Read Tunisian Arabic New Testament يُوحَنَّا 16 Bible Online

يُوحَنَّا 16 - Tunisian Arabic New Testament bible

يُوحَنَّا 16

¹«قُلْتِلْكُمْ الشَّيْء هَاذَا بَاشْ إِيمَانْكُمْ مَا يُضْعُفْشْ.

²بَاشْ يْطَرّْدُوكُمْ مِالمَجْمَعْ، بَاشْ يْجِي وَقْتْ الِّي يُقْتُلْكُمْ يِمْشِي فِي بَالُو الِّي هُوَ يْرَضِّي اللهْ.

³وْرَاهُمْ يَعْمْلُوا فِي الشَّيْء هَاذَا عْلَى خَاطِرْهُمْ لاَ عَرْفُوا الآبْ وْلاَ عَرْفُونِي.

⁴آمَا رَانِي قُلْتِلْكُمْ الشَّيْء هَاذَا، بَاشْ كِي يْجِي وَقْتُو تِتْذَكّْرُوا الِّي آنَا قُلْتِلْكُمْ عْلِيهْ. مَا قُلْتِلْكُمْشْ مِلُّوِّلْ عْلَى خَاطِرْنِي كُنْتْ مْعَاكُمْ.

⁵تَوْ رَانِي مَاشِي لِلِّي بْعَثْنِي، وْحَتَّى حَدْ مِنْكُمْ مَا يِسْإِلْنِي: وِينْ مَاشِي؟

⁶آمَا تَوْ قْلُوبْكُمْ مِلْيَانَة بِالحُزْنْ كِقُلْتِلْكُمْ الشَّيْء هَاذَا.

⁷نْقُلْكُمْ الحَقْ، كَانْ نِمْشِي خِيرِلْكُمْ، رَاهُو كَانْ مَا نِمْشِيشْ المُعَزِّي مَا يْجِيكُمْشْ. آمَا كَانْ نِمْشِي رَانِي بَاشْ نَبْعِثْهُولْكُمْ.

⁸وْوَقْتِلِّي يْجِي يْوَبِّخْ العَالَمْ عْلَى الذْنُوبْ وِعْلَى البِرْ وِعْلَى الدّيْنُونة:

⁹كَانْ عْلَى الذْنُوبْ رَاهُو عْلَى خَاطِرْهُمْ مَا يِمّْنُوشْ بِيَّ،

¹⁰وْكَانْ عْلَى البِرْ عْلَى خَاطِرْنِي مَاشِي لِلآبْ وْمَا عَادِشْ بَاشْ تْشُوفُونِي،

¹¹وْكَانْ عْلَى الدَّيْنُونة رَاهُو عْلَى خَاطِرْ رَئِيسْ العَالَمْ هَاذَا مُدَانْ.

¹²مَازَالْ عِنْدِي بَرْشَة كْلاَمْ نْحِبْ نْقُولْهُولْكُمْ، آمَا رَاكُمْ تَوَّا مَا تْنَجّْمُوشْ تِفْهْمُوهْ.

¹³وْوَقْتِلِّي يْجِي رُوحْ الحَقْ بَاشْ يْدِلّْكُمْ لِلحَقْ الكُلُّو، عْلَى خَاطْرُو مَا يْقُولْ حَتَّى شَيْء مِنْ عَنْدُو، آمَا يِتْكَلِّمْ بِلِّي يِسْمْعُو وْيِحْكِيلْكُمْ عْلَى الحَاجَاتْ الِّي بَاشْ تَاقَعْ.

¹⁴بَاشْ يْمَجِّدْنِي عْلَى خَاطِرْ الكْلاَمْ الِّي بَاشْ يْقُولْهُولْكُمْ جَايْ مِنْ عِنْدِي.

¹⁵الِّي عِنْدْ الآبْ الكُلْ لِيَّا. هَاذَاكَا عْلاَشْ قُلْتِلْكُمْ: رَاهُو يَاخُذْ مِلِّي عِنْدِي وِيْقُولْهُولْكُمْ.»

¹⁶بَعْدْ شْوَيَّة مَا كُمْشْ بَاشْ تْشُوفُونِي، وِمْبَعْدْهَا بَاشْ تْشُوفُونِي.

¹⁷وْسِأْلُوا التْلاَمْذَة بْعَضْهُمْ: «شْنُوَّة يُقْصُدْ بِكْلاَمُو: "بَعْدْ شْوَيَّة مَا كُمْشْ بَاشْ تْشُوفُونِي. وِمْبَعْدْهَا بِشْوَيَّة بَاشْ تْشُوفُونِي. وِعْلَى خَاطْرُو مَاشِي لِلآبْ؟"»

¹⁸وْسِأْلُوا بْعَضْهُمْ: «آشْ مَعْنِتْهَا "بَعْدْ شْوَيَّة؟" أَحْنَا مَا نَاشْ فَاهْمِينْ شْنُوَّة قَاعِدْ يَحْكِي.»

¹⁹وِعْرَفْ يَسُوعْ الِّي هُومَا يْحِبُّوا يِسْأْلُوهْ، يَاخِي قَالِلْهُمْ: «تِسْأْلُوا فِي بْعَضْكُمْ شْنُوَّة نُقْصُدْ كِقُلْتْ: "بَعْدْ شْوَيَّة مَا كُمْشْ بَاشْ تْشُوفُونِي، وِمْبَعْدْهَا بِشْوَيَّة بَاشْ تْشُوفُونِي؟"

²⁰نْقُلْكُمْ الحَقْ الحَقْ بَاشْ تِبْكِيوْ وْتِنْدْبُوا، وِالعَالَمْ بَاشْ يَفْرَحْ. بَاشْ تِحْزْنُوا، آمَا رَاهُو الحُزْنْ مْتَاعْكُمْ بَاشْ يْوَلِّي فْرَحْ.

²¹المْرَا تِتْقَلِّقْ وَقْتِلِّي يْجِي وَقْتْ الوْلاَدَة مْتَاعْهَا. آمَا بَعْدْ مَا تُولِدْ تِنْسَى الوْجَايِعْ مْتَاعْهَا الكُلْهَا، عْلَى خَاطِرْهَا فَرْحَانَة الِّي جَابِتْ إِنْسَانْ جْدِيدْ لِلدِّنْيَا.

²²إِنْتُومَا زَادَا بَاشْ تِحْزْنُوا تَوَّا، آمَا رَانِي بَاشْ نَرْجَعْ وِنْشُوفْكُمْ، وِقْلُوبْكُمْ بَاشْ تَفْرَحْ وْحَتَّى حَدْ مَا يْنَحِّيلْكُمْ فَرْحِتْكُمْ.

²³وْفِي النْهَارْ هَاذَاكَا مَا عَادِشْ تُطْلْبُوا مِنِّي حَتَّى حَاجَة. نْقُلْكُمْ الحَقْ الحَقْ: أَيْ حَاجَة تُطْلْبُوهَا مِالآبْ بْإِسْمِي بَاشْ يَعْطِيهَالْكُمْ.

²⁴حَتَّى لْتَوْ مَا طْلَبْتُوا حَتَّى شَيْء بْإِسْمِي. اطْلْبُوا تَاخْذُوا، بَاشْ تِكْمِلْ فَرْحِتْكُمْ.»

²⁵«قُلْتِلْكُمْ الشَّيْء هَاذَا الكُلْ بِالأَمْثَالْ. وْبِشْ يْجِي الوَقْتْ الِّي مَا عَادِشْ نَحْكِي مْعَاكُمْ بِالأَمْثَالْ، آمَا نَحْكِيلْكُمْ عْلَى الآبْ بِالوَاضِحْ.

²⁶وْفِي النْهَارْ هَاذَاكَا بَاشْ تُطْلْبُوا مِالآبْ بْإِسْمِي، وْمَا نْقُلْكُمْشْ الِّي آنَا بَاشْ نُطْلْبِلْكُمْ مِنْ عَنْدُو.

²⁷رَاهُو الآبْ بِيدُو يْحِبّْكُمْ عْلَى خَاطِرْكُمْ حَبِّيتُونِي وِامِّنْتُوا الِّي آنَا جِيتْ مِنْ عِنْدْ اللهْ.

²⁸إِي نْعَمْ، آنَا خْرَجْتْ مِنْ عِنْدْ الآبْ وْجِيتْ لِلدِّنْيَا هَاذِي وْتَوْ بَاشْ نْخَلِّي الدِّنْيَا وْنَرْجَعْ لِلآبْ.»

²⁹قَالُولُو تْلاَمِذْتُو: «إِنْتِ تَوْ قَاعِدْ تْقُولْ فِي كْلاَمْ وَاضِحْ، مُوشْ بِالأَمْثَالْ.

³⁰وْإِحْنَا تَوْ قَاعْدِينْ نْشُوفُوا الِّي إِنْتِ تَعْرِفْ كُلْ شَيْء، وِلِّي مَا تِحْتَاجِشْ بَاشْ يِسْأْلُوكْ عْلَى أَيْ حَاجَة. هَاذَاكَا عْلاَشْ أَحْنَا نِمّْنُوا الِّي إِنْتِ جِيتْ مِنْ عِنْدْ اللهْ.»

³¹جَاوِبْهُمْ يَسُوعْ: «يَاخِي بِالحَقْ تَوَّا تِمّْنُوا.

³²آمَا بَاشْ يْجِي وَقْتْ، وْرَاهُو جَا تَوَّا، بَاشْ تِتْفَرّْقُوا، وْكُلْ وَاحِدْ يْرَوِّحْ لْدَارُو وِتْخَلُّونِي وَحْدِي. آمَا رَانِي مَا نِيشْ وَحْدِي، رَاهُو الآبْ مْعَايَ.

³³قُلْتِلْكُمْ الشَّيْء هَاذَا لْكُلُّو بَاشْ يْكُونْ عِنْدْكُمْ سَلاَمْ فِيَّ. إِنْتُومَا بَاشْ تْعَانُوا مِالمَشَاكِلْ فِي العَالَمْ هَاذَا، آمَا تْشَجّْعُوا. آنَا رَانِي غْلِبْتْ العَالَمْ.»