Read Tunisian Arabic New Testament يُوحَنَّا 20 Bible Online

يُوحَنَّا 20 - Tunisian Arabic New Testament bible

يُوحَنَّا 20

¹نْهَارْ الأَحَدْ الصْبَاحْ بِكْرِي جَاتْ مَرْيَمْ المَجْدَلِيَّة لِلقْبَرْ، وِالدِّنْيَا مَازَالِتْ ظَلْمَة يَاخِي شَافِتْ الحَجْرَة الِّي مْسَكّْرِينْ بِيهَا القْبَرْ مْنَحّْيَة.

²وْجَاتْ تِجْرِي لْسِمْعَانْ بُطْرُسْ وِالتِّلْمِيذْ الِّي يَسُوعْ يْحِبُّو وْقَالْتِلْهُمْ: «هَزُّوا الرَّبْ مِالقْبَرْ، وْمَا نَعْرْفُوشْ وِينْ حَطُّوهْ.»

³وِمْشَى بُطْرُسْ وِالتِّلْمِيذْ الآخَرْ لِلقْبَرْ،

⁴وْلِثْنِينْ كَانُوا يِجْرِيوْ. لَكِنْ التِّلْمِيذْ الآخَرْ سْبِقْ بُطْرُسْ وِوْصُلْ قَبْلُو لِلقْبَرْ.

⁵وْطَلْ شَافْ الكْفَنْ طَايِحْ فُوقْ الأَرْضْ، آمَا مَا دْخَلْشْ لْدَاخِلْ.

⁶وِمْبَاعِدْ وْصُلْ سِمْعَانْ بُطْرُسْ، وِدْخَلْ لِلقْبَرْ. وْشَافْ الكْفَنْ طَايِحْ فُوقْ الأَرْضْ،

⁷وِالمِنْدِيلَة الِّي كَانِتْ مَحْطُوطَة عْلَى رَاسْ يَسُوعْ لْقَاهَا مَلْفُوفَة وَحَّدْهَا، فِي بْلاَصَة بْعِيدَة عْلَى الكْفَنْ.

⁸وِمْبَاعِدْ دْخَلْ التِّلْمِيذْ الآخَرْ الِّي وْصُلْ لِلقْبَرْ هُوَ الأُوِّلْ، وْشَافْ وْإِمِّنْ،

⁹(وْلِلوَقْتْ هَاذَاكَا التْلاَمْذَة مَازَالُوا مَا هُمْشْ فَاهْمِينْ الِّي قَصْدُو الكْتَابْ المُقَدَّسْ وَقْتِلِّي قَالْ الِّي يَسُوعْ يِلْزِمْ يْقُومْ مِنْ بِينْ المُوتَى.)

¹⁰وِمْبَاعِدْ رَوّْحُوا التْلاَمْذَة لِدْيَارْهُمْ.

¹¹آمَا مَرْيَمْ المَجْدَلِيَّة، وُقْفِتْ بِحْذَا القْبَرْ تِبْكِي. وِاتَّكَّاتْ عْلَى القْبَرْ وْهِيَ تِبْكِي،

¹²يَاخِي شَافِتْ زُوزْ مْلاَيْكَة لاَبْسِينْ بِالأَبْيِضْ وْقَاعْدِينْ فِي البْلاَصَة الِّي كَانِتْ مَحْطُوطَة فِيهَا الجُثَّة مْتَاعْ يَسُوعْ وَاحِدْ عِنْدْ رَاسُو وْوَاحِدْ عِنْدْ سَاقِيهْ.

¹³قَالُولْهَا: «يَا مْرَا، عْلاَشْ تِبْكِي؟» جَاوْبِتْ: «هَزُّوا سِيدِي وْمَا نَعْرِفْشْ وِينْ حَطُّوهْ!»

¹⁴قَالِتْ الشَّيْء هَاذَا وْدَارِتْ التَالِي، شَافِتْ يَسُوعْ وَاقِفْ، آمَا مَا عَرْفِتْهُوشْ.

¹⁵قَالِلْهَا يَسُوعْ: «يَا مْرَا، عْلاَشْ تِبْكِي؟ عْلَى شْكُونْ تْلَوّْجِي؟» وِمْشَى فِي بَالْهَا الِّي هُوَ العَسَّاسْ مْتَاعْ السَّانْيَة، قَالِتْلُو: «كَانِكْ إِنْتِ هَزِّيتُو إِمَّالاَ قُلِّي وِينْ حَطِّيتُو بَاشْ نِمْشِي نْجِيبُو.»

¹⁶نَادَاهَا يَسُوعْ: «يَا مَرْيَمْ.» تْلَفّْتِتْلُو وْعَيّْطِتْ بِالعِبْرِيَّة: «رَبُّونِي!» (الِّي مَعْنَاهَا يَا مُعَلِّمْ)

¹⁷قَالِلْهَا: «مَا تْمِسّْنِيشْ، عْلَى خَاطِرْنِي مَازِلْتْ مَا طْلَعْتِشْ لِلآبْ، آمَا إِمْشِي لْإِخْوْتِي وْقُولِلْهُمْ رَانِي بَاشْ نَطْلَعْ لْبَابَا وْبُوكُمْ، لإِلاَهِي وْالاَهْكُمْ.»

¹⁸رَجْعِتْ مَرْيَمْ المَجْدَلِيَّة وْبَشّْرِتْ التْلاَمْذَة وْقَالْتِلْهُمْ الِّي هِيَ شَافِتْ الرَّبْ وِحْكَاتِلْهُمْ عَلِّي قَالْهُولْهَا الكُلْ.

¹⁹وْفِي نْهَارْ الأَحَدْ هَاذَاكَا فِي العْشِيَّة، تْلَمُّوا التْلاَمْذَة فِي دَارْ وْسَكّْرُوا البِيبَانْ بِالمْفَاتِحْ عْلَى خَاطِرْهُمْ كَانُوا خَايْفِينْ مِاليْهُودْ. وْإِذَا بِيهْ يَسُوعْ جَا وِوْقُفْ فِي وُسْطْهُمْ وْقَالِلْهُمْ: «السَّلاَمْ عْلِيكُمْ.»

²⁰وْكِقَالِلْهُمْ الشَّيْء هَاذَا وَرَّاهُمْ يْدِيهْ وْجَنْبُو، وْفَرْحُوا التْلاَمْذَة وَقْتِلِّي شَافُوا الرَّبْ.

²¹قَالِلْهُمْ يَسُوعْ مَرَّة أُخْرَى: «سَلاَمْ لِيكُمْ! كِيفْ مَا الآبْ بْعَثْنِي، آنَا زَادَا نَبْعِثْكُمْ.»

²²قَالْ الشَّيْء هَاذَا وِنْفَخْ عْلِيهُمْ وْقَالِلْهُمْ: «خُوذُوا الرُّوحْ القُدُسْ.

²³الِّي تِغْفْرُولْهُمْ إِنْتُومَا ذْنُوبْهُمْ تِتْغْفَرِّلْهُمْ وِلِّي مَا تِغْفْرُولْهُمْشْ ذْنُوبْهُمْ مَا يِتْغْفَرِّلْهُمْشْ.»

²⁴وْتُومَا، الِّي هُوَ وَاحِدْ مِالتْلاَمْذَة الأَثْنَاشْ وِلِّي كَانْ يْعَيّْطُولُو التُّومِي، مَا كَانِشْ مْعَاهُمْ وَقْتِلِّي جَا يَسُوعْ.

²⁵قَالُولُو التْلاَمْذَة الأُخْرِينْ: «أَحْنَا شُفْنَا الرَّبْ!» قَالِلْهُمْ: «آنَا مَا نْصَدِّقْ كَانْ وَقْتِلِّي نْشُوفْ جُرِّتْ المْسَامِرْ فِي يْدِيهْ، وِنْحُطْ صُبْعِي فِي بْلاَصِةْ المْسَامِرْ وِنْحُطْ يِدِّي فِي جَنْبُو.»

²⁶وْبَعْدْ ثْمَنْيَة أَيَّامْ تْلَمُّوا التْلاَمْذَة مَرَّة أُخْرَى فِي الدَّارْ، وْتُومَا كَانْ مْعَاهُمْ، وْكَانِتْ البِيبَانْ مْسَكّْرَة يَاخِي جَا يَسُوعْ وِوْقُفْ فِي وُسْطْهُمْ وْقَالْ: «سَلاَمْ لِيكُمْ»

²⁷وِمْبَاعِدْ قَالْ لْتُومَا: «هَاتْ صُبْعِكْ لِهْنَا وْشُوفْ يْدَيَّا، وْهَاتْ يِدِّكْ وْحُطّْهَا فِي جَنْبِي. مَا عَادِشْ تْشِكْ، آمَا إِمِّنْ!»

²⁸جَاوِبْ تُومَا وْقَالُّو: «يَا رَبِّي وْيَا إِلاَهِي!»

²⁹قَالُّو يَسُوعْ: «يَاخِي امِّنْتْ عْلَى خَاطْرِكْ رِيتْنِي. صَحَّة لِيهُمْ الِّي يِمّْنُوا مِنْ غِيرْ مَا يْشُوفُوا.»

³⁰وِعْمَلْ يَسُوعْ بَرْشَة مُعْجْزَاتْ أُخْرَى قُدَّامْ تْلاَمِذْتُو مَا تْكِتْبُوشْ فِي الكْتَابْ هَاذَا.

³¹آمَا الحَاجَاتْ الِّي تْكِتْبِتْ هْنَا، رَاهِي بَاشْ تِمّْنُوا الِّي يَسُوعْ هُوَ المَسِيحْ إِبْنْ اللهْ وْكِتِمّْنُوا بِيهْ تْكُونْ عِنْدْكُمْ حَيَاةْ فِي إِسْمُو.