Read Tunisian Arabic New Testament لُوقَا 8 Bible Online

لُوقَا 8 - Tunisian Arabic New Testament bible

لُوقَا 8

¹بَعْدْ هَاذَا بْدَا يَسُوعْ يْسَافِرْ فِي المُدُنْ وِالقُرَى يُوعِظْ وِيْبَشِّرْ بْمَمْلِكْةْ اللهْ وْكَانُوا مْعَاهْ تْلاَمِذْتُو الأَثْنَاشْ

²وِالنْسَاء الِّي شْفَاهُمْ يَسُوعْ مِالأرْوَاحْ الشِّرِّيرَة وِالأَمْرَاضْ، وِلِّي هُومَا: مَرْيَمْ الِّي يْنَادِيوْلْهَا المَجْدَلِيَّة الِّي خَرِّجْ مِنْهَا سَبْعَة شْوَاطِنْ.

³وْيُوَنَّا مَرْةْ خُوزِي الوْكِيلْ مْتَاعْ هِيرُودُسْ وْسُوسَنَّة وْبَرْشَة غِيرْهُمْ الِّي كَانُوا يْعَاوْنُوا فِيهْ.

⁴وْكِتْلَمُّوا بِيهْ النَّاسْ الِّي جَاوْ مِنْ المُدُنْ الكُلْ كَلِّمْهُمْ يَسُوعْ بِالأَمْثَالْ

⁵وْقَالْ: «خْرَجْ الفَلاَّحْ بَاشْ يَزْرَعْ الزِّرِّيعَة، وَقْتِلِّي هُوَ يَزْرَعْ طَاحِتْ شْوَيَّة مِنْهَا فِي الثْنِيَّة وِتْعِفْسِتْ بِالسَّاقِينْ وِكْلاَتْهَا طْيُورْ السْمَاءْ.

⁶وِشْوَيَّة أُخْرِينْ جَاوْ فِي بْلاَصَة فِيهَا الحْجَرْ، وْكِنِبْتُوا، يِبْسُوا عْلَى خَاطِرْهُمْ مَا كَانِشْ تِحْتْهُمْ الثْرَى.

⁷وِشْوَيَّة طَاحُوا فِي وُسْطْ الشُّوكْ، يَاخِي نْبِتْ مْعَاهُمْ الشُّوكْ وِخْنَقْهُمْ.

⁸وِشْوَيَّة مِالزِّرِّيعَة طَاحِتْ فِي أَرْضْ بَاهْيَة، وْكِنِبْتِتْ جَاتْ صَابَة وْجَابِتْ مْيَاةْ مَرَّة قَدْ الِّي تِزْرَعْ.» وْبَعْدْ هَاذَا نَادَى وْقَالْ: «الِّي عَنْدُو وِذْنِينْ خَلِّيهْ يِسْمَعْ.»

⁹وْسِأْلُوهْ تْلاَمِذْتُو عْلَى المَعْنَى مْتَاعْ المَثَلْ هَاذَا.

¹⁰قَالْ: «إِنْتُومَا تِعْطَالْكُمْ بَاشْ تَعْرْفُوا الأَسْرَارْ مْتَاعْ مَمْلِكْةْ اللهْ. آمَا الأُخْرِينْ نْكَلِّمْهُمْ بِالأَمْثَالْ عْلَى خَاطِرْهُمْ يُخْزْرُوا وْمُمْكِنْ مَا يْشُوفُوشْ وْيِسْمْعُوا وْمُمْكِنْ مَا يِفْهْمُوشْ.»

¹¹«وْهَاذَا تَفْسِيرْ المَثَلْ: الزِّرِّيعَة هِيَ كِلْمِةْ اللهْ.

¹²وِلِّي طَاحُوا فِي الثْنِيَّة هُومَا الِّي سَمْعُوا الكِلْمَة، مِنْ بَعْدْ يْجِي بْلِيسْ وْيَخْطِفْ الكِلْمَة مِنْ قْلُوبْهُمْ بَاشْ مَا يِمّْنُوشْ وْيُخْلْصُوا.

¹³وِلِّي جَاوْ فِي الحْجَرْ، هُومَا الِّي يِقْبْلُوا الكِلْمَة وَقْتِلِّي يِسْمْعُوهَا وْيَفْرْحُوا بِيهَا آمَا مَا عِنْدْهُمْشْ عْرُوقْ ؛ يِمّْنُوا لْمُدَّة قْصِيرَة، وْكِيْجِي وَقْتْ صْعِيبْ يِتْرَاجْعُوا عْلَى إِيمَانْهُمْ.

¹⁴وِلِّي جَاوْ فِي وُسْطْ الشُّوكْ هُومَا الِّي يِسْمْعُوا الكِلْمَة وْمِنْ بَعْدْ يِمْشِيوْ وْتُخْنُقْهُمْ الهْمُومْ وِالغْنَى وِالشْهَاوِي مْتَاعْ الدِّنْيَا وْمَا يْجِيبُوشْ زِرِّيعَة بَاهْيَة.

¹⁵آمَا الِّي جَاوْ فِي أَرْضْ بَاهْيَة هُومَا الِّي يِسْمْعُوا الكِلْمَة وْيَحْفْظُوهَا بْقَلْبْ بَاهِي وْصَادِقْ وْيُصْبْرُوا حَتَّى لِينْ يْجِيبُوا ثَمَرْ.»

¹⁶«وْمَا ثَمَّاشْ حَتَّى وَاحِدْ يْشَعِّلْ فْنَارْ وِيْغَطِّيهْ بْقَصْعَة وِلاَّ يْحُطُّو تَحْتْ السْرِيرْ، آمَا رَاهُو يْحُطُّو فِي بْلاَصَة عَالْيَة بَاشْ النَّاسْ وَقْتِلِّي يُدْخْلُوا يْشُوفُوا الضَّوْ.

¹⁷رَاهُو مَا ثَمَّاشْ حَتَّى شَيْء مْخُبِّي مُوشْ بَاشْ يِتْكْشِفْ وْمَا ثَمَّاشْ حَتَّى شَيْء مَسْتُورْ مُوشْ بَاشْ يُظْهُرْ وْيِتْكْشِفْ لِلنُّورْ.

¹⁸إِمَّالاَ رُدُّوا بَالْكُمْ وْأَعْرْفُوا كِيفَاشْ تِسْمْعُوا. رَاهُو الِّي عَنْدُو بَاشْ يِتْزَادْلُو أَكْثِرْ وِلِّي مَا عِنْدُوشْ حَتَّى الِّي مَاشِي فِي بَالُو الِّي هُوَ عَنْدُو بَاشْ يِتْفَكّْلُو.»

¹⁹وْجَاوْ أُمْ يَسُوعْ وْإِخْوْتُو وْمَا نَجّْمُوشْ يُوصْلُولُو بِسْبَبْ الزْحَامْ.

²⁰يَاخِي قَالُولُو: «رَاهِي أُمِّكْ وْإِخْوْتِكْ وَاقْفِينْ البَرَّة وِيْحِبُّوا يْشُوفُوكْ.»

²¹آمَا يَسُوعْ جَاوِبْهُمْ وْقَالْ: «أُمِّي وْإِخْوْتِي هُومَا الِّي يِسْمْعُوا كِلْمِةْ اللهْ وِيْطَبّْقُوهَا.»

²²وْفِي نْهَارْ مِنْ النْهَارَاتْ رْكِبْ يَسُوعْ فِي فْلُوكَة مْعَ تْلاَمِذْتُو وْقَالِلْهُمْ: «هَيَّا نِتْعَدَّاوْ لِلشَّطْ المْقَابِلْ مْتَاعْ البُحَيْرَة.» وِمْشَاوْ.

²³وَقْتِلِّي هُومَا مْبَحّْرِينْ يَسُوعْ رْقَدْ، وْفِي لَحْظَة جَاتْ عَاصْفَة وْرِيحْ قْوِيَّة. وِبْدَاتْ الفْلُوكَة تِتْعَبَّى بِالمَاء وْوَلاَّوْ فِي خْطَرْ.

²⁴يَاخِي قُرْبُوا مِنْ يَسُوعْ وْفَيّْقُوهْ وْقَالُوا: «يَا سِيدْنَا، يَا سِيدْنَا، رَانَا بَاشْ نْمُوتُوا!» يَاخِي قَامْ يَسُوعْ وِأْمَرْ الرِّيحْ وِالمَاء الهَايِجْ، وِهْدَاوْ وِالدِّنْيَا الكُلْهَا رَاضِتْ.

²⁵مِنْ بَعْدْ قَالِلْهُمْ: «وِينُو إِيمَانْكُمْ؟» وِتْعَجّْبُوا وْوَلُّوا خَايْفِينْ وِبْدَا كُلْ وَاحِدْ مِنْهُمْ يْقُولْ لِلآخَرْ: «إِمَّالاَ شْكُونُو هَاذَا، بَاشْ يُوصِلْ حَتَّى مِالرِّيحْ وِالمَاء يُأْمُرْهُمْ وْهُومَا يْطِيعُوهْ؟»

²⁶وْوُصْلُوا لْمَنْطِقْةْ الجَرَّاسِيِّينْ المْقَابْلَة الجَلِيلْ.

²⁷وْكِهْبَطْ لِلبَرْ عَرْضُو رَاجِلْ مِالمْدِينَة مَسْكُونْ بِالشْوَاطِنْ وْمِنْ مُدَّة طْوِيلَة مَا يِلْبِسْ فِي حَتَّى شَيْء وْمَا يُسْكُنْشْ فِي دَارْ، آمَا يُسْكُنْ بِينْ القْبُورْ.

²⁸وْدُوبْ مَا شَافْ يَسُوعْ صَاحْ وْطَاحْ قُدَّامُو، وْقَالْ بْصُوتْ عَالِي: «آشْ بِينِي وْبِينِكْ يَا يَسُوعْ إِبْنْ اللهْ العَالِي؟ نِتْرَجَّاكْ بَاشْ مَا تْعَذِّبْنِيشْ.»

²⁹وِأْمَرْ يَسُوعْ الرُّوحْ المَنْزُوسْ بَاشْ يُخْرُجْ مِالرَّاجِلْ، عْلَى خَاطْرُو كَانْ سَاكْنُو مِنْ مُدَّة طْوِيلَة وْكَانْ كُلْ مَا يَرْبْطُوهْ بِالسْلاَسِلْ وِلاَّ بِالحْدِيدْ بَاشْ يْشِدُّوهْ يْقَطِّعْهُمْ وِالشِّيطَانْ يْهِزُّو لِلخْلاَء

³⁰سِأْلُو يَسُوعْ: «آشْ إِسْمِكْ؟» قَالْ: «لِجْيُونْ!» عْلَى خَاطِرْهُمْ كَانُوا جَيْشْ كْبِيرْ مِالشْوَاطِنْ دَخْلُوا فِي الرَّاجِلْ هَاذَا.

³¹وِتْشَحّْتُوهْ بَاشْ مَا يُأْمُرْهُمْشْ بَاشْ يَرْجْعُوا لِلهَاوْيَة.

³²وْكَانِتْ ثَمَّة رِسْلَة كْبِيرَة مْتَاعْ حْلاَلِفْ قَاعْدَة سَارْحَة فِي الجْبَلْ يَاخِي تْشَحّْتُوهْ بَاشْ يْخَلِّيهُمْ يُدْخْلُوا فِيهُمْ، وْيَسُوعْ خَلاَّهُمْ يَعْمْلُوا الشَّيْء هَاذَا.

³³خَرْجُوا الشْوَاطِنْ مِالرَّاجِلْ وْدَخْلُوا فِي الحْلاَلِفْ، وِجْرَاوْ الحْلاَلِفْ لْحَرْفْ الجْبَلْ وْهَبْطُوا الكُلْهُمْ فِي البُحَيْرَة وْغَرْقُوا.

³⁴وَقْتِلِّي سُرَّاحْ الحْلاَلِفْ شَافُوا الِّي صَارْ هَرْبُوا لِلمْدِينَة وِالقُرَى وْنَشْرُوا الخْبَرْ.

³⁵خَرْجُوا النَّاسْ بَاشْ يْشُوفُوا شْنُوَّة الِّي وْقَعْ، وْجَاوْ لْيَسُوعْ وِلْقَاوْ الرَّاجِلْ الِّي خُرْجِتْ مِنُّو الشْوَاطِنْ لاَبِسْ حْوَايْجُو وْعَقْلُو لاَبَاسْ عْلِيهْ وْقَاعِدْ عَاقِلْ بِحْذَا سَاقِينْ يَسُوعْ، يَاخِي خَافُوا.

³⁶وِالنَّاسْ الِّي شَافُوا الِّي صَارْ خَبّْرُوهُمْ كِيفَاشْ الرَّاجِلْ الِّي سَاكْنِتُّو الشْوَاطِنْ تِشْفَى.

³⁷لَكِنْ امَّالِي مْدِينِةْ الجَرَّاسِيِّينْ الكُلْهُمْ طَلْبُوا مِنْ يَسُوعْ بَاشْ يَرْحِلْ مِنْ مْدِينِتْهُمْ عْلَى خَاطِرْهُمْ خَافُوا بَرْشَة، وِطْلَعْ يَسُوعْ فِي الفْلُوكَة وِرْجَعْ.

³⁸آمَا الرَّاجِلْ الِّي خَرْجِتْ مِنُّو الشْوَاطِنْ تْشَحِّتْ يَسُوعْ بَاشْ يِمْشِي مْعَاهْ، آمَا يَسُوعْ مَا خَلاَّهِشْ وْقَالُّو:

³⁹«أَرْجِعْ لْدَارِكْ وِاحْكِي عْلَى الحَاجَاتْ الكُلْهَا الِّي عْمَلْهَا اللهْ مْعَاكْ.» وِمْشَى يَحْكِي عَلِّي عِمْلُو يَسُوعْ مْعَاهْ فِي المْدِينَة الكُلْهَا.

⁴⁰وْكِرْجَعْ يَسُوعْ رَحّْبُوا بِيهْ النَّاسْ عْلَى خَاطِرْهُمْ الكُلْهُمْ كَانُوا يِسْتَنَّاوْ فِيهْ وَقْتَاشْ بَاشْ يَرْجَعْ.

⁴¹وْإِذَا بْرَاجِلْ إِسْمُو يَايْرُسْ، وِلِّي هُوَ رَئِيسْ الشْيُوخْ مْتَاعْ المَجْمَعْ جَا وْطَاحْ قُدَّامْ سَاقِينْ يَسُوعْ وِتْشَحّْتُو بَاشْ يِمْشِي مْعَاهْ لْدَارُو.

⁴²عْلَى خَاطِرْ عَنْدُو طُفْلَة وَحْدَة وِعْمُرْهَا اثْنَاشِنْ سْنَة وِقْريبْ تْمُوتْ. وَقْتِلِّي كَانْ مَاشِي زَاحْمُوهْ بَرْشَة نَاسْ

⁴³وْكَانِتْ ثَمَّة مْرَا مْرِيضَة بْنَزِيفْ دَمْ مِنْ اثْنَاشِنْ سْنَة، بِالرَّغْمْ الِّي هِيَ صَرْفِتْ كُلْ مَا عِنْدْهَا عْلَى الطُّبَّة وْمَا بْرَاتْ عْلَى يِدْ حَتَّى وَاحِدْ.

⁴⁴جَاتْ لْيَسُوعْ مِنْ تَالِي وْمَسِّتْ الطّْرَفْ مْتَاعْ دَبْشُو، وْبِالوَقْتْ النَّزِيفْ وْقُفْ.

⁴⁵قَالْ يَسُوعْ: «شْكُونْ الِّي مَسّْنِي؟» وْكِالكُلْهُمْ نُكْرُوا، قَالْ بُطْرُسْ: «يَا سِيدْنَا النَّاسْ دَايْرِينْ بِيكْ وِيْزَاحْمُوا فِيكْ.»

⁴⁶يَاخِي قَالْ يَسُوعْ: «ثَمَّة وَاحِدْ مَسّْنِي عْلَى خَاطِرْنِي حَسِّيتْ الِّي ثَمَّة قُوَّة خَرْجِتْ مِنِّي.»

⁴⁷وَقْتِلِّي المْرَا شَافِتْ رُوحْهَا الِّي هِيَ بَاشْ تِتْكْشِفْ جَاتْ خَايْفَة وِرْمَاتْ رُوحْهَا قُدَّامْ سَاقِيهْ وْقَالِتْ قُدَّامْ النَّاسْ الكُلْ عْلاَشْ مَسِّتُّو وْكِيفَاشْ بْرَاتْ بِالوَقْتْ.

⁴⁸قَالِلْهَا يَسُوعْ: «يَا بِنْتِي إِيمَانِكْ شْفَاكْ، إِمْشِي فِي الأَمَانْ!»

⁴⁹وَقْتِلِّي هُوَ يِتْكَلِّمْ جَا وَاحِدْ بَاعْثِينُو مِنْ بِيتْ رَئِيسْ المَجْمَعْ وْقَالُّو: «بِنْتِكْ مَاتِتْ وْزَايِدْ تْشَقِّي فِي المُعَلِّمْ.»

⁵⁰كِسْمَعْ يَسُوعْ الشَّيْء هَاذَا، قَالُّو: «مَا تْخَافِشْ إِمِّنْ بَرْكْ، وْهِيَ بَاشْ تْكُونْ لاَبَاسْ.»

⁵¹وْكِوْصُلْ لْدَارْ رَئِيسْ المَجْمَعْ، مَا خَلَّى حَتَّى وَاحِدْ يُدْخُلْ مْعَاهْ كَانْ بُطْرُسْ وْيُوحَنَّا وْيَعْقُوبْ وْبُو الطُّفْلَة وْأُمّْهَا.

⁵²النَّاسْ الكُلْ كَانُوا يِبْكِيوْ وْيِنْدْبُوا عْلِيهَا، قَالِلْهُمْ يَسُوعْ: «مَا تِبْكِيوْشْ رَاهِي مَا مَاتِتْشْ آمَا هِيَ رَاقْدَة.»

⁵³يَاخِي ضَحْكُوا عْلِيهْ عْلَى خَاطِرْهُمْ يَعْرْفُوا الِّي هِيَ مَاتِتْ.

⁵⁴شَدْ الطُّفْلَة مِنْ يِدّْهَا وْقَالِلْهَا: «يَا بْنَيَّة قُومْ!»

⁵⁵وْرَجْعِتْ فِيهَا الرُّوحْ وْقَامِتْ بِالوَقْتْ وِأْمَرْ بَاشْ يَعْطِيوْهَا تَاكُلْ.

⁵⁶بْقَاوْوَالْدِيهَا مِتْعَجّْبِينْ وْوَصَّاهُمْ بَاشْ مَا يْقُولُوا لْحَتَّى حَدْ عَلِّي صَارْ.