Read Tunisian Arabic New Testament يُوحَنَّا 17 Bible Online

يُوحَنَّا 17 - Tunisian Arabic New Testament bible

يُوحَنَّا 17

¹بَعْدْ مَا قَالْ الكْلاَمْ هَاذَا الكُلُّو، هَزْ يَسُوعْ عِينِيهْ لِلسْمَاء وْقَالْ: «يَا بَابَا الوَقْتْ جَا: مَجِّدْ ابْنِكْ بَاشْ ابْنِكْ يْمَجّْدِكْ

²وْبِالسُّلْطَة الِّي عْطِيتْهَالُو عْلَى البَشَرْ الكُلْ بَاشْ يَعْطِي الحَيَاةْ الأَبَدِيَّة لِلنَّاسْ الكُلْ الِّي عْطِيتْهُمْلُو.

³وِالحَيَاةْ الأَبَدِيَّة هِيَ إِنّْهُمْ يَعْرْفُوكْ إِنْتِ وَحْدِكْ الإِلاَهْ الحَقْ وْيَسُوعْ المَسِيحْ الِّي بْعَثْتُو.

⁴آنَا مَجِّدْتِكْ فِي الأَرْضْ كِكَمِّلْتْ الخِدْمَة الِّي عْطِيتْهَالِي بَاشْ نَعْمِلْهَا

⁵وْتَوْ يَا بَابَا مَجِّدْنِي بِالمَجْدْ الِّي كَانْ عِنْدِي وَقْتِلِّي كُنْتْ مْعَاكْ قْبَلْ مَا يِتْخْلَقْ العَالَمْ.

⁶آنَا ظَهِّرْتْ إِسْمِكْ لِلِّي عْطِيتْهُمْلِي مِالعَالَمْ. هُومَا كَانُوا مْتَاعِكْ، وْإِنْتِ عْطِيتْهُمْلِي وْطَاعُوا كْلاَمِكْ.

⁷وْتَوْ يَعْرْفُوا الِّي كُلْ شَيْء عْطِيتْهُولِي هُوَ مِنْ عِنْدِكْ إِنْتِ.

⁸رَانِي عْطِيتْهُمْ الكْلاَمْ الِّي إِنْتِ عْطِيتْهُولِي مِنْ عِنْدِكْ، وْهُومَا قِبْلُوهْ وْعَرْفُوا بِالحَقْ الِّي آنَا جِيتْ مِنْ عِنْدِكْ وِامّْنُوا انِّكْ إِنْتِ الِّي بْعَثْتْنِي.

⁹آنَا نْصَلِّي مِنْ أَجْلْهُمْ، وْمَا نْصَلِّيشْ مِنْ أَجْلْ العَالَمْ، آمَا مِنْ أَجْلْ الِّي عْطِيتْهُمْلِي عْلَى خَاطِرْهُمْ مْتَاعِكْ.

¹⁰كُلْ مَا هُوَ لِيَّا رَاهُو لِيكْ، وِلِّي لِيكْ رَاهُو لِيَّا، وْآنَا تْمَجِّدْتْ فِيهُمْ.

¹¹مَا نِيشْ بَاشْ نَبْقَى فِي العَالَمْ آمَا هُومَا رَاهُمْ بَاشْ يَبْقَاوْ فِي العَالَمْ، وْآنَا جَايِكْ. يَا الآبْ القُدُّوسْ، النَّاسْ الِّي عْطِيتْهُمْلِي احْفِظْهُمْ فِي إِسْمِكْ، بَاشْ يْكُونُوا وَاحِدْ كِيفْ مَا آنَا وْإِنْتِ وَاحِدْ.

¹²وَقْتِلِّي كُنْتْ مْعَاهُمْ حْفَظْتْهُمْ فِيكْ. الِّي عْطِيتْهُمْلِي حْفَظْتْهُمْ، وْمَا هْلِكْ مِنْهُمْ حَتَّى وَاحِدْ كَانْ وِلْدْ الهْلاَكْ بَاشْ يْتِمْ الِّي تْقَالْ فِي الكْتَابْ المُقَدَّسْ.

¹³وْآنَا تَوْ جَايِكْ. نْقُولْ الشَّيْء هَاذَا وْآنَا مَازِلْتْ فِي العَالَمْ بَاشْ فَرْحْتِي تْوَلِّي عِنْدْهُمْ وِتْكُونْ كَامْلَة.

¹⁴آنَا عْطِيتْهُمْ كِلْمْتِكْ وِالعَالَمْ كْرَهْهُمْ عْلَى خَاطِرْهُمْ مَا هُمْشْ مِالعَالَمْ كِيفْ مَا آنَا زَادَا مَا نِيشْ مِالعَالَمْ.

¹⁵مَا نُطْلُبْشْ بَاشْ تْهِزّْهُمْ مِالعَالَمْ، آمَا نُطْلُبْ بَاشْ تَحْفِظْهُمْ مِالشِّرِّيرْ.

¹⁶هُومَا مَا هُمْشْ مِالعَالَمْ. كِيفْ مَا آنَا مَا نِيشْ مِالعَالَمْ.

¹⁷قَدِّسْهُمْ فِي الحَقْ، رَاهِي كِلْمْتِكْ هِيَ الحَقْ.

¹⁸كِيفْ مَا بْعَثْتْنِي فِي العَالَمْ آنَا زَادَا بْعَثْتْهُمْ فِي العَالَمْ.

¹⁹وْآنَا نْقَدِّسْ رُوحِي عْلَى خَاطِرْهُمْ، بَاشْ هُومَا زَادَا يْكُونُوا مِتْقَدّْسِينْ فِي الحَقْ.

²⁰وْمَا نْصَلِّيشْ مِنْ أَجْلْهُمْ هُومَا آكَاهُو، آمَا زَادَا نْصَلِّي مِنْ أَجْلْ الِّي بَاشْ يِمّْنُوا بِيَّ بِسْبَبْ الكِلْمَة مْتَاعْهُمْ،

²¹نْصَلِّي مِنْ أَجْلْ إِنّْهُمْ الكُلْهُمْ يْكُونُوا وَاحِدْ، يَا بَابَا كِيفْ مَا إِنْتِ فِيَّ وْآنَا فِيكْ، خَلِّيهُمْ هُومَا زَادَا يْكُونُوا وَاحِدْ فِينَا، بَاشْ العَالَمْ يِمِّنْ الِّي إِنْتِ بْعَثْتْنِي.

²²وْآنَا عْطِيتْهُمْ المَجْدْ الِّي عْطِيتْهُولِي، بَاشْ كِيفْ مَا أَحْنَا مِتَّحْدِينْ هُومَا زَادَا يْكُونُوا مِتَّحْدِينْ:

²³آنَا فِيهُمْ وْإِنْتِ فِيَّ بَاشْ الوِحْدَة مْتَاعْهُمْ تْكُونْ كَامْلَة وِالعَالَمْ يَعْرِفْ الِّي إِنْتِ بْعَثْتْنِي وِلِّي إِنْتِ تْحِبّْهُمْ كِيفْ مَا حَبِّيتْنِي.

²⁴يَا بَابَا النَّاسْ الِّي عْطِيتْهُمْلِي، نْحِبّْهُمْ يْكُونُوا مْعَايَ وِينْ آنَا مُوجُودْ بَاشْ يْشُوفُوا المَجْدْ مْتَاعِي الِّي إِنْتِ عْطِيتْهُولِي عْلَى خَاطْرِكْ حَبِّيتْنِي مِنْ قْبَلْ مَا تْخَلْقَتْ الدِّنْيَا.

²⁵يَا بَابَا العَادِلْ، العَالَمْ مَا عَرْفِكْشْ، آمَا آنَا رَانِي عْرَفْتِكْ وْهَاذُومَا عُرْفُوا الِّي إِنْتِ بْعَثْتْنِي.

²⁶وْعَرِّفْتْهُمْ بْإِسْمِكْ، وْبِشْ نْزِيدْ نْعَرِّفْهُمْ بِيهْ بَاشْ مْحَبّْتِكْ لِيَّا تْكُونْ فِيهُمْ وْآنَا نْكُونْ فِيهُمْ.»