Read Tunisian Arabic New Testament يُوحَنَّا 6 Bible Online

يُوحَنَّا 6 - Tunisian Arabic New Testament bible

يُوحَنَّا 6

¹مْبَاعِدْ تْعَدَّى يَسُوعْ بُحَيْرِةْ الجَلِيلْ الِّي يْسَمِّيوْهَا بُحَيْرِةْ طَبَرِيَّة،

²تَبّْعُوهْ بَرْشَة نَاسْ، عْلَى خَاطِرْهُمْ شَافُوا المُعْجْزَاتْ مْتَاعُو كِشْفَى المُرْضَى.

³وِطْلَعْ يَسُوعْ لِلجْبَلْ وِقْعَدْ عْلَى الأَرْضْ مْعَ تْلاَمِذْتُو.

⁴وْوَقْتْهَا قْرُبْ عِيدْ الفِصْحْ مْتَاعْ اليْهُودْ.

⁵هَزْ يَسُوعْ عِينِيهْ وْشَافْ النَّاسْ جَايِينْ، قَالْ لْفِيلِبُّسْ: «مْنِينْ نِشْرُولْهُمْ خُبْزْ بَاشْ يَاكْلُوا.»

⁶قَالْ الكْلاَمْ هَاذَا بَاشْ يْجَرَّبْ فِيلِبُّسْ، وْيَسُوعْ كَانْ عَارِفْ رُوحُو آشْ بَاشْ يَعْمِلْ.

⁷جَاوْبُو فِيلِبُّسْ: «حَتَّى كِنِشْرِيوْ بْمِيتِينْ قَطْعَة مِالفِضَّة، مَا هِيشْ بَاشْ تِكْفِي بَاشْ كُلْ وَاحِدْ مِنْهُمْ يَاخُذْ قِدْمَة.»

⁸قَالُّو أَنْدَرَاوُسْ خُو سِمْعَانْ بُطْرُسْ وَاحِدْ مِنْ تْلاَمِذْتُو:

⁹«ثَمَّة هْنَا شْكُونْ عَنْدُو خَمْسَة خُبْزَاتْ شْعِيرْ وْحُوتِّينْ صْغَارْ: آمَا آشْ بَاشْ يَعْمْلُوا لِلنَّاسْ هَاذُومَا.»

¹⁰قَالْ يَسُوعْ: «قَعّْدُوا النَّاسْ لُوطَة.» وْكَانْ ثَمَّة بَرْشَة حْشِيشْ قَعْدُوا عْلِيهْ النَّاسْ. وْكَانُوا خَمْسَة آلاَفْ رَاجِلْ.

¹¹خْذَا يَسُوعْ الخُبْزَاتْ وْشْكَرْ اللهْ، وِعْطَى لِلمُوجُودِينْ الكُلْ قَدْ مَا حَبُّوا. وِعْمَلْ نَفْسْ الشَّيْء لِلحُوتِّينْ.

¹²وْوَقْتِلِّي شَبْعُوا، قَالْ لِتْلاَمِذْتُو: «لِمُّوا الِّي فْضُلْ الكُلُّو بَاشْ مَا يْضِيعْ مِنُّو حَتَّى شَيْء.»

¹³وَلاَّوْ لَمُّوهْ وْعَبَّاوْ ثْنَاشِنْ قُفَّة بِالخُبْزْ الِّي فْضُلْ مِالخَمْسَة خُبْزَاتْ مْتَاعْ الشْعِيرْ بَعْدْ مَا كْلاَوْ النَّاسْ.

¹⁴وْوَقْتِلِّي شَافُوا النَّاسْ المُعْجْزَة هَاذِي الِّي عْمَلْهَا يَسُوعْ قَالُوا: «بِالحَقْ، هَاذَا هُوَ النَّبِي الِّي جَايْ لِلعَالَمْ!»

¹⁵وِعْرَفْ يَسُوعْ الِّي هُومَا يْحِبُّوا يْهِزُّوهْ وِيْحُطُّوهْ مَلِكْ، يَاخِي بْعِدْ عْلِيهُمْ وِرْجَعْ وَحْدُو لِلجْبَلْ.

¹⁶وْفِي العْشِيَّة، هَبْطُوا تْلاَمِذْتُو لِلبُحَيْرَة.

¹⁷وْطَلْعُوا فِي فْلُوكَة وِمْشَاوْ لِمْدِينِةْ كَفْرْنَاحُومْ فِي الشِّيرَة الأُخْرَى مْتَاعْ البُحَيْرَة وِظْلاَمِتْ الدِّنْيَا وْيَسُوعْ مَازَالْ مَا خْلَطْشْ عْلِيهُمْ.

¹⁸هَبِّتْ رِيحْ قْوِيَّة، هَيّْجِتْ البُحَيْرَة.

¹⁹وِمْبَاعِدْ مَا دَخْلُوا فِي البُحَيْرَة خَمْسَة وِلاَّ سِتَّة كِيلُومِيتْرَاتْ، خَافُوا كِشَافُوا يَسُوعْ يِمْشِي فُوقْ المَاء وِقْرُبْ لِلفْلُوكَة.

²⁰يَاخِي قَالِلْهُمْ: «مَا تْخَافُوشْ رَانِي آنَا هُوَ!»

²¹وْحَبُّوا يْطَلّْعُوهْ مْعَاهُمْ فِي الفْلُوكَة، وْفِي الوَقْتْ هَاذَاكَا وُصْلِتْ الفْلُوكَة لِلأَرْضْ الِّي مَاشِينْ لِيهَا.

²²وْمِنْ غُدْوَة، النَّاسْ المُوجُودِينْ فِي الشِّيرَة الأُخْرَى مْتَاعْ البُحَيْرَة تْذَكّْرُوا الِّي هُومَا شَافُوا فْلُوكَة وَحْدَة وِلِّي يَسُوعْ مَا طْلَعْشْ فِيهَا مْعَاهُمْ وِلِّي التْلاَمْذَة مْشَاوْ وَحَّدْهُمْ.

²³آمَا ثَمَّة فْلاَيِكْ أُخْرَى جَاتْ مِنْ مْدِينِةْ طَبَرِيَّة لِلشَّطْ الِّي قْرِيبْ مِالبْلاَصَة الِّي كْلاَوْ فِيهَا الخُبْزْ بَعْدْ مَا الرَّبْ بَارْكُو.

²⁴وَقْتِلِّي النَّاسْ شَافُوا الِّي يَسُوعْ وِتْلاَمِذْتُو مَا هُمْشْ مُوجُودِينْ الغَادِي وَلُّوا رِكْبُوا فِي الفْلاَيِكْ وِمْشَاوْ يْلَوّْجُوا عْلِيهْ فِي كَفْرْنَاحُومْ.

²⁵وْكِي لْقَاوْهْ فِي الشِّيرَة الأُخْرَى مْتَاعْ البُحَيْرَة قَالُولُو: «يَا مُعَلِّمْ، وَقْتَاشْ وْصُلْتْ؟»

²⁶جَاوِبْهُمْ يَسُوعْ وْقَالِلْهُمْ: «نْقُلْكُمْ الحَقْ الحَقْ: إِنْتُومَا تْلَوّْجُوا عْلِيَّ مُوشْ عْلَى خَاطِرْكُمْ شُفْتُوا المُعْجْزَاتْ، آمَا عْلَى خَاطِرْكُمْ كْلِيتُوا مِالخُبْزْ وِشْبَعْتُوا.

²⁷مَا تِجْرِيوْشْ وْرَاء المَاكْلَة الِّي تَفْنَى آمَا إِجْرُوا وْرَاء المَاكْلَة الِّي تْدُومْ لِلحَيَاةْ الأَبَدِيَّة. المَاكْلَة هَاذِي نَعْطِيهَالْكُمْ آنَا إِبْنْ الإِنْسَانْ الِّي اللهْ الآبْ حَطْ عْلِيَّ عَلاَمِةْ القْبُولْ مْتَاعُو، الخُبْزْ اللِّي طَبْعُو الآب بِالْخَاتِمْ مْتَاعُو.»

²⁸قَالُولُو: «شْنُوَّة الشَّيْء الِّي اللهْ يْحِبّْنَا نَعْمْلُوهْ؟»

²⁹جَاوِبْهُمْ يَسُوعْ وْقَالِلْهُمْ: «هَاذَا هُوَ الشَّيْء الِّي يْحِبْ عْلِيهْ اللهْ هُوَ إِنّْكُمْ تِمّْنُوا بِلِّي بَعْثُو.»

³⁰قَالُولُو: «شْنُوَّة المُعْجْزَة الِّي تْنَجِّمْ تَعْمِلْهَا بَاشْ نِمّْنُوا بِيكْ؟

³¹جْدُودْنَا كْلاَوْ المَنْ فِي الصَّحْرَاء، كِيمَا مَكْتُوبْ فِي الكْتَابْ المُقَدَّسْ: "عْطَاهُمْ خُبْزْ مِالسْمَاءْ بَاشْ يَاكْلُوهْ."»

³²إِمَّالاَ قَالِلْهُمْ يَسُوعْ: «نْقُلْكُمْ الحَقْ الحَقْ: مُوشْ مُوسَى الِّي عْطَاكُمْ الخُبْزْ مِالسْمَاءْ. بَابَا وَحْدُو هُوَ الِّي يَعْطِيكُمْ الخُبْزْ الحَقَّانِي مِالسْمَاءْ.

³³رَاهُو خُبْزْ اللهْ هُوَ الِّي يِنْزِلْ مِالسْمَاءْ وْيَعْطِي حَيَاةْ لِلعَالَمْ.»

³⁴قَالُولُو: «يَا سِيدْنَا، أَعْطِينَا مِالخُبْزْ هَاذَا دِيمَا!»

³⁵قَالِلْهُمْ يَسُوعْ: «آنَا هُوَ خُبْزْ الحَيَاةْ. الِّي يْجِينِي مَا يْجُوعِشْ، الِّي يِمِّنْ بِيَّ مَا يَعْطِشْ لِلأَبَدْ.

³⁶آنَا قُلْتِلْكُمْ: شُفْتُونِي آمَا مَا امِّنْتُوشْ.

³⁷الِّي يَعْطِيهُمْلِي الآبْ الكُلْهُمْ يْجِيوْنِي، وِلِّي يْجِينِي مَا نْخَرّْجُوشْ البَرَّا.

³⁸رَانِي مَا نْزِلْتِشْ مِنْ السْمَاءْ بَاشْ نَعْمِلْ الِّي نْحِبْ عْلِيهْ آنَا، آمَا بَاشْ نَعْمِلْ الِّي يْحِبْ عْلِيهْ الِّي بْعَثْنِي.

³⁹وِلِّي بْعَثْنِي يْحِبّْنِي نْقَيِّمْ الِّي عْطَاهُمْلِي مِنْ المُوتْ يُومْ القْيَامَة، وْمَا نْضَيَّعْشْ حَتَّى وَاحِدْ مِنْهُمْ.

⁴⁰وْهَاذَا الِّي يْحِبْ عْلِيهْ بَابَا: كُلْ مِنْ يْشُوفْ الإِبْنْ وْيِمِّنْ بِيهْ يْنَالْ الحَيَاةْ الأَبَدِيَّة وْآنَا نْقَيّْمُو مِنْ المُوتْ يُومْ القْيَامَة.»

⁴¹وِتْشَكَّاوْ اليْهُودْ عْلَى يَسُوعْ عْلَى خَاطْرُو قَالْ: «آنَا هُوَ الخُبْزْ الِّي نْزِلْ مِنْ السْمَاءْ»،

⁴²وْقَالُولُو: «يَاخِي هَاذَا مُوشْ يَسُوعْ وِلْدْ يُوسُفْ؟ أَحْنَا نَعْرْفُوا بُوهْ وْأُمُّو، إِمَّالاَ كِيفَاشْ تَوْ يْقُولْ الِّي هُوَ نْزِلْ مِنْ السْمَاءْ.»

⁴³جَاوِبْهُمْ يَسُوعْ وْقَالِلْهُمْ: «مَا تِتْشَكَّاوْشْ مَا بِينَاتْكُمْ.

⁴⁴حَتَّى حَدْ مَا يْنَجِّمْ يْجِينِي إِلاَّ إِذَا كَانْ الآبْ الِّي بْعَثْنِي هُو اللّي قَرْبُو وْآنَا نْقَوّْمُو مِنْ المُوتْ يُومْ القْيَامَة.

⁴⁵كِيفْ مَا جَا فِي كْتُبْ الأَنْبِيَاءْ، الِّي الكُلْهُمْ بَاشْ يِتْعَلّْمُوا مِنْ اللهْ. كُلْ مِنْ يِسْمَعْ الآبْ وْيِتْعَلِّمْ مِنُّو يْجِينِي.

⁴⁶حَتَّى حَدْ مَا شَافْ الآبْ كَانْ الِّي هُوَ مِنْ عِنْدْ اللهْ: هَاذَاكَا هُوَ الِّي شَافْ الآبْ.

⁴⁷نْقُلْكُمْ الحَقْ الحَقْ: الِّي يِمِّنْ بِيَّ، يْنَالْ الحَيَاةْ الأَبَدِيَّة.

⁴⁸آنَا هُوَ خُبْزْ الحَيَاةْ.

⁴⁹جْدُودْكُمْ كْلاَوْ المَنْ فِي الصَّحْرَاء وْمَاتُوا،

⁵⁰هَاذَا هُوَ الخُبْزْ الِّي نَازِلْ مِنْ السْمَاءْ بَاشْ الِّي يَاكُلْ مِنُّو مَا يْمُوتْشْ.

⁵¹آنَا هُوَ الخُبْزْ الحَيْ الِّي نْزِلْ مِالسْمَاءْ. الِّي يَاكُلْ مِنْ الخُبْزْ هَاذَا يْعِيشْ لِلأَبَدْ. وِالخُبْزْ الِّي نَعْطِيهْ هُوَ البْدَنْ مْتَاعِي، الِّي نَعْطِيهْ بَاشْ العَالَمْ يَحْيَى.»

⁵²وِتْعَارْكُوا اليْهُودْ فِي بْعَضْهُمْ وْقَالُوا: «كِيفَاشْ هَاذَا يْنَجِّمْ يَعْطِينَا البْدَنْ مْتَاعُو بَاشْ نَاكْلُوهْ؟»

⁵³إِمَّالاَ قَالِلْهُمْ يَسُوعْ: «نْقُلْكُمْ الحَقْ الحَقْ: إِذَا مَا تَاكْلُوشْ البْدَنْ مْتَاعِي آنَا إِبْنْ الإِنْسَانْ وْمَا تُشْرْبُوشْ دَمِّي، مُوشْ بَاشْ تْكُونْ عِنْدْكُمْ حَيَاةْ فِيكُمْ.

⁵⁴الِّي يَاكُلْ البْدَنْ مْتَاعِي وْيُشْرُبْ مِنْ دَمِّي يْنَالْ الحَيَاةْ الأَبَدِيَّة، وْآنَا نْقَوّْمُو مِنْ المُوتْ يُومْ القْيَامَة.

⁵⁵رَاهُو البْدَنْ مْتَاعِي هُوَ المَاكْلَة الحَقَّانِيَّة، وْدَمِّي هُوَ المَاء الحَقَّانِي.

⁵⁶الِّي يَاكُلْ مِنْ البْدَنْ مْتَاعِي وْيُشْرُبْ مِنْ دَمِّي هُوَ يِثْبِتْ فِيَّ، وْآنَا نِثْبِتْ فِيهْ.

⁵⁷وْكِيفْ مَا الآبْ الحَيْ بْعَثْنِي وْآنَا نَحْيَى بِيهْ، الِّي يَاكُلْنِي زَادَا يَحْيَى بِيَّا.

⁵⁸هَاذَا هُوَ الخُبْزْ الِّي نْزِلْ مِالسْمَاءْ، وْرَاهُو مُوشْ كِيفْ المَنْ الِّي كْلاَوْهْ جْدُودْكُمْ وْمَاتُوا. الِّي يَاكُلْ مِالخُبْزْ هَاذَا يَحْيَى لِلأَبَدْ.»

⁵⁹الكْلاَمْ هَاذَا قَالُوا وَقْتِلِّي كَانْ يْعَلِّمْ فِي المَجْمَعْ مْتَاعْ كَفْرْنَاحُومْ.

⁶⁰وَقْتِلِّي سَمْعُوهْ بَرْشَة مِنْ تْلاَمِذْتُو قَالُوا: «مَا اصْعْبُو الكْلاَمْ هَاذَا، شْكُونْ يْنَجِّمْ يِسْمْعُو؟»

⁶¹وِعْرَفْ يَسُوعْ فِي قَلْبُو الِّي تْلاَمِذْتُو شَكُّوا، وَلَّى سْإِلْهُمْ: «يَاخِي الكْلاَمْ هَاذَا يْخَلِّيكُمْ تْشِكُّوا؟

⁶²إِمَّالاَ آشْ بَاشْ تَعْمْلُوا كَانْ تْشُوفُونِي آنَا إِبْنْ الإِنْسَانْ طَالِعْ لِلبْلاَصَة الِّي كُنْتْ فِيهَا قْبَلْ؟

⁶³الرُّوحْ هُوَ الِّي يَعْطِي الحَيَاةْ، آمَا البْدَنْ رَاهُو مَا يِنْفَعْ بْحَتَّى شَيْء. رَاهُو الكْلاَمْ الِّي قُلْتْهُولْكُمْ رُوحْ وْحَيَاةْ.

⁶⁴آمَا ثَمَّة شْكُونْ فِيكُمْ الِّي مَا يِمّْنُوشْ.» يَسُوعْ كَانْ مِالأُوِّلْ يَعْرِفْ شْكُونْهُمْ الِّي مَا هُمْشْ بَاشْ يِمّْنُوا بِيهْ وِشْكُونُو الِّي بَاشْ يْخُونُو.

⁶⁵وْقَالْ: «هَاذَاكَا عْلاَشْ آنَا قُلْتِلْكُمْ رَاهُو مَا يْنَجِّمْ حَتَّى حَدْ يْجِينِي إِلاَّ إِذَا كَانْ الآبْ خَلاَّهْ يْجِينِي.»

⁶⁶مِالوَقْتْ هَاذَاكَا بَرْشَة مِنْ تْلاَمِذْتُو بَطّْلُوا مَا عَادِشْ يْتَبّْعُوهْ.

⁶⁷يَاخِي دَارْ لِلأَثْنَاشْ وْقَالِلْهُمْ: «إِنْتُومَا زَادَا تْحِبُّوا تِمْشِيوْ كِيفْهُمْ؟»

⁶⁸جَاوْبُو سِمْعَانْ بُطْرُسْ: «يَا رَبْ لِشْكُونْ بَاشْ نِمْشِيوْا، وْإِنْتِ عِنْدِكْ كْلاَمْ الحَيَاةْ الأَبَدِيَّة؟

⁶⁹وْإِحْنَا امِّنَّا وِعْرَفْنَا الِّي إِنْتِ قُدُّوسْ اللهْ.»

⁷⁰جَاوِبْهُمْ يَسُوعْ: «ياخي مُوشْ آنَا الِّي خْتَرْتْكُمْ إِنْتُومَا الأَثْنَاشْ رَغْمِلِّي وَاحِدْ مِنْكُمْ شِيطَانْ!»

⁷¹وِقْصَدْ بِكْلاَمُو هَاذَا يَهُوذَا وِلْدْ سِمْعَانْ الإِسْخَرْيُوطِي، الِّي بَاشْ يْخُونُو، رَغْمِلِّي هُوَ وَاحِدْ مِنْ الأَثْنَاشْ.