Read Tunisian Arabic New Testament يُوحَنَّا 11 Bible Online

يُوحَنَّا 11 - Tunisian Arabic New Testament bible

يُوحَنَّا 11

¹وْكَانْ ثَمَّة وَاحِدْ مْرِيضْ إِسْمُو لَعَازَرْ مِنْ قَرْيِةْ بِيتْ عَنْيَا، الِّي تُسْكُنْ فِيهَا مَرْيَمْ وْأُخْتْهَا مَرْثَى.

²وْمَرْيِمْ هَاذِي هِيَ الِّي دِهْنِتْ سَاقِينْ الرَّبْ بِالعِطْرْ وْمَسْحِتْهُمْ بِشْعَرْهَا. وْلَعَازَرْ المْرِيضْ كَانْ خُوهَا.

³وِالإِخْوَاتْ بَعْثُوا لْيَسُوعْ وْقَالُولُو: «يَا رَبْ، رَاهُو الِّي إِنْتَ تْحِبُّو رَاهُو تَوَّا مْرِيضْ.»

⁴وْوَقْتِلِّي سْمَعْ يَسُوعْ قَالْ: «المْرَضْ هَاذَا مَا يُقْتُلْشْ. آمَا رَاهُو لْمَجْدْ اللهْ بَاشْ يِتْمَجِّدْ بِيهْ إِبْنْ اللهْ.»

⁵وْيَسُوعْ كَانْ يْحِبْ مَرْثَى وْأُخْتْهَا وْلَعَازَرْ.

⁶وْوَقْتِلِّي سْمَعْ بْلَعَازَرْ مْرِيضْ زَادْ قْعَدْ نْهَارِينْ فِي البْلاَصَة الِّي هُوَ فِيهَا.

⁷وِمْبَاعِدْ قَالْ لِلتْلاَمْذَة: «هَيَّا نَرْجْعُوا لِليَهُودِيَّة مَرَّة أُخْرَى.»

⁸قَالُولُو التْلاَمْذَة: «يَا مُعَلِّمْ، قْبَلْ شْوَيَّة اليْهُودْ كَانُوا يْحِبُّوا يُرْجْمُوكْ وْإِنْتِ تْحِبْ تَرْجِعْ لْغَادِي.»

⁹جَاوِبْ يَسُوعْ: «يَاخِي النْهَارْ مُوشْ فِيهْ ثْنَاشِنْ سَاعَة؟ الِّي يِمْشِي فِي النْهَارْ مَا يِدَّعْثِرْشْ عْلَى خَاطْرُو يْشُوفْ ضَوْ الدِّنْيَا هَاذِي.

¹⁰آمَا الِّي يِمْشِي فِي اللِّيلْ رَاهُو يِدَّعْثِرْ عْلَى خَاطْرُو مَا عِنْدُوشْ نُورْ فِي دَاخْلُو.»

¹¹وِمْبَاعِدْ مَا قَالْ الشَّيْء هَاذَا زَادْ قَالِلْهُمْ: «حْبِيبْنَا لَعَازَرْ رْقَدْ آمَا آنَا بَاشْ نِمْشِي نْقَيّْمُو.»

¹²قَالُولُو التْلاَمْذَة: «يَا رَبْ: إِذَا كَانُو رَاقِدْ إِمَّالاَ رَاهُو بَاشْ يِتْشْفَى.»

¹³يَسُوعْ كَانْ يَحْكِي عْلَى مُوتُو آمَا هُومَا مْشَى فِي بَالْهُمْ الِّي هُوَ يَحْكِي عْلَى النُّومْ مْتَاعُو.

¹⁴وَلَّى قَالِلْهُمْ يَسُوعْ بْصَرَاحَة: «لَعَازَرْ مَاتْ.

¹⁵آنَا نَفْرْحِلْكُمْ كِمَا نِيشْ غَادِي بَاشْ إِنْتُومَا تِمّْنُوا. آمَا خَلِّينَا نِمْشِيوْلُو.»

¹⁶تُومَا الِّي يْسَمِّيوْا فِيهْ التُّومِي وِلِّي هُوَ وَاحِدْ مِالتْلاَمْذَة الأُخْرِينْ قَالْ: «هَيَّا أَحْنَا زَادَا نِمْشِيوْا وِنْمُوتُوا مْعَاهْ.»

¹⁷وْوَقْتِلِّي جَا يَسُوعْ لْقَاهْ عَنْدُو أَرْبْعَة أَيَّامْ مِلِّي دَفْنُوهْ.

¹⁸وْكَانِتْ بِيتْ عَنْيَا تِبْعِدْ عْلَى أُورْشَلِيمْ قْرِيبْ ثْلاَثَة كِيلُومِتْرْ.

¹⁹وْجَاوْ بَرْشَة يْهُودْ لْمَرْثَى وْمَرْيِمْ بَاشْ يْعَزِّيوْهُمْ عْلَى خُوهُمْ.

²⁰وَقْتِلِّي مَرْثَى سَمْعِتْ الِّي يَسُوعْ جَايْ خَرْجِتْ مِالدَّارْ بَاشْ تْعَرِّضْلُو. آمَا مَرْيَمْ بْقَاتْ لْدَاخِلْ.

²¹قَالِتْ مَرْثَى لْيَسُوعْ: «يَا رَبْ، كَانْ جِيتْ إِنْتِ هْنَا، رَاهُو خُويَا مَا كَانِشْ بَاشْ يْمُوتْ.

²²آمَا حَتَّى تَوَّا نَعْرِفْ الِّي أَيْ حَاجَة تُطْلُبْهَا مِنْ عِنْدْ اللهْ يَعْطِيهَالِكْ.»

²³قَالِلْهَا يَسُوعْ: «خُوكْ بَاشْ يْقُومْ.»

²⁴قَالِتْلُو مَرْثَى: «آنَا نَعْرِفْ الِّي هُوَ بَاشْ يْقُومْ فِي الآخْرَة.»

²⁵قَالِلْهَا يَسُوعْ: «آنَا هُوَ القْيَامَة وِالحَيَاةْ. الِّي يِمِّنْ بِيَّ بَاشْ يَحْيَى حَتَّى لُوكَانْ مَاتْ.

²⁶وِلِّي هُوَ حَيْ وْيِمِّنْ بِيَّ عُمْرُو مَا يْمُوتْ. يَاخِي تِمِّنْ بِالشَّيْء هَاذَا؟»

²⁷قَالِتْلُو: «إِي نْعَمْ يَا رَبْ، آنَا نِمِّنْ الِّي إِنْتِ هُوَ المَسِيحْ ابْنْ اللهْ الِّي جَا لِلدِّنْيَا.»

²⁸وْبَعْدْ مَا قَالِتْ الكْلاَمْ هَاذَا، رَجْعِتْ مَرْثَى لِلدَّارْ وْنَادِتْ مَرْيَمْ أُخْتْهَا وْقَالْتِلْهَا فِي وْذِنْهَا: «المُعَلِّمْ جَا وْرَاهُو يْنَادِيلِكْ.»

²⁹وْدُوبْ مَا سَمْعِتْ قَامِتْ فِيسَعْ وِمْشَاتْلُو.

³⁰وْمَازَالْ يَسُوعْ مَا وْصُلْشْ لِلقَرْيَة آمَا قْعَدْ فِي البْلاَصَة الِّي لْقَاتُو فِيهَا مَرْثَى.

³¹يَاخِي اليْهُودْ الِّي كَانُوا مْعَ مَرْيَمْ فِي الدَّارْ يْعَزِّيوْ فِيهَا وَقْتِلِّي شَافُوهَا قَامِتْ بْسُرْعَة وْخَرْجِتْ. تَبّْعُوهَا وِمْشَى فِي بَالْهُمْ الِّي هِيَ مَاشْيَة لِلقْبَرْ بَاشْ تِبْكِي لْغَادِي.

³²وْوَقْتِلِّي وُصْلِتْ مَرْيَمْ لِلبْلاَصَة الِّي فِيهَا يَسُوعْ وْدُوبْ مَا شَافِتُّو تِرْمَاتْ عِنْدْ سَاقِيهْ وْقَالِتْلُو: «يَا رَبْ، كَانْ جِيتْ هْنَا، تَالِي رَاهُو خُويَا مَا كَانِشْ بَاشْ يْمُوتْ.»

³³وْوَقْتِلِّي شَافْهَا يَسُوعْ تِبْكِي وِاليْهُودْ الِّي جَاوْ مْعَاهَا زَادَا يِبْكِيوْ غَاضِتُّو وِحْزِنْ وِتْقَلِّقْ بَرْشَة.

³⁴وْقَالْ: «وِينْ حَطِّيتُوهْ؟» قَالُولُو: «يَا رَبْ، إِيجَا وْشُوفْ.»

³⁵يَاخِي يَسُوعْ بْكَى.

³⁶وِاليْهُودْ قَالُوا: «شُوفُوا قَدَّاشْ كَانْ يْحِبُّو!»

³⁷وْثَمَّة شْكُونْ مِنْهُمْ قَالْ: «يَاخِي نَجِّمْ يْحِلْ عِينِينْ الأَعْمَى وْمَا يْنَجِّمْشْ يْخَلِّي هَاذَا مَا يْمُوتْشْ؟»

³⁸وْحَسْ يَسُوعْ رُوحُو حْزِينْ بَرْشَة مَرَّة أُخْرَى وْجَا لِلقْبَرْ الِّي كَانْ دَامُوسْ مْسَكِّرْ بْحَجْرَة.

³⁹وْقَالِلْهُمْ يَسُوعْ: «نَحِّيوْ الحَجْرَة!» قَالِتْلُو مَرْثَى أُخْتْ المَيِّتْ: «يَا رَبْ رَاهُو نْتِنْ عْلَى خَاطْرُو مِيتْ عَنْدُو أَرْبْعَة أَيَّامْ.»

⁴⁰قَالِلْهَا يَسُوعْ: «مُوشْ قُتْلِكْ إِذَا كَانْ تِمِّنْ رَاكْ بَاشْ تْشُوفْ مَجْدْ اللهْ.»

⁴¹نَحَّاوْ الحَجْرَة وْهَزْ يَسُوعْ عِينِيهْ لِلسْمَاء وْقَالْ: «يَا بَابَا. نُشْكْرِكْ عْلَى خَاطِرْ سْمَعْتْلِي.

⁴²نَعْرِفْ الِّي إِنْتِ دِيمَا تْجَاوِبْ صْلاَتِي. آمَا رَانِي قُلْتْ الشَّيْء هَاذَا عْلَى خَاطِرْ النَّاسْ الِّي دَايْرِينْ بِيَّ بَاشْ يِمّْنُوا الِّي إِنْتِ بْعَثْتْنِي.»

⁴³وْبَعْدْ مَا قَالْ الشَّيْء هَاذَا نَادَى بْصُوتْ عَالِي: «لَعَازَرْ، اخْرُجْ.»

⁴⁴خْرَجْ المَيِّتْ وِيْدِيهْ وْسَاقِيهْ مَرْبُوطِينْ بِالكْفَنْ. وْوِجْهُو مَلْفُوفْ بْمِنْدِيلَة. قَالِلْهُمْ يَسُوعْ: «حِلُّولُو الكْفَنْ وْخَلِّيوْهْ يِمْشِي!»

⁴⁵وْبَرْشَة مِاليْهُودْ الِّي جَاوْ لْمَرْيَمْ بَاشْ يْعَزِّيْوْهَا وْشَافُوا آشْ عْمَلْ يَسُوعْ. امّْنُوا بِيهْ

⁴⁶آمَا ثَمَّة شْكُونْ مِنْهُمْ مْشَاوْ لِلفَرِّيسِيِّينْ وِحْكَاوْلْهُمْ عَلِّي عَمْلُو يَسُوعْ.

⁴⁷وْعَمْلُوا رُؤَسَاءْ الكُهَّانْ وِالفَرِّيسِيِّينْ اجْتِمَاعْ المَجْلِسْ مْتَاعْ اليْهُودْ وْقَالُوا: «آشْ بَاشْ نَعْمْلُوا؟ الرَّاجِلْ هَاذَا قَاعِدْ يَعْمِلْ فِي بَرْشَة مُعْجْزَاتْ.

⁴⁸إِذَا كَانْ نْخَلِّيوْهْ هَكَّا النَّاسْ الكُلْ بَاشْ يِمّْنُوا بِيهْ وِيْجِيوْ الرُّومَانْ وِيْدَمّْرُولْنَا الهَيْكِلْ وِالأُمَّة مْتَاعْنَا.»

⁴⁹وْقَالْ وَاحِدْ مِنْهُمْ إِسْمُو قَيَافَا وِلِّي هُو كَانْ كْبِيرْ الكُهَّانْ الكُلْ فِي العَامْ هَاذَاكَا: «إِنْتُومَا مَا تَعْرْفُوشْ حَتَّى شَيْء!

⁵⁰وْمَا كُمْشْ فَاهْمِينْ الِّي كِيْمُوتْ وَاحِدْ بَرْكْ فِي عُوضْ الشَّعْبْ خِيرْ مِلِّي تْمُوتْ الأُمَّة الكُلْهَا»

⁵¹وْمَا قَالِشْ الشَّيْء هَاذَا مِنْ رَاسُو آمَا عْلَى خَاطْرُو كَانْ كْبِيرْ الكُهَّانْ العَامْ هَاذَاكَا اللهْ وْحَالُو الِّي يَسُوعْ بَاشْ يْمُوتْ فِي عُوضْ الأُمَّة. هَاذَاكَا عْلاَشْ تْنَبَّأْ الِّي يَسُوعْ بَاشْ يْمُوتْ فِي عُوضْ الأُمَّة.

⁵²وْمُوشْ فِي عُوضْ الأُمَّة آكَاهُو آمَا بَاشْ يْلِمْ وْلاَدْ اللهْ المْفَرّْقِينْ وِيْرُدّْهُمْ وَاحِدْ

⁵³وْمِنْ النْهَارْ هَاذَاكَا تْفَاهْمُوا القَادَة مْتَاعْ اليْهُودْ بَاشْ يُقْتْلُوهْ

⁵⁴يَاخِي يَسُوعْ مَا عَادِشْ يُظْهُرْ بَرْشَة لِليْهُودْ وِمْشَى لِبْلاَصَة قْرِيبَة مِالصَّحْرَاء لِمْدِينَة إِسْمْهَا أَفْرَايِمْ وِقْعَدْ الغَادِي هُوَ وِتْلاَمِذْتُو.

⁵⁵وِقْرُبْ عِيدْ الفِصْحْ مْتَاعْ اليْهُودْ، وْطَلْعُوا بَرْشَة نَاسْ مِالأَرْيَافْ لِمْدِينِةْ أُورْشَلِيمْ بَاشْ يَعْمْلُوا اللاَّزِمْ بَاشْ يْكُونُوا طَاهْرِينْ قْبَلْ مَا يْجِي العِيدْ

⁵⁶وْكَانُوا يْلَوّْجُوا عْلَى يَسُوعْ وْوَقْتِلِّي تْلَمُّوا فِي الهَيْكِلْ سِأْلُو بْعَضْهُمْ: «شْنُوَّة رَايْكُمْ زَعْمَة يْجِي لِلعِيدْ وِلاَّ لاَ؟»

⁵⁷وْرُؤَسَاءْ الكُهَّانْ وِالفَرِّيسِيِّينْ أَمْرُوا إِنُّو أَيْ وَاحِدْ يَعْرِفْ هُوَ وِينْ لاَزِمْ يِعْلِمْهُمْ عْلِيهْ بَاشْ يْشِدُّوهْ.