Read Tunisian Arabic New Testament يُوحَنَّا 1 Bible Online

يُوحَنَّا 1 - Tunisian Arabic New Testament bible

يُوحَنَّا 1

¹فِي الأُوِّلْ بِالكُلْ كَانْ الكِلْمَة، وِالكِلْمَة كَانْ عِنْدْ اللهْ، وِالكِلْمَة كَانْ هُوَ اللهْ.

²هَاذَا هُوَ الِّي كَانْ فِي الأُوِّلْ عِنْدْ اللهْ.

³كُلْ شَيْء جَا مِنُّو هُوَ، وْمِنْ غِيرُو مَا كَانْ حَتَّى شَيْء

⁴فِيهْ كَانِتْ الحَيَاةْ، وِالحَيَاةْ هَاذِي كَانِتْ النُّورْ مْتَاعْ النَّاسْ.

⁵وِالنُّورْ يِضْوِي فِي الظْلاَمْ، وِالظْلاَمْ مَا عَرْفُوشْ.

⁶اللهْ بْعَثْ رَاجِلْ إِسْمُو يُوحَنَّا.

⁷هُوَ جَا شَاهِدْ بَاشْ يِشْهِدْ لِلنُّورْ بَاشْ عْلَى طْرِيقُو هُوَ النَّاسْ الكُلْ يِمّْنُوا.

⁸مَا كَانِشْ هُوَ النُّورْ، آمَا جَا بَاشْ يِشْهِدْ لِلنُّورْ.

⁹النُّورْ الحَقَّانِي الِّي يِضْوِي لِلنَّاسْ الكُلْ الِّي فِي الدِّنْيَا، جَايْ لِلدِّنْيَا الكُلْ.

¹⁰الكِلْمَة كَانْ فِي العَالَمْ، وْبِيهْ اللهْ خْلَقْ العَالَمْ، آمَا العَالَمْ مَا عَرْفُوشْ.

¹¹جَا لِلشَّعْبْ مْتَاعُو، آمَا الشَّعْبْ مْتَاعُو مَا قِبْلُوشْ.

¹²آمَا الِّي قِبْلُوهْ عْطَاهُمْ السُّلْطَة بَاشْ يْوَلِّيوْ وْلاَدْ اللهْ، الِّي هُومَا امّْنُوا بْإِسْمُو.

¹³الِّي مَا تْوِلْدُوشْ مِالدَّمْ وِلاَّ مِنْ شَهْوِةْ البْدَنْ وِلاَّ مِنْ إِرَادِةْ الإِنْسَانْ آمَا تْوِلْدُوا مِالله.

¹⁴وِالكِلْمَة وَلَّى بَشَرْ وِسْكِنْ مَا بِينَاتْنَا، وْشُفْنَا المَجْدْ مْتَاعُو. مَجْدْ إِبْنْ اللهْ الوَحِيدْ الِّي جَاهْ مِنْ عِنْدْ الآبْ، المَلْيَانْ بِالنِّعْمَة وِالحَقْ،

¹⁵وِشْهِدْلُو يُوحَنَّا وْنَادَى وْقَالْ: «هَاذَا هُوَ الِّي قُلْتْ عْلِيهْ: رَاهُو الِّي جَايْ بَعْدِي وَلَّى أَقْوَى مِنِّي عْلَى خَاطْرُو كَانْ قَبْلِي.»

¹⁶وْإِحْنَا الكُلْنَا خْذِينَا مِنْ نِعْمْتُو الفَايْضَة، نِعْمَة عْلَى نِعْمَة،

¹⁷عْلَى طْرِيقْ مُوسَى اللهْ عْطَانَا الشَّرِيعَة، آمَا يَسُوعْ المَسِيحْ هُوَ الِّي جَابْ الحَقْ وِالنِّعْمَة.

¹⁸حَتَّى حَدْ مَا شَافْ اللهْ. آمَا عَرِّفْنَا بِيهْ إِبْنْ اللهْ الِّي هُوَ عِنْدْ الآبْ.

¹⁹وْهَاذِي هِيَ الشّْهَادَة الِّي شْهِدْ بِيهَا يُوحَنَّا، وَقْتِلِّي اليْهُودْ الِّي فِي أُورْشَلِيمْ بَعْثُولُوا كُهَّانْ وْلاَوِيِّينْ بَاشْ يِسْأْلُوهْ: «إِنْتِ شْكُونْ؟»

²⁰شْهِدْ وْمَا نْكَرْشْ وِاسْتَعْرِفْ: «مَا نِيشْ آنَا المَسِيحْ.»

²¹وَلاَّوْ سِأْلُوهْ: «إِمَّالاَ، شْكُونْ؟ يَاخِي إِنْتِ إِيلِيَّا؟» قَالِلْهُمْ: «لاَ.» «يَاخِي إِنْتِ النَّبِي؟» قَالِلْهُمْ زَادَا: «لاَ.»

²²قَالُولُو: «إِمَّالاَ شْكُونِكْ إِنْتِ، أَعْطِينَا آشْ بَاشْ نْقُولُوا لِلنَّاسْ الِّي بِعْثُونَا. شْنُوَّة تْقُولْ عْلَى رُوحِكْ؟»

²³قَالْ: «آنَا، كِيمَا قَالْ النَّبِي إِشَعْيَاءْ: صُوتْ يْنَادِي فِي الخْلاَء خَلُّوا طْرِيقْ رَبّْنَا تِتْسْوَى.»

²⁴وْبِينَاتْ النَّاسْ هَاذُومَا ثَمَّة شْكُونْ كَانُوا مَبْعُوثِينْ مِالفَرِّيسِيِّينْ،

²⁵وْسِأْلُوهْ وْقَالُولُو: «كِيفَاشْ مَالاَ إِنْتِ تْعَمِّدْ إِذَا كَانِكْ مَاكِشْ المَسِيحْ وِلاَّ إِيلِيَّا وِلاَّ النَّبِي؟»

²⁶جَاوِبْهُمْ يُوحَنَّا وْقَالِلْهُمْ: «آنَا نْعَمِّدْ بِالمَاء، آمَا بِينَاتْكُمْ وَاحِدْ مَا تَعْرْفُوهِشْ.

²⁷وْهُوَ جَايْ بَعْدِي، وْهُوَ أَعْظِمْ مِنِّي، وْآنَا مَا نِسْتْحَقِّشْ نْحِلْلُو خْيُوطْ صَنْدَالُو.»

²⁸هَاذَا الكُلْ صَارْ فِي بْلاَصَة إِسْمْهَا بِيتْ عَنْيَا، فِي الشَّرْقْ مْتَاعْ نَهْرْ الأُرْدُنْ، وِينْ كَانْ يُوحَنَّا يْعَمِّدْ.

²⁹مِنْ غُدْوَة شَافْ يُوحَنَّا يَسُوعْ جَايْلُو، قَالْ: «هَاذَا هُوَ خَرُوفْ اللهْ الِّي يْنَحِّي الذْنُوبْ مْتَاعْ العَالَمْ.

³⁰هَاذَا هُوَ الِّي قُلْتْ عْلِيهْ: "ثَمَّة رَاجِلْ بَاشْ يْجِي بَعْدِي وْرَاهُو وَلَّى أَقْوَى مِنِّي، عْلَى خَاطْرُو كَانْ قَبْلِي."

³¹وْآنَا بِيدِي مَا كُنْتِشْ نَعْرْفُو، آمَا رَانِي جِيتْ بَاشْ نْعَمِّدْ بِالمَاء بَاشْ هُوَ يِتْعْرَفْ عِنْدْ إِسْرَائِيلْ.»

³²وِشْهِدْ يُوحَنَّا، وْقَالْ: «آنَا شُفْتْ الرُّوحْ هَابِطْ مِنْ السْمَاءْ فِي هَيْئِةْ يْمَامَة وْحَطْ عْلِيهْ.

³³وْآنَا مَا كُنْتِشْ نَعْرْفُو، آمَا الِّي بْعَثْنِي بَاشْ نْعَمِّدْ بِالمَاء قَالِّي: "الِّي تْشُوفْ الرُّوحْ هَابِطْ عْلِيهْ وْحَطْ فُوقُو هَاذَاكَا هُوَ الِّي بَاشْ يْعَمِّدْ بِالرُّوحْ القُدُسْ."

³⁴وْآنَا رِيتْ وِشْهِدْتْ الِّي هَاذَا هُوَ إِبْنْ اللهْ.»

³⁵مِنْ غُدْوَة كَانْ يُوحَنَّا الغَادِي، مْعَ زُوزْ مِنْ تْلاَمِذْتُو.

³⁶وْشَافْ يَسُوعْ مِتْعَدِّي يَاخِي قَالْ: «هَاذَا هُوَ خَرُوفْ اللهْ.»

³⁷وْكِسَمْعُوا التْلاَمْذَة لِزُّوزْ الكْلاَمْ هَاذَا، مْشَاوْ وْتَبّْعُوا يَسُوعْ.

³⁸وْوَقْتِلِّي تْلَفِّتْ يَسُوعْ وْشَافْهُمْ يْتَبّْعُوا فِيهْ، قَالِلْهُمْ: «شْنُوَّة تْحِبُّوا؟» قَالُولُو: «يَا رَبْ، الِّي مَعْنَاهَا يَا مُعَلِّمْ، وِينْ تُسْكُنْ؟»

³⁹قَالِلْهُمْ: «إِيجَاوْ وْتَوْ تْشُوفُوا.» إِمَّالاَ مْشَاوْ وْشَافُوهْ وِينْ يُسْكُنْ، وْعَدُّوا مْعَاهْ بْقِيِّةْ النْهَارْ، وْوَقْتْهَا كَانِتْ السَّاعَة العَاشْرَة[١].

⁴⁰أَنْدَرَاوُسْ خُو سِمْعَانْ بُطْرُسْ كَانْ وَاحِدْ مِالزُّوزْ الِّي سَمْعُوا الكْلاَمْ الِّي قَالُو يُوحَنَّا وْتَبّْعُوا يَسُوعْ.

⁴¹لْقَى خُوهْ سِمْعَانْ، وْقَالُّو: «لْقِينَا المَسِيَّا»، الِّي مَعْنَاهْ المَسِيحْ.

⁴²وْهَزُّو لْيَسُوعْ، وْوَقْتِلِّي شَافُو يَسُوعْ قَالُّو: «إِنْتِ هُوَ سِمْعَانْ وِلْدْ يُوحَنَّا، إِنْتِ بَاشْ يْوَلِّي إِسْمِكْ كِيفَاسْ الِّي مَعْنَاهَا بُطْرُسْ.»

⁴³مِنْ غُدْوَة حَبْ يَسُوعْ يِمْشِي لِلجَلِيلْ. وِلْقَى فِيلِبُّسْ، وْقَالُّو: «تَبَّعْنِي.»

⁴⁴وْفِيلِبُّسْ كَانْ مِنْ بِيتْ صَيْدَا، مِنْ مْدِينِةْ أَنْدَرَاوُسْ وْبُطْرُسْ.

⁴⁵لْقَى فِيلِبُّسْ نَثَنَائِيلْ، وْقَالُّو: «لْقِينَا يَسُوعْ وِلْدْ يُوسُفْ الِّي مِالنَّاصْرَة، الِّي كْتِبْ عْلِيهْ مُوسَى فِي التَّوْرَاةْ، وْكِتْبُوا عْلِيهْ الأَنْبِيَاءْ.»

⁴⁶قَالُّو نَثَنَائِيلْ: «يَاخِي تُخْرُجْ مِنْ النَّاصْرَة حَاجَة تُصْلُحْ؟» جَاوْبُو فِيلِبُّسْ: «إِيجَا وْشُوفْ!»

⁴⁷شَافْ يَسُوعْ نَثَنَائِيلْ جَايْلُو يَاخِي قَالْ عْلِيهْ: «هَاذَا إِسْرَائِيلِي بِالحَقْ وْمَا عِنْدُوشْ حَتَّى غَشَّة!»

⁴⁸قَالُّو نَثَنَائِيلْ: «كِيفَاشْ عْرَفْتْنِي؟» جَاوْبُو يَسُوعْ وْقَالُّو: «قْبَلْ مَا يْعَيِّطْلِكْ فِيلِبُّسْ رِيتِكْ قَاعِدْ تَحْتْ الكَرْمَة.»

⁴⁹جَاوْبُو نَثَنَائِيلْ: «يَا مُعَلِّمْ إِنْتِ هُوَ إِبْنْ اللهْ. إِنْتِ هُوَ المَلِكْ مْتَاعْ إِسْرَائِيلْ!»

⁵⁰جَاوْبُو يَسُوعْ: «يَاخِي امِّنْتْ كِقُتْلِكْ الِّي آنَا شُفْتِكْ قَاعِدْ تَحْتْ الكَرْمَة؟ رَاكْ بَاشْ تْشُوفْ حَاجَاتْ أَكْبِرْ مِنْ هَاذِي.»

⁵¹وْقَالُّو: «نْقُلْكُمْ الحَقْ الحَقْ: بَاشْ تْشُوفُوا السْمَاءْ مَحْلُولَة وِالمْلاَيْكَة مْتَاعْ الله طَالْعِينْ هَابْطِينْ عْلِيَّ آنَا إِبْنْ الإِنْسَانْ.»