Read Tunisian Arabic New Testament يُوحَنَّا 18 Bible Online

يُوحَنَّا 18 - Tunisian Arabic New Testament bible

يُوحَنَّا 18

¹قَالْ يَسُوعْ الشَّيْء هَاذَا وِتْعَدَّى هُوَ وِتْلاَمِذْتُو لِلجِيهَة الأُخْرَى مْتَاعْ وَادْ قَدْرُونْ وْكَانْ ثَمَّة سَانْيَة الغَادِي، دَخْلُوا فِيهَا هُوَ وِتْلاَمِذْتُو.

²وْيَهُوذَا الِّي خَانُو كَانْ يَعْرِفْ البْلاَصَة هَاذِيكَا، عْلَى خَاطِرْ يَسُوعْ تْقَابِلْ مْعَ تْلاَمِذْتُو لْغَادِي بَرْشَة مَرَّاتْ.

³يَهُوذَا جَابْ مْعَاهْ العَسْكِرْ مْتَاعْ الرُّومَانْ وِالحُرَّاسْ مْتَاعْ الهَيْكِلْ، وْجَاوْ لِلسَّانْيَة هَازِّينْ اعْوَادْ شَاعْلَة وِفْنَارَاتْ وِسْلاَحَاتْ.

⁴وِعْلَى خَاطْرُو كَانْ يَعْرِفْ الِّي بَاشْ يَجْرَالُو الكُلْ، مْشَالْهُمْ وْقَالِلْهُمْ: «عْلَى شْكُونْ تْلَوّْجُوا؟»

⁵جَاوْبُوهْ: «يَسُوعْ النَّاصْرِي.» قَالِلْهُمْ: «آنَا هُوَ!» وْكَانْ يَهُوذَا الِّي خَانُو وَاقِفْ مْعَاهُمْ.

⁶وْوَقْتِلِّي يَسُوعْ قَالِلْهُمْ: «آنَا هُوَ» وَخّْرُوا التَّالِي وْطَاحُوا عْلَى الأَرْضْ.

⁷سْإِلْهُمْ يَسُوعْ مَرَّة أُخْرَى: «عْلَى شْكُونْ تْلَوّْجُوا؟» قَالُوا: «يَسُوعْ النَّاصْرِي.»

⁸جَاوِبْهُمْ يَسُوعْ: «قُلْتِلْكُمْ آنَا هُوَ. إِذَا كَانْكُمْ تْلَوّْجُوا عْلِيَّ آنَا، خَلُّوا هَاذُومَا يِمْشِيوْ.»

⁹وْهَاذَا بَاشْ اتِّمْ الكِلْمَة الِّي قَالْهَا يَسُوعْ: «مَا ضَيِّعْتْ حَتَّى وَاحِدْ مِلِّي عْطِيتْهُمْلِي.»

¹⁰وْكَانْ سِمْعَانْ بُطْرُسْ عَنْدُو سِيفْ، جِبْدُو وِضْرَبْ العَبْدْ مْتَاعْ كْبِيرْ الكُهَّانْ قَصّْلُو وِذْنُو اليْمِينْ، وِالعَبْدْ كَانْ إِسْمُو مَلْخُسْ

¹¹قَالْ يَسُوعْ لْبُطْرُسْ: «رَجَّعْ سِيفِكْ لِلغْمَدْ مْتَاعُو! يَاخِي مَا نُشْرُبْشْ الكَاسْ الِّي عْطَاهَالِي الآبْ؟»

¹²العَسْكِرْ مْتَاعْ الرُّومَانْ وِالقَايِدْ مْتَاعْهُمْ وِالحُرَّاسْ مْتَاعْ الهَيْكِلْ الِّي تَابْعِينْ اليْهُودْ الكُلْهُمْ شَدُّوا يَسُوعْ وْكَتّْفُوهْ

¹³هَزُّوهْ فِي الأُوِّلْ لْحَنَّانْ بُو مَرْةْ قَيَافَا الِّي كَانْ كْبِيرْ الكُهَّانْ العَامْ هَاذَاكَا.

¹⁴قَيَافَا هُوَ الِّي نْصَحْ اليْهُودْ: «خِيرِلْكُمْ كَانْ يْمُوتْ رَاجِلْ وَاحِدْ فِي بْلاَصِةْ الأُمَّة الكُلْهَا.»

¹⁵وْكَانْ سِمْعَانْ بُطْرُسْ وْتِلْمِيذْ آخَرْ يْتَبّْعُوا فِي يَسُوعْ. وِدْخَلْ التِّلْمِيذْ هَاذَاكَا مْعَ يَسُوعْ لِلوُسْطِيَّة مْتَاعْ دَارْ كْبِيرْ الكُهَّانْ الِّي كَانْ يَعْرْفُو.

¹⁶آمَا بُطْرُسْ قْعَدْ وَاقِفْ البَرَّا. وِخْرَجْ التِّلْمِيذْ الآخَرْ الِّي يَعْرْفُو كْبِيرْ الكُهَّانْ البَرَّا، وْكَلِّمْ الطُّفْلَة الِّي تْعِسْ فِي البَابْ بَاشْ ادَّخِّلْ بُطْرُسْ.

¹⁷سِأْلِتْ الطُّفْلَة الِّي تْعِسْ فِي البَابْ بُطْرُسْ: «يَاخِي إِنْتِ مُوشْ وَاحِدْ مِنْ تْلاَمِذْةْ الرَّاجِلْ هَاذَا؟» يَاخِي جَاوِبْهَا بُطْرُسْ: «لاَ، مَا نِيشْ مِنْهُمْ.»

¹⁸وْكَانِتْ الدِّنْيَا بَارْدَة بَرْشَة، يَاخِي شَعّْلُوا الخُدَّامْ وِالحُرَّاسْ مْتَاعْ الهَيْكِلْ النَّارْ وْوُقْفُوا يِدَّفُّوا، وِوْقُفْ بُطْرُسْ يِدَّفَّى مْعَاهُمْ.

¹⁹وِسْإِلْ كْبِيرْ الكُهَّانْ يَسُوعْ عْلَى تْلاَمِذْتُو وِعْلَى تَعْلِيمُو،

²⁰جَاوْبُو يَسُوعْ: «آنَا كَلِّمْتْ النَّاسْ الكُلْ جْهَارْ، كُنْتْ دِيمَا نْعَلِّمْ فِي المَجَامِعْ وْفِي الهَيْكِلْ وِينْ كَانُوا اليْهُودْ الكُلْهُمْ يِتْلَمُّوا، وْمَا قُلْتْ حَتَّى شَيْء فِي السِّرْ.

²¹إِمَّالاَ عْلاَشْ تِسْإِلْ فِيَّ؟ إِسْإِلْ النَّاسْ الِّي سَمْعُوا الشَّيْء الِّي آنَا كلِّمتْهُمْ عْلِيهْ، هُومَا يَعْرْفُوا شْنُوَّة قُلْتْ.»

²²وَقْتِلِّي قَالْ يَسُوعْ الكْلاَمْ هَاذَا، ثَمَّة وَاحِدْ مِالحُرَّاسْ مْتَاعْ الهَيْكِلْ بْجَنْبُو ضَرْبُو بْكَفْ وْقَالُّو: «هَكَّاكَا تْجَاوِبْ كْبِيرْ الكُهَّانْ؟»

²³جَاوْبُو يَسُوعْ: «كَانْ آنَا قُلْتْ كِلْمَة غَالْطَة، قُلِّي عْلِيهَا، وْكَانْ آنَا قُلْتْ الحَقْ، إِمَّالاَ عْلاَشْ تَضْرِبْ فِيَّ؟»

²⁴وِمْبَاعِدْ حَنَّانْ بْعَثْ يَسُوعْ مْكَتِّفْ لْقِيَافَا كْبِيرْ الكُهَّانْ.

²⁵الوَقْتْ هَاذَاكَا كَانْ سِمْعَانْ بُطْرُسْ وَاقِفْ يِدَّفَّى، يَاخِي قَالُولُو: «مُوشْ إِنْتَ وَاحِدْ مِنْ تْلاَمِذْتُو؟» نْكَرْ بُطْرُسْ وْقَالْ: «مَا نِيشْ مِنْهُمْ!»

²⁶يَاخِي قَالُّو وَاحِدْ مِالخُدَّامْ مْتَاعْ كْبِيرْ الكُهَّانْ، وْهُوَ نْسِيبْ الخْدِيمْ الِّي بُطْرُسْ قَصّْلُو وِذْنُو: «مُوشْ شُفْتِكْ مْعَاهْ فِي السَّانْيَة؟»

²⁷وْزَادْ بُطْرُسْ نْكَرْ مَرَّة أُخْرَى. وْفِي وَقْتْهَا السَّرْدُوكْ صَاحْ.

²⁸وِمْبَاعِدْ هَزُّوا يَسُوعْ مِنْ دَارْ قَيَافَا لِقْصَرْ الوَالِي مْتَاعْ الرُّومَانْ. وْوَقْتْهَا كَانْ صْبَاحْ. مَا حَبُّوشْ اليْهُودْ يُدْخْلُوا لِلقْصَرْ بَاشْ مَا يِتْنَجّْسُوشْ، وْبَاشْ يْنَجّْمُوا يَاكْلُوا مِالمَاكْلَة مْتَاعْ عِيدْ الفِصْحْ.

²⁹وَلَّى خَرِّجْهُولْهُمْ بِيلاَطُسْ البَرَّا وِسْإِلْهُمْ: «شْنُوَّة الحَاجَة الِّي تِتهْمُوا بِيهَا الرَّاجِلْ هَاذَا؟»

³⁰جَاوْبُوهْ: «كَانْ مَا جَاشْ مُجْرِمْ، رَانَا مَا جِبْنَاهِشْ لِيكْ.»

³¹قَالِلْهُمْ بِيلاَطُسْ: «هِزُّوهْ إِنْتُومَا وْأُحْكْمُوا عْلِيهْ بِلِّي مُوجُودْ فِي الشَّرِيعَة مْتَاعْكُمْ.» جَاوْبُوهْ اليْهُودْ: «مَا عِنْدْنَاشْ الحَقْ نُقْتْلُوا حَتَّى حَدْ.»

³²وِالشَّيْء هَاذَا صَارْ بَاشْ تِتْحَقِّقْ الكِلْمَة الِّي قَالْهَا يَسُوعْ وَقْتِلِّي حْكَى عْلَى المِيتَة الِّي بَاشْ يْمُوتْهَا.

³³وِرْجَعْ بِيلاَطُسْ لِلقْصَرْ وْنَادَى لْيَسُوعْ وْسِأْلُو: «يَاخِي إِنْتِ مَلِكْ اليْهُودْ؟»

³⁴جَاوْبُو يَسُوعْ: «يَاخِي تْقُولْ فِي الكْلاَمْ هَاذَا مِنْ عِنْدِكْ وِلاَّ قَالُوهُولِكْ عْلِيَّ نَاسْ أُخْرِينْ؟»

³⁵جَاوِبْ بِيلاَطُسْ: «يَاخِي آنَا يْهُودِي؟ الأُمَّة مْتَاعِكْ وْرُؤَسَاءْ الكُهَّانْ جَابُوكْ لِيَّا. شْنُوَّة عْمَلْتْ؟»

³⁶جَاوِبْ يَسُوعْ: «المَمْلْكَة مْتَاعِي مَا هِيشْ مِالعَالَمْ هَاذَا. وْكَانْ جَاتْ مَمْلِكْتِي مِالعَالَمْ هَاذَا، تَالِي رَاهُمْ الخُدَّامْ مْتَاعِي يْحَارْبُوا بَاشْ اليْهُودْ مَا يْشِدُّونِيشْ. مَمْلِكْتِي مُوشْ مِالعَالَمْ هَاذَا.»

³⁷قَالُّو بِيلاَطُسْ: «إِمَّالاَ، إِنْتِ مَلِكْ؟» جَاوْبُو يَسُوعْ: «إِنْتِ قُلْتْ الِّي آنَا مَلِكْ. آنَا تُولِدْتْ وْجِيتْ لِلعَالَمْ بَاشْ نِشْهِدْ لِلحَقْ. الِّي هُوَ مِالحَقْ يِسْمَعْ كْلاَمِي.»

³⁸يَاخِي قَالُّو بِيلاَطُسْ: «شْنُوَّة هُوَ الحَقْ؟» قَالْ الشَّيْء هَاذَا وِخْرَجْ مَرَّة أُخْرَى لِليْهُودْ وْقَالِلْهُمْ: «مَا لْقِيتِشْ عْلِيهْ حَتَّى سْبَبْ بَاشْ نُحْكُمْ عْلِيهْ.

³⁹فِي العَادَة نْسَيّْبِلْكُمْ وَاحِدْ مِالمْرَابِيطْ فِي عِيدْ الفِصْحْ. تْحِبُّوشْ نْسَيّْبِلْكُمْ مَلِكْ اليْهُودْ؟»

⁴⁰يَاخِي صَاحُوا: «مَا تْسَيّْبِلْنَاشْ الرَّاجِلْ هَاذَا، سيّْبِلْنَا بَارَابَاسْ.» وْبَارَابَاسْ هَاذَا كَانْ مُجْرِمْ.