Read Tunisian Arabic New Testament يُوحَنَّا 5 Bible Online

يُوحَنَّا 5 - Tunisian Arabic New Testament bible

يُوحَنَّا 5

¹وِمْبَعْدْهَا طْلَعْ يَسُوعْ لْأُورْشَلِيمْ، وْوَقْتْهَا كَانْ ثَمَّة عِيدْ مْتَاعْ اليْهُودْ.

²وْكَانِتْ ثَمَّة قِلْتَة فِي أُورْشَلِيمْ، بِحْذَا بَابْ الغْنَمْ، عِنْدْهَا خَمْسَة أَرْوْقَة وِيْسَمِّيوْهَا بِالعِبْرِيَّة بِيتْ حَسْدَا.

³وْفِي الأَرْوْقَة كَانُوا قَاعْدِينْ جْمَاعَة عِمْيَانْ وْعِيَّابْ وْمُعَاقِينْ، يِسْتَنَّاوْ فِي المَاء حَتَّى لِينْ يِتْحَرِّكْ،

⁴عْلَى خَاطِرْ كَانِتْ ثَمّة مْلاَيْكة مِنْ عِنْدْ رَبّي تْجِي سَاعَاتْ وِتْحَرِّكْ المَاءْ، واللّي يِتْرْمَى لُولْ فِي الْمَاءْ يَشْفَى مِ الْمْرَضْ مْتَاعُو

⁵وْكَانْ ثَمَّة رَاجِلْ غَادِي عَنْدُو ثْمَنْيَة وِثْلاَثِينْ سْنَة مْرِيضْ.

⁶وَقْتِلِّي شَافُو يَسُوعْ مِتَّكِّي، عْرَفْ الِّي عَنْدُو مُدَّة طْوِيلَة فِي الحَالَة هَاذِيكَا، وَلَّى قَالُّو: «تْحِبِّشْ تِتْشْفَى»

⁷جَاوْبُو المْرِيضْ: «مَا عِنْدِيشْ شْكُونْ يَرْمِينِي فِي القِلْتَة وَقْتِلِّي يِتْحَرِّكْ المَاء. وْكُلْ مَا نْحَاوِلْ نُوصْلِلْهَا آنَا لُوِّلْ غِيرِي يِسْبِقْنِي.»

⁸قَالُّو يَسُوعْ: «قُومْ هِزْ فْرَاشِكْ وْإِمْشِي.»

⁹وْبِالوَقْتْ تِشْفَى الرَّاجِلْ، وْهَزْ فْرَاشُو وِمْشَى. وِالنْهَارْ هَاذَاكَا كَانْ سِبْتْ.

¹⁰قَالُوا اليْهُودْ لِلرَّاجِلْ الِّي تِشْفَى: «اليُومْ رَاهُو سِبْتْ، مَا تْنَجِّمْشْ تْهِزْ فْرَاشِكْ.»

¹¹جَاوِبْهُمْ: «الِّي شْفَانِي هُوَ الِّي قَلِّي: هِزْ فْرَاشِكْ وْإِمْشِي.»

¹²وَلاَّوْ سِأْلُوهْ: «شْكُونُو الِّي قَلِّكْ هِزْ فْرَاشِكْ وْإِمْشِي.»

¹³وِالرَّاجِلْ الِّي تِشْفَى مَا كَانِشْ يَعْرِفْ شْكُونُو هُوَ، عْلَى خَاطِرْ يَسُوعْ دْخَلْ فِي وُسْطْ النَّاسْ الِّي تْلَمُّوا.

¹⁴بَعْدْ هَاذَا لْقَاهْ يَسُوعْ فِي الهَيْكِلْ، وْقَالُّو: «هَاكْ بْرِيتْ، مَا تْعَاوِدْشْ تَعْمِلْ الذْنُوبْ، بَاشْ مَا يَجْرَاشْ فِيكْ شَيْء أَخْيِبْ مِلِّي جْرَالِكْ.»

¹⁵مْشَى الرَّاجِلْ وْقَالْ لِليْهُودْ الِّي يَسُوعْ هُوَ الِّي شْفَاهْ.

¹⁶هَاذَاكَا عْلاَشْ بْدَاوْا اليْهُودْ يِضْطَهْدُوا فِي يَسُوعْ، وِيْحِبُّوا يُقْتْلُوهْ عْلَى خَاطْرُو عْمَلْ الشَّيْء هَاذَا نْهَارْ السِّبْتْ.

¹⁷آمَا يَسُوعْ جَاوِبْهُمْ: «بَابَا قَاعِدْ يِخْدِمْ حَتَّى لْتَوْ، وْآنَا زَادَا قَاعِدْ نِخْدِمْ.»

¹⁸هَاذَاكَا عْلاَشْ زَادُوا اليْهُودْ حَبُّوا يُقْتْلُوهْ، عْلَى خَاطْرُو مُوشْ مَا احْتَرِمْشْ نْهَارْ السِّبْتْ بَرْكْ، آمَا زَادَا قَالْ الِّي اللهْ بُوهْ، وْرَدْ رُوحُو هُوَ وِالله كِيفْ كِيفْ.

¹⁹جَاوِبْ يَسُوعْ وْقَالْ: «نْقُلْكُمْ الحَقْ الحَقْ الإِبْنْ مَا يَعْمِلْ كَانْ الحَاجَاتْ الِّي يْشُوفْ بُوهْ يَعْمِلْ فِيهُمْ، وْمَا يْنَجِّمْ يَعْمِلْ حَتَّى شَيْء مِنْ رَاسُو. الحَاجَاتْ الكُلْ الِّي يَعْمِلْهُمْ الآبْ الإِبْنْ زَادَا يَعْمِلْهُمْ كِيفُو.

²⁰الآبْ يْحِبْ الإِبْنْ وِيْوَرِّيهْ الحَاجَاتْ الِّي يَعْمِلْ فِيهُمْ الكُلْ، وْبِشْ يْوَرِّيهْ حَاجَاتْ أَكْثِرْ مِنْ هَاذِي، بَاشْ إِنْتُومَا تُقْعْدُوا مِسْتَغْرْبِينْ.

²¹كِيفْ مَا الآبْ يْقَيِّمْ المُوتَى وْيِحْيِيهُمْ، الإِبْنْ زَادَا يِحْيِي الِّي يْحِبْ.

²²الآبْ مَا يُحْكُمْ عْلَى حَتَّى حَدْ آمَا عْطَى الحُكْمْ الكُلُّو لِلإِبْنْ،

²³بَاشْ النَّاسْ الكُلْ يْمَجّْدُوا الإِبْنْ، كِيفْ مَا يْمَجّْدُوا الآبْ. الِّي مَا يْمَجِّدْشْ الإِبْنْ، مَا يْمَجِّدْشْ الآبْ الِّي بَعْثُو.

²⁴نْقُلْكُمْ الحَقْ الحَقْ: الِّي يِسْمَعْ كْلاَمِي وْيِمِّنْ بِلِّي بْعَثْنِي يْنَالْ الحَيَاةْ الأَبَدِيَّة، وْمَا يِدَّانِشْ فِي يُومْ الحْسَابْ، وْيِتْعَدَّى مِالمُوتْ لِلحَيَاةْ.

²⁵نْقُلْكُمْ الحَقْ الحَقْ: بَاشْ يْجِي وَقْتْ، يِسْمْعُوا فِيهْ المُوتَى صُوتْ إِبْنْ اللهْ، وِلِّي يِسْمَعْ كْلاَمُو يَحْيَى، وِالوَقْتْ هَاذَا رَاهُو جَا تَوَّا.

²⁶كِيفْ مَا الآبْ عَنْدُو الحَيَاةْ فِي نَفْسُو، عْطَى لِلإِبْنْ زَادَا بَاشْ تْكُونْ عَنْدُو الحَيَاةْ فِي نَفْسُو.

²⁷وِعْطَاهْ السُّلْطَة بَاشْ يُحْكُمْ عْلَى خَاطْرُو هُوَ إِبْنْ الإِنْسَانْ.

²⁸مَا تِسْتَغْرْبُوشْ مِالشَّيْء هَاذَا. بَاشْ يْجِي وَقْتْ النَّاسْ الِّي فِي القْبُورْ الكُلْهُمْ بَاشْ يِسْمْعُوا صُوتُو،

²⁹وْيُخْرْجُوا العَامْلِينْ الخِيرْ وِيْقُومُوا لِلحَيَاةْ الأَبَدِيَّة، وِالعَامْلِينْ الشَّرْ بَاشْ يْقُومُوا بَاشْ يِتْحْكَمْ عْلِيهُمْ.

³⁰آنَا وَحْدِي مَا انَّجِّمْ نَعْمِلْ حَتَّى شَيْء. آنَا نُحْكُمْ بِلِّي يْقُلِّي عْلِيهْ الآبْ، وِالحُكْمْ مْتَاعِي عَادِلْ عْلَى خَاطِرْنِي مَا نَعْمِلْشْ الِّي نْحِبْ عْلِيهْ آنَا، آمَا نْحِبْ نَعْمِلْ الِّي يْحِبْ عْلِيهْ الِّي بْعَثْنِي.

³¹إِذَا كَانْ آنَا نِشْهِدْ لْرُوحِي، رَاهِي شْهَادْتِي بَاطْلَة.

³²آمَا رَاهُو ثَمَّة وَاحِدْ آخَرْ يِشْهِدْلِي، وْآنَا نَعْرِفْ الِّي شْهَادْتُو صْحِيحَة.

³³إِنْتُومَا بْعَثْتُوا نَاسْ لْيُوحَنَّا، وْهُوَ شْهِدْ لِلحَقْ.

³⁴آنَا رَانِي مَا نِقْبِلْشْ شْهَادِةْ البَشَرْ، آمَا رَانِي نْقُلْكُمْ فِي الكْلاَمْ هَاذَا بَاشْ تُخْلْصُوا.

³⁵يُوحَنَّا كَانْ فْنَارْ يِشْعِلْ وْيِضْوِي وْإِنْتُومَا حَبِّيتُوا تَفْرْحُوا بِالنُّورْ مْتَاعُو شْوَيَّة.

³⁶آنَا شْهَادْتِي أَكْبِرْ مِنْ شْهَادِةْ يُوحَنَّا: الآبْ عْطَانِي بَرْشَة حَاجَاتْ بَاشْ نَعْمِلْهُمْ، وِالأَعْمَالْ هَاذِي بِيدْهَا تِشْهِدْلِي إِنُّو الآبْ بْعَثْنِي.

³⁷وِالآبْ الِّي بْعَثْنِي هُوَ بِيدُو يِشْهِدْلِي. وْإِنْتُومَا عْمُرْكُمْ مَا سْمَعْتُوا صُوتُو، وِعْمُرْكُمْ مَا شُفْتُوا وِجْهُو،

³⁸وِكْلاَمُو مَا يِثْبِتْشْ فِيكُمْ، عْلَى خَاطِرْكُمْ مَا تِمّْنُوشْ بِلِّي بَعْثُو.

³⁹تَقْرَاوْ وِتْلَوّْجُوا فِي الكْتُبْ المُقَدّْسَة، مَاشِي فِي بَالْكُمْ بَاشْ تَلْقَاوْ فِيهَا الحَيَاةْ الأَبَدِيَّة، وِالكْتُبْ هَاذِي بِيدْهَا تِشْهِدْلِي آنَا،

⁴⁰وْمَا تْحِبُّوشْ تْجِيوْنِي آنَا بَاشْ تَاخْذُوا الحَيَاةْ.

⁴¹آنَا مَا نِجْرِيشْ وْرَاء المَجْدْ الِّي يْجِي مِنْ عِنْدْ النَّاسْ،

⁴²آنَا نَعْرِفْكُمْ وْنَعْرِفْ الِّي مْحَبِّةْ اللهْ مَا هِيشْ فِي قْلُوبْكُمْ.

⁴³آنَا جِيتْ بْإِسْمْ بَابَا، وْإِنْتُومَا مَا قْبِلْتُونِيشْ. وْكَانْ وَاحِدْ آخَرْ يْجِيكُمْ بْإِسْمُو هُوَ تَوْ تِقْبْلُوهْ.

⁴⁴وْكِيفَاشْ تْنَجّْمُوا تِمّْنُوا وْإِنْتُومَا تَاخْذُوا فِي المَجْدْ مِنْ عِنْدْ بْعَضْكُمْ، وْمَا تْحَاوْلُوشْ تَاخْذُوا المَجْدْ الِّي اللهْ وَحْدُو يَعْطِيهْ؟

⁴⁵مَا يِمْشِيشْ فِي بَالْكُمْ الِّي آنَا نِشْكِي بِيكُمْ لِلآبْ، رَاهُو ثَمَّة شْكُونْ يِشْكِي بِيكُمْ: مُوسَى الِّي إِنْتُومَا حَاطِّينْ الأَمَلْ مْتَاعْكُمْ فِيهْ.

⁴⁶وْكَانْ جِيتُوا صَدِّقْتُوا مُوسَى رَاكُمْ صَدِّقْتُونِي، عْلَى خَاطْرُو هُوَ كْتِبْ عْلِيَّ.

⁴⁷وْإِذَا كَانْ مَا تْصَدّْقُوشْ الِّي كِتْبُو عْلِيَّ، إِمَّالاَ كِيفَاشْ بَاشْ تْصَدّْقُوا كْلاَمِي؟»