Read Tunisian Arabic New Testament يُوحَنَّا 14 Bible Online

يُوحَنَّا 14 - Tunisian Arabic New Testament bible

يُوحَنَّا 14

¹«خَلِّي قْلُوبْكُمْ تِطْمَانْ. إِنْتُومَا تِمّْنُوا بِالله إِمَّالاَ امّْنُوا بِيَّ.

²فِي دَارْ بَابَا ثَمَّة بَرْشَة بْيُوتْ، تَالِي رَانِي مَا قُلْتِلْكُمْشْ: آنَا رَانِي مَاشِي بَاشْ نْحَضّْرِلْكُمْ بْلاَصَة.

³وْإِذَا كَانْ مْشِيتْ وْحَضِّرْتِلْكُمْ بْلاَصَة، نَرْجَعْ وِنْهِزّْكُمْ بَاشْ تْكُونُوا فِي البْلاَصَة الِّي آنَا مُوجُودْ فِيهَا.

⁴وْباشْ تَعْرْفُوا الطْرِيقْ الِّي يْوَصِّلْ لْوِينْ آنَا مَاشِي.»

⁵قَالُّو تُومَا: «يَا رَبْ، أَحْنَا مَا نَعْرْفُوشْ لْوِينْ إِنْتِ مَاشِي، إِمَّالاَ كِيفَاشْ بَاشْ نَعْرْفُوا الطْرِيقْ؟»

⁶قَالُّو يَسُوعْ: «آنَا هُوَ الطْرِيقْ وِالحَقْ وِالحَيَاةْ، حَتَّى حَدْ مَا يْجِي لِلآبْ كَانْ بِيَّ.

⁷كَانْ عْرَفْتُونِي رَاكُمْ عْرَفْتُوا بَابَا زَادَا. وْمِنْ تَوْ إِنْتُومَا تَعْرْفُوهْ وْشُفْتُوهْ.»

⁸قَالُّو فِيلِبُّسْ: «يَا رَبْ، وَرِّينَا الآبْ وْهَاذَا بَاشْ يِكْفِينَا.»

⁹قَالُّو يَسُوعْ: «آنَا مْعَاكُمْ الوَقْتْ هَاذَا الكُلْ، وْمَا عْرَفْتْنِيشْ يَا فِيلِبُّسْ؟ الِّي شَافْنِي رَاهُو شَافْ الآبْ، إِمَّالاَ كِيفَاشْ تْقُولْ وَرِّينَا الآبْ؟

¹⁰يَاخِي مَا تِمِّنْشْ الِّي آنَا فِي الآبْ وِلِّي الآبْ فِيَّ؟ الكْلاَمْ الِّي نْقُولْ فِيهْ لِيكُمْ مُوشْ كْلاَمِي آنَا، آمَا رَاهُو الآبْ الِّي فِيَّ هُوَ الِّي يَعْمِلْ الأَعْمَالْ مْتَاعُو.

¹¹صَدّْقُونِي إِذَا نْقُلْكُمْ: آنَا فِي الآبْ وِالآبْ فِيَّ، وِلاَّ عْلَى الأَقَلْ صَدّْقُونِي عْلَى خَاطِرْ الحَاجَاتْ الِّي عْمَلْتْهَا.

¹²نْقُلْكُمْ الحَقْ الحَقْ: الِّي يِمِّنْ بِيَّ هُوَ زَادَا يَعْمِلْ الأَعْمَالْ الِّي آنَا نَعْمِلْ فِيهَا، وِيْنَجِّمْ يَعْمِلْ أَكْثِرْ مِنْهَا، عْلَى خَاطِرْنِي مَاشِي لِلآبْ.

¹³وْإِذَا كَانْ تُطْلْبُوا أَيْ حَاجَة بْإِسْمِي نَعْمِلْهَا، بَاشْ الآبْ يِتْمَجِّدْ فِي الإِبْنْ.

¹⁴وْإِذَا كَانْ تُطْلْبُوا مِنِّي أَيْ حَاجَة بْإِسْمِي آنَا نَعْطِيهَالْكُمْ.»

¹⁵«كَانْكُمْ تْحِبُّونِي تَوْ تَعْمْلُوا الشَّيْء الِّي أْمَرْتْكُمْ بِيهْ.

¹⁶وْآنَا بَاشْ نُطْلُبْ مِالآبْ بَاشْ يَعْطِيكُمْ مُعَزِّي آخَرْ بَاشْ يَبْقَى مْعَاكُمْ دِيمَا.

¹⁷هُوَ رُوحْ الحَقْ الِّي النَّاسْ الِّي فِي الدِّنْيَا هَاذِي مَا يْنَجّْمُوشْ يْنَالُوهْ. عْلَى خَاطِرْهُمْ مَا يْشُوفُوهِشْ وْمَا يَعْرْفُوهِشْ، آمَا إِنْتُومَا رَاكُمْ تَعْرْفُوهْ عْلَى خَاطْرُو بَاشْ يَبْقَى مْعَاكُمْ وْبِشْ يْكُونْ فِيكُمْ.

¹⁸مَانِيشْ بَاشْ نْخَلِّيكُمْ يْتَامَى آمَا تَوْ نَرْجْعِلْكُمْ.

¹⁹بَعْدْ شْوَيَّة النَّاسْ الِّي فِي الدِّنْيَا هَاذِي مَا عَادِشْ بَاشْ يْشُوفُونِي، آمَا إِنْتُومَا تْشُوفُونِي وِعْلَى خَاطِرْنِي آنَا حَيْ إِنْتُومَا زَادَا بَاشْ تَحْيَاوْ.

²⁰وْفِي النْهَارْ هَاذَاكَا بَاشْ تَعْرْفُوا الِّي آنَا فِي بَابَا، وِلِّي إِنْتُومَا فِيَّ وْآنَا فِيكُمْ.

²¹الِّي يِقْبِلْ الوْصَايَا مْتَاعِي وْيَعْمِلْ بِيهَا هَاذَاكَا هُوَ الِّي يْحِبّْنِي. وِلِّي يْحِبّْنِي يْحِبُّوا بَابَا، وْآنَا نْحِبُّوا وْبِشْ نْظَهِّرْلُو رُوحِي.»

²²يَاخِي قَالُّو يَهُوذَا، الِّي مُوشْ يَهُوذَا الإِسْخَرْيُوطِي: «يَا رَبْ، كِيفَاشْ تْظَهّْرِلْنَا رُوحِكْ وْمَا تْظَهَّرْهَاشْ لِلنَّاسْ الِّي فِي الدِّنْيَا؟»

²³جَاوْبُو يَسُوعْ: «الِّي يْحِبّْنِي يْطِيعْ كْلاَمِي وْبَابَا يْحِبُّو، وِنْجُوهْ وْنُسْكْنُوا مْعَاهْ.

²⁴وِلِّي مَا يْحِبّْنِيشْ مَا يِسْمَعْشْ كْلاَمِي. وِكْلاَمِي مُوشْ مِنْ عِنْدِي، آمَا رَاهُو مِنْ عِنْدْ الآبْ الِّي بْعَثْنِي.

²⁵قُلْتِلْكُمْ الشَّيْء هَاذَا الكُلُّو وْآنَا مْعَاكُمْ

²⁶آمَا المُعَزِّي الِّي هُوَ الرُّوحْ القُدُسْ الِّي بَاشْ يَبْعْثُو الآبْ بْإِسْمِي، هُوَ بَاشْ يْعَلِّمْكُمْ كُلْ شَيْء وِيْذَكِّرْكُمْ بِالحَاجَاتْ الِّي قُلْتْهَالْكُمْ الكُلْ.

²⁷سَلاَمْ نْخَلِّيلْكُمْ، سَلاَمِي نَعْطِيكُمْ، السَّلاَمْ الِّي يَعْطِيهُولْكُمْ العَالَمْ مُوشْ كِيفْ السَّلاَمْ الِّي نَعْطِيهُولْكُمْ آنَا. إِمَّالاَ مَا تْخَلِّيوْشْ قْلُوبْكُمْ تِتْرْعِبْ وِلاَّ تِتْفْجَعْ.

²⁸إِنْتُومَا سْمَعْتُونِي كِقُلْتْ: آنَا مَاشِي وْبِشْ نَرْجْعِلْكُمْ، كَانْ جِيتُوا تْحِبُّونِي رَاكُمْ فْرَحْتُوا الِّي آنَا مَاشِي لِلآبْ، عْلَى خَاطِرْ الآبْ أَعْظِمْ مِنِّي.

²⁹قُلْتِلْكُمْ الحَاجَاتْ هَاذِي تَوَّا قْبَلْ مَا تْصِيرْ، بَاشْ وَقْتِلِّي تَاقَعْ تِمّْنُوا.

³⁰مَانِيشْ بَاشْ نَحْكِي مْعَاكُمْ أَكْثِرْ، رَاهُو الشِّيطَانْ الِّي هُوَ يُحْكُمْ فِي الدِّنْيَا هَاذِي بَاشْ يْجِي. مَا عِنْدُوشْ سُلْطَة عْلِيَّ

³¹آمَا لاَزِمْ النَّاسْ الِّي فِي الدِّنْيَا هَاذِي يَعْرْفُوا الِّي آنَا نْحِبْ الآبْ وْنَعْمِلْ الِّي يْقُلِّي عْلِيهْ. قُومُوا نِمْشِيوْا مِنْ هْنَا!»