Read Tunisian Arabic New Testament يُوحَنَّا 13 Bible Online

يُوحَنَّا 13 - Tunisian Arabic New Testament bible

يُوحَنَّا 13

¹قْبَلْ عِيدْ الفِصْحْ، يَسُوعْ كَانْ يَعْرِفْ، الِّي سَاعْتُو جَاتْ بَاشْ يِمْشِي مِالعَالَمْ هَاذَا وْيَرْجِعْ لِلآبْ، وْهُوَ حَبْ جْمَاعْتُو الِّي فِي العَالَمْ هَاذَا، حَبّْهُمْ عَلِّخْرْ.

²وَقْتِلِّي كَانْ يِتْعَشَّى مْعَ تْلاَمِذْتُو. وَسْوِسْ بْلِيسْ لْيَهُوذَا وِلْدْ سِمْعَانْ الإِسْخَرْيُوطِي بّاشْ يْخُونو

³يَسُوعْ كَانْ يَعْرِفْ الِّي الآبْ حَطْ فِي يْدِيهْ كُلْ شَيْء، وْإِنُّو جَا مِنْ عِنْدْ اللهْ وْبِشْ يَرْجَعْ للهْ.

⁴قَامْ عْلَى العْشَاء وْنَحَّى الجِّبَّة مْتَاعُو وِخْذَا مَنْشْفَة وِاتْحَزِّمْ بِيهَا،

⁵وْصَبْ مَاء فِي سْطَلْ مْتَاعْ غْسِيلْ سَاقِينْ وِبْدَا يَغْسِلْ فِي سَاقِينْ التْلاَمْذَة وِيْنَشِّفْ فِيهُمْ بِالمَنْشْفَة الِّي مِتْحَزِّمْ بِيهَا.

⁶وَقْتِلِّي وْصُلْ لْسِمْعَانْ بُطْرُسْ، قَالُّو سِمْعَانْ: «يَا رَبْ، إِنْتِ تَغْسِلِّي سَاقَيَّا؟»

⁷جَاوْبُو يَسُوعْ: «إِنْتِ تَوَّا مَاكِشْ فَاهِمْ آشْ قَاعِدْ نَعْمِلْ، آمَا تَوْ تِفْهِمْ مْبَاعِدْ.»

⁸قَالُّو بُطْرُسْ: «مُسْتَحِيلْ إِنْتِ تَغْسِلِّي سَاقَيَّا.» جَاوْبُو يَسُوعْ: «إِذَا كَانْ مَا نَغْسِلِّكْشْ سَاقِيكْ مَا عِنْدِكْشْ بَايْ مْعَايَا.»

⁹يَاخِي قَالُّو سِمْعَانْ بُطْرُسْ: «يَا رَبْ مُوشْ سَاقَيَّا آكَاهُو، آمَا يْدَيَّا وْرَاسِي زَادَا.»

¹⁰قَالُّو يَسُوعْ: «الِّي يْعُومْ رَاهُو الكُلُّو نْظِيفْ، وْمَا يِسْتْحَقْ كَانْ لِغْسِيلْ سَاقِيهْ. إِنْتُومَا طَاهْرِينْ، آمَا مَا كُمْشْ الكُلْكُمْ.»

¹¹يَسُوعْ كَانْ يَعْرِفْ شْكُونْ بَاشْ يْخُونُو. هَاذَاكَا عْلاَشْ قَالْ: «مَا كُمْشْ الكُلْكُمْ طَاهْرِينْ.»

¹²بَعْدْ مَا غْسَلِّلْهُمْ سَاقِيهُمْ لْبِسْ جِبّْتُو وِتَّكَّى فِي بْلاَصْتُو مِنْ جْدِيدْ وْقَالِلْهُمْ: «يَاخِي فَاهْمِينْ الشَّيْء الِّي عْمَلْتُو مْعَاكُمْ؟

¹³إِنْتُومَا تْنَادُولِي يَا مُعَلِّمْ وْيَا رَبّْنَا، وْهَاذَا صْحِيحْ عْلَى خَاطِرْنِي آنَا مُعَلِّمْ وْرَبْ.

¹⁴إِذَا كَانْ آنَا المُعَلِّمْ وِالرَّبْ وِغْسَلْتِلْكُمْ سَاقِيكُمْ، إِمَّالاَ إِنْتُومَا زَادَا يِلْزِمْكُمْ تَغْسْلُوا سَاقِينْ بْعَضْكُمْ.

¹⁵وْآنَا عْطِيتْكُمْ مِثَالْ بَاشْ اتَّبْعُوهْ، وْتَعْمْلُوا مْعَ بْعَضْكُمْ كِيفْ مَا عْمَلْتْ مْعَاكُمْ.

¹⁶نْقُلْكُمْ الحَقْ الحَقْ: مَا ثَمَّاشْ خْدِيمْ أَعْظِمْ مِنْ سِيدُو، وْمَا ثَمَّاشْ مَبْعُوثْ أَعْظِمْ مِلِّي بِعْثُو.

¹⁷إِمَّالاَ كِفْهِمْتُوا الشَّيْء هَاذَا، صَحَّة لِيكُمْ كَانْ تَعْمْلُوا بِيهْ.

¹⁸آنَا مَا نِيشْ قَاعِدْ نَحْكِي عْلِيكُمْ الكُلْكُمْ، آنَا نَعْرِفْ النَّاسْ الِّي خْتَرْتْهُمْ. آمَا رَاهُو الشَّيْء الِّي قَالُو الكْتَابْ لاَزْمُو يْتِمْ، وِلِّي هُوَ: "الِّي يَاكُلْ مْعَايَ فِي الخُبْزْ مْتَاعِي دَارْ عْلِيَّ."

¹⁹قُلْتِلْكُمْ عْلَى الشَّيْء هَاذَا قْبَلْ مَا يْصِيرْ، بَاشْ وَقْتِلِّي يَاقَعْ تِمّْنُوا الِّي آنَا هُوَ.

²⁰نْقُلْكُمْ الحَقْ الحَقْ: الِّي يِقْبِلْ الِّي نَبْعْثُو يِقْبِلْنِي. وِلِّي يِقْبِلْنِي رَاهُو يِقْبِلْ الِّي بْعَثْنِي.»

²¹وَقْتِلِّي قَالْ الكْلاَمْ هَاذَا، حَسْ يَسُوعْ رُوحُو مُضْطَرْبَة وِشْهِدْ وْقَالْ: «نْقُلْكُمْ الحَقْ الحَقْ: وَاحِدْ مِنْكُمْ بَاشْ يْخُونِّي.»

²²وِبْقَاوْ التْلاَمْذَة يُخْزْرُوا لِبْعَضْهُمْ وْحَايْرِينْ فِي شْكُونْ يُقْصُدْ بِكْلاَمُو.

²³وْوَاحِدْ مِالتْلاَمْذَة، الِّي يَسُوعْ يْحِبُّو، كَانْ مِتَّكِّي بْجَنْبُو.

²⁴هِمْزُو سِمْعَانْ بُطْرُسْ وْقَالُّو: «إِسْأْلُو فِي شْكُونْ يُقْصُدْ بِكْلاَمُو.»

²⁵اتَّكَّى التِّلْمِيذْ عْلَى يَسُوعْ وْسِأْلُو: «شْكُونُو هُوَ، يَا رَبْ؟»

²⁶جَاوِبْ يَسُوعْ: «الِّي نْعَدِّي الخُبْزْ فِي الصْحَنْ وْنَعْطِيهْ يَاكُلْ هُوَ الِّي بَاشْ يْخُونِّي!» وْغَطِّسْ يَسُوعْ قِدْمِةْ الخُبْزْ وِعْطَاهَا لْيَهُوذَا وِلْدْ سِمْعَانْ الإِسْخَرْيُوطِي.

²⁷وْبَعْدْ مَا كْلاَهَا لِبْسُو الشِّيطَانْ. يَاخِي قَالُّو يَسُوعْ: «الِّي نَاوِي بَاشْ تَعْمْلُوا إِزْرِبْ رُوحِكْ وْأَعْمْلُو فِيسَعْ.»

²⁸وْحَتَّى وَاحِدْ مِلِّي قَاعْدِينْ مْعَاهْ عْلَى الطَّاوْلَة مَا فْهِمْ عْلاَشْ قَالُّو الكْلاَمْ هَاذَاكَا.

²⁹وْيَهُوذَا كَانْ مَسْؤُولْ عْلَى صَنْدُوقْ الفْلُوسْ، هَاذَاكَا عْلاَشْ مْشَى فِي بَالْهُمْ الِّي يَسُوعْ وَصَّاهْ بَاشْ يِشْرِي آشْ يِسْتْحَقُّوا لِلعِيدْ، وِلاَّ بَاشْ يَعْطِي حَاجَاتْ لِلفُقَرَاءْ.

³⁰وِخْذَا يَهُوذَا القِدْمَة وِخْرَجْ بِالوَقْتْ. وْكَانِتْ الدِّنْيَا لِيلْ.

³¹وْوَقْتِلِّي خْرَجْ يَهُوذَا قَالْ يَسُوعْ: «تَوْ آنَا إِبْنْ الإِنْسَانْ تْمَجِّدْتْ وِالله تْمَجِّدْ فِيَّ.

³²إِذَا كَانْ اللهْ تْمَجِّدْ فِيَّ، رَاهُو اللهْ بَاشْ يْمَجِّدْنِي فِي رُوحُو، وْبِشْ يْمَجِّدْنِي عْلَى قْرِيبْ.

³³يَا وْلاَدِي، رَانِي بَاشْ نَبْقَى مْعَاكُمْ شْوَيَّة وَقْتْ. بَاشْ تْفَرْكْسُوا عْلِيَّ، وِلِّي قُلْتُو لِليْهُودْ نْقُولْهُولْكُمْ إِنْتُومَا تَوَّا: إِنْتُومَا مَا تْنَجّْمُوشْ تْجِيوْ لِلبْلاَصَة الِّي آنَا مَاشِيلْهَا.

³⁴آنَا نْوَصِّيكُمْ وْصِيَّة جْدِيدَة: إِنّْكُمْ تْحِبُّوا بْعَضْكُمْ. وْكِيفْ مَا آنَا حَبِّيتْكُمْ إِنْتُومَا زَادَا حِبُّوا بْعَضْكُمْ.

³⁵إِذَا كَانْ تْحِبُّوا بْعَضْكُمْ، النَّاسْ الكُلْ بَاشْ يَعْرْفُوا الِّي إِنْتُومَا تْلاَمِذْتِي.»

³⁶قَالُّو سِمْعَانْ بُطْرُسْ: «يَا رَبْ، إِنْتِ وِينْ مَاشِي؟» جَاوْبُو يَسُوعْ: «إِنْتِ تَوْ مَا تْنَجِّمْشْ اتَّبَّعْنِي لِلبْلاَصَة الِّي آنَا مَاشِيلْهَا، آمَا رَاكْ نْهَارْ مِالنْهَارَاتْ بَاشْ اتَّبَّعْنِي.»

³⁷يَاخِي قَالُّو بُطْرُسْ: «يَا رَبْ، عْلاَشْ مَا انَّجِّمْشْ نْتَبّْعِكْ تَوَّا؟ رَانِي مُسْتْعَدْ نْمُوتْ عْلَى خَاطْرِكْ.»

³⁸جَاوْبُو يَسُوعْ: «يَاخِي إِنْتِ مُسْتْعَدْ بَاشْ تْمُوتْ عْلَى خَاطْرِي؟ نْقُلِّكْ الحَقْ الحَقْ: مَا يْصِيحْ السَّرْدُوكْ كَانْ مَا تُنْكُرْ فِيَّ ثْلاَثَة مَرَّاتْ.»