Read Tunisian Arabic New Testament لُوقَا 9 Bible Online

لُوقَا 9 - Tunisian Arabic New Testament bible

لُوقَا 9

¹مِنْ بَعْدْ لَمْ يَسُوعْ الأَثْنَاشِنْ تِلْمِيذْ وِعْطَاهُمْ قُوَّة وْسُلْطَة عْلَى أَنْوَاعْ الشْوَاطِنْ الكُلْهَا وِعْلَى الأَمْرَاضْ الكُلْهَا بَاشْ يِشْفِيوْهَا.

²وِبْعَثْهُمْ بَاشْ يْبَشّْرُوا بْمَمْلِكْةْ اللهْ وْيِشْفِيُوا المُرْضَى.

³وْقَالِلْهُمْ: «مَا تْهِزُّوشْ مْعَاكُمْ فِي طْرِيقْكُمْ لاَ عْصَا، وْلاَ صُرَّة، وْلاَ خُبْزْ، وْلاَ فْلُوسْ وْمَا تْهِزُّوشْ زُوزْ كْبَابِطْ.

⁴وِالدَّارْ الِّي تُدْخْلُوهَا تُسْكْنُوا فِيهَا حَتَّى لِينْ تَرْحْلُوا مِالمْدِينَة هَاذِيكَا،

⁵وِالمْدِينَة الِّي مَا يِقْبْلُوكُمْشْ فِيهَا، أُخْرْجُوا مِنْهَا وْأُنْفْضُوا التْرَابْ مِنْ سَاقِيكُمْ شْهَادَة عْلِيهُمْ.»

⁶مْشَاوْ يْدُورُوا فِي القُرَى وْهُومَا يْبَشّْرُوا بِالإِنْجِيلْ وْيِشْفِيوْ فِي النَّاسْ فِي كُلْ بُقْعَة.

⁷وِسْمَعْ المَلِكْ هِيرُودُسْ بِلِّي صَارْ الكُلْ، وِبْقَى حَايِرْ، عْلَى خَاطِرْ ثَمَّة شْكُونْ يْقُولُوا الِّي يُوحَنَّا قَامْ مِنْ بِينْ المُوتَى.

⁸وْثَمَّة أُخْرِينْ يْقُولُوا الِّي النَّبِي إِيلِيَّا ظْهُرْ وْنَاسْ أُخْرِينْ يْقُولُوا الِّي وَاحِدْ مِالأَنْبِيَاءْ القْدُمْ قَامْ.

⁹وْقَالْ هِيرُودُسْ: «يُوحَنَّا آنَا قَصِّيتْلُو رَاسُو، آمَا شْكُونْ الِّي آنَا قَاعِدْ نِسْمَعْ عْلِيهْ فِي الحَاجَاتْ هَاذِي؟» وْكَانْ يْحِبْ يْشُوفُو.

¹⁰وْبَعْدْ مَا رَجْعُوا الرُّسُلْ، خَبّْرُوا يَسُوعْ بِلِّي عَمْلُوهْ الكُلْ، يَاخِي هَزّْهُمْ هُومَا وَحَّدْهُمْ وِمْشَاوْ لِمْدِينَة اسْمْهَا بِيتْ‌ صَيْدَا.

¹¹آمَا النَّاسْ عَرْفُوا وْخَلْطُوا عْلِيهْ، وِاسْتَقْبِلْهُمْ وْكَلِّمْهُمْ عْلَى مَمْلِكْةْ اللهْ وِشْفَى الِّي كَانُوا مِنْهُمْ مِحْتَاجِينْ بَاشْ يِتْشْفَاوْ.

¹²وْكِقْرِيبْ يُوفَى النْهَارْ جَاوْهْ الأَثْنَاشِنْ تِلْمِيذْ وْقَالُولُو: «أَبْعِثْ النَّاسْ خَلِّيهُمْ يِمْشِيوْ لِلقُرَى وِالفِيرْمَاتْ القْرِيبَة بَاشْ يْبَاتُوا وْيَلْقَاوْ مَاكْلَة، عْلَى خَاطِرْنَا أَحْنَا هْنَا فِي بُقْعَة خَالْيَة.»

¹³يَاخِي قَالِلْهُمْ يَسُوعْ: «أَعْطِيوْهُمْ إِنْتُومَا حَاجَة يَاكْلُوهَا» جَاوْبُوا: «مَا عِنْدْنَا كَانْ خَمْسَة خُبْزَاتْ وْزُوزْ حُوتَاتْ، إِلاَّ إِذَا كَانْ بَاشْ نِمْشِيوْا وْنِشْرِيوْ مَاكْلَة لِلنَّاسْ الكُلْ.»

¹⁴وْكَانُوا تَقْرِيبْ خَمْسَة آلاَفْ رَاجِلْ، مِنْ بَعْدْ قَالْ يَسُوعْ لِتْلاَمِذْتُو: «قَعّْدُوهُمْ فِي مَجْمُوعَاتْ كُلْ مَجْمُوعَة فِيهَا خَمْسِينْ وَاحِدْ.»

¹⁵وْعَمْلُوا كِيمَا قَالِلْهُمْ وْقَعّْدُوا النَّاسْ الكُلْ.

¹⁶خْذَا يَسُوعْ الخَمْسَة خُبْزَاتْ وِالحُوتِّينْ وْهَزْ عِينِيهْ لِلسْمَاء وْبَارِكْهُمْ وِقْسِمْهُمْ وِعْطَاهُمْ لِتْلاَمِذْتُو بَاشْ يْفَرّْقُوهُمْ عْلَى النَّاسْ.

¹⁷وِالكُلْهُمْ كْلاَوْ وْشَبْعُوا. مِنْ بَعْدْ عَبَّاوْ ثْنَاشِنْ قُفَّة مِلِّي فْضُلْ.

¹⁸وْوَقْتِلِّي كَانْ يَسُوعْ يْصَلِّي وَحْدُو وِالتْلاَمْذَة بِحْذَاهْ، سْإِلْهُمْ: «النَّاسْ يْقُولُوا عْلِيَّ شْكُونْ آنَا؟»

¹⁹جَاوْبُوهْ: «ثَمَّة شْكُونْ يْقُولْ الِّي إِنْتِ يُوحَنَّا المَعْمَدَانْ، وْغِيرْهُمْ يْقُولْ الِّي إِنْتِ النَّبِي إِيلِيَّا. وِالأُخْرِينْ يْقُولُوا الِّي إِنْتِ وَاحِدْ مِالأَنْبِيَاءْ القْدُمْ قَامْ مِالمُوتْ.»

²⁰سْإِلْهُمْ يَسُوعْ: «وْإِنْتُومَا تْقُولُوا عْلِيَّ شْكُونْ؟» جَاوْبُو بُطْرُسْ: «إِنْتِ مَسِيحْ اللهْ!»

²¹آمَا هُوَ نَبِّهْ عْلِيهُمْ وْوَصَّاهُمْ بَاشْ مَا يْقُولُوا الشَّيْء هَاذَا لْحَتَّى حَدْ.

²²وْقَالْ يَسُوعْ: «إِبْنْ الإِنْسَانْ لاَزِمُو يِتْعَذِّبْ بَرْشَة وْيُرْفْضُوهْ الشْيُوخْ وْرُؤَسَاءْ الكُهَّانْ وِالكُتَّابْ مْتَاعْ اليْهُودْ، وْيِتْقْتَلْ، وْفِي النْهَارْ الثَّالِثْ يْقُومْ.»

²³مِنْ بَعْدْ قَالِلْهُمْ الكُلْهُمْ: «إِذَا كَانْ وَاحِدْ يْحِبْ يْتَبَّعْنِي، خَلِّيهْ مَا يْحِبِّشْ رُوحُو وِيْهِزْ الصَّلِيبْ مْتَاعُو كُلْ يُومْ وْيِمْشِي وْرَايَا.

²⁴الِّي يْحِبْ يْخَلِّصْ حْيَاتُو يِخْسِرْهَا، آمَا الِّي يِخْسِرْ حْيَاتُو عْلَى خَاطْرِي، رَاهُو يْخَلِّصْهَا.

²⁵شْنُوَّة فَايِدْةْ الإِنْسَانْ إِذَا كَانْ يِرْبِحْ العَالَمْ الكُلُّو وْيِخْسِرْ حْيَاتُو وِلاَّ يِهْلِكْهَا.

²⁶كُلْ مِنْ يِسْتْعَارْ بِيَّ وْبِكْلاَمِي، نِسْتْعَارْ بِيهْ آنَا إِبْنْ الإِنْسَانْ وَقْتِلِّي نَرْجَعْ فِي مَجْدِي وْمَجْدْ الآبْ وِالمْلاَيْكَة المُقَدّْسِينْ.

²⁷آمَا نْقُلْكُمْ الحَقْ: ثَمَّة شْكُونْ مِالوَاقْفِينْ هْنَا مَا هُمْشْ بَاشْ يْشُوفُوا المُوتْ حَتَّى لِينْ يْشُوفُوا مَمْلِكْةْ اللهْ.»

²⁸وْتَقْرِيبْ بَعْدْ مَا قَالْ الكْلاَمْ هَاذَا بِثْمَنْيَة أَيَّامْ، هَزْ يَسُوعْ مْعَاهْ بُطْرُسْ وْيُوحَنَّا وْيَعْقُوبْ وِطْلَعْ هُوَ وْيَاهُمْ لِلجْبَلْ بَاشْ يْصَلِّي.

²⁹وَقْتِلِّي هُوَ يْصَلِّي وِجْهُو تْبَدِّلْ، وِحْوَايْجُو وَلاَّتْ بِيضَة تِلْمَعْ.

³⁰وْإِذَا بِيهُمْ زُوزْ رْجَالْ يْكَلّْمُوا فِيهْ، هُومَا: مُوسَى وْإِيلِيَّا.

³¹وْظُهْرُوا فِي مَجْدْ وِتْكَلّْمُوا مْعَاهْ عْلَى مُوتُو الِّي لاَزِمْ يْتِمْ فِي أُورْشَلِيمْ

³²آمَا بُطْرُسْ وِلِّي مْعَاهْ رَقْدُوا، كِفَاقُوا شَافُوا المَجْدْ مْتَاعُو، وِالزُّوزْ الرْجَالْ الِّي كَانُوا وَاقْفِينْ مْعَاهْ

³³وْوَقْتِلِّي هُومَا مَاشِينْ قَالْ بُطْرُسْ لْيَسُوعْ: «بَاهِي الِّي أَحْنَا مُوجُودِينْ هْنَا خَلِّينَا نُنْصْبُوا ثْلاَثَة خْيَامْ، وَحْدَة لِيكْ وْوَحْدَة لْمُوسَى وْوَحْدَة لْإِيلِيَّا» وْهُوَ مَا كَانِشْ دَارِي عْلَى رُوحُو شْنُوَّة قَاعِدْ يْقُولْ.

³⁴وَقْتِلِّي هُوَ قَاعِدْ يْقُولْ فِي الكْلاَمْ هَاذَا جَا سْحَابْ وْغَطَّاهُمْ، يَاخِي خَافُوا وَقْتِلِّي غَطَّاهُمْ السْحَابْ.

³⁵وِخْرَجْ صُوتْ مِالسْحَابْ يْقُولْ: «هَاذَا هُوَ ابْنِي الِّي اخْتَرْتُو، إِسْمْعُوا كْلاَمُو.»

³⁶وْبَعْدْ مَا سَمْعُوا الصُّوتْ لْقَاوْ يَسُوعْ وَحْدُو. وْمَا عَاوْدُوشْ الخْبَرْ وْفِي الوَقْتْ هَاذَاكَا مَا قَالُوا لْحَتَّى حَدْ عْلَى الشَّيْء الِّي شَافُوهْ.

³⁷وْمِالغُدْوَة كِهَبْطُوا مِالجْبَلْ عَرّْضُولْهُمْ نَاسْ.

³⁸وْإِذَا بْوَاحِدْ مِالنَّاسْ هَاذُمْ صَاحْ وْقَالْ: «يَا مُعَلِّمْ جِيتِكْ طَالِبْ، إِيجَا شُوفْ وِلْدِي رَانِي مَا عِنْدِيشْ غِيرُو.

³⁹وْرَاهُو ثَمَّة رُوحْ يِلْبْسُو، وْفِيسَعْ مَا يْوَلِّي يْصِيحْ، وْيَصْرْعُو وِيْخَرِّجْ الكْشَاكِشْ مِنْ فُمُّو وْمَا يْسَيّْبُو كَانْ بِالسِّيفْ.

⁴⁰وْآنَا تْشَحِّتّْ تْلاَمِذْتِكْ بَاشْ يْخَرّْجُوهْ، آمَا هُومَا مَا نَجّْمُوشْ.»

⁴¹جَاوِبْ يَسُوعْ وْقَالْ: «يَا جِيلْ يَا فَاسِدْ وْيَلِّي مَا عِنْدْكُمْشْ إِيمَانْ، لْوَقْتَاشْ بَاشْ نَبْقَى مْعَاكُمْ، لْوَقْتَاشْ بَاشْ نِتْحَمِّلْكُمْ؟ جِيبْ وِلْدِكْ هْنَا!»

⁴²وَقْتِلِّي هُوَ جَايْلُو طَيّْحُو الشِّيطَانْ بْقُوَّة وْصَرْعُو، يَاخِي يَسُوعْ طَرِّدْ الرُّوحْ المَنْزُوسْ وِشْفَى الوْلِدْ وْرَجّْعُو لْبُوهْ.

⁴³يَاخِي تْعَجّْبُوا النَّاسْ الكُلْ مِنْ قُدْرِةْ اللهْ. وْكِكَانُوا مِتْعَجّْبِينْ مِلِّي عَمْلُو يَسُوعْ، قَالْ لِتْلاَمِذْتُو:

⁴⁴«الكْلاَمْ هَاذَا حُطُّوهْ فِي بَالْكُمْ: رَانِي آنَا إِبْنْ الإِنْسَانْ بَاشْ يْسَلّْمُونِي لِيْدِينْ النَّاسْ.»

⁴⁵آمَا هُومَا مَا فَهْمُوشْ الكْلاَمْ هَاذَا، وْمَا كَانِشْ مَكْشُوفْ لِيهُمْ بَاشْ مَا يْنَجّْمُوشْ يِفْهْمُوهْ، وْخَافُوا بَاشْ يِسْأْلُوهْ عْلَى الشَّيْء الِّي قَالُو.

⁴⁶وْوَلاَّوْ يِتْنَاقْشُوا مَا بِينَاتْهُمْ عْلَى شْكُونُو أَعْظِمْ وَاحِدْ فِيهُمْ.

⁴⁷وِعْرَفْ يَسُوعْ نِيَّاتْ قْلُوبْهُمْ، جَابْ وْلِدْ صْغِيرْ وْوَقّْفُو بْجَنْبُو

⁴⁸وْقَالِلْهُمْ: «الِّي يِقْبِلْ الوْلِدْ الصْغِيرْ هَاذَا عْلَى خَاطِرْ إِسْمِي، رَاهُو يِقْبِلْنِي، وِلِّي يِقْبِلْنِي، يِقْبِلْ الِّي بْعَثْنِي، رَاهُو أَصْغِرْ وَاحِدْ فِيكُمْ الكُلْ هُوَ العْظِيمْ.»

⁴⁹وِتْكَلِّمْ يُوحَنَّا وْقَالْ: «يَا سِيدْنَا، شُفْنَا وَاحِدْ يْخَرِّجْ فِي الشْوَاطِنْ بْإِسْمِكْ يَاخِي حَاوِلْنَا بَاشْ نْحُوزُوهْ، عْلَى خَاطْرُو مُوشْ يْتَبَّعْ فِيكْ كِيفْنَا.»

⁵⁰يَاخِي قَالُّو يَسُوعْ: «مَا تْحُوزُوهِشْ، الِّي مُوشْ ضِدّْكُمْ رَاهُو مْعَاكُمْ.»

⁵¹وْكِقُرْبِتْ الأَيَّامَاتْ الِّي بَاشْ يِتْرْفَعْ فِيهُمْ قَرِّرْ يَسُوعْ وْشَدْ صْحِيحْ بَاشْ يِمْشِي لْأُورْشَلِيمْ.

⁵²وِبْعَثْ قُدَّامُو جْمَاعَة مِالنَّاسْ، مْشَاوْ وْدَخْلُوا لْقَرْيَة تَابْعَة السَّامِرِيِّينْ، بَاشْ يْحَضّْرُولُو دَارْ.

⁵³آمَا السَّامِرِيِّينْ مَا قِبْلُوشْ يَسُوعْ عْلَى خَاطْرُو كَانْ مَاشِي لْأُورْشَلِيمْ.

⁵⁴وَقْتِلِّي تْلاَمِذْتُو يُوحَنَّا وْيَعْقُوبْ شَافُوا الشَّيْء هَاذَا قَالُوا: «يَا رَبْ تْحِبِّشْ نُأْمْرُوا بَاشْ تَهْبِطْ نَارْ مِالسْمَاءْ وْتَاكُلْهُمْ؟»

⁵⁵تْلَفّْتِلْهُمْ يَسُوعْ وْوَبِّخْهُمْ وْقَالْ: «إِنْتُومَا مَا كُمْشْ عَارْفِينْ مِنْ أَيْ رُوحْ إِنْتُومَا جَايِينْ، رَانِي آنَا إِبْنْ الإِنْسَانْ مَا جِيتِشْ بَاشْ نِهْلِكْ النَّاسْ، آمَا جِيتْ بَاشْ نْخَلِّصْهُمْ.»

⁵⁶وْمِنْ بَعْدْ مْشَاوْ لْقَرْيَة أُخْرَى.

⁵⁷وَقْتِلِّي كَانُوا مَاشِينْ فِي الطْرِيقْ ثَمَّة وَاحِدْ قَالْ لْيَسُوعْ: «بَاشْ نْتَبّْعِكْ لأَيْ بْلاَصَة تِمْشِيلْهَا.»

⁵⁸يَاخِي قَالُّو يَسُوعْ: «الثْعَالِبْ عِنْدْهَا مْغَاغِرْ وِطْيُورْ السْمَاءْ عِنْدْهَا عْشَاشْ آمَا آنَا إِبْنْ الإِنْسَانْ مَا عِنْدِيشْ بْلاَصَة نْكِنْ فِيهَا رَاسِي.»

⁵⁹وْقَالْ يَسُوعْ لْوَاحِدْ آخَرْ: «تَبَّعْنِي!» آمَا هُوَ قَالْ: «يَا سِيدْنَا، خَلِّي نِمْشِي فِي الأُوِّلْ نِدْفِنْ بَابَا.»

⁶⁰يَاخِي قَالُّو يَسُوعْ: «خَلِّي المُوتَى يِدْفْنُوا المُوتَى مْتَاعْهُمْ آمَا إِنْتِ إِمْشِي وْبَشِّرْ بْمَمْلِكْةْ اللهْ.»

⁶¹وْقَالُّو وَاحِدْ آخَرْ: «يَا سِيدْنَا، آنَا نْتَبّْعِكْ، آمَا خَلِّينِى قْبَلْ نِمْشِي نْسَلِّمْ عْلَى امَّالِيَّ.»

⁶²جَاوْبُو يَسُوعْ: «الِّي يْحُطْ يِدُّو عْلَى المُحْرَاثْ وْيِتْلَفِّتْ التَالِي مَا يُصْلُحْشْ لْمَمْلِكْةْ اللهْ.»