Read Tunisian Arabic New Testament يُوحَنَّا 21 Bible Online

يُوحَنَّا 21 - Tunisian Arabic New Testament bible

يُوحَنَّا 21

¹وْزَادْ يَسُوعْ ظَهِّرْ رُوحُو مَرَّة أُخْرَى لِتْلاَمِذْتُو بِحْذَا البُحَيْرَة مْتَاعْ طَبَرِيَّة وِظْهَرِّلْهُمْ هَكَّا.

²سِمْعَانْ بُطْرُسْ، وْتُومَا الِّي يْعَيّْطُولُو التُّومِي، وْنَثَنَائِيلْ الِّي مِالمَنْطْقَة مْتَاعْ قَانَا الجَلِيلْ، وِوْلاَدْ زَبَدِي، وْزُوزْ تْلاَمْذَةْ أُخْرِينْ مِنْ تْلاَمِذْةْ يَسُوعْ الكُلْهُمْ تْلَمُّوا.

³قَالِلْهُمْ سِمْعَانْ بُطْرُسْ: «آنَا مَاشِي بَاشْ نِصْطَادْ.» قَالُولُو: «أَحْنَا زَادَا نِمْشِيوْا مْعَاكْ.» خَرْجُوا وْطَلْعُوا فِي الفْلُوكَة، آمَا اللِّيلَة هَاذِيكَا مَا صْطَادُوا حَتَّى شَيْء.

⁴وَقْتِلِّي طْلَعْ النْهَارْ جَا يَسُوعْ لِلشَّطْ، آمَا التْلاَمْذَة مَا عَرْفُوهِشْ.

⁵قَالِلْهُمْ: «يَا وْلاَدِي، يَاخِي مَا صْطَدْتُوشْ حُوتْ» جَاوْبُوهْ: «لاَ.»

⁶قَالِلْهُمْ: «ارْمِيوْ الشْبَاكْ عْلَى يْمِينْ الفْلُوكَة وْتَوْ تَلْقَاوْ الحُوتْ.» رْمَاوْ الشْبَاكْ وْمَا نَجّْمُوشْ يْخَرّْجُوهَا مِنْ كَثْرِةْ مَاهِي مْعُبّْيَة بِالحُوتْ.

⁷قَالْ التِّلْمِيذْ الِّي يَسُوعْ يْحِبُّو لْبُطْرُسْ: «هَاذَا هُوَ الرَّبْ!» كِسْمَعْ سِمْعَانْ بُطْرُسْ كِلْمِةْ: «هَاذَا هُوَ الرَّبْ»، لْبِسْ دَبْشُو عْلَى خَاطْرُو كَانْ عِرْيَانْ، وِرْمَى رُوحُو فِي المَاء.

⁸وْجَاوْ التْلاَمْذَة الأُخْرِينْ فِي الفْلُوكَة، يْكَرْكْرُوا فِي الشْبَاكْ الِّي مْعُبّْيَة بِالحُوتْ، وْكَانُوا بْعَادْ عْلَى الشَّطْ مِيتِينْ مِيتْرُو.

⁹وْوَقْتِلِّي خَرْجُوا لِلشَّطْ شَافُو خُبْزْ وْحُوتْ قَاعِدْ يْطِيبْ عْلَى النَّارْ.

¹⁰قَالِلْهُمْ يَسُوعْ: «جِيبُوا مِالحُوتْ الِّي شَدِّيتُوهْ تَوْ.»

¹¹طْلَعْ سِمْعَانْ بُطْرُسْ فُوقْ الفْلُوكَة وِجْبِدْ الشْبَاكْ المَلْيَانْ بِالحُوتْ الكْبِيرْ لِلشَّطْ وْكَانِتْ فِيهَا مْيَة وِثْلاَثَة وْخَمْسِينْ حُوتَة، وْرَغْمِلِّي الحُوتْ كَانْ بَرْشَة الشْبَاكْ مَا تْقَطِّعْشْ.

¹²قَالِلْهُمْ يَسُوعْ: «إِيجَاوْ كُولُوا!» وْحَتَّى وَاحِدْ مِالتْلاَمْذَة مَا تْجَرِّأْ بَاشْ يِسْأْلُو شْكُونْ إِنْتِ، وْهُومَا عَرْفُوا الِّي هُوَ الرَّبْ.

¹³وْقَدِّمْ يَسُوعْ، وِخْذَا الخُبْزْ وِعْطَاهُمْ، وْزَادْ مَدِّلْهُمْ الحُوتْ.

¹⁴هَاذِي كَانِتْ المَرَّة الثَّالْثَة الِّي ظْهُرْ فِيهَا يَسُوعْ لِتْلاَمِذْتُو بَعْدْ مَا قَامْ مِنْ بِينْ المُوتَى.

¹⁵وْبَعْدْ مَا كْلاَوْ، قَالْ يَسُوعْ لْسِمْعَانْ بُطْرُسْ: «يَا سِمْعَانْ وِلْدْ يُونَا، يَاخِي تْحِبّْنِي أَكْثِرْ مِلِّي يْحِبُّونِي هَاذُومَا الكُلْهُمْ؟» جَاوْبُو: «إِي نْعَمْ، يَا رَبْ. إِنْتِ تَعْرِفْ الِّي آنَا نْحِبِّكْ.» قَالُّو: «وَكِّلْ الْخِرَافْ مْتَاعِي.»

¹⁶وْقَالُّو يَسُوعْ مَرَّة أُخْرَى: «يَا سِمْعَانْ وِلْدْ يُوحَنَّا، يَاخِي تْحِبّْنِي؟» جَاوْبُو: «إِي نْعَمْ، يَا رَبْ، إِنْتِ تَعْرِفْ الِّي آنَا نْحِبِّكْ.» قَالُّو: «ارْعَ الغْنَمْ مْتَاعِي.»

¹⁷وْسِأْلُو مَرَّة ثَالْثَة: «يَا سِمْعَانْ يَا وِلْدْ يُوحَنَّا، يَاخِي تْحِبّْنِي؟» وِحْزِنْ بُطْرُسْ عْلَى خَاطِرْ يَسُوعْ سِأْلُو ثْلاَثَة مَرَّاتْ: يَاخِي تْحِبّْنِي؟ قَالُّو: «يَا رَبْ، إِنْتِ تَعْرِفْ كُلْ شَيْء، وْتَعْرِفْ الِّي آنَا نْحِبِّكْ.» قَالُّو يَسُوعْ: «وَكّلْ الغْنَمْ مْتَاعِي.

¹⁸نْقُلِّكْ الحَقْ الحَقْ وَقْتِلِّي، كُنْتْ صْغِيرْ، كُنْتْ تِتْحَزِّمْ وْتِمْشِي وِينْ تْحِبْ. وْوَقْتِلِّي تْوَلِّي شَايِبْ تْمِدْ يْدِيكْ، وْوَاحِدْ آخَرْ يْحَزّْمِكْ وِيْهِزِّكْ لِلبْلاَصَة الِّي مَا تْحِبِّشْ تِمْشِيلْهَا.»

¹⁹(بِالكْلاَمْ هَاذَا يَسُوعْ لَمِّحْ لْكِيفَاشْ بُطْرُسْ بَاشْ يْمُوتْ، وِالمِيتَة مْتَاعُو بَاشْ يْمَجِّدْ بِيهَا اللهْ.) وِمْبَاعِدْ قَالُّو: «تَبَّعْنِي!»

²⁰وِتْلَفِّتْ بُطْرُسْ وْرَاهْ، يَاخِي شَافْ التِّلْمِيذْ الِّي يَسُوعْ يْحِبُّو يِمْشِي وْرَاهُمْ، وْهُوَ الِّي اتَّكَّى عْلَى سْدِرْ يَسُوعْ وَقْتْ العْشَاء وْقَالُّو: «يَا رَبْ، شْكُونُو الِّي بَاشْ يْخُونِكْ؟»

²¹وَقْتِلِّي شَافُو قَالْ بُطْرُسْ لْيَسُوعْ: «يَا رَبْ، وْهَاذَا آشْ بَاشْ يْصِيرْلُو؟»

²²قَالُّو يَسُوعْ: «إِذَا كَانْ آنَا نْحِبْ نْخَلِّيهْ حَيْ لِلِّي نَرْجَعْ، إِنْتِ آشْ دَخّْلِكْ؟ تَبَّعْنِي إِنْتِ!»

²³بِسْبَبْ الكْلاَمْ هَاذَا طَلْعِتْ اشَاعَة بِينْ التْلاَمْذَة الِّي التِّلْمِيذْ هَاذَاكَا مُوشْ بَاشْ يْمُوتْ، رَغْمِلِّي يَسُوعْ مَا قَالِشْ لْبُطْرُسْ الِّي هُوَ مُوشْ بَاشْ يْمُوتْ، آمَا قَالُّو: «إِذَا كَانْ آنَا نْحِبْ نْخَلِّيهْ حَيْ لِلِّي نَرْجَعْ، إِنْتِ آشْ دَخّْلِكْ؟»

²⁴وِالتِّلْمِيذْ هَاذَا هُوَ الِّي يِشْهِدْ بِالحَاجَاتْ هَاذِي الكُلْ، وِكْتِبْهَا لِهْنَا. وْإِحْنَا نَعْرْفُوا الِّي شْهَادْتُو صْحِيحَة.

²⁵وْثَمَّة بَرْشَة حَاجَاتْ أُخْرِينْ عْمَلْهُمْ يَسُوعْ، نِتْصَوِّرْ كَانْ تِتْكْتِبْ بِالوَحْدَة بِالوَحْدَة، العَالَمْ الكُلُّو مَا يِكْفِيشْ بَاشْ يَرْفِعْ الكْتُبْ الِّي بَاشْ تِتْكْتِبْ فِيهَا.