Read Tunisian Arabic New Testament يُوحَنَّا 12 Bible Online

يُوحَنَّا 12 - Tunisian Arabic New Testament bible

يُوحَنَّا 12

¹قْبَلْ العِيدْ بْسِتَّة أَيَّامْ، جَا يَسُوعْ لْبِيتْ عَنْيَا وِمْشَى لْوِينْ يُسْكُنْ لَعَازَرْ الِّي قَيّْمُو يَسُوعْ مِالمُوتْ.

²وْحَضّْرُولُو العْشَاء، وِالوَقْتْ هَاذَاكَا كَانِتْ مَرْثَى تِقْضِي فِي الدَّارْ، وْكَانْ لَعَازَرْ وَاحِدْ مِلِّي يَاكْلُوا مْعَاهْ

³وِخْذَاتْ مَرْيَمْ دَبُّوزَة مْتَاعْ عِطْرْ صَافِي وْغَالِي بَرْشَة إِسْمُو النَّارْدِينْ وْدَهْنِتْ بِيهْ سَاقِينْ يَسُوعْ وْمَسْحِتْهُمْلُو بِشْعَرْهَا. وْفَاحِتْ الرِّيحَة فِي الدَّارْ الكُلْهَا.

⁴آمَا ثَمَّة وَاحِدْ مِنْ تْلاَمِذْتُو، إِسْمُو يَهُوذَا الإِسْخَرْيُوطِي، وِلِّي بَاشْ يْخُونُو مْبَاعِدْ قَالْ:

⁵«عْلاَشْ مَا نْبِيعُوشْ العِطْرْ هَاذَا بِثْلاَثَة مْيَاةْ قَطْعَة مِالفِضَّة وْنَعْطِيوْ حَقُّو لِلفُقَرَاءْ؟»

⁶الشَّيْء هَاذَا مَا قَالُوشْ عْلَى خَاطْرُو يْحِنْ عْلَى الفُقَرَاءْ، آمَا عْلَى خَاطْرُو كَانْ سَارِقْ وْصَنْدُوقْ الفْلُوسْ عَنْدُو وْكَانْ يِسْرِقْ فِي الِّي يِتْحَطْ فِيهْ.

⁷قَالْ يَسُوعْ: «أَخْطَاهَا! رَاهِي خَبَّاتْ العِطْرْ هَاذَا لِلنْهَارْ الِّي بَاشْ يِدْفْنُونِي فِيهْ.

⁸الفُقَرَاءْ دِيمَا مْعَاكُمْ آمَا آنَا مَا نِيشْ بَاشْ نْكُونْ مْعَاكُمْ دِيمَا.»

⁹وْسَمْعُوا بِيهْ بَرْشَة يْهُودْ الِّي هُوَ مُوجُودْ لْغَادِي، وْجَاوْ، مُوشْ عْلَى خَاطْرُو هُوَ آكَاهُو آمَا زَادَا بَاشْ يْشُوفُوا لَعَازَرْ الِّي قَيّْمُو مِالمُوتْ.

¹⁰وِتْفَاهْمُوا رُؤَسَاءْ اليْهُودْ بَاشْ يُقْتْلُوا لَعَازَرْ زَادَا،

¹¹عْلَى خَاطِرْ فِي جُرّْتُو هُوَ بَرْشَة يْهُودْ بْدَاوْا يِبْعْدُوا عْلَى رُؤَسَاءْ الكُهَّانْ وْيِمّْنُوا بْيَسُوعْ.

¹²وِاليُومِتْ غُدْوَة، بَرْشَة نَاسْ الِّي جَاوْ لْعِيدْ الفِصْحْ سَمْعُوا إِنُّو يَسُوعْ بَاشْ يْجِي لْأُورْشَلِيمْ.

¹³وْهَزُّوا عِيدَانْ نْخَلْ وْخَرْجُوا بَاشْ يِسْتَقْبْلُوهْ وْكَانُوا يْعَيّْطُوا: أُوصَنَّا! مُبَارَكْ الِّي جَايْ بْإِسْمْ الرَّبْ وْمُبَارَكْ مَلِكْ إِسْرَائِيلْ!

¹⁴وِلْقَى يَسُوعْ جَحْشْ، وِرْكِبْ عْلِيهْ كِيفْ مَا هُوَ مَكْتُوبْ فِي الكْتَابْ المُقَدَّسْ:

¹⁵مَا تْخَافِشْ يَا بِنْتْ صِهْيُونْ رَاهُو المَلِكْ مْتَاعِكْ جَايِكْ رَاكِبْ عْلَى جَحْشْ بْهَايِمْ.

¹⁶وْفِي الوَقْتْ هَاذَاكَا التْلاَمْذَة مَا فَهْمُوشْ الحَاجَاتْ هَاذِيكَا الكُلْ. آمَا بَعْدْ مَا تْمَجِّدْ يَسُوعْ، تْذَكّْرُوا الِّي الآيَة تْكِتْبِتْ عْلِيهْ هُوَ، وِلِّي النَّاسْ عَمْلُوا الشَّيْء هَاذَا عْلَى خَاطْرُو هُوَ.

¹⁷وِالنَّاسْ الِّي كَانُوا مْعَاهْ وَقْتِلِّي قَيِّمْ لَعَازَرْ مِالمُوتْ وْخَرّْجُو مِالقْبَرْ الكُلْهُمْ يِشْهْدُولُو بِالشَّيْء هَاذَاكَا.

¹⁸هَاذَاكَا عْلاَشْ النَّاسْ خَرْجُوا بَاشْ يِسْتَقْبْلُوهْ كِسَمْعُوا الِّي هُوَ عْمَلْ المُعْجْزَة هَاذِيكَا.

¹⁹وْقَالُوا الفَرِّسِيِّينْ لِبْعَضْهُمْ: «شُفْتُوا رَاكُمْ مَا عُدْتُوشْ تْنَجّْمُوا تَعْمْلُوا حَتَّى شَيْء. آهُومَا النَّاسْ الكُلْ وَلُّوا يْتَبّْعُوا فِيهْ!»

²⁰وْكَانُوا ثَمَّة يُونَانِيِّينْ طَلْعُوا لْأُورْشَلِيمْ بَاشْ يْصَلِّيوْ مْعَ اليْهُودْ فِي العِيدْ.

²¹مْشَاوْ لْفِيلِبُّسْ، الِّي كَانْ مِنْ بِيتْ صَيْدَا الِّي فِي مَنْطِقْةْ الجَلِيلْ وْسِأْلُوهْ وْقَالُولُو: «يَا سِيدْنَا نْحِبُّوا نْشُوفُوا يَسُوعْ.»

²²مْشَى فِيلِبُّسْ وْقَالْ لْأَنْدَرَاوُسْ، وِمْشَاوْ مْعَ بْعَضْهُمْ وْخَبّْرُوا يَسُوعْ.

²³جَاوِبْهُمْ يَسُوعْ: «رَاهُو جَا الوَقْتْ الِّي بَاشْ نِتْمَجِّدْ فِيهْ آنَا إِبْنْ الإِنْسَانْ.

²⁴نْقُولِلْكُمْ الحَقْ الحَقْ: إِذَا كَانْ كَعْبِةْ القَمْحْ مَا اطِّيحِشْ فِي الأَرْضْ وْمَا تْمُوتِشْ رَاهِي تَبْقَى وَحَّدْهَا. آمَا إِذَا كَانْ تْمُوتْ رَاهِي بَاشْ تْجِيبْ بَرْشَة قَمْحْ.

²⁵الِّي يْحِبْ حْيَاتُو رَاهُو يِخْسِرْهَا وِلِّي يُنْكُرْهَا فِي الدِّنْيَا هَاذِي رَاهُو يَحْفِظْهَا لِلحَيَاةْ الأَبَدِيَّة.

²⁶الِّي يْحِبْ يِخْدِمْنِي، يِلْزْمُو يْتَبَّعْنِي، وِلِّي يِخْدِمْنِي يْكُونْ فِي البْلاَصَة الِّي نْكُونْ فِيهَا آنَا. وِلِّي يِخْدِمْنِي يِكْرْمُو الآبْ.»

²⁷«آنَا تَوَّا قَلْبِي مُضْطَرِبْ. آشْ بَاشْ نْقُولْ؟ يَاخِي نْقُولْ: "يَا بَابَا، نَجِّينِي مِالسَّاعَة هَاذِي؟ آمَا آنَا جِيتْ عْلَى خَاطِرْ السَّاعَة هَاذِي.

²⁸يَا بَابَا خَلِّي إِسْمِكْ يِتْمَجِّدْ!"» وْجَا صُوتْ مِالسْمَاءْ: «مَجِّدْتُو وْبِشْ نْزِيدْ نْمَجّْدُو!»

²⁹ثَمَّة شْكُونْ مِالنَّاسْ الِّي كَانُوا مُوجُودِينْ الغَادِي وْسِمْعُوا الصُّوتْ قَالُوا: «هَاذَا رَاهُو صُوتْ رَعْدْ!» وِجْمَاعَة أُخْرِينْ قَالُوا: «رَاهُو كَلّْمُو مَلاَكْ!»

³⁰جَاوِبْ يَسُوعْ وْقَالْ: «الصُّوتْ هَاذَا مَا جَاشْ عْلَى خَاطْرِي آنَا، رَاهُو جَا عْلَى خَاطِرْكُمْ إِنْتُومَا.

³¹تَوْ العَالَمْ بَاشْ يِتْحْكَمْ عْلِيهْ. تَوْ رَئِيسْ العَالَمْ هَاذَا بَاشْ يِطَّرِّدْ البَرَّا.

³²وَقْتِلِّي نِتْرْفَعْ عْلَى الأَرْضْ، بَاشْ نْقَرِّبْ النَّاسْ الكُلْ لِيَّا.»

³³قَالْ الكْلاَمْ هَاذَا وْكَانْ يُقْصُدْ كِيفَاشْ بَاشْ يْمُوتْ.

³⁴جَاوْبُوهْ النَّاسْ: «الشَّرِيعَة مْتَاعْ مُوسَى عَلّْمِتْنَا إِنُّو المَسِيحْ بَاشْ يْعِيشْ لِلأَبَدْ. إِمَّالاَ كِيفَاشْ تْقُولْ: "يِلْزِمْ إِبْنْ الإِنْسَانْ يِتْعَلِّقْ؟" يَاخِي شْكُونُو إِبْنْ الإِنْسَانْ هَاذَا؟»

³⁵قَلْهُمْ يَسُوعْ: «النُّورْ بَاشْ يَبْقَى مْعَاكُمْ مُدَّة قْصِيرَة، إِمَّالاَ إِمْشِيوْ مَادَامْ عِنْدْكُمْ النُّورْ، بَاشْ مَا يَخْلِطْشْ عْلِيكُمْ الظْلاَمْ. وِلِّي يِمْشِي فِي الظْلاَمْ مَا يَعْرِفْشْ عْلَى رُوحُو وِينْ مَاشِي.

³⁶امّْنُوا بِالنُّورْ، مَادَامْ عِنْدْكُمْ النُّورْ، بَاشْ تْوَلُّوا وْلاَدْ النُّورْ.» وْبَاعِدْ مَا قَالِلْهُمْ الكْلاَمْ هَاذَا، مْشَى يَسُوعْ وِتْخبَّى عْلِيهُمْ.

³⁷وْمَا امّْنُوشْ بِيهْ، رَغْمِلِّي عْمَلْ بَرْشَة مُعْجْزَاتْ قُدَّامْ عِينِيهُمْ،

³⁸وْهَكَّا صَارْ الِّي قَالُو النَّبِي إِشَعْيَاءْ: يَا رَبِّي، شْكُونُو الِّي إِمِّنْ بِخْبَرْنَا؟ وْلِشْكُونْ ظُهْرِتْ يِدْ اللهْ؟

³⁹هَاذَاكَا عْلاَشْ مَا نَجّْمُوشْ يِمّْنُوا، عْلَى خَاطِرْ إِشَعْيَاءْ قَالْ زَادَا:

⁴⁰عْمَالْهُمْ رَبِّي عِينِيهُمْ وْقَسَّالْهُمْ قْلُوبْهُمْ، بَاشْ مَا يْشُوفُوشْ بْعِينِيهُمْ وْمَا يِفْهْمُوشْ بِقْلُوبْهُمْ، وْمَا يَرْجْعُوشْ بَاشْ نِشْفِيهُمْ.

⁴¹قَالْ إِشَعْيَاءْ الكْلاَمْ هَاذَا وَقْتِلِّي شَافْ مَجْدْ يَسُوعْ وِحْكَى عْلِيهْ.

⁴²بْرَغْمْ هَاذَا الكُلْ ثَمَّة بَرْشَة مِنْ شْيُوخْ اليْهُودْ امّْنُوا بْيَسُوعْ، آمَا مَا اعْتَرْفُوشْ بِيهْ بِسْبَبْ الفَرِّسِيِّينْ، لَيْطَرّْدُوهُمْ مِالمَجْمَعْ.

⁴³وْحَبُّوا المَجْدْ مْتَاعْ النَّاسْ أَكْثِرْ مِالمَجْدْ مْتَاعْ اللهْ.

⁴⁴يَاخِي عَيِّطْ يَسُوعْ، وْقَالْ: «الِّي يِمِّنْ بِيَّا مُوشْ يِمِّنْ بِيَّا آنَا، آمَا يِمِّنْ بِلِّي بْعَثْنِي.

⁴⁵وِلِّي يْشُوفْنِي يْشُوفْ الِّي بْعَثْنِي.

⁴⁶آنَا النُّورْ الِّي جَا لِلعَالَمْ، وِلِّي يِمِّنْ بِيَّا مَا يَبْقَاشْ فِي الظْلاَمْ،

⁴⁷وِلِّي سْمَعْ كْلاَمِي وْمَا عْمَلْشْ بِيهْ آنَا مَا نُحْكُمْشْ عْلِيهْ، رَانِي جِيتْ بَاشْ نْخَلِّصْ العَالَمْ مُوشْ بَاشْ نُحْكُمْ عْلِيهْ.

⁴⁸الِّي ما يِقْبِلْنِيشْ وْمَا يِقْبِلْشْ كْلاَمِي، عَنْدُو شْكُونْ يُحْكُمْ عْلِيهْ. الكْلاَمْ الِّي قُلْتُو هُوَ الِّي يُحْكُمْ عْلِيهْ فِي الآخْرَة،

⁴⁹آنَا مَا قُلْتْ حَتَّى شَيْء مِنْ عِنْدِي، آمَا الآبْ الِّي بْعَثْنِي وَصَّانِي آشْ بَاشْ نْقُولْ وْنِتْكَلِّمْ.

⁵⁰وْآنَا نَعْرِفْ الِّي وْصِيتُو تَعْطِي حَيَاةْ أَبَدِيَّة. وْآنَا نْقُولْ فِي الكْلاَمْ الِّي قَالْهُولِي الآبْ بِالضَّبْطْ.»