Read Tunisian Arabic New Testament لُوقَا 7 Bible Online

لُوقَا 7 - Tunisian Arabic New Testament bible

لُوقَا 7

¹وْبَعْدْ مَا كَمِّلْ يَسُوعْ كْلاَمُو مْعَ الشَّعْبْ، دْخَلْ لِمْدِينِةْ كَفْرْنَاحُومْ

²وْكَانْ ثَمَّة قَايِدْ مْتَاعْ مْيَاةْ عَسْكْرِي عَنْدُو وَاحِدْ مِالعَبِيدْ مْتَاعُو مْرِيضْ قْرِيبْ يْمُوتْ، وْكَانْ عْزِيزْ عْلِيهْ.

³وَقْتِلِّي سْمَعْ بْيَسُوعْ، بْعَثْلُو شْيُوخْ اليْهُودْ وِتْرَجَّاهْ بَاشْ يْجِي وْيِشْفِي العَبْدْ مْتَاعُو مِالمْرَضْ.

⁴وْكِوُصْلُوا لْيَسُوعْ شَدُّوا فِيهْ صْحِيحْ وْقَالُوا: «رَاهُو يِسْتْحَقْ بَاشْ تَعْمِلُّو الشَّيْء الِّي يْحِبْ عْلِيهْ.

⁵عْلَى خَاطْرُو يْحِبْ الأُمَّة مْتَاعْنَا وْهُوَ الِّي بْنَالْنَا المَجْمَعْ.»

⁶يَاخِي مْشَى مْعَاهُمْ يَسُوعْ. وْدُوبْ مَا قْرُبْ مِالدَّارْ، بْعَثْلُو القَايِدْ مْتَاعْ المْيَا جْمَاعَة صْحَابُو يْقُلُّو: «يَا سِيدِي مَا اتَّعِّبْشْ رُوحِكْ، عْلَى خَاطِرْنِي مَا نِسْتَاهِلْشْ بَاشْ إِنْتِ تْجِي وتُدْخُلْ تَحْتْ سْقَفْ بِيتِي.

⁷لِلسْبَبْ هَاذَا مَا نْرَاشْ رُوحِي الِّي آنَا نِسْتَاهِلْ بَاشْ نِتْلاَقَى مْعَاكْ. آمَا قُولْ كِلْمَة بَرْكَة وْعَبْدِي بَاشْ يِتْشْفَى.

⁸آنَا زَادَا رَاجِلْ عِنْدِي شْكُونْ يُحْكُمْ فِيَّ وْعِنْدِي عَسْكِرْ نُحْكُمْ فِيهُمْ، نْقُولْ لْوَاحِدْ "إِمْشِي!" يِمْشِي. وِلْغِيرُو "إِيجَا!" يْجِي وْلِلعَبْدْ مْتَاعِي "أَعْمِلْ الشَّيْء هَاذَا!" يَعْمْلُو.»

⁹وْكِسْمَعْ يَسُوعْ الكْلاَمْ هَاذَا، تْعَجِّبْ مِنُّو وِتْلَفِّتْ لِلنَّاسْ الِّي يْتَبّْعُوا فِيهْ وْقَالْ: «نْقُلْكُمْ: حَتَّى وَاحِدْ فِي بَنِي إِسْرَائِيلْ مَا لْقِيتْ عَنْدُو إِيمَانْ كْبِيرْ كِيفْ هَاذَا.»

¹⁰وْكِرَجْعُوا الِّي بْعَثْهُمْ القَايِدْ مْتَاعْ المْيَاةْ عَسْكْرِي لِلدَّارْ لْقَاوْ العَبْدْ المْرِيضْ تِشْفَى.

¹¹وْمِالغُدْوَة مْشَى يَسُوعْ لِمْدِينَة اسْمْهَا نَايِينْ وِمْعَاهْ تْلاَمِذْتُو وْبَرْشَة نَاسْ أُخْرِينْ.

¹²وْكِقْرُبْ مِنْ بَابْ المْدِينَة، شَافْ وَاحِدْ هَازِّينُو مِيتْ وْكَانْ وِلْدْ مْرَا رَاجِلْهَا مِيتْ وْمَا عِنْدْهَا كَانْ هُوَ وْكَانُوا مْعَاهَا بَرْشَة نَاسْ.

¹³وَقْتِلِّي شَافْهَا الرَّبْ حَنْ عْلِيهَا وْقَالِلْهَا: «مَا تِبْكِيشْ!»

¹⁴وْمِنْ بَعْدْ قْرُبْ يَسُوعْ وْمَسْ المِيسَانْ وِالِّي هَازِّينُو وُقْفُوا وْقَالْ: «يَا وْلِدْ نْقُلِّكْ، قُومْ!»

¹⁵قَامْ المَيِّتْ وِقْعَدْ وِبْدَا يِتْكَلِّمْ، وِعْطَاهْ لْأُمُّو.

¹⁶النَّاسْ الكُلْ خَافُوا وْمَجّْدُوا اللهْ وْقَالُوا: «جَا مَا بِينَاتْنَا نَبِي عْظِيمْ وِالله تْذَكِّرْ الشَّعْبْ مْتَاعُو!»

¹⁷وِالخْبَرْ هَاذَا تِنْشَرْ فِي مَنْطِقْةْ اليَهُودِيَّة الكُلْهَا وْفِي البْقَايِعْ الِّي بِحْذَاهَا.

¹⁸يُوحَنَّا خَبّْرُوهْ التْلاَمْذَة مْتَاعُو بِالحَاجَاتْ الِّي صَارِتْ الكُلْهَا، يَاخِي عَيِّطْ عْلَى زُوزْ مِنْ تْلاَمِذْتُو.

¹⁹وِبْعَثْهُمْ لِلرَّبْ يِسْإِلْ فِيهْ: «إِنْتِ هُوَ الِّي جَايْ وِلاَّ نِسْتَنَّاوْ وَاحِدْ آخَرْ؟»

²⁰وَقْتِلِّي جَاوْ لِلرَّبْ يَسُوعْ قَالُوا: «بْعَثْنَا لِيكْ يُوحَنَّا المَعْمَدَانْ يِسْإِلْ: إِنْتِ هُوَ الِّي جَايْ وِلاَّ نِسْتَنَّاوْ وَاحِدْ آخَرْ؟»

²¹وْفِي الوَقْتْ هَاذَاكَا يَسُوعْ شْفَى بَرْشَة نَاسْ مِنْ أَمْرَاضْ وِعْلِلْ وْأَرْوَاحْ شِرِّيرَة وْرَجَّعْ بَرْشَة عِمْيَانْ يُخْزْرُوا.

²²جَاوِبْ يَسُوعْ المَبْعُوثِينْ وْقَالْ: «امْشِيوْ وْخَبّْرُوا يُوحَنَّا بِلِّي شُفْتُوهْ وِسْمَعْتُوهْ: العِمْيَانْ يْشُوفُوا، وِالعَايْبِينْ يِمْشِيوْ، وِالمُرْضَى بِالبْرَصْ يِتْشْفَاوْ وِالطُّرْشْ يِسْمْعُوا وِالمُوتَى يْقُومُوا وِالمْسَاكِينْ يِتْبَشّْرُوا.

²³وْصَحَّة لِيهْ الِّي مَا يِشِكِّشْ فِيَّ.»

²⁴وْدُوبْ مَا تْلاَمِذْةْ يُوحَنَّا مْشَاوْ بْدَا يَسُوعْ يْكَلِّمْ فِي النَّاسْ عْلَى يُوحَنَّا المَعْمَدَانْ. «شْنُوَّة الِّي خْرَجْتُوا بَاشْ تْشُوفُوهْ فِي الخْلاَء؟ قَصْبَة يْحَرِّكْ فِيهَا الرِّيحْ؟

²⁵شْنُوَّة الِّي خْرَجْتُوا بَاشْ تْشُوفُوهْ؟ يَاخِي نَاوِينْ بَاشْ تْشُوفُوا إِنْسَانْ لاَبِسْ الحْرِيرْ؟ الِّي يِلْبْسُوا فِي الحْوَايِجْ الغَالْيَة وِلِّي لاَبَاسْ عْلِيهُمْ هَاوِّينْهُمْ قَاعْدِينْ فِي القْصُورْ مْتَاعْ المُلُوكْ.

²⁶إِمَّالاَ شْنُوَّة الِّي خْرَجْتُوا بَاشْ تْشُوفُوهْ؟ نَبِي؟ إِي نْعَمْ وِنْقُلْكُمْ، أَعْظِمْ مِنْ نَبِي.

²⁷هَاذَا هُوَ الِّي تِكْتِبْ عْلِيهْ: هَانِي نَبْعِثْ قُدَّامِكْ رَسُولِي الِّي يْحَضِّرْلِكْ الطْرِيقْ.

²⁸آنَا نْقُلْكُمْ: مَا ثَمَّاشْ بِينْ الِّي جَابِتْهُمْ النْسَاء أَعْظِمْ مِنْ يُوحَنَّا آمَا رَاهُو أَصْغِرْ وَاحِدْ فِي مَمْلِكْةْ اللهْ أَعْظِمْ مِنُّو.»

²⁹وْكِسَمْعُوا النَّاسْ الكُلْ وْحَتَّى الِّي يْلِمُّوا فِي الضَّرَايِبْ الكْلاَمْ هَاذَا اعْتَرْفُوا الِّي اللهْ عَادِلْ بَعْدْ مَا تْعَمّْدُوا بْمَعْمُودِيِّةْ يُوحَنَّا.

³⁰آمَا الفَرِّيسِيِّينْ وْعُلَمَاءْ الشَّرِيعَة رَفْضُوا الخُطَّة الِّي حَبّْهَالْهُمْ اللهْ عْلَى خَاطِرْهُمْ مَا تْعَمّْدُوشْ عْلَى يِدْ يُوحَنَّا.

³¹«إِمَّالاَ بِشْنُوَّة نْشَبِّهْ النَّاسْ مْتَاعْ الجِيلْ هَاذَا؟ وْلِشْكُونْ يِشْبْهُوا؟

³²يِشْبْهُوا لِوْلاَدْ قَاعْدِينْ فِي السُّوقْ يْقُولُوا لِبْعَضْهُمْ: زَمِّرْنَالْكُمْ، وْمَا شْطَحْتُوشْ. نَوِّحْنَالْكُمْ وْمَا بْكِيتُوشْ.

³³جَا يُوحَنَّا المَعْمَدَانْ لاَ يَاكُلْ خُبْزْ وْلاَ يُشْرُبْ شْرَابْ، قُلْتُوا: سَاكْنُو شِيطَانْ.

³⁴مِنْ بَعْدْ جِيتْ آنَا إِبْنْ الإِنْسَانْ نَاكُلْ المَاكْلَة وْنُشْرُبْ الشْرَابْ قُلْتُوا: هَاذَا رَاجِلْ سُكَّارْجِي وْيَاكُلْ بَرْشَة، يْصَاحِبْ فِي الِّي يْلِمُّوا فِي الضَّرَايِبْ وِالمِذْنْبِينْ.

³⁵آمَا رَاهِي الحِكْمَة يِشْهْدُولْهَا وْلاَدْهَا.»

³⁶ثَمَّة وَاحِدْ مِنْ الفَرِّيسِيِّينْ طْلَبْ مِنُّو بَاشْ يْجِي وْيُفْطِرْ عَنْدُو. دْخَلْ يَسُوعْ لْدَارْ الفِرِّيسِي وِتَّكَّى عْلَى جْنَبْ

³⁷وْكَانِتْ ثَمَّة مْرَا فَاسْدَة فِي المْدِينَة دُوبْ مَاعَرْفِتْ الِّي يَسُوعْ قَاعِدْ فِي دَارْ الفَرِّيسِي جَاتْ وْجَابِتْ مْعَاهَا دَبُّوزَة مْتَاعْ عِطْرْ.

³⁸وُقْفِتْ وْرَاء يَسُوعْ عِنْدْ سَاقِيهْ وْهِيَ تِبْكِي وِبْدَاتْ تْبِلْ فِي سَاقِيهْ بِدْمُوعْهَا وْتَمْسِحْ فِيهُمْ بِشْعَرْهَا، وِتْبُوسْ فِيهُمْ وْتِدْهِنْ فِيهُمْ بِالعِطْرْ.

³⁹كِشَافْ الفَرِّيسِي الشَّيْء هَاذَا قَالْ بِينُو وْبِينْ رُوحُو: «لُو كَانْ جَا نَبِي رَاهُو عْرَفْ شْكُونِي المْرَا هَاذِي الِّي تْمِسْ فِيهْ وْرَاهُو عْرَفْ سِيرِتْهَا، رَاهِي مْرَا فَاسْدَة.»

⁴⁰يَاخِي جَاوْبُو يَسُوعْ وْقَالْ: «يَا سِمْعَانْ عِنْدِي شَيْء نْحِبْ نْقُولْهُولِكْ.» جَاوْبُو سِمْعَانْ: «قُولْ يَا مُعَلِّمْ»

⁴¹قَلُّو يَسُوعْ: «كَانْ ثَمَّة رَاجِلْ مْسَلِّفْ فْلُوسْ لْزُوزْ مِالنَّاسْ، وَاحِدْ سَلّْفُو خَمْسَة مْلاَيِنْ وِالآخَرْ خَمْسَة مْيَاةْ دِينَارْ.

⁴²آمَا مَا كَانِشْ عِنْدْهُمْ بَاشْ يَرَجّْعُوا الفْلُوسْ يَاخِي سَامِحْهُمْ لِثْنِينْ. زَعْمَة شْكُونْ مِنْهُمْ بَاشْ يْحِبُّو أَكْثِرْ؟»

⁴³جَاوِبْ سِمْعَانْ وْقَالْ: «يُظْهُرْلِي الِّي سَامْحُو فِي بَرْشَة فْلُوسْ.» يَاخِي قَالُّو يَسُوعْ: «كْلاَمِكْ صْحِيحْ.»

⁴⁴مِنْ بَعْدْ تْلَفِّتْ يَسُوعْ لِلمْرَا وْقَالْ لْسِمْعَانْ: «تْشُوفْ فِي المْرَا هَاذِي؟ آنَا دْخَلْتْ لْدَارِكْ وْإِنْتِ مَا عْطِيتْنِيشْ مَاء بَاشْ نَغْسِلْ بِيهْ سَاقَيَّا، آمَا هِيَ غِسْلِتْ سَاقَيَّا بِالدْمُوعْ وْمَسْحِتْهُمْ بِشْعَرْهَا.

⁴⁵إِنْتِ مَا سَلِّمْتِشْ عْلِيَّ بِالوِجْهْ، آمَا هِيَ مِلِّي دْخَلْتْ وْهِيَ تْبُوسْلِي فِي سَاقَيَّا.

⁴⁶إِنْتِ مَا دْهِنْتِشْ رَاسِي بِالزِّيتْ، آمَا هِيَ دِهْنِتْ سَاقَيَّا بِالعِطْرْ.

⁴⁷هَاذَاكَا عْلاَشْ نْقُلِّكْ: رَاهِي ذْنُوبْهَا الكُلْ تْغِفْرِتْ عْلَى خَاطِرْهَا حَبِّتْ بَرْشَة، آمَا الِّي يِتْغْفِرْلُو شْوَيَّة يْحِبْ شْوَيَّة.»

⁴⁸مِنْ بَعْدْ قَالِلْهَا: «ذْنُوبِكْ مَغْفُورَة.»

⁴⁹يَاخِي بْدَاوْا المِتَّكِّينْ مْعَاهْ يِسْأْلُوا فِي رْوَاحْهُمْ: «شْكُونُو هَاذَا زَادَا حَتَّى لِينْ يِغْفِرْ الذْنُوبْ.»

⁵⁰وْقَالْ يَسُوعْ لِلمْرَا: «إِيمَانِكْ خَلّْصِكْ إِمْشِي فِي سَلاَمْ.»