Read Tunisian Arabic New Testament يُوحَنَّا 10 Bible Online

يُوحَنَّا 10 - Tunisian Arabic New Testament bible

يُوحَنَّا 10

¹نْقُلْكُمْ الحَقْ الحَقْ: «الِّي مَا يُدْخُلْشْ لِلكُورِي مْتَاعْ الغْنَمْ مِالبَابْ مْتَاعُو، آمَا يَطْلِعْ مِنْ شِيرَة أخرى، رَاهُو سَارِقْ وْخَطَّافْ

²آمَا الِّي يُدْخُلْ مِالبَابْ رَاهُو رَاعِي الغْنَمْ.

³وِالعَسَّاسْ يْحِلْلُو، وِالغْنَمْ تِسْمَعْ صُوتُو. وِيْنَادِي عْلَى الغْنَمْ مْتَاعُو كُلْ وَاحِدْ بْإِسْمُو وِيْخَرِّجْهُمْ البَرَّا مِالكُورِي.

⁴وْوَقْتِلِّي يْخَرِّجْهُمْ الكُلْهُمْ، يِمْشِي قُدَّامْهُمْ وْهُومَا يْتَبّْعُوهْ عْلَى خَاطِرْهُمْ يَعْرْفُوا صُوتُو.

⁵وْمَا يْتَبّْعُوشْ البَرَّانِي آمَا رَاهُمْ يُهْرْبُوا مِنُّو، عْلَى خَاطِرْهُمْ مَا يَعْرْفُوشْ صُوتْ البْرَايْنِيَّة.»

⁶المَثَلْ هَاذَا قَالْهُولْهُمْ يَسُوعْ، وْهُومَا مَا فَهْمُوشْ شْنُوَّة يُقْصُدْ،

⁷إِمَّالاَ قَالِلْهُمْ يَسُوعْ مِنْ جْدِيدْ: «نْقُلْكُمْ الحَقْ الحَقْ: آنَا هُوَ البَابْ مْتَاعْ العْلاَلِشْ.

⁸الِّي جَاوْ قَبْلِي الكُلْهُمْ سُرَّاقْ وْخَطَّافَا، وِالغْنَمْ مَا سَمْعِتْشْ كْلاَمْهُمْ.

⁹آنَا هُوَ البَابْ. الِّي يُدْخُلْ مِنِّي يْنَالْ الخَلاَصْ. وْيُدْخُلْ وْيُخْرُجْ وْيَلْقَى المَرْعَى.

¹⁰السَّارِقْ مَا يْجِي كَانْ بَاشْ يِسْرِقْ وْيَذْبِحْ وْيِهْلِكْ. آمَا آنَا رَانِي جِيتْ بَاشْ نَعْطِيهُمْ حَيَاةْ، وِيْنَالُوا فِيهَا الأَفْضَلْ.

¹¹آنَا هُوَ الرَّاعِي الصَّالِحْ، وِالرَّاعِي الصَّالِحْ هُوَ الِّي يَعْطِي حْيَاتُو عْلَى خَاطِرْ الغْنَمْ مْتَاعُو.

¹²وِالسَّارِحْ الِّي مُوشْ مُولاَهَا وِالغْنَمْ مَا هِيشْ مِلْكُو، وَقْتِلِّي يْشُوفْ الذِّيبْ جَايْ، يْخَلِّي الغْنَمْ وْيُهْرُبْ، وِالذِّيبْ يَخْطِفْ الغْنَمْ وِيْفَرِّقْهَا عْلَى بْعَضْهَا.

¹³عْلَى خَاطْرُو سَارِحْ، هَاذَاكَا عْلاَشْ يُهْرُبْ وْمَا يْهِمُّوشْ فِي الغْنَمْ.

¹⁴آمَا رَانِي آنَا هُوَ الرَّاعِي الصَّالِحْ، وْنَعْرِفْ الغْنَمْ مْتَاعِي وِالغْنَمْ مْتَاعِي زَادَا تَعْرِفْنِي،

¹⁵كِيفْ مَا اللآبْ يَعْرِفْنِي وْآنَا نَعْرْفُو، وْآنَا نَعْطِي حْيَاتِي عْلَى خَاطِرْ الغْنَمْ مْتَاعِي.

¹⁶وْعِنْدِي عْلاَلِشْ أُخْرِينْ مَا هُمْشْ مِالكُورِي، لاَزِمْنِي نْجِيبْهُمْ، وْهُومَا بَاشْ يِسْمْعُوا صُوتِي، وِتْوَلِّي غْنَمْ وَحْدَة وْرَاعِي وَاحِدْ.

¹⁷هَاذَاكَا عْلاَشْ اللآبْ يْحِبّْنِي عْلَى خَاطِرْنِي نَعْطِي حْيَاتِي بَاشْ نْرَجَّعْهَا مِنْ جْدِيدْ.

¹⁸حَتَّى حَدْ مَا يَاخُذْلِي حْيَاتِي بِالقُوَّة، آمَا رَانِي آنَا الِّي نَعْطِيهَا بِيدِي، عِنْدِي السُّلْطَة بَاشْ نَعْطِيهَا، وْعِنْدِي السُّلْطَة بَاشْ نْرَجَّعْهَا، هَاذِي كَانِتْ وْصِيِّةْ الآبْ.»

¹⁹وِتْعَارْكُوا اليْهُودْ وِاتْقِسْمُوا مَرَّة أُخْرَى بِسْبَبْ الكْلاَمْ هَاذَا،

²⁰بَرْشَة مِنْهُمْ قَالُوا: «رَاهُو سَاكْنُو شِيطَانْ، وِيْخَرِّفْ. عْلاَشْ تِسْمْعُوا فِي كْلاَمُو.»

²¹قَالُوا نَاسْ أُخْرِينْ: «الكْلاَمْ هَاذَا مُوشْ مْتَاعْ وَاحِدْ سَاكْنُو شِيطَانْ. يَاخِي الشِّيطَانْ يْنَجِّمْ يْحِلْ عِينِينْ العِمْيَانْ؟»

²²وِالوَقْتْ هَاذَاكَا جَا عِيدْ تَطْهِيرْ الهَيْكِلْ فِي أُورْشَلِيمْ، فِي الشْتَاء.

²³وْكَانْ يَسُوعْ يْدُورْ فِي الهَيْكِلْ فِي المْزَازْ مْتَاعْ سُلَيْمَانْ،

²⁴دَارُوا بِيهْ اليْهُودْ وْقَالُولُو: «لْوَقْتَاشْ بَاشْ تْخَلِّينَا حَايْرِينْ فِيكْ؟ قُلْنَا بْصَرَاحَة: يَاخِي إِنْتِ هُوَ المَسِيحْ.»

²⁵جَاوِبْهُمْ يَسُوعْ: «قُلْتِلْكُمْ، آمَا إِنْتُومَا مَا تْصَدّْقُونِيشْ. وِالأَعْمَالْ الِّي نَعْمِلْ فِيهَا بْإِسْمْ بَابَا تِشْهِدْلِي.

²⁶آمَا إِنْتُومَا مَا تْصَدّْقُونِيشْ عْلَى خَاطِرْكُمْ مَا كُمْشْ مِالغْنَمْ مْتَاعِي.

²⁷الغْنَمْ مْتَاعِي يِسْمْعُوا صُوتِي، وْآنَا نَعْرِفْهُمْ وْهُومَا يْتَبّْعُونِي.

²⁸وْآنَا نَعْطِيهَا حَيَاةْ أَبَدِيَّة، وِعْمُرْهُمْ مَا يِدَّمّْرُوا وْحَتَّى حَدْ مَا يْنَجِّمْ يْفُكّْهُمْ مِنْ يِدِّي.

²⁹الآبْ الِّي عْطَاهُمْلِي هُوَ أَعْظِمْ مِنْ كُلْ شَيْء، وْحَتَّى حَدْ مَا يْنَجِّمْ يْفُكّْهُمْ مِنْ يِدْ الآبْ،

³⁰رَانِي آنَا وِالآبْ وَاحِدْ.»

³¹وْمَرَّة أُخْرَى هَزُّوا اليْهُودْ الحْجَرْ بَاشْ يُرْجْمُوهْ.

³²قَالِلْهُمْ يَسُوعْ: «آنَا وَرِّيتْكُمْ بَرْشَة حَاجَاتْ بَاهْيَة مِنْ عِنْدْ الآبْ، عْلَى آنَا وَحْدَة مِنْهُمْ بَاشْ تُرْجْمُونِي.»

³³جَاوْبُوهْ اليْهُودْ: «مَا نَاشْ نُرْجْمُوا فِيكْ عْلَى جَالْ حَاجَة بَاهْيَة عْمَلْتْهَا، آمَا عْلَى خَاطْرِكْ كْفَرْتْ. عْلَى خَاطْرِكْ إِنْتِ بَشَرْ، وْرَدِّيتْ رُوحِكْ اللهْ.»

³⁴جَاوِبْهُمْ يَسُوعْ: «يَاخِي مُوشْ مَكْتُوبْ فِي الشَّرِيعَة مْتَاعْكُمْ الِّي اللهْ قَالْ: إِنْتُومَا آلْهَة؟

³⁵إِذَا كَانْ الشَّرِيعَة مْتَاعْكُمْ قَالِتْ الشَّيْء هَاذَا لِلِّي جَاتْهُمْ كِلْمِةْ اللهْ وِالكْتَابْ صَادِقْ لِلأَبَدْ.

³⁶الِّي قَدّْسُو اللهْ وْبِعْثُو لِلعَالَمْ تْقُولُولُو إِنْتِ كْفَرْتْ، كِقُلْتْ: آنَا إِبْنْ اللهْ؟

³⁷إِذَا كَانْ آنَا مَا نِيشْ قَاعِدْ نَعْمِلْ فِي الأَعْمَالْ مْتَاعْ بَابَا، إِمَّالاَ مَا تْصَدّْقُونِيشْ.

³⁸وْإِذَا كُنْتْ نَعْمِلْ فِيهَا وْمَا كُمْشْ مْصَدّْقِينِّي آنَا، إِمَّالاَ صَدّْقُوا الأَعْمَالْ هَاذِي، بَاشْ تَعْرْفُوا الِّي الآبْ فِيَّ وْآنَا فِي الآبْ.»

³⁹حَاوْلُوا مَرَّة أُخْرَى بَاشْ يْشِدُّوهْ، يَاخِي فْلِتْ مِنْ بِينْ يْدِيهُمْ.

⁴⁰وِمْشَى يَسُوعْ مِنْ جْدِيدْ لِلشِّيرَة الأُخْرَى مْتَاعْ نَهْرْ الأُرْدُنْ وِينْ كَانْ يُوحَنَّا يْعَمِّدْ فِي النَّاسْ، وِبْقَى غَادِيكَا.

⁴¹جَاوْهْ بَرْشَة نَاسْ وْقَالُولُو: «يُوحَنَّا مَا عْمَلْ حَتَّى مُعْجْزَة، آمَا الِّي قَالُو عْلَى الرَّاجِلْ هَاذَا الكُلُّو صْحِيحْ.»

⁴²وَلاّوْ امّْنُوا بِيهْ بَرْشَة نَاسْ الغَادِيكَا.