Read Tunisian Arabic New Testament يُوحَنَّا 19 Bible Online

يُوحَنَّا 19 - Tunisian Arabic New Testament bible

يُوحَنَّا 19

¹يَاخِي أْمَرْ بِيلاَطُسْ باش يْهِزُّوا يَسُوعْ وْيَضْرْبُوهْ بِالسُّوطْ.

²وْعَمْلُولُو الجُنُودْ تَاجْ مِالشُّوكْ وْحَطُّوهُولُو فُوقْ رَاسُو، وْلَبّْسُوهْ لِبْسَة حَمْرَا،

³وِبْدَاوْا يُقْرْبُولُو وْيَضْرْبُوا فِيهْ بِالكَفْ وِيْقُولُولُو: «يَحْيَى مَلِكْ اليْهُودْ!»

⁴وِخْرَجْ بِيلاَطُسْ مَرَّة أُخْرَى لِلنَّاسْ وْقَالِلْهُمْ: «شُوفُوا، بَاشْ نْخَرِّجْهُولْكُمْ البَرَّا بَاشْ نْوَرِّيكُمْ الِّي آنَا مَا لْقِيتِشْ عْلِيهْ حَتَّى سْبَبْ بَاشْ نُحْكُمْ بِيهْ عْلِيهْ.»

⁵خْرَجْ يَسُوعْ لاَبِسْ الجِّبَّة الحَمْرَا وْتَاجْ الشُّوكْ فُوقْ رَاسُو، قَالِلْهُمْ بِيلاَطُسْ: «آهُوَ الرَّاجِلْ!»

⁶وْوَقْتِلِّي شَافُوهْ رُؤَسَاءْ الكُهَّانْ وِالحُرَّاسْ مْتَاعْ الهَيْكِلْ صَاحُوا: «اُصْلْبُو! اُصْلْبُو!» قَالِلْهُمْ بِيلاَطُسْ: «هِزُّوهْ إِنْتُومَا وْأُصْلْبُوهْ، آنَا مَا لْقِيتِشْ عْلِيهْ حَتَّى سْبَبْ بَاشْ نُحْكُمْ عْلِيهْ بِالمُوتْ.»

⁷جَاوْبُوهْ اليْهُودْ: «أَحْنَا عِنْدْنَا شَرِيعَةْ، وِالشَّرِيعَة تْقُولْ الِّي هُوَ لاَزِمْ يْمُوتْ عْلَى خَاطْرُو قَالْ عْلَى رُوحُو الِّي هُوَ إِبْنْ اللهْ.»

⁸وَقْتِلِّي سْمَعْ بِيلاَطُسْ كْلاَمْهُمْ زَادْ خَافْ أَكْثِرْ.

⁹وْعَاوِدْ دْخَلْ لِلقْصَرْ وْقَالْ لْيَسُوعْ: «إِنْتِ مْنِينْ؟» لَكِنْ يَسُوعْ مَا جَاوْبُوشْ بِالكُلْ.

¹⁰قَالُّو بِيلاَطُسْ: «مَا تْحِبِّشْ تْكَلِّمْنِي؟ يَاخِي مَا تَعْرِفْشْ الِّي آنَا عِنْدِي السُّلْطَة بَاشْ نْسَيّْبِكْ، وْعِنْدِي السُّلْطَة بَاشْ نُصْلْبِكْ؟»

¹¹جَاوْبُو يَسُوعْ: «مَا كُنْتِشْ بَاشْ تْكُونْ عِنْدِكْ سُلْطَة عْلِيَّ، كَانْ مَا تِعْطَاتْلِكْشْ مِالسْمَاءْ. آمَا الِّي جَابْنِي لِيكْ رَاهُو ذَنْبُو أَعْظِمْ.»

¹²وْحَاوِلْ بِيلاَطُسْ بَاشْ يْسَيّْبُو، آمَا اليْهُودْ صَاحُوا: «كَانْ تْسَيّْبُو، رَاكْ مَاكِشْ مْعَ القَيْصِرْ، رَاهُو الِّي يِدَّعِي انُّو هُوَ مَلِكْ هُوَ عْدُو القَيْصَرْ.»

¹³وَقْتِلِّي سْمَعْ بِيلاَطُسْ الكْلاَمْ هَاذَا خَرِّجْ يَسُوعْ البَرَّا وِقْعَدْ فِي المَحْكْمَة فِي بْلاَصَة اسْمْهَا «البْلاَطْ»، وْبِالعِبْريَّة اسْمْهَا «جَبَّاثَا.»

¹⁴وِالنْهَارْ هَاذَاكَا كَانْ النْهَارْ الِّي يْحَضّْرُوا فِيهْ لِلفِصْحْ مْعَ السِّتَّة[٤]. وْقَالْ لِليْهُودْ: «هَا هُوَ المَلِكْ مْتَاعْكُمْ!»

¹⁵يَاخِي صَاحُوا: «أُقْتْلُو! أُقْتْلُو! اُصْلْبُو!» قَالِلْهُمْ بِيلاَطُسْ: «يَاخِي نُصْلُبْ المَلِكْ مْتَاعْكُمْ؟» جَاوْبُوهْ رُؤَسَاءْ الكُهَّانْ: «مَا عِنْدْنَاشْ مَلِكْ غِيرْ القَيْصَرْ!»

¹⁶يَاخِي سيِّبْهُولْهُمْ بَاشْ يِتْصْلَبْ. وْهَزُّوا يَسُوعْ.

¹⁷وِخْرَجْ هَازْ الصَّلِيبْ مْتَاعُو وْمَاشِي لْبُقْعَة تِتْسَمَّى بِالعِبْرِيَّة الجُلْجْثَة، الِّي مَعْنَاهَا بُقْعِةْ الجُمْجْمَة.

¹⁸وْصَلْبُوهْ فِي البْلاَصَة هَاذِيكَا وْصَلْبُوا مْعَاهْ زُوزْ رْجَالْ، وَاحِدْ عْلَى يْمِينُو وْوَاحِدْ عْلَى يْسَارُو وْيَسُوعْ فِي الوُسْطْ.

¹⁹وْعَلِّقْ بِيلاَطُسْ بْلاَكَة عْلَى الصَّلِيبْ مَكْتُوبْ عْلِيهَا: «يَسُوعْ النَّاصْرِي مَلِكْ اليْهُودْ.»

²⁰بَرْشَة يْهُودْ قْرَاوْ البْلاَكَة، عْلَى خَاطِرْ البْلاَصَة الِّي تِصْلَبْ فِيهَا يَسُوعْ كَانِتْ قْرِيبَة مِالمْدِينَة. وِالكْتِيبَة كَانِتْ بِاللُّغَة العِبْرِيَّة وِاللاَّتِينِيَّة وِاليُونَانِيَّة.

²¹يَاخِي قَالُوا رُؤَسَاءْ كُهَّانْ اليْهُودْ لْبِيلاَطُسْ: «مَا تِكْتِبْشْ "مَلِكْ اليْهُودْ" آمَا إِكْتِبْ "الرَّاجِلْ هَاذَا قَالْ: آنَا مَلِكْ اليْهُودْ!"»

²²جَاوِبْهُمْ بِيلاَطُسْ: «الِّي كْتِبْتُو، كْتِبْتُو.»

²³وْبَعْدْ مَا صَلْبُوا الجُنُودْ يَسُوعْ خذُولُو لِبْسْتُو وْقَسْمُوهَا عْلَى أَرْبْعَة طْرُوفْ، كُلْ جُنْدِي خْذَا طَرْفْ. وِخْذَاوْ جِبّْتُو زَادَا وْكَانِتْ قَطْعَة وَحْدَة مَنْسُوجَة بْكُلْهَا وْمَا هِيشْ مْخَيّْطَة.

²⁴قَالُوا الجُنُودْ لِبْعَضْهُمْ: «مُوشْ لاَزِمْ نْقَطّْعُوهَا، خَلِّينَا نِتْخَاطْرُوا عْلِيهَا، وِنْشُوفُوا شْكُونْ بَاشْ يِرْبِحْهَا.» وِوْقَعْ الشَّيْء هَاذَاكَا بَاشْ يْتِمْ الِّي تْقَالْ فِي الكْتَابْ المُقَدَّسْ: قِسْمُوا لِبْسْتِي مَا بِينَاتْهُمْ، وِعْلَى جِبّْتِي تْخَاطْرُوا. وْهَاذَا هُوَ الشَّيْء الِّي عَمْلُوهْ الجُنُودْ.

²⁵وْفِي البْلاَصَة هَاذِيكَا، بِحْذَا صَلِيبْ يَسُوعْ، وُقْفِتْ أُمُّو مَرْيَمْ، وْخَالْتُو وْمَرْيَمْ مَرْتْ كِلُوبَا، وْمَرْيِمْ المَجْدَلِيَّة.

²⁶وَقْتِلِّي يَسُوعْ شَافْ أُمُّو وِالتِّلْمِيذْ الِّي يْحِبُّو وَاقِفْ بِحْذَاهَا، قَالْ لْأُمُّو: «يَا مْرَا، هَاذَا وِلْدِكْ.»

²⁷وْقَالْ لِلتِّلْمِيذْ: «هَاذِي أُمِّكْ!» وْمِالوَقْتْ هَاذَاكَا هَزّْهَا التِّلْمِيذْ لْدَارُو.

²⁸وْشَافْ يَسُوعْ الِّي كُلْ شَيْء كْمِلْ، قَالْ: «آنَا عَطْشَانْ» بَاشْ يْتِمْ الِّي تْقَالْ فِي الكْتَابْ.

²⁹وْكَانْ ثَمَّة سْطَلْ مَلْيَانْ بِالخَلْ غَطّْسُوا فِيهْ شِيفُونَة وْحَطُّوهَا فِي عُودْ مْتَاعْ رِيحَانْ وْطَلّْعُوهَا لْفُمُّو.

³⁰وْوَقْتِلِّي ذَاقْ يَسُوعْ الخَلْ قَالْ: «كُلْ شَيْء كْمِلْ!» وِهْبَطْ رَاسُو وْخَلَّى رُوحُو تُطْلُعْ.

³¹وِالنْهَارْ هَاذَاكَا كَانْ يُومْ التَّحْضِيرْ لْعِيدْ الفِصْحْ، وَلاَّوْ اليْهُودْ طَلْبُوا مِنْ بِيلاَطُسْ إِنُّو يُأْمُرْ الجُنُودْ مْتَاعُو بَاشْ يْكَسّْرُوا سَاقِينْ المَصْلُوبِينْ وِيْهَبّْطُوهُمْ مِنْ فُوقْ الصَّلِيبْ بَاشْ مَا تْبَاتِشْ لِنْهَارْ السِّبْتْ، بِالأَخَصْ الِّي نْهَارْ السِّبْتْ هَاذَاكَا كَانْ نْهَارْ عْظِيمْ.

³²إِمَّالاَ جَاوْ الجُنُودْ وْكَسّْرُوا سَاقِينْ الزُّوزْ رْجَالْ الِّي تْصَلْبُوا مْعَ يَسُوعْ.

³³وْوَقْتِلِّي وُصْلُوا لْيَسُوعْ لْقَاوْهْ مَاتْ، وَلاَّوْ مَا كَسّْرُوشْ لِيهْ سَاقِيهْ.

³⁴وَاحِدْ مِالجُنُودْ ضَرْبُو بْرُمْحْ فِي جَنْبُو، وْبِالوَقْتْ خْرَجْ مِنُّو دَمْ وْمَاء.

³⁵وِلِّي شَافْ الشَّيْء هَاذَا يِشْهِدْ بِيهْ وشْهَادْتُو صْحِيحَة، وْيَعْرِفْ رُوحُو الِّي هُوَ يْقُولْ فِي الحَقْ بَاشْ إِنْتُومَا زَادَا تِمّْنُوا.

³⁶وِالشَّيْء هَاذَا صَارْ بَاشْ يْتِمْ الِّي جَا فِي الكْتَابْ المُقَدَّسْ: «مَا يِتْكَسِّرْلُو حَتَّى عْظَمْ.»

³⁷وْمَكْتُوبْ فِي آيَة أُخْرَى: «بَاشْ يُخْزْرُوا لِلِّي ضَرْبُوهْ بْرُمْحْ.»

³⁸بَعْدْ مَا وْقَعْ الشَّيْء هَاذَا جَا يُوسُفْ الِّي هُوَ مِنْ مَنْطِقْةْ الرَّامَة، وِطْلَبْ مِنْ بِيلاَطُسْ بَاشْ يْخَلِّيهْ يْهِزْ الجُثَّة مْتَاعْ يَسُوعْ، وْيُوسُفْ هَاذَا كَانْ تِلْمِيذْ مْتَاعْ يَسُوعْ آمَا فِي السِّرْ عْلَى خَاطْرُو كَانْ خَايِفْ مِنْ اليْهُودْ، يَاخِي سْمَحْلُو بِيلاَطُسْ. وْجَا وْهَزْ الجُثَّة مْتَاعْ يَسُوعْ.

³⁹وْجَا زَادَا نِيقُودِيمُوسْ، الِّي قْبَلْ مْشَى لْيَسُوعْ فِي اللِّيلْ، وْجَابْ مْعَاهْ قْرَابِةْ أَرْبْعَة وِثْلاَثِينْ كِيلُو مْتَاعْ مُرْ وْعُودْ مْخَلّْطِينْ.

⁴⁰وْهُومَا لِثْنِينْ هَزُّوا جُثِّةْ يَسُوعْ وْصَبُّوا عْلِيهْ القْوَارِصْ وْلَفُّوهْ فِي كْفَنْ، كِيفْ مَا كَانِتْ عْوَايِدْ اليْهُودْ فِي الدْفِينَة.

⁴¹وْكَانِتْ ثَمَّة سَانْيَة فِي البْلاَصَة الِّي تِصْلَبْ فِيهَا يَسُوعْ، وِالسَّانْيَة هَاذِيكَا فِيهَا قْبَرْ مَا تِدْفِنْشْ فِيهْ حَتَّى حَدْ قْبَلْ.

⁴²وْدِفْنُوا يَسُوعْ فِي القْبَرْ هَاذَاكَا عْلَى خَاطْرُو قْرِيبْ وِالنْهَارْ هَاذَاكَا كَانْ يُومْ التَّحْضِيرْ لِلسِّبْتْ عِنْدْ اليْهُودْ.