Read Tunisian Arabic New Testament يُوحَنَّا 15 Bible Online

يُوحَنَّا 15 - Tunisian Arabic New Testament bible

يُوحَنَّا 15

¹«آنَا هُوَ العِنْبَايَة الحَقَّانِيَّة وْبَابَا هُوَ مُولَى السَّانْيَة.

²كُلْ عُرْفْ مَا يْجِيبِشْ الغَلَّة يْقُصُّو، وِلِّي فِيهْ الغَلَّة يُزْبْرُو بَاشْ يْجِيبْ أَكْثِرْ.

³إِنْتُومَا تَوْ طَاهْرِينْ بِسْبَبْ الكِلْمَة الِّي قُلْتْهَالْكُمْ.

⁴إِثْبْتُوا فِيَّ وْآنَا بَاشْ نِثْبِتْ فِيكُمْ. وْكِيفْ مَا العُودْ مَا يْنَجِّمْشْ يْجِيبْ الغَلَّة كَانْ وَقْتِلِّي يِثْبِتْ فِي العِنْبَايَة، إِنْتُومَا زَادَا مَا تْنَجّْمُوا تْجِيبُوا ثَمَرْ كَانْ وَقْتِلِّي تِثْبْتُوا فِيَّ.

⁵آنَا العِنْبَايَة وْإِنْتُومَا الأَعْرَافْ، الِّي يِثْبِتْ فِيَّ وْآنَا نِثْبِتْ فِيهْ يْجِيبْ بَرْشَة ثَمَرْ. آمَا رَاكُمْ مَا تْنَجّْمُوا تَعْمْلُوا حَتَّى شَيْء مِنْ غِيرِي.

⁶الِّي مَا يِثْبِتْشْ فِيَّ يِتْرْمَى كِالعُرْفْ وْيِيبِسْ. وِالأَعْرَافْ اليَابْسَة تِتْلَمْ وْتِتْرْمَى فِي النَّارْ بَاشْ تِتْحْرَقْ.

⁷كَانْ تِثْبْتُوا فِيَّ وِكْلاَمِي يِثْبِتْ فِيكُمْ، أَيْ حَاجَة تُطْلْبُوهَا تَاخْذُوهَا.

⁸هَاذَا هُوَ الشَّيْء الِّي يْمَجِّدْ بَابَا: إِنّْكُمْ تْجِيبُوا بَرْشَة ثَمَرْ وْهَكَّا تْوَلِّيوْا تْلاَمِذْتِي.

⁹كِيفْ مَا حَبّْنِي الآبْ آنَا حَبِّيتْكُمْ، إِمَّالاَ اثْبْتُوا فِي مْحَبّْتِي.

¹⁰إِذَا كَانْ تَعْمْلُوا بِالوْصَايَا مْتَاعِي تِثْبْتُوا فِي مْحَبّْتِي، كِيفْ مَا آنَا عْمَلْتْ بِالوْصَايَا مْتَاعْ بَابَا وْثَابِتْ فِي مْحَبّْتُو.

¹¹قُلْتِلْكُمْ الشَّيْء هَاذَا بَاشْ الفَرَحْ مْتَاعِي يْدُومْ فِيكُمْ، وِيْكُونْ الفَرَحْ مْتَاعْكُمْ كَامِلْ.

¹²هَاذِي هِيَ وْصِيتِي: حِبُّوا بْعَضْكُمْ كِيفْ مَا آنَا حَبِّيتْكُمْ.

¹³مَا ثَمَّاشْ مْحَبَّة أَكْبِرْ مِنْ هَاذِي: إِنُّو الوَاحِدْ يْضَحِّي بِحْيَاتُو عْلَى خَاطِرْ حْبَابُو.

¹⁴إِنْتُومَا رَاكُمْ تْوَلِّيوْا حْبَابِي وَقْتِلِّي تَعْمْلُوا الِّي نْوَصِّيكُمْ بِيهْ.

¹⁵آنَا مِاليُومْ مَا عَادِشْ بَاشْ نْسَمِّيكُمْ عَبِيدْ، رَاهُو العَبْدْ مَا يَعْرِفْشْ آشْ سِيدُو يَعْمِلْ، آمَا نْسَمِّيكُمْ حْبَابِي، عْلَى خَاطِرْنِي حْكِيتِلْكُمْ عْلَى الحَاجَاتْ الِّي سْمَعْتْها مِنْ عِنْدْ بَابَا الكُلْهَا

¹⁶مُوشْ إِنْتُومَا الِّي خْتَرْتُونِي، آمَا رَانِي آنَا الِّي خْتَرْتْكُمْ وْحَطِّيطْكُمْ بَاشْ تِمْشِيوْ وتُنْتْجُوا بَرْشَة ثَمَرْ وِالثَّمَرْ مْتَاعْكُمْ يْدُومْ، وَقْتْهَا يَعْطِيكُمْ الآبْ كُلْ حَاجَة تُطْلْبُوهَا بْإِسْمِي.

¹⁷وْهَاذَا هُوَ الشَّيْء الِّي نْوَصِّيكُمْ بِيهْ: إِنّْكُمْ تْحِبُّوا بْعَضْكُمْ.»

¹⁸«إِذَا كَانْ العَالَمْ كْرَهْكُمْ، أَعْرْفُوا الِّي هُوَ كْرَهْنِي آنَا قْبَلْكُمْ.

¹⁹كَانْ جِيتُوا مِالعَالَمْ، رَاهُو العَالَمْ حَبّْكُمْ كِيفْ مَا يْحِبْ امَّالِيهْ. وْآنَا خْتَرْتْكُمْ مِالعَالَمْ هَاذَا وْإِنْتُومَا مَا كُمْشْ مِنُّو، هَاذَاكَا عْلاَشْ هُوَ يَكْرَهْكُمْ.

²⁰إِذَّكْرُوا الكِلْمَة الِّي قُلْتْهَالْكُمْ: "عُمْرُو مَا كَانْ ثَمَّة خْدِيمْ أَعْظِمْ مِنْ سِيدُو." كَانْ اضْطَهْدُونِي رَاهُمْ بَاشْ يِضْطَهْدُوكُمْ، وْكَانْ سَمْعُوا كْلاَمِي رَاهُمْ بَاشْ يِسْمْعُوا كْلاَمْكُمْ.

²¹هُومَا بَاشْ يَعْمْلُوا فِيكُمْ الشَّيْء هَاذَا الكُلُّو عْلَى خَاطِرْ إِسْمِي، رَاهُمْ مَا يَعْرْفُوشْ الِّي بْعَثْنِي.

²²كَانْ مَا جِيتِشْ وْكَلِّمْتْهُمْ، تَالِي رَاهُمْ مَا عِنْدْهُمْشْ حَتَّى ذَنْبْ. آمَا تَوْ رَاهُمْ مَا عِنْدْهُمْشْ حَتَّى عُذْرْ عْلَى ذْنُوبْهُمْ.

²³الِّي يَكْرَهْنِي يَكْرَهْ بَابَا زَادَا.

²⁴كَانْ مَا جِيتِشْ عْمَلْتْ قُدَّامْهُمْ الأَعْمَالْ الِّي حَتَّى حَدْ مَا عْمَلْهَا، تَالِي رَاهُمْ مَا عِنْدْهُمْشْ ذْنُوبْ. آمَا تَوْ رَاهُمْ شَافُوا الأَعْمَالْ مْتَاعِي وْمَازَالُوا يَكْرْهُونِي وْيَكْرْهُوا بَابَا.

²⁵آمَا الشَّيْء هَاذَا رَاهُو صَارْ بَاشْ يْتِمْ الِّي مَكْتُوبْ فِي الشَّرِيعَة مْتَاعْهُمْ: كَرْهُونِي مِنْ غِيرْ سْبَبْ.

²⁶وْوَقْتِلِّي يْجِي المُعَزِّي الِّي بَاشْ نَبْعِثْهُولْكُمْ مِنْ عِنْدْ الآبْ، رُوحْ الحَقْ الِّي يْجِي مِنْ عِنْدْ الآبْ، هُوَ يِشْهِدْلِي.

²⁷وْإِنْتُومَا زَادَا بَاشْ تِشْهْدُولِي، عْلَى خَاطِرْكُمْ مْعَايَ مِلُّوِّلْ.»