Read Tunisian Arabic New Testament أَعْمَالْ 1 Bible Online

أَعْمَالْ 1 - Tunisian Arabic New Testament bible

أَعْمَالْ 1

¹حْكِيتْلِكْ فِي كْتَابِي الأُوِّلْ يَا ثَاوْفِيلُسْ عْلَى كُلْ أَعْمَالْ يَسُوعْ وِالحَاجَاتْ الِّي حْكَى عْلِيهُمْ مِلِّي بْدَا التَّعْلِيمْ مْتَاعُو

²حَتَّى لِينْ جَا النْهَارْ الِّي تِرْفَعْ فِيهْ لِلسْمَاء بَعْدْ مَا عْطَى الوْصَايَا مْتَاعُو بِالرُّوحْ القُدُسْ لِلرُّسُلْ الِّي خْتَارْهُمْ.

³وْبَعْدْ مَا مَاتْ ظْهَرِّلْهُمْ بَرْشَة مَرَّاتْ لْمُدِّةْ أَرْبْعِينْ يُومْ وْوَرَّاهُمْ الِّي هُوَ حَيْ ابَّرْشَة أَدِلَّة وِحْكَالْهُمْ عْلَى مَمْلِكْةْ اللهْ.

⁴وَقْتِلِّي كَانْ قَاعِدْ مْعَاهُمْ قَالِلْهُمْ: «مَا تُخْرْجُوشْ مِنْ أُورْشَلِيمْ آمَا اسْتَنَّاوْ الشَّيْء الِّي وْعِدْكُمْ بِيهْ الآبْ وِلِّي سْمَعْتُوهْ مِنِّي

⁵يُوحَنَّا عَمِّدْ النَّاسْ بِالمَاء آمَا إِنْتُومَا بَاشْ تِتْعَمّْدُوا بَعْدْ أَيَّامَاتْ بِالرُّوحْ القُدُسْ.»

⁶وَقْتِلِّي تْلَمُّوا التْلاَمْذَة مْعَ بْعَضْهُمْ سِأْلُوا يَسُوعْ: «يَا رَبْ زَعْمَة فِي الوَقْتْ هَاذَا تْرَجَّعْ المَمْلْكَة لْإِسْرَائِيلْ؟»

⁷جَاوِبْهُمْ يَسُوعْ: «مَا عِنْدْكُمْشْ الحَقْ بَاشْ تَعْرْفُوا المَوَاعِيدْ وِالأَوْقَاتْ الِّي حَطّْهُمْ الآبْ بِالسُّلْطَة مْتَاعُو.

⁸آمَا بَاشْ تَاخْذُوا قُوَّة وَقْتِلِّي يِنْزِلْ عْلِيكُمْ الرُّوحْ القُدُسْ وِتْكُونُولِي شْهُودْ فِي أُورْشَلِيمْ وِاليَهُودِيَّة الكُلْهَا وْفِي السَّامْرَة وْحَتَّى آخِرْ الدِّنْيَا.»

⁹وْبَعْدْ مَا قَالْ الشَّيْء هَاذَا بْدَا يِتْرْفَعْ وْهُومَا يُخْزْرُوا وْجَاتْ سْحَابَة وْهَزِّتُّو مِنْ قُدَّامْ عِينِيهُمْ.

¹⁰وَقْتِلِّي هُومَا يُخْزْرُوا لِلسْمَاء وْهُوَ قَاعِدْ طَالْعِلْهَا، إِذَا بْزُوزْ رْجَالْ لاَبْسِينْ بِالأَبْيِضْ وُقْفُوا بِحْذَاهُمْ.

¹¹وْقَالُولْهُمْ: «يَا رْجَالْ الجَلِيلْ شْبِيكُمْ وَاقْفِينْ تُخْزْرُوا لِلسْمَاء؟ يَسُوعْ هَاذَا الِّي قَاعِدْ يِتْرْفَعْ لِلسْمَاء بَاشْ يَرْجَعْ كِيمَا شُفْتُوهْ طَالِعْ لِلسْمَاء.»

¹²وْمِنْ بَعْدْ رَجْعُوا الرُّسُلْ لْأُورْشَلِيمْ مِالجْبَلْ المَعْرُوفْ بِجْبَلْ الزِّيتُونْ الِّي هُوَ قْرِيبْ مِنْ أُورْشَلِيمْ عْلَى بُعْدْ مْسَافَة مَسْمُوحْ مَشْيَانْهَا نْهَارْ السِّبْتْ.

¹³وَقْتِلِّي وُصْلُوا طَلْعُوا لِلعْلِي الِّي كَانُوا سَاكْنِينْ فِيهْ بُطْرُسْ وْيُوحَنَّا، وْيَعْقُوبْ، وْأَنْدَرَاوُسْ، وْفِيلِبُّسْ، وْتُومَا، وْبَرْثُلْمَاوُسْ وْمَتَّى، وْيَعْقُوبْ وِلْدْ حَلْفَى، وْسِمْعَانْ الِّي يْغِيرْ عْلَى بْلاَدُو، وْيَهُوذَا وِلْدْ يَعْقُوبْ.

¹⁴وِالكُلْهُمْ كَانُوا يْدَاوْمُوا عْلَى الصَّلاَةْ بْقَلْبْ وَاحِدْ، وِمْعَاهُمْ نْسَاء، وْمَرْيِمْ أُمْ يَسُوعْ وِمْعَاهُمْ زَادَا إِخْوْتُو.

¹⁵وْفِي الأَيَّامَاتْ هَاذُوكُمْ وَقْتِلِّي تْلَمُّوا مْيَة وْعِشْرِينْ مِالمُؤْمْنِينْ قَامْ بُطْرُسْ وْقَالِلْهُمْ:

¹⁶«يَا إِخْوَة كَانْ لاَزِمْ اتِّمْ النُّبُوَّة الِّي قَالْهَا الرُّوحْ القُدُسْ عْلَى لْسَانْ النَّبِي دَاوُدْ فِيمَا يْخُصْ يَهُوذَا الِّي هَزْ النَّاسْ لْيَسُوعْ بَاشْ يْشِدُّوهْ.

¹⁷عْلَى خَاطْرُو كَانْ وَاحِدْ مِنَّا وْشَارِكْنَا فِي الخِدْمَة مْتَاعْنَا.

¹⁸وْبَعْدْ مَا شْرَى الأَرْضْ بِالفْلُوسْ الِّي خْذَاهَا بِسْبَبْ الشَّرْ الِّي عَمْلُو، طَاحْ عْلَى وِجْهُو وِتْشَقْ مِنْ الوُسْطْ وْخَرْجِتْ مْصَارْنُو الكُلْهَا.

¹⁹وِالحْكَايَة وَلاَّتْ مَعْرُوفَة عِنْدْ أَهْلْ أُورْشَلِيمْ الكُلْ، يَاخِي سَمُّوا السَّانْيَة بْلُوغِتْهُمْ "حَقْلْ دَمَخْ "وْمَعْنَاهَا سَانِيةْ الدَّمْ.

²⁰وْهَكَّا تَمِّتْ النُّبُوَّة الِّي جَاتْ فِي كْتَابْ مَزَامِيرْ دَاوُدْ: دَارُو تْوَلِّي خِرْبَة وْحَدْ مَا يُسْكُنْهَا. وِيْقُولْ زَادَا: وْخِدْمْتُو غِيرُو يَاخُذْهَا.

²¹يِلْزِمْنَا تَوَّا نِخْتَارُوا وَاحِدْ مِالرْجَالْ الِّي مْشَاوْ مْعَانَا طُولْ المُدَّة الِّي عَدَّاهَا الرَّبْ يَسُوعْ مْعَانَا.

²²مِاليُومْ الِّي عَمّْدُو فِيهْ يُوحَنَّا لِليُومْ الِّي تِرْفَعْ فِيهْ لِلسْمَاء، بَاشْ يْكُونْ شَاهِدْ مْعَانَا عْلَى قْيَامِةْ يَسُوعْ.»

²³وْجَابُوا النَّاسْ الحَاضْرِينْ زُوزْ رْجَالْ هُومَا يُوسُفْ المَعْرُوفْ بْإِسْمْ بَارْسَابَا وْسَمَّاوْهْ التْلاَمْذَة يُوسْتُسْ، وْمَتْيَاسْ.

²⁴وْصَلُّوا وْقَالُوا: «يَا رَبْ، يَلِّي تَعْرِفْ قْلُوبْ النَّاسْ الكُلْ وَرِّينَا شْكُونْ الِّي اخْتَرْتُو مِنْ الزُّوزْ رْجَالْ هَاذُومَا؟

²⁵بَاشْ يْشَارِكْنَا فِي الخِدْمَة وِالرِّسَالَة فِي عُوضْ يَهُوذَا الِّي مْشَى لِلبُقْعَة الِّي يِسْتْحَقّْهَا.»

²⁶وْكِي عَمْلُوا القُرْعَة طَاحِتْ عْلَى مَتْيَاسْ، وْحِسْبُوهْ وَاحِدْ مِالرُّسُلْ الحْدَاشْ.