Read Tunisian Arabic New Testament يُوحَنَّا 4 Bible Online

يُوحَنَّا 4 - Tunisian Arabic New Testament bible

يُوحَنَّا 4

¹وَقْتِلِّي عْرَفْ يَسُوعْ الِّي الفَرِّيسِيِّينْ سَمْعُوا بِيهْ الِّي هُوَ يَعْمِلْ فِي تْلاَمْذَةْ وْيْعَمِّدْ فِيهُمْ أَكْثِرْ مِنْ يُوحَنَّا،

²رَغْمِلِّي مُوشْ يَسُوعْ الِّي كَانْ يْعَمِّدْ آمَا تْلاَمِذْتُو،

³وَلَّى خْرَجْ مِنْ مَنْطِقْةْ اليَهُودِيَّة وِرْجَعْ لِلجَلِيلْ.

⁴وْكَانْ لاَزْمُو يِتْعَدَّى عْلَى مَنْطِقْةْ السَّامْرَة،

⁵وْصُلْ لِمْدِينَة فِي السَّامْرَة إِسْمْهَا سُوخَارْ، قْرِيبَة مِنْ قَطْعِةْ الأَرْضْ الِّي عْطَاهَا يَعْقُوبْ لْوِلْدُو يُوسُفْ،

⁶وِقْعَدْ بِجْنَبْ بِيرْ يَعْقُوبْ مْعَ السِّتَّة[٢]، عْلَى خَاطْرُو تْعِبْ مِالمَشْيْ.

⁷جَاتْ مْرَا مِنْ السَّامْرَة بَاشْ تْعَبِّي المَاء، قَالِلْهَا يَسُوعْ: «أَعْطِينِي نُشْرُبْ.»

⁸وِتْلاَمِذْتُو مْشَاوْ لِلمْدِينَة بَاشْ يِشْرِيوْ مَاكْلَة.

⁹قَالِتْلُو المْرَا السَّامْرِيَّة: «كِيفَاشْ إِنْتِ يْهُودِي وْآنَا سَامْرِيَّة، وْتُطْلُبْ مِنِّي بَاشْ نَعْطِيكْ بَاشْ تُشْرُبْ؟» قَالِتْلُو الكْلاَمْ هَاذَا عْلَى خَاطِرْ اليْهُودْ وِالنَّاسْ الِّي مِالسَّامْرَة مَا كَانُوشْ يِتْعَامْلُو مْعَ بْعَضْهُمْ بِالكُلْ.

¹⁰جَاوِبْهَا يَسُوعْ وْقَالْ: «كَانْ جِيتْ تَعْرْفِي عْطِيِّةْ اللهْ، وِشْكُونُو هُوَ الِّي يْقُلِّكْ أَعْطِينِي نُشْرُبْ، رَاكِي إِنْتِ الِّي تُطْلِبْ مِنُّو وْتَالِي رَاهُو هُوَ الِّي يَعْطِيكْ المَاء الحَيْ.»

¹¹قَالِتْلُو المْرَا: «يَا سِيدِي، مْنِينْ جَاكْ المَاء الحَيْ وْإِنْتِ مَا عِنْدِكْشْ سْطَلْ، وِالبِيرْ غَارْقَة؟

¹²يَاخِي إِنْتِ خِيرْ مِنْ بُونَا يَعْقُوبْ الِّي عْطَانَا البِيرْ هَاذِي، وِشْرَبْ مِنْهَا هُوَ وِالبْقَرْ مْتَاعُو؟»

¹³جَاوِبْهَا يَسُوعْ وْقَالِلْهَا: «كُلْ مِنْ يُشْرُبْ مِالمَاء هَاذَا يَعْطِشْ مِنْ جْدِيدْ،

¹⁴آمَا الِّي يُشْرُبْ مِنْ المَاء الِّي نَعْطِيهْ آنَا، مُوشْ بَاشْ يَعْطِشْ لِلأَبَدْ. رَاهُو المَاء الِّي نَعْطِيهُولُو بَاشْ يْوَلِّي فِي دَاخْلُو عِينْ تِجْرِي وِتْهِزْ لِلحَيَاةْ الأَبَدِيَّة.»

¹⁵قَالِتْلُو المْرَا: «يَا سِيدِي، أَعْطِينِي مِنْ المَاء هَاذَا بَاشْ مَا عَادِشْ نَعْطِشْ بِالكُلْ وْمَا عَادِشْ نْجِي نْعَبِّي المَاء مِنْ هْنَا جِمْلَة.»

¹⁶قَالِلْهَا: «إِمْشِي نَادِي رَاجْلِكْ وْإِيجَا إِنْتِ وْيَاهْ.»

¹⁷جَاوْبِتُّو المْرَا وْقَتْلُو: «مَا عِنْدِيشْ رَاجِلْ.» قَالِلْهَا يَسُوعْ: «كْلاَمِكْ صْحِيحْ كِقُلْتْ مَا عِنْدِيشْ رَاجِلْ.

¹⁸عْلَى خَاطْرِكْ عَرِّسْتْ خَمْسَة مَرَّاتْ، وِالرَّاجِلْ الِّي عَايْشَة مْعَاهْ تَوْ مُوشْ رَاجْلِكْ. وِلِّي قُلْتُو صْحِيحْ.»

¹⁹قَتْلُو المْرَا: «يَا سِيدِي، آنَا نْشُوفْ الِّي إِنْتِ نَبِي!

²⁰جْدُودْنَا عِبْدُوا رَبِّي فِي الجْبَلْ هَاذَا، وْإِنْتُومَا اليْهُودْ تْقُولُوا الِّي أُورْشَلِيمْ هِيَ البْلاَصَة الِّي لاَزِمْ يِتْعْبِدْ فِيهَا رَبِّي.»

²¹قَالِلْهَا يَسُوعْ: «صَدّْقِينِي يَا مْرَا، بَاشْ يْجِي وَقْتْ لاَ فِي الجْبَلْ هَاذَا وْلاَ فِي أُورْشَلِيمْ بَاشْ تِعْبْدُو الآبْ.

²²إِنْتُومَا السَّامِرِيِّينْ تِعْبْدُوا فِلِّي مَا تَعْرْفُوهِشْ، وْإِحْنَا اليْهُودْ نِعْبْدُوا فِلِّي نَعْرْفُوهْ، رَاهُو الخَلاَصْ يْجِي مِنْ عِنْدْ اليْهُودْ.

²³آمَا رَاهُو بَاشْ يْجِي وَقْتْ، وِالوَقْتْ هَاذَا رَاهُو جَا تَوْ وَقْتِلِّي النَّاسْ الِّي يِعْبْدُوا بِحْقِيقَة يِعْبْدُوا الآبْ فِي الرُّوحْ وْفِي الحَقْ. وِالنَّاسْ الِّي كِيفْ هَاذُومَا الآبْ يْحِبّْهُمْ يِعْبْدُوهْ.

²⁴اللهْ رُوحْ، هَاذَاكَا عْلاَشْ النَّاسْ الِّي يِعْبْدُوا فِيهْ لاَزِمْهُمْ يِعْبْدُوهْ فِي الرُّوحْ وْفِي الحَقْ.»

²⁵قَالِتْلُو المْرَا: «آنَا نَعْرِفْ الِّي المَسِيَّا، الِّي يْقُولُولُو المَسِيحْ بَاشْ يْجِي. وْوَقْتِلِّي يْجِي بَاشْ يْقُولِلْنَا عْلَى كُلْ شَيْء.»

²⁶قَالِلْهَا يَسُوعْ: «آنَا هُوَ، آنَا الِّي قَاعِدْ نْكَلِّمْ فِيكْ.»

²⁷وْفِي الوَقْتْ هَاذَاكَا رَجْعُوا تْلاَمِذْتُو. وِتْعَجّْبُوا كِلْقُوهْ يَحْكِي مْعَ مْرَا. آمَا حَتَّى حَدْ مِنْهُمْ مَا قَالُّو: «آشْ تْحِبْ مِنْهَا» وِلاَّ «عْلاَشْ تْكَلِّمْ فِيهَا.»

²⁸وْخَلاَّتْ القُلَّة مْتَاعْهَا وْرَجْعِتْ لِلمْدِينَة. وْقَالِتْ لِلنَّاسْ:

²⁹«إِيجَاوْ شُوفُوا رَاهُو ثَمَّة رَاجِلْ قَلِّي عْلَى الحَاجَاتْ الِّي عْمَلْتْهُمْ الكُلْ. زَعْمَة هَاذَا هُوَ المَسِيحْ؟»

³⁰وَلُّوا خَرْجُوا مِالمْدِينَة وِمْشُولُو.

³¹وْفِي الوَقْتْ هَاذَاكَا قَالُوا التْلاَمْذَة لْيَسُوعْ: «يَا مُعَلِّمْ، كُولْ.»

³²آمَا هُوَ قَالِلْهُمْ: «عِنْدِي مَاكْلَة نَاكُلْ فِيهَا إِنْتُومَا مَا تَعْرْفُوهَاشْ.»

³³بْدَاوْا التْلاَمْذَة يِسْأْلُوا فِي بْعَضْهُمْ: «يَاخِي ثَمَّة شْكُونْ جَابْلُو مَاكْلَة؟»

³⁴وْقَالِلْهُمْ يَسُوعْ: «مَاكِلْتِي هِيَ انِّي نَعْمِلْ إِرَادِةْ الِّي بْعَثْنِي وِنْكَمِّلْ خِدْمْتُو.

³⁵يَاخِي مُوشْ تْقُولُوا: "الحْصَادْ يْجِي بَعْدْ أَرْبْعَة شْهُرْ؟" وْآنَا نْقُلْكُمْ هِزُّوا رُوسْكُمْ وْأُخْزْرُوا كِيفَاشْ الزَّرْعْ بْيَاضْ وِحْضَرْ لِلحْصِيدَة.

³⁶وْهَاوْ الحَصَّادْ يَاخُذْ أُجْرْتُو، وِيْلِمْ الغَلَّة لِلحَيَاةْ الأَبَدِيَّة. بَاشْ الِّي يَزْرَعْ وِلِّي يَحْصِدْ يَفْرْحُوا لِثْنِينْ.

³⁷وِصْدَقْ المَثَلْ الِّي يْقُولْ: "وَاحِدْ يَزْرَعْ وِالآخَرْ يَحْصِدْ."

³⁸وْآنَا بْعَثْتْكُمْ بَاشْ تَحْصْدُوا زَرْعْ مَا تعِبْتُوشْ عْليهْ. نَاسْ أُخْرِينْ تَعْبُوا وْإِنْتُومَا بَاشْ تْلِمُّوا الثَّمْرَة مْتَاعْ تْعَبْهُمْ.»

³⁹امّْنُوا بِيهْ بَرْشَة سَامِرِيِّينْ مِالمْدِينَة هَاذِيكَا، عْلَى خَاطِرْ المْرَا شِهْدِتْلُو وْقَالِتْ: «قَالِّي عْلَى الحَاجَاتْ الِّي عْمَلْتْهُمْ الكُلْ.»

⁴⁰وْوَقْتِلِّي جَاوْهْ السَّامِرِيِّينْ تْشَحّْتُوهْ بَاشْ يُسْكُنْ عِنْدْهُمْ، وَلَّى سْكِنْ عِنْدْهُمْ نْهَارِينْ.

⁴¹وْزَادُوا كُثْرُوا النَّاسْ الِّي امّْنُوا بِيهْ وَقْتِلِّي سَمْعُوهْ يِتْكَلِّمْ،

⁴²وْقَالُوا لِلمْرَا: «أَحْنَا تَوْ نِمّْنُوا بِيهْ، مُوشْ بِسْبَبْ كْلاَمِكْ، آمَا رَانَا أَحْنَا بِيدْنَا سْمَعْنَا وِعْرَفْنَا الِّي هُوَ بِالحَقْ المُخَلِّصْ مْتَاعْ العَالَمْ.»

⁴³وِمْبَاعِدْ نْهَارِينْ مْشَى يَسُوعْ لْمَنْطِقْةْ الجَلِيلْ.

⁴⁴رَغْمِلِّي هُوَ بِيدُو شْهِدْ قَالْ: «حَتَّى نَبِي مَا عَنْدُو قْدَرْ فِي بْلاَدُو.»

⁴⁵وَقْتْ وْصُلْ لِلجَلِيلْ، رَحّْبُوا بِيهْ امَّالِيهَا، عْلَى خَاطِرْهُمْ شَافُوا الحَاجَاتْ الِّي عْمَلْهَا الكُلْ، وَقْتِلِّي كَانُوا فِي أُورْشَلِيمْ فِي عِيدْ الفِصْحْ.

⁴⁶وِمْشَى مَرَّة أُخْرَى لْقَانَا الجَلِيلْ، المْدِينَة الِّي حَوِّلْ فِيهَا المَاء شْرَابْ. وْكَانْ ثَمَّة مُوَظَّفْ فِي الحُكُومَة فِي كَفْرْنَاحُومْ وِلْدُو كَانْ مْرِيضْ.

⁴⁷وَقْتِلِّي سْمَعْ المُوَظَّفْ الِّي يَسُوعْ جَا مِنْ اليَهُودِيَّة لِلجَلِيلْ، مْشَالُو وِطْلَبْ مِنُّو بَاشْ يَهْبِطْ مْعَاهْ وْيِشْفِيلُو وِلْدُو الِّي قْرِيبْ يْمُوتْ.

⁴⁸قَالُّو يَسُوعْ: «مَا تِمّْنُوا كَانْ وَقْتِلِّي تْشُوفُوا عْجَايِبْ وْمُعْجْزَاتْ.»

⁴⁹قَالُّو المُوَظَّفْ: «يَا سِيدِي، أَهْبِطْ مْعَايَا قْبَلْ مَا وِلْدِي يْمُوتْ»

⁵⁰قَالُّو يَسُوعْ: «إِمْشِي! رَاهُو وِلْدِكْ بَاشْ يْعِيشْ.» صَدِّقْ الرَّاجِلْ الكِلْمَة الِّي قَالْهَالُو يَسُوعْ وِمْشَى.

⁵¹وَقْتِلِّي هُوَ رَاجِعْ، عَرْضُوهْ الخُدَّامْ مْتَاعُو وْبَشّْرُوهْ بِلِّي وِلْدُو حَيْ.

⁵²سْإِلْهُمْ: «وَقْتَاشْ بْرَى؟» قَالُولُو: «تْنَحَّاتْ عْلِيهْ السْخَانَة البَارِحْ مْعَ السَّبْعَة[٣].»

⁵³يَاخِي فْهِمْ البُو الِّي هَاذَا هُوَ نَفْسْ الوَقْتْ الِّي قَالُّو فِيهْ يَسُوعْ: «وِلْدِكْ بَاشْ يْعِيشْ» وْإِمِّنْ هُوَ وْعَايِلْتُو الكُلْ.

⁵⁴وْهَاذِي المُعْجْزَة الثَّانْيَة الِّي عْمَلْهَا يَسُوعْ، وَقْتِلِّي مْشَى مِاليَهُودِيَّة لِلجَلِيلْ.