Read Tunisian Arabic New Testament يُوحَنَّا 7 Bible Online

يُوحَنَّا 7 - Tunisian Arabic New Testament bible

يُوحَنَّا 7

¹مْبَاعِدْ كَانْ يَسُوعْ يْدُورْ فِي الجَلِيلْ، وْمَا حَبِّشْ يِمْشِي لْمَنْطِقْةْ اليَهُودِيَّة عْلَى خَاطِرْ اليْهُودْ كَانُوا يْحِبُّوا يُقْتْلُوهْ.

²وْوَقْتِلِّي قْرُبْ عِيدْ الخْيَامْ اليْهُودِي،

³قَالُولُو إِخْوْتُو: «اخْرُجْ مِالمَنْطْقَة هَاذِي وْإِمْشِي لِليَهُودِيَّة، بَاشْ التْلاَمْذَة الِّي يْتَبّْعُوا فِيكْ يْشُوفُوا أَعْمَالِكْ،

⁴رَاهُو الِّي يْحِبْ يِتْشْهَرْ مَا يِلْزْمُوشْ يِخْدِمْ فِي السِّرْ. مَادَامِكْ تَعْمِلْ فِي الحَاجَاتْ هَاذِي، إِمَّالاَ ظَهِّرْ رُوحِكْ لِلنَّاسْ.»

⁵وْحَتَّى إِخْوْتُو بِيدْهُمْ مَا كَانُوشْ يِمّْنُوا بِيهْ.

⁶وَلَّى قَالِلْهُمْ يَسُوعْ: «وَقْتِي مَازَالْ مَا جَاشْ. آمَا إِنْتُومَا الوَقْتْ دِيمَا مْسَاعِدْكُمْ.

⁷العَالَمْ مَا يْنَجِّمْشْ يَكْرَهْكُمْ إِنْتُومَا، آمَا رَاهُو يَكْرَهْنِي آنَا عْلَى خَاطِرْنِي نِشْهِدْ عْلِيهْ الِّي أَعْمَالُو خَايْبَة.

⁸امْشِيوْ إِنْتُومَا لِلعِيدْ، آمَا آنَا رَانِي مَا نِيشْ بَاشْ نِمْشِي لِلعِيدْ هَاذَا عْلَى خَاطِرْ وَقْتِي مَازَالْ مَا كْمِلْشْ.»

⁹قَالِلْهُمْ الكْلاَمْ هَاذَا وِبْقَى فِي الجَلِيلْ.

¹⁰بَعْدْ مَا مْشَاوْ خْوَاتُو لِلعِيدْ مْشَى هُوَ زَادَا آمَا مِنْ غِيرْ مَا يْظَهِّرْ رُوحُو.

¹¹اليْهُودْ كَانُوا يْلَوّْجُوا عْلِيهْ فِي العِيدْ وْيِسْأْلُوا: «وِينُو هَاكَا الرَّاجِلْ؟»

¹²وْكَانُوا النَّاسْ يَحْكِيوْ عْلِيهْ مَا بِينَاتْهُمْ بِالشْوَيَّة، ثَمَّة شْكُونْ قَالْ: «رَاهُو رَاجِلْ صَالِحْ.» وْثَمَّة شْكُونْ قَالْ: «لاَ، رَاهُو يْغَلِّطْ فِي النَّاسْ.»

¹³حَتَّى حَدْ مَا حْكَى عْلِيهْ جْهَارْ عْلَى خَاطِرْ النَّاسْ الكُلْ كَانُوا خَايْفِينْ مِاليْهُودْ.

¹⁴وْفِي شْطَرْ أَيَّامَاتْ العِيدْ، طْلَعْ يَسُوعْ لِلهَيْكِلْ وِبْدَا يْعَلِّمْ.

¹⁵سْتَغْرْبُوا اليْهُودْ وْقَالُوا: «كِيفَاشْ هَاذَا يَعْرِفْ الكْتُبْ المُقَدّْسَة بِالقْدَا، وْهُوَ مَا تْعَلِّمْشْ؟»

¹⁶قَالِلْهُمْ يَسُوعْ: «الحَاجَاتْ الِّي نْعَلِّمْ فِيهُمْ مُوشْ مِنْ عِنْدِي آمَا رَاهُمْ مِنْ عِنْدْ الِّي بْعَثْنِي.

¹⁷كَانْ وَاحِدْ يْحِبْ يَعْمِلْ الشَّيْء الِّي يْحِبْ عْلِيهْ اللهْ رَاهُو بَاشْ يَعْرِفْ كَانْ التَّعْلِيمْ هَاذَا مِنْ عِنْدْ اللهْ وِلاَّ مِنْ عِنْدِي آنَا.

¹⁸الِّي يْقُولْ كْلاَمْ مِنْ عَنْدُو رَاهُو يْمَجِّدْ فِي رُوحُو، آمَا الِّي يْمَجِّدْ الِّي بَعْثُو، رَاهُو صَادِقْ وْمَا فِيهْ حَتَّى عِيبْ.

¹⁹يَاخِي مُوشْ مُوسَى عْطَاكُمْ الشَّرِيعَة؟ وْحَتَّى وَاحِدْ مِنْكُمْ مَا يَعْمِلْ بِيهَا. إِمَّالاَ عْلاَشْ تْحِبُّوا تُقْتْلُونِي؟»

²⁰جَاوْبُوهْ النَّاسْ: «إِنْتِ سَاكْنِكْ شِيطَانْ، شْكُونُو الِّي يْحِبْ يُقْتْلِكْ؟»

²¹جَاوِبْ يَسُوعْ وْقَالِلْهُمْ: «إِنْتُومَا مِسْتَغْرْبِينْ، وْآنَا مَا عْمَلْتْ كَانْ حَاجَة وَحْدَة.

²²مُوسَى أْمَرْكُمْ بَاشْ اطَّهْرُوا وْلاَدْكُمْ، وِالطْهُورْ مَا جَابُوشْ مُوسَى آمَا رَاهُو كَانْ عِنْدْ جْدُودْكُمْ مِنْ قْبَلْ، هَاذَاكَا عْلاَشْ إِنْتُومَا اطَّهْرُوا وْلاَدْكُمْ حَتَّى لُوكَانْ نْهَارْ سِبْتْ.

²³إِذَا كَانْ إِنْسَانْ يِطَّهِّرْ نْهَارْ السِّبْتْ بَاشْ الشَّرِيعَة مْتَاعْ مُوسَى مَا تِتْكَسِّرْشْ، إِمَّالاَ عْلاَشْ تْلُومُوا فِيَّ آنَا كِشْفِيتْ عَبْدْ بْكُلُّو نْهَارْ السِّبْتْ؟

²⁴مَا تُحْكْمُوشْ بِالمَظَاهِرْ، آمَا احْكْمُوا بِالعَدْلْ.»

²⁵وَقْتْهَا ثَمَّة جْمَاعَة مِنْ أُورْشَلِيمْ قَالُوا: «يَاخِي مُوشْ هَاذَا الِّي يْحِبُّوا يُقْتْلُوهْ؟

²⁶هَاوْ يِتْكَلِّمْ جْهَارْ وْمَا قَالُولُو حَتَّى شَيْء. يَاخِي الشْيُوخْ اقْتَنْعُوا بِالحَقْ الِّي هُوَ المَسِيحْ؟

²⁷آمَا هَاذَا أَحْنَا نَعْرْفُوا مْنِينْ جَا. عَكْسْ المَسِيحْ، الِّي حَتَّى حَدْ مَا يَعْرِفْ عْلِيهْ مْنِينْ بَاشْ يْجِي.»

²⁸نَادَى يَسُوعْ عْلَى طُولْ صُوتُو وْهُوَ يْعَلِّمْ فِي الهَيْكِلْ: «إِنْتُومَا تَعْرْفُونِي وْتَعْرْفُوا آنَا مْنِينْ، رَانِي مَا جِيتِشْ مِنْ رُوحِي. بِالحَقْ رَاهُو ثَمَّة شْكُونْ الِّي بْعَثْنِي، وْإِنْتُومَا مَا تَعْرْفُوهِشْ.

²⁹آمَا آنَا رَانِي نَعْرْفُو، عْلَى خَاطِرْنِي مِنُّو، وْهُوَ الِّي بْعَثْنِي.»

³⁰الوَقْتْ هَاذَاكَا كَانُوا يْلَوّْجُوا عْلِيهْ بَاشْ يُقْتْلُوهْ، آمَا حَتَّى حَدْ مَا نَجِّمْ يْحُطْ عْلِيهْ يِدُّو، عْلَى خَاطِرْ سَاعْتُو مَا زَالِتْ مَا جَاتِشْ.

³¹وِامّْنُوا بِيهْ بَرْشَة نَاسْ مِلِّي كَانُوا حَاضْرِينْ وْقَالُوا: «وَقْتِلِّي يْجِي المَسِيحْ زَعْمَة بَاشْ يَعْمِلْ مُعْجْزَاتْ أَكْثِرْ مِلِّي عْمَلْهُمْ الرَّاجِلْ هَاذَا؟»

³²وْسَمْعُوا الفَرِّيسِيِّينْ الِّي النَّاسْ يَحْكِيوْ عْلِيهْ مَا بِينَاتْهُمْ، وَلاَّوْ هُومَا وْرُؤَسَاءْ الكُهَّانْ بَعْثُوا الحُرَّاسْ مْتَاعْ الهَيْكِلْ بَاشْ يْشِدُّوهْ.

³³وِمْبَاعِدْ قَالْ يَسُوعْ: «بَاشْ نَبْقَى مْعَاكُمْ مُدَّة قْصِيرَة وِمْبَاعِدْ نِمْشِي لِلِّي بْعَثْنِي.

³⁴بَاشْ تْلَوّْجُوا عْلِيَّ وْمَا تَلْقَاوْنِيشْ، وْمَا تْنَجّْمُوشْ تْجُوا لِلبُقْعَة الِّي آنَا بَاشْ نِمْشِيلْهَا.»

³⁵قَالُوا اليْهُودْ بِينَاتْ بْعَضْهُمْ: «مَا نَاشْ بَاشْ نَلْقَاوْهْ، يَاخِي الرَّاجِلْ هَاذَا وِينْ عَنْدُو مَاشِي حَتَّى لِينْ مَا نَلْقَاوْهِشْ؟ زَعْمَة بَاشْ يِمْشِي لِليْهُودْ المِتْفَرّْقِينْ فِي المُدُنْ اليُونَانِيَّة بَاشْ يْعَلِّمْ اليُونَانِيِّينْ؟

³⁶آشْ يُقْصُدْ بِكْلاَمُو: بَاشْ تْلَوّْجُوا عْلِيَّ وْمَا تَلْقَاوْنِيشْ، وْمَا تْنَجّْمُوشْ تْجِيوْ لِلبُقْعَة الِّي بَاشْ نِمْشِيلْهَا؟»

³⁷وْفِي النْهَارْ الإِخْرَانِي مِنْ أَيَّامَاتْ العِيدْ وِلِّي هُوَ أَهَمْ نْهَارْ، وْقُفْ يَسُوعْ وْنَادَى بْصُوتْ عَالِي: «كَانْ وَاحِدْ فِيكُمْ عْطُشْ، خَلِّيهْ يْجِينِي وْيُشْرُبْ.

³⁸الِّي يِمِّنْ بِيَّا، كِيفْ مَا قَالْ الكْتَابْ: "تِجْرِي مِنُّو وِدْيَانْ مْتَاعْ مَاء حَيْ."»

³⁹وِقْصَدْ بِكْلاَمُو هَاذَا الرُّوحْ الِّي بَاشْ يْنَالُوهْ النَّاسْ الِّي يِمّْنُوا بِيهْ، وْهُومَا مَازَالُوا مَا نَالُوشْ الرُّوحْ عْلَى خَاطِرْ فِي الوَقْتْ هَاذَاكَا، يَسُوعْ مَازَالْ مَا تْمَجِّدْشْ.

⁴⁰وْثَمَّة شْكُونْ مِنْ النَّاسْ الِّي سَمْعُوا الكْلاَمْ هَاذَا قَالُوا: «بِالحَقْ هَاذَا هُوَ النَّبِي.»

⁴¹وْثَمَّة نَاسْ أُخْرِينْ قَالُوا: «هَاذَا هُوَ المَسِيحْ!» وْأُخْرِينْ زَادَا قَالُوا: «يَاخِي المَسِيحْ بَاشْ يْجِي مِالجَلِيلْ؟

⁴²يَاخِي الكْتَابْ مُوشْ قَالْ الِّي المَسِيحْ بَاشْ يْجِي مِنْ ذُرِّيِّةْ دَاوُدْ، وْبِيتْ لَحْمْ المْدِينَة الِّي عَاشْ فِيهَا دَاوُدْ؟»

⁴³وَلُّوا تْخَالْفُوا النَّاسْ فِيمَا بِينَاتْهُمْ عْلَى خَاطْرُو.

⁴⁴ثَمَّة شْكُونْ مِنْهُمْ حَبُّوا يْشِدُّوهْ، آمَا حَتَّى وَاحِدْ مِنْهُمْ مَا حَطْ عْلِيهْ يِدُّو.

⁴⁵وْوَقْتِلِّي رَجْعُوا الحُرَّاسْ مْتَاعْ الهَيْكِلْ لْرُؤَسَاءْ الكُهَّانْ وِالفَرِّيسِيِّينْ، قَالُولْهُمْ: «عْلاَشْ مَا جِبْتُوهِشْ؟»

⁴⁶جَاوْبُوهُمْ الحُرَّاسْ مْتَاعْ الهَيْكِلْ: «مَا ثَمَّة حَتَّى بَشَرْ قَالْ الكْلاَمْ الِّي قَالُو الرَّاجِلْ هَاذَا!»

⁴⁷جَاوْبُوهُمْ الفَرِّيسِيِّينْ: «يَاخِي إِنْتُومَا زَادَا خْدَعْكُمْ؟

⁴⁸شُفْتُوشْ وَاحِدْ مِنْ رُؤَسَاءْ الكُهَّانْ وِلاَّ الفَرِّيسِيِّينْ إِمِّنْ بِيهْ؟

⁴⁹آمَا النَّاسْ هَاذُومَا الكُلْ الِّي مَا يَعْرْفُوشْ الشَّرِيعَة، رَاهُمْ مَلْعُونِينْ!»

⁵⁰وَلَّى قَالْ نِيقُودِيمُوسْ، الِّي كَانْ وَاحِدْ مِنْهُمْ، وْهُوَ الِّي جَا لْيَسُوعْ قْبَلْ:

⁵¹«يَاخِي الشَّرِيعَة مْتَاعْنَا تُحْكُمْ عْلَى أَيْ وَاحِدْ قْبَلْ مَا تِسْمْعُوا وْتَعْرِفْ شْنُوَّة عْمَلْ؟»

⁵²جَاوْبُوهْ: «تَطْلِعْشْ إِنْتِ زَادَا مِالجَلِيلْ؟ ثَبِّتْ فِي الكْتُبْ المُقَدّْسَة تَوْ تَلْقَى الِّي حَتَّى نَبِي مَا جَا مِالجَلِيلْ.»

⁵³وِمْبَاعِدْ كُلْ وَاحِدْ رَوِّحْ لْدَارُو.