Read Tunisian Arabic New Testament يُوحَنَّا 9 Bible Online

يُوحَنَّا 9 - Tunisian Arabic New Testament bible

يُوحَنَّا 9

¹وْوَقْتِلِّي كَانْ يَسُوعْ مِتْعَدِّي، شَافْ رَاجِلْ أَعْمَى مِلِّي تُولِدْ.

²سِأْلُوهْ تْلاَمِذْتُو: «يَا مُعَلِّمْ، شْكُونُو الِّي عْمَلْ الذْنُوبْ حَتَّى لِينْ تُولِدْ أَعْمَى، هُوَ وِلاَّ وَالْدِيهْ؟»

³جَاوِبْهُمْ يَسُوعْ: «لاَ هُوَ وْلاَ وَالْدِيهْ عَمْلُوا الذْنُوبْ. آمَا رَاهُو جْرَالُو الشَّيْء هَاذَاكَا بَاشْ تُظْهُرْ فِيهْ أَعْمَالْ اللهْ.

⁴يِلْزِمْنِي نَعْمَلْ الأَعْمَالْ مْتَاعْ الِّي بْعَثْنِي، مَا دَامْهَا الدِّنْيَا مَازَالِتْ نْهَارْ، رَاهُو بَاشْ يْجِي اللِّيلْ وْحَتَّى حَدْ مَا عَادْ يْنَجِّمْ يَعْمِلْ حَاجَة.

⁵مَا دَامْنِي فِي العَالَمْ، آنَا هُوَ نُورْ العَالَمْ.»

⁶قَالْ الكْلاَمْ هَاذَا وِدْفِلْ فِي التْرَابْ، وِعْمَلْ طِينْ مِالرِّيقْ وْحَطّْهُولُو عْلَى عِينِيهْ

⁷وْقَالُّو: «إِمْشِي أَغْسِلْ وِجْهِكْ فِي القِلْتَة مْتَاعْ سِلْوَامْ.» (الِّي مَعْنَاهَا مَبْعُوثْ) وِمْشَى وِرْجَعْ مِنْ غَادِي وْهُوَ يْشُوفْ.

⁸الجِيرَانْ وِالنَّاسْ الِّي شَافُوهْ قْبَلْ يُطْلُبْ كَانُوا يْقُولُوا: «يَاخِي مُوشْ هَاذَا الِّي كَانْ يُقْعُدْ بَاشْ يُطْلُبْ؟»

⁹ثَمَّة شْكُونْ قَالُوا: «هَاذَا هُوَ.» ثَمَّة أُخْرِينْ قَالُوا: «لاَ، آمَا رَاهُو يِشْبِهْلُو.» آمَا هُوَ كَانْ يقُلْهُمْ: «آنَا هُوَ!»

¹⁰قَالُولُو: «كِيفَاشْ عِينِيكْ تْحَلِّتْ»

¹¹جَاوِبْ: «هَاكَا الرَّاجِلْ الِّي إِسْمُو يَسُوعْ عْمَلْ طِينْ وْحَطُّو عْلَى عِينَيَّ وْقَالِّي: "إِمْشِي أَغْسِلْ وِجْهِكْ فِي القِلْتَة مْتَاعْ سِلْوَامْ." وْوَقْتِلِّي مْشِيتْ وْغْسَلْتْ وِجْهِي، وَلِّيتْ نْشُوفْ.»

¹²قَالُولُو: «وْتَوْ وِينُو الرَّاجِلْ هَاذَاكَا؟» قَالْ: «مَا نَعْرِفْشْ.»

¹³هَزُّوا الرَّاجِلْ الِّي كَانْ أَعْمَى لِلفَرِّيسِيِّينْ،

¹⁴وِالنْهَارْ الِّي عْمَلْ فِيهْ يَسُوعْ الطِّينْ وْحَلْ عِينِينْ الأَعْمَى كَانْ نْهَارْ سِبْتْ.

¹⁵زَادُوا الفَرِّيسِيِّينْ سِأْلُوهْ مِنْ جْدِيدْ كِيفَاشْ وَلَّى يْشُوفْ، وْهُوَ قَالِلْهُمْ: «حَطّْلِي طِينْ عْلَى عِينَيَّ وِغْسَلْتْ وِجْهِي وَلِّيتْ نْشُوفْ.»

¹⁶ثَمَّة فَرِّيسِيِّينْ قَالُوا: «مُوشْ مُمْكِنْ الرَّاجِلْ هَاذَا يْكُونْ جَايْ مِنْ عِنْدْ اللهْ عْلَى خَاطْرُو مَا احْتَرِمْشْ نْهَارْ السِّبْتْ.» وْثَمَّة نَاسْ أُخْرِينْ قَالُوا: «كِيفَاشْ وَاحِدْ يَعْمِلْ فِي الذْنُوبْ يْنَجِّمْ يَعْمِلْ المُعْجْزَاتْ هَاذِي الكُلْهَا؟» وْمَا تْفَاهْمُوشْ بِينَاتْ بْعَضْهُمْ.

¹⁷قَالُوا لِلأَعْمَى مِنْ جْدِيدْ: «إِنْتِ آشْ تْقُولْ عْلِيهْ بَعْدْ مَا حَلِّكْ عِينِيكْ.» جَاوِبْهُمْ: «هُوَ نَبِي!»

¹⁸وِاليْهُودْ مَا حَبُّوشْ يْصَدّْقُوا الِّي هُوَ كَانْ أَعْمَى وْوَلَّى يْشُوفْ، حَتَّى لِينْ سْتَدْعُوا أُمُّو وْبُوهْ.

¹⁹وْسِأْلُوهُمْ: «يَاخِي مُوشْ هَاذَا وِلْدْكُمْ الِّي قُلْتُوا الِّي هُوَ مُولُودْ أَعْمَى؟ إِمَّالاَ كِيفَاشْ وَلَّى يْشُوفْ؟»

²⁰جَاوْبُوا أُمُّو وْبُوهْ: «أَحْنَا نَعْرْفُوا الِّي هَاذَا وِلْدْنَا، وِلِّي هُوَ تُولِدْ أَعْمَى.

²¹أَحْنَا مَا نَعْرْفُوشْ كِيفَاشْ تَوْ وَلَّى يْشُوفْ، وْمَا نَعْرْفُوشْ شْكُونْ الِّي حَلْلُو عِينِيهْ. رَاهُو كْبِيرْ، إِسْأْلُوهْ، تَوْ يْجَاوِبْكُمْ هُوَ بِيدُو.»

²²وْقَالُوا وَالْدِيهْ الشَّيْء هَاذَا عْلَى خَاطِرْهُمْ يْخَافُوا مِاليْهُودْ، الِّي كَانُوا يْطَرّْدُوا مِالمَجْمَعْ فِي أَيْ وَاحِدْ يْقُولْ الِّي يَسُوعْ هُوَ المَسِيحْ.

²³هَاذَاكَا عْلاَشْ وَالْدِيهْ قَالُوا: «اسْأْلُوهْ رَاهُو كْبِيرْ وْيَعْرِفْ.»

²⁴وِمْبَاعِدْ سْتَدْعَاوْا الفَرِّيسِيِّينْ الرَّاجِلْ الأَعْمَى مَرَّة أُخْرَى وْقَالُولُو: «بْرَبِّي قُولْ الحَقْ! أَحْنَا نَعْرْفُوا الِّي الرَّاجِلْ هَاذَا يَعْمِلْ فِي الذْنُوبْ.»

²⁵جَاوِبْ: «يَاخِي هُوَ يَعْمِلْ فِي الذْنُوبْ؟ آنَا مَا نَعْرِفْشْ، آنَا نَعْرِفْ حَاجَة وَحْدَة الِّي آنَا كُنْتْ أَعْمَى وْتَوْ وَلِّيتْ نْشُوفْ.»

²⁶إِمَّالاَ قَالُولُو مَرَّة أُخْرَى: «آشْ عْمَلِّكْ؟ كِيفَاشْ حَلْلِكْ عِينِيكْ؟»

²⁷جَاوِبْهُمْ: «قُلْتِلْكُمْ وْمَا سْمَعْتُونِيشْ، عْلاَشْ تْحِبُّوا تِسْمْعُوا مَرَّة أُخْرَى؟ يَاخِي إِنْتُومَا زَادَا تْحِبُّوا تْوَلِّيوْا تْلاَمِذْتُو؟»

²⁸يَاخِي سَبُّوهْ وْقَالُولُو: «إِنْتِ تِلْمِيذُو، آمَا أَحْنَا رَانَا تْلاَمِذْةْ مُوسَى.

²⁹أَحْنَا نَعْرْفُوا مُوسَى اللهْ هُوَ الِّي كَلّْمُو، آمَا هَاذَا مَا نَعْرْفُوشْ عْلِيهْ حَتَّى مْنِينْ جَا.»

³⁰جَاوِبْهُمْ الرَّاجِلْ: «غْرِيبَة كِيفَاشْ مَا تَعْرْفُوهِشْ مْنِينْ جَا وْهُوَ حَلِّي عِينَيَّ!

³¹أَحْنَا نَعْرْفُوا الِّي رَبِّي مَا يِسْمَعْشْ صْلاَةْ المِذْنْبِينْ، آمَا يِسْمَعْ صْلاَةْ النَّاسْ الِّي يْخَافُوهْ وِلِّي يَعْمْلُوا إِرَادْتُو.

³²وْمِنْ أَوِّلْ الدِّنْيَا حَتَّى حَدْ مَا سْمَعْ بْوَاحِدْ حَلْ عِينِينْ وَاحِدْ مُولُودْ أَعْمَى.

³³لُوكَانْ الرَّاجِلْ هَاذَا مَا كَانِشْ مِنْ عِنْدْ اللهْ، رَاهُو مَا نَجِّمْشْ يَعْمِلْ حَتَّى شَيْء.»

³⁴قَالُولُو: «إِنْتِ بْكُلِّكْ تُولِدْتْ فِي الذْنُوبْ وِتْحِبْ تْقَرِّينَا؟» وْطَرّْدُوهْ البَرَّا.

³⁵وِعْرَفْ يَسُوعْ الِّي هُومَا طَرّْدُوهْ، وَلَّى مْشَالُو وْسِأْلُو: «يَاخِي تِمِّنْ بِإِبْنْ الإِنْسَانْ؟»

³⁶جَاوْبُو: «شْكُونُو هُوَ يَا سِيدِي بَاشْ نِمِّنْ بِيهْ؟»

³⁷قَالُّو يَسُوعْ: «رَاكْ قَاعِدْ تْشُوفْ فِيهْ وْهُوَ قَاعِدْ يَحْكِي مْعَاكْ تَوَّا!»

³⁸قَالْ: «آنَا نِمِّنْ، يَا سِيدِي!» وِسْجِدْلُو.

³⁹وْقَالْ يَسُوعْ: «جِيتْ لِلعَالَمْ هَاذَا بَاشْ نُحْكُمْ عْلِيهْ، بَاشْ الِّي مَا يْشُوفُوشْ يْوَلِّيوْ يْشُوفُوا، وِلِّي يْشُوفُوا يْوَلِّيوْ عِمْيَانْ»

⁴⁰سَمْعُوهْ جْمَاعَة مِالفَرِّيسِيِّينْ، قَالُولُو: «يَاخِي أَحْنَا زَادَا عِمْيَانْ؟»

⁴¹جَاوِبْهُمْ يَسُوعْ: «كَانْ جِيتُوا عِمْيَانْ بِالرَّسْمِي، رَاهِي مَا عِنْدْكُمْشْ ذْنُوبْ. آمَا إِنْتُومَا تْقُولُوا الِّي إِنْتُومَا تْشُوفُوا. هَاذَاكَا عْلاَشْ ذْنُوبْكُمْ بَاشْ تَبْقَى مْعَاكُمْ.»