْ،

¹⁵وْمَتَّى وْتُومَا وْيَعْقُوبْ وِلْدْ حَلْفَى وْسِمْعَانْ الِّي يْغِيرْ عْلَى بْلاَدُو.

¹⁶وْيَهُوذَا وِلْدْ يَعْقُوبْ وْيَهُوذَا الإِسْخَرْيُوطِي الِّي مِنْ بَعْدْ خَانُو.

¹⁷وْمِنْ بَعْدْ هْبَطْ يَسُوعْ مْعَاهُمْ وِوْقُفْ فِي بُقْعَة وَاطْيَة هُوَ وْبَرْشَة مِنْ تْلاَمِذْتُو وْزَادَا بَرْشَة نَاسْ مِاليَهُودِيَّة الكُلْهَا وْأُورْشَلِيمْ وِالسَّاحِلْ مْتَاعْ صَيْدَا وِمْدِينِةْ صُورْ.

¹⁸جَاوْ بَاشْ يِسْمْعُوهْ وْيِتْشْفَاوْ مِنْ امْرَاضْهُمْ، وْحَتَّى الِّي كَانِتْ تْعَذِّبْ فِيهُمْ الأَرْوَاحْ المَنْزُوسَة كَانُوا يِتْشْفَاوْ.

¹⁹وِالنَّاسْ الكُلْهُمْ كَانُوا يْحِبُّوا يْمِسُّوهْ عْلَى خَاطِرْ ثَمَّة قُوَّة كَانِتْ تُخْرُجْ مِنُّو وْتِشْفِي فِيهُمْ الكُلْهُمْ.

²⁰مِنْ بَعْدْ خْزَرْ يَسُوعْ لِتْلاَمِذْتُو وْقَالْ: «صَحَّة لِيكُمْ يَا مْسَاكِينْ رَاكُمْ عِنْدْكُمْ مَمْلِكْةْ الله.

²¹صَحَّة لِيكُمْ يَلِّي إِنْتُومَا تَوَّا جِيعَانِينْ رَاكُمْ بَاشْ تَشْبْعُوا صَحَّة لِيكُمْ يَلِّي إِنْتُومَا تَوَّا تِبْكِيوْ رَاكُمْ بَاشْ تَضْحْكُوا.

²²صَحَّة لِيكُمْ وَقْتِلِّي النَّاسْ يَكْرْهُوكُمْ وِيْطَرّْدُوكُمْ وِيْلُومُوا عْلِيكُمْ وْمَا يْنَادُوكُمْشْ بْإِسْمْكُمْ كَإِنُّو شَرْ، عْلَى خَاطِرْكُمْ تَبِّعْتُونِي آنَا إِبْنْ الإِنْسَانْ.

²³أَفْرْحُوا وْهَلْلُو وَقْتِلِّي يْجِي النْهَارْ هَاذَاكَا، رَاهُو أَجْرْكُمْ عْظِيمْ فِي السْمَاءْ. وِالشَّيْء هَاذَا بِيدُو عَمْلُوهْ جْدُودْهُمْ مْعَ الأَنْبِيَاءْ.

²⁴آمَا يَا وِيلْكُمْ يَا غُنْيَا، رَاكُمْ خْذِيتُوا أَجْرْكُمْ.

²⁵وْيَا وِيلْكُمْ يَلِّي إِنْتُومَا شَبْعَانِينْ تَوَّا، رَاكُمْ بَاشْ تْجُوعُوا، يَا وِيلْكُمْ يَلِّي تَضْحْكُوا تَوَّا رَاكُمْ بَاشْ تِبْكِيوْ وِتْنَوّْحُوا.

²⁶يَا وِيلْكُمْ إِذَا كَانْ النَّاسْ الكُلْهُمْ قَالُوا فِيكُمْ كْلاَمْ بَاهِي. رَاهُمْ جْدُودْهُمْ عَمْلُوا الشَّيْء هَاذَا بِيدُو مْعَ الأَنْبِيَاءْ الكَذَّابِينْ.»

²⁷«آمَا إِنْتُومَا يَلِّي تِسْمْعُوا فِيَّ آنَا نْقُلْكُمْ: حِبُّوا أَعْدَاءْكُمْ، أَعْمْلُوا الخِيرْ مْعَ الِّي يَكْرْهُوكُمْ.

²⁸بَارْكُوا الِّي يَلْعْنُوكُمْ، وْصَلُّوا مِنْ أَجْلْ الِّي يُظْلْمُوكُمْ.

²⁹وِلِّي يَضْرْبِكْ عْلَى خَدِّكْ، زِيدْ مِدّْلُو خَدِّكْ الآخَرْ زَادَا، وِلِّي يْنَحِّيلِكْ بَرْنُوسِكْ زِيدْ أَعْطِيهْ جِبّْتِكْ.

³⁰وِلِّي يُطْلُبْ مِنْ عِنْدِكْ حَاجَة أَعْطِيهَالُو، وِلِّي يْهِزّْلِكْ الِّي تِمْلْكُو مَا تُطْلْبُوشْ فِيهْ.

³¹وْأَعْمْلُوا مْعَ النَّاسْ الحَاجَاتْ الِّي تْحِبُّوهُمْ يَعْمْلُوهُمْ مْعَاكُمْ.

³²إِذَا كَانْ تْحِبُّوا الِّي يْحِبُّوكُمْ شْنُوَّة الفَضْلْ الِّي عِنْدْكُمْ؟ حَتَّى المِذْنْبِينْ يْحِبُّوا النَّاسْ الِّي يْحِبُّوهُمْ.

³³وْإِذَا عْمَلْتُوا الخِيرْ مْعَ الِّي يَعْمْلُوا مْعَاكُمْ فِي الخِيرْ، شْنُوَّة الفَضْلْ الِّي عِنْدْكُمْ، حَتَّى المِذْنْبِينْ يَعْمْلُوا هَكَّا زَادَا.

³⁴وْإِذَا سَلِّفْتُوا الِّي تَعْرْفُوهُمْ بَاشْ يْرَجّْعُولْكُمْ شْنُوَّة الفَضْلْ الِّي عِنْدْكُمْ؟ حَتَّى المِذْنْبِينْ يْسَلّْفُوا الأُخْرِينْ بَاشْ يْرَجّْعُولْهُمْ الِّي سَلّْفُوهُولْهُمْ بِالضَّبْطْ.

³⁵آمَا حِبُّوا أَعْدَاءْكُمْ وْأَعْمْلُوا الخِيرْ وْسَلّْفُوا مِنْ غِيرْ مَا تِسْتَنُّوا بَاشْ يْرَجّْعُولْكُمْ وْأَجْرْكُمْ يْكُونْ عْظِيمْ وِتْكُونُوا وْلاَدْ العَالِي، رَاهُو اللهْ يِنْعِمْ عْلَى البَاهِي وِعْلَى الخَايِبْ.

³⁶إِمَّالاَ ارْحْمُوا كِيمَا بُوكُمْ الِّي فِي السْمَاءْ يَرْحِمْ.»

³⁷«مَا تُحْكْمُوشْ عْلَى النَّاسْ بَاشْ مَا يِتْحْكَمْشْ عْلِيكُمْ، مَا تِتْهْمُوشْ النَّاسْ بَاشْ مَا يِتْهْمُوكُمْشْ، إِغْفْرُوا يِتْغْفِرِّلْكُمْ.

³⁸أَعْطِيوْ لِلنَّاسْ تَوْ تَاخْذُوا، رَاكُمْ تَاخْذُوا كِيلْ وَافِي، مْعَبِّي، مَرْصُوصْ وْفَايِضْ فِي حْجُورَاتْكُمْ، الكِيلْ الِّي تْكَيّْلُوا بِيهْ يِتْكَيّْلِلْكُمْ بِيهْ.»

³⁹وِعْطَاهُمْ يَسُوعْ مَثَلْ وْقَالْ: «يْنَجِّمْشْ أَعْمَى يْقُودْ أَعْمَى؟ مَاهُمْ الإِثْنِينْ يْطِيحُوا فِي حُفْرَة.

⁴⁰التِّلْمِيذْ مُوشْ أَعْظِمْ مِالمُعَلِّمْ مْتَاعُو، آمَا الِّي يِتْعَلِّمْ بِالقْدَا يْوَلِّى كِيفْ المُعَلِّمْ مْتَاعُو.

⁴¹وِعْلاَشْ تْشُوفْ القَشَّة الِّي فِي عِينْ خُوكْ، وْمَا تْفِيقِشْ بِاللُّوحَة الِّي فِي عِينِكْ؟

⁴²وِلاَّ كِيفَاشْ تْنَجِّمْ تْقُولْ لْخُوكْ: "يَا خُويَا خَلِّينِي انَّحِّيلِكْ القَشَّة الِّي فِي عِينِكْ." وْإِنْتِ مَاكِشْ قَاعِدْ تْشُوفْ فِي اللُّوحَة الِّي فِي عِينِكْ إِنْتِ. يَا مُنَافِقْ نَحِّي اللُّوحَة مِنْ عِينِكْ إِنْتِ فِي الأُوِّلْ، وِمْبَاعِدْ تَوَّا تْوَلِّي تْشُوفْ بِالقْدَا وِتْنَحِّي القَشَّة مِنْ عِينْ خُوكْ.»

⁴³«مَا ثَمَّاشْ شَجْرَة بَاهْيَة تَعْطِى غَلَّة خَايْبَة، وِلاَّ شَجْرَة خَايْبَة تَعْطِى غَلَّة بَاهْيَة.

⁴⁴كُلْ شَجْرَة تِتْعْرَفْ مِنْ غَلِّتْهَا، مَا يْنَحِّيوْشْ الكَرْمُوسْ مِالشُّوكْ، وْمَا يْنَحِّيوْشْ العْنِبْ مِالعِلِّيقْ.

⁴⁵رَاهُو الإِنْسَانْ البَاهِي، مِنْ الكَنْزْ البَاهِي الِّي فِي قَلْبُو يْطَلِّعْ الحَاجَاتْ البَاهْيَة الكُلْهَا. آمَا الإِنْسَانْ الخَايِبْ مِنْ الكَنْزْ الخَايِبْ الِّي عَنْدُو يْطَلِّعْ الحَاجَاتْ الخَايْبَة الكُلْهَا، رَاهُو اللْسَانْ يَنْطِقْ بِالشَّيْء الِّي القَلْبْ مَلْيَانْ بِيهْ.»

⁴⁶«وِعْلاَشْ تْنَادِيوْلِي "يَا رَبْ، يَا رَبْ" وْمَا تَعْمْلُوشْ الشَّيْء الِّي نْقُولْ عْلِيهْ؟

⁴⁷الِّي يْجِينِي وْيِسْمَعْ كْلاَمِي وْيَعْمِلْ بِيهْ نْقُلْكُمْ لِشْكُونْ يِشْبِهْ.

⁴⁸رَاهُو يِشْبِهْ لإِنْسَانْ بْنَى دَارْ، حْفِرْ وْغَرِّقْ وْحَطْ السَّاسْ عْلَى الحْجَرْ، مِنْ بَعْدْ الوَادْ فَاضْ عْلَى الدَّارْ هَاذِيكَا آمَا مَا نَجِّمْشْ يْحَرِّكْهَا عْلَى خَاطِرْ السَّاسْ مْتَاعْهَا مِبْنِي عْلَى الحْجَرْ.

⁴⁹وِلِّي سْمَعْ كْلاَمِي وْمَا عْمَلْشْ بِيهْ، رَاهُو يِشْبِهْ لإِنْسَانْ بْنَى دَارُو عْلَى الأَرْضْ مِنْ غِيرْ سَاسْ، وَقْتِلِّي فَاضْ الوَادْ. طَاحِتْ بِالوَقْتْ وِادَّمْرِتْ الكُلْهَا.»