Read Tunisian Arabic New Testament يُوحَنَّا 3 Bible Online

يُوحَنَّا 3 - Tunisian Arabic New Testament bible

يُوحَنَّا 3

¹آمَا كَانْ ثَمَّة وَاحِدْ مِنْ الفَرِّيسِيِّينْ إِسْمُو نِيقُودِيمُوسْ وَاحِدْ مِالشْيُوخْ مْتَاعْ اليْهُودْ.

²جَا لْيَسُوعْ فِي اللِّيلْ وْقَالُّو: «يَا مُعَلِّمْ أَحْنَا نَعْرْفُوا الِّي رَبِّي بَعْثِكْ بَاشْ تْعَلِّمْ، رَاهُو مَا يْنَجِّمْ يَعْمِلْ المُعْجْزَاتْ الِّي إِنْتِ تَعْمِلْ فِيهُمْ كَانْ الِّي اللهْ مْعَاهْ.»

³جَاوْبُو يَسُوعْ وْقَالْ: «نْقُلِّكْ الحَقْ الحَقْ: حَتَّى حَدْ مَا يْنَجِّمْ يْشُوفْ مَمْلِكْةْ اللهْ إِلاَّ إِذَا كَانْ يْعَاوِدْ يِتْوْلِدْ مِنْ فُوقْ.»

⁴قَالُّو نِيقُودِيمُوسْ: «كِيفَاشْ الوَاحِدْ يْنَجِّمْ يِتْوْلِدْ بَعْدْ مَا شَابْ؟ يَاخِي يْنَجِّمْ يُدْخُلْ لْكِرْشْ أُمُّو مَرَّة أُخْرَى وْيِتْوْلِدْ مِنْ جْدِيدْ؟»

⁵جَاوْبُو يَسُوعْ: «نْقُلِّكْ الحَقْ الحَقْ: إِذَا كَانْ وَاحِدْ مَا يِتْوْلِدْشْ مِالمَاء وْمِالرُّوحْ مَا يْنَجِّمْشْ يُدْخُلْ مَمْلِكْةْ اللهْ،

⁶المُولُودْ مِالبْدَنْ هُوَ بْدَنْ وِالمُولُودْ مِالرُّوحْ هُوَ رُوحْ.

⁷مَا تِستَغْرِبْشْ إِذَا قُتْلِكْ: يِلْزْمِكْ تِتْوْلِدْ مِنْ جْدِيدْ.

⁸الرِّيحْ تْهِبْ كِيفْ مَا تْحِبْ، وْتِسْمَعْ صُوتْهَا آمَا مَا تَعْرِفْهَاشْ مْنِينْ جَاتْ وِلاَّ وِينْ مَاشْيَة: وْهَكَّا يْكُونْ كُلْ مِنْ يِتْوْلِدْ مِنْ الرُّوحْ.»

⁹جَاوْبُو نِيقُودِيمُوسْ وْقَالُّو: «كِيفَاشْ يْجِي هَاذَا؟»

¹⁰جَاوْبُو يَسُوعْ وْقَالُّو: «إِنْتِ مُعَلِّمْ مْتَاعْ شَعْبْ إِسْرَائِيلْ وْمَا تَعْرِفْشْ الشَّيْء هَاذَا؟

¹¹نْقُلِّكْ الحَقْ الحَقْ: أَحْنَا نَحْكِيوْ عْلَى شَيْء نَعْرْفُوهْ، وْنِشْهْدُوا عْلَى شَيْء شُفْنَاهْ آمَا إِنْتُومَا مَا قْبِلْتُوشْ الشّْهَادَة مْتَاعْنَا.

¹²إِذَا كَانْكُمْ مَا تْصَدّْقُوشْ الحَاجَاتْ الِّي نَحْكِيهَالْكُمْ عْلَى الدِّنْيَا هَاذِي، إِمَّالاَ كِيفَاشْ بَاشْ تْصَدّْقُوا الحَاجَاتْ الِّي فِي السْمَاءْ؟

¹³وْرَاهُو حَتَّى حَدْ مَا طْلَعْ لِلسْمَاء كَانْ الِّي هْبَطْ مِنْ السْمَاءْ الِّي هُوَ آنَا إِبْنْ الإِنْسَانْ الِّي فِي السْمَاءْ.

¹⁴وْكِيفْ مَا رْفَعْ مُوسَى اللَّفْعَى فِي الصَّحْرَاء آنَا إِبْنْ الإِنْسَانْ زَادَا لاَزِمْنِي نِتْرْفَعْ.

¹⁵بَاشْ أَيْ وَاحِدْ يِمِّنْ بِيَّا يْنَالْ الحَيَاةْ الأَبَدِيَّة.

¹⁶اللهْ حَبْ النَّاسْ الكُلْ لْدَرْجِةْ إِنُّو عْطَى ابْنُو الوَحِيدْ بَاشْ أَيْ وَاحِدْ يِمِّنْ بِيهْ مَا يِتْهِلِكْشْ، آمَا يْنَالْ الحَيَاةْ الأَبَدِيَّة.

¹⁷رَاهُو اللهْ مَا بْعَثْشْ ابْنُو لِلنَّاسْ بَاشْ يُحْكُمْ عْلِيهُمْ، آمَا بَعْثُو بَاشْ يُخْلْصُوا بِيهْ.

¹⁸الِّي يِمِّنْ بِيهْ مَا يِدَّانِشْ. وِلِّي مَا يِمِّنْشْ بِيهْ مُدَانْ، عْلَى خَاطْرُو مَا امِّنْشْ بْإِسْمْ الإِبْنْ الوَحِيدْ مْتَاعْ اللهْ.

¹⁹وْهَاذَا هُوَ الحُكْمْ الِّي النُّورْ جَا لِلدِّنْيَا، وِالنَّاسْ حَبُّوا الظْلاَمْ وْمَا حَبُّوشْ النُّورْ عْلَى خَاطِرْهُمْ كَانُوا يَعْمْلُوا فِي الشَّرْ.

²⁰أَيْ وَاحِدْ يَعْمِلْ الشَّرْ يَكْرَهْ النُّورْ، وْمَا يُقْرُبْشْ لِلنُّورْ بَاشْ عْمَايْلُو مَا تِتْكْشِفْشْ.

²¹آمَا الِّي يَعْمِلْ الشَّيْء الصْحِيحْ، رَاهُو يُقْرُبْ لِلنُّورْ، بَاشْ يْوَرِّي الِّي أَعْمَالُو مِنْ عِنْدْ اللهْ.»

²²وِمْبَاعِدْ مْشَى يَسُوعْ وِتْلاَمِذْتُو لْأَرْضْ اليَهُودِيَّة، وِسْكِنْ غَادِي وِبْدَا يْعَمِّدْ فِي النَّاسْ.

²³وْكَانْ يُوحَنَّا زَادَا يْعَمِّدْ فِي مَنْطِقْةْ عِينْ نُونْ، الِّي هِيَ قْرِيبَة مِنْ مْدِينِةْ سَالِيمْ، عْلَى خَاطِرْ كَانْ فِيهَا بَرْشَة مَاء. وْكَانُوا النَّاسْ يْجِيوْ بَاشْ يِتْعَمّْدُوا.

²⁴وْهَاذَا الكُلْ وْقَعْ قْبَلْ مَا يُدْخُلْ يُوحَنَّا لِلحَبْسْ.

²⁵وْكَانْ ثَمَّة نِقَاشْ بِينْ تْلاَمِذْةْ يُوحَنَّا وْوَاحِدْ يْهُودِي فِيمَا يْخُصْ مَوْضُوعْ التَّطْهِيرْ.

²⁶وِالتْلاَمْذَة هَاذُومَا جَاوْ لْيُوحَنَّا وْقَالُولُو: «يَا مُعَلِّمْ. الرَّاجِلْ الِّي كَانْ مْعَاكْ فِي الشِّيرَة الأُخْرَى مْتَاعْ نَهْرْ الأُرْدُنْ وِلِّي إِنْتِ تِشْهِدْلُو رَاهُو تَوْ قَاعِدْ يْعَمِّدْ وِالنَّاسْ الكُلْ قَاعْدِينْ يِمْشِيوْلُو.»

²⁷جَاوِبْ يُوحَنَّا وْقَالْ: «مَا يْنَجِّمْ حَتَّى حَدْ يَاخُذْ حَاجَة إِلاَّ إِذَا كَانْ تِعْطَاتْلُو مِالسْمَاءْ.

²⁸وْإِنْتُومَا بِيدْكُمْ تِشْهْدُوا الِّي آنَا قُلْتْ: "مُوشْ آنَا المَسِيحْ، آمَا رَاهُو اللهْ بْعَثْنِي قَبْلُو."

²⁹العْرِيسْ، هُوَ الِّي عَنْدُو العْرُوسَة. آمَا صَاحِبْ العْرِيسْ، رَاهُو يَاقِفْ بْجَنْبُو وْيَفْرَحْ كِيِسْمَعْ صُوتُو. وْهَاذِي تَوْ الفَرْحَة الِّي مْلاَتْ قَلْبِي.

³⁰لاَزْمُو هُوَ يِكْبِرْ، وْآنَا نُصْغُرْ.»

³¹«الِّي يْجِي مِنْ الفُوقْ، رَاهُو فُوقْ النَّاسْ الكُلْ. وِلِّي هُوَ مِالأَرْضْ، يِتْكَلِّمْ بِكْلاَمْ الأَرْضْ. الِّي يْجِي مِالسْمَاءْ، رَاهُو فُوقْ النَّاسْ الكُلْ،

³²وْهُوَ يِشْهِدْ عَلِّي شَافُو وْعَلِّي سَمْعُو وْحَتَّى حَدْ مَا يِقْبِلْ شْهَادْتُو.

³³آمَا الِّي قْبِلْ شْهَادْتُو رَاهُو يْأَكِّدْ الِّي اللهْ صَادِقْ.

³⁴الِّي بَعْثُو اللهْ يِتْكَلِّمْ بِكْلاَمْ اللهْ، وِالله يَعْطِي الرُّوحْ بْلاَشْ حْسَابْ.

³⁵الآبْ يْحِبْ الإِبْنْ وْحَطْ كُلْ شَيْء بِينْ يْدِيهْ.

³⁶الِّي يِمِّنْ بِالإِبْنْ، عَنْدُو الحَيَاةْ الأَبَدِيَّة. وِلِّي مَا يِمِّنْشْ بِالإِبْنْ، عُمْرُو مَا يْشُوفْ الحَيَاةْ آمَا رَبِّي بَاشْ يَغْضِبْ عْلِيهْ لِلأَبَدْ.»