Read Tunisian Arabic New Testament يُوحَنَّا 2 Bible Online

يُوحَنَّا 2 - Tunisian Arabic New Testament bible

يُوحَنَّا 2

¹وْفِي النْهَارْ الثَّالِثْ كَانْ ثَمَّة عِرْسْ فِي مْدِينِةْ قَانَا الِّي فِي مَنْطِقْةْ الجَلِيلْ، وْأُمْ يَسُوعْ كَانِتْ غَادِي.

²وْيَسُوعْ وِتْلاَمِذْتُو زَادَا كَانُوا مِسْتَدْعِينْ.

³وْوَقْتِلِّي وْفَى الشْرَابْ، قَالِتْلُو أُمُّو: «رَاهُو مَا عَادِشْ عِنْدْهُمْ شْرَابْ.»

⁴قَالِلْهَا يَسُوعْ: «آشْ بِينِي وْبِينِكْ يَا مْرَا؟ رَاهُو وَقْتِي مَازَالْ مَا جَاشْ.»

⁵قَالِتْ أُمُّو لِلخُدَّامْ: «أَعْمْلُوا أَيْ حَاجَة يْقُلْكُمْ عْلِيهَا.»

⁶وْكَانِتْ ثَمَّة سِتَّة قْلاَلْ مْتَاعْ مَاء، يِطَّهْرُوا بِيهُمْ اليْهُودْ كِيفْ عْوَايِدْهُمْ، كُلْ وَحْدَة مِنْهُمْ تْهِزْ مَا بِينْ ثْمَانِينْ وِمْيَة وْعِشْرِينْ إِيتْرَا.

⁷قَالِلْهُمْ يَسُوعْ: «عَبِّيوْ القْلاَلْ.» وْهُومَا عَبَّاوْهُمْ لِلفُمْ.

⁸وْقَالِلْهُمْ: «تَوْ أُغْرْفُوا مِنْهَا وْأَعْطِيوْا لِلرَّاجِلْ المَسْؤُولْ عْلَى السَّهْرِيَّة.» وَلاَّوْ هَزُّولُو.

⁹وْوَقْتِلِّي ذَاقْ المَسْؤُولْ عْلَى السَّهْرِيَّة المَاء الِّي وَلَّى شْرَابْ، وْمَا كَانِشْ يَعْرِفْ عْلِيهْ مْنِينْ، آمَا الخُدَّامْ الِّي جَابُوهُولُو كَانُوا يَعْرْفُوا، وَلَّى نَادَى العْرِيسْ.

¹⁰وْقَالُّو: «النَّاسْ الكُلْ يَعْطِيوْا الشْرَابْ البَاهِي فِي الأُوِّلْ، وِمْبَاعِدْ مَا الضْيُوفْ يِسْكْرُوا يَعْطِيوْهُمْ شْرَابْ عَادِي. وْإِنْتِ خَلِّيتْ الشْرَابْ البَاهِي لْتَوَّا!»

¹¹وْكَانِتْ هَاذِي أَوِّلْ مُعْجْزَة مِالمُعْجْزَاتْ الِّي عْمَلْهَا يَسُوعْ فِي مْدِينِةْ قَانَا الِّي فِي الجَلِيلْ، وْظَهِّرْ فِيهَا مَجْدُو، وِامّْنُوا بِيهْ تْلاَمِذْتُو.

¹²وْبَعْدْهَا هْبَطْ لْكَفْرْنَاحُومْ هُوَ وْأُمُّو وْإِخْوْتُو وِتْلاَمِذْتُو، وِبْقَاوْ لْغَادِي أَيَّامَاتْ.

¹³وْكِقْرُبْ عِيدْ الفِصْحْ مْتَاعْ اليْهُودْ، طْلَعْ يَسُوعْ لْأُورْشَلِيمْ.

¹⁴وِلْقَى فِي الهَيْكِلْ النَّاسْ الِّي يْبِيعُوا فِي البْقَرْ وِالغْنَمْ وِالحْمَامْ، وِلِّي يْصَرّْفُوا فِي الفْلُوسْ قَاعْدِينْ،

¹⁵وِعْمَلْ سُوطْ مِالحْبَالْ وْطَرِّدْ النَّاسْ الكُلْ مِالهَيْكِلْ وْخَرِّجْ الغْنَمْ وِالبْقَرْ، وِقْلِبْ الطْوَاوِلْ وْفَرِّتْ الفْلُوسْ مْتَاعْ النَّاسْ الِّي يِخْدْمُوا فِي الصَّرْفْ،

¹⁶وْقَالْ لْبَيَّاعِةْ الحْمَامْ: «هِزُّوا عْلِيَّ الحْمَامْ مْتَاعْكُمْ مِنْ هْنَا، مَا تْرُدُّوشْ دَارْ بَابَا سُوقْ مْتَاعْ بِيعْ وِشْرَى.»

¹⁷تْذَكّْرُوا تْلاَمِذْتُو الِّي مُوجُودْ فِي الكْتَابْ المُقَدَّسْ: الغِيرَة عْلَى بِيتِكْ كْلاَتْنِي.

¹⁸جَاوْبُوهْ اليْهُودْ وْقَالُولُو: «أَعْمْلِلْنَا مُعْجْزَة تْوَرِّي الِّي إِنْتِ عِنْدِكْ الحَقْ بَاشْ تَعْمِلْ الشَّيْء هَاذَا.»

¹⁹جَاوِبْهُمْ يَسُوعْ وْقَالِلْهُمْ: «طَيّْحُوا الهَيْكِلْ هَاذَا، وْآنَا نْعَاوِدْ نِبْنِيهْ فِي ثْلاَثَة أَيَّامْ.»

²⁰قَالُولُو اليْهُودْ: «الهَيْكِلْ هَاذَا تِبْنَى فِي سِتَّة وْأَرْبْعِينْ سْنَة، وْإِنْتِ بَاشْ تِبْنِيهْ فِي ثْلاَثَة أَيَّامْ؟»

²¹آمَا هُوَ رَاهُو كَانْ يُقْصُدْ فِي الهَيْكِلْ مْتَاعْ بَدْنُو.

²²هَاذَاكَا عْلاَشْ وَقْتِلِّي قَامْ مِنْ المُوتْ، تْذَكّْرُوا تْلاَمِذْتُو الِّي هُوَ قَالْ الشَّيْء هَاذَا، وِامّْنُوا بِالكْتَابْ المُقَدَّسْ وْبِالكْلاَمْ الِّي قَالُو يَسُوعْ.

²³وَقْتِلِّي كَانْ فِي أُورْشَلِيمْ فِي وَقْتْ عِيدْ الفِصْحْ، امّْنُوا بِيهْ بَرْشَة نَاسْ كِشَافُوا المُعْجْزَاتْ الِّي عْمَلْهُمْ.

²⁴آمَا هُوَ مَا امِّنْهُمْشْ عْلَى حْيَاتُو، عْلَى خَاطْرُو كَانْ يَعْرِفْ النَّاسْ الكُلْ،

²⁵وِعْلَى خَاطْرُو مَا كَانِشْ مِحْتَاجْ لِشْكُونْ يَحْكِيلُو عْلَى النَّاسْ، هُوَ بِيدُو يَعْرِفْ شْنُوَّة فِي قَلْبْ كُلْ إِنْسَانْ.