Read Tunisian Arabic New Testament أَعْمَالْ 10 Bible Online

أَعْمَالْ 10 - Tunisian Arabic New Testament bible

أَعْمَالْ 10

¹وْكَانْ ثَمَّة رَاجِلْ إِسْمُو كُرْنِيلْيُوسْ فِي مْدِينِةْ قَيْصَرِيَّة وْكَانْ قَايِدْ مْتَاعْ مْيَاةْ عَسْكْرِي فِي الفِرْقَة الِّي تِتْسَمَّي الإِيطَالِيَّة.

²وْكَانْ رَاجِلْ يْخَافْ رَبِّي هُوَ وْعَايِلْتُو الكُلْ، يِتْصَدِّقْ عْلَى النَّاسْ وْدِيمَا يْصَلِّي.

³فِي نْهَارْ مِالنْهَارَاتْ مْعَ مَاضِي ثْلاَثَة مْتَاعْ العْشِيَّة شَافْ كُرْنِيلْيُوسْ فِي رُؤْيَا وَاضْحَة، مَلاَكْ مِنْ عِنْدْ اللهْ دْخَلْ عَنْدُو وْقَالُّو: «يَا كُرْنِيلْيُوسْ!»

⁴خْزَرْ لِلمَلاَكْ وْهُوَ خَايِفْ وْسِأْلُو: «يَا سِيدِي عْلاَشْ جِيتْنِي.» جَاوْبُو المَلاَكْ: «الصَّلاَةْ مْتَاعِكْ وْصَدَقَاتِكْ وُصْلِتْ للهْ وْهُوَ تْذَكّْرِكْ.

⁵وْتَوْ أَبْعِثْ نَاسْ لْيَافَا وِاسْتَدْعَى سِمْعَانْ الِّي يِتْسَمَّى بُطْرُسْ.

⁶رَاهُو يُسْكُنْ فِي دَارْ سِمْعَانْ الدَّبَّاغْ القْرِيبَة مِالبْحَرْ.»

⁷وْبَعْدْ مَا مْشَي المَلاَكْ الِّي كَانْ يْكَلِّمْ فِي كُرْنِيلْيُوسْ، عَيِّطْ لِثْنِينْ مِنْ الخُدَّامْ مْتَاعُو وْعَسْكْرِي يْخَافْ رَبِّي مِالجْمَاعَة الِّي دِيمَا مْعَاهْ.

⁸وْبَعْدْ مَا حْكَالْهُمْ عَلِّي صَارْ مْعَاهْ الكُلْ، بْعَثْهُمْ لِمْدِينِةْ يَافَا.

⁹وْمِنْ غُدْوَة وَقْتِلِّي الثْلاَثَة رْجَالْ بْدَاوْا يُقْرْبُوا مِنْ مْدِينِةْ يَافَا، طْلَعْ بُطْرُسْ لِلسْطَحْ مْتَاعْ الدَّارْ بَاشْ يُطْلُبْ رَبِّي وِالوَقْتْ هَاذَاكَا كَانْ مْعَ نُصْفْ النْهَارْ.

¹⁰وْحَسْ رُوحُو جِيعَانْ بَرْشَة وْإِشْتْهَى بَاشْ يَاكُلْ، وَقْتِلِّي كَانُوا يْحَضّْرُولُو فِي الفْطُورْ

¹¹شَافْ رُؤْيَا: السْمَاءْ مَحْلُولَة وْحَاجَة كِيفْ مَلْحْفَة كْبِيرَة مَرْبُوطَة مِالأَرْبْعَة أَطْرَافْ هَابْطَة وِتْفِرْشِتْ عْلَى الأَرْضْ.

¹²وْكَانِتْ فِيهَا أَنْوَاعْ الحَيَوَانَاتْ الكُلْهَا الِّي تِمْشِي عْلَى سَاقِيهَا وِالمِتْوَحّْشَة وِلِّي تَزْحِفْ وِلِّي اطِّيرْ فِي السْمَاء.

¹³وْجَاهْ صُوتْ: «يَا بُطْرُسْ، قُومْ اذْبَحْ وْكُولْ!»

¹⁴آمَا بُطْرُسْ جَاوْبُو: «لاَ يَا رَبِّي! آنَا عُمْرِي مَا كْلِيتْ شَيْء مَنْزُوسْ وِلاَّ مْحَرَّمْ.»

¹⁵لَكِنْ مَرَّة أُخْرَى الصُّوتْ قَالُّو: «الِّي طَهّْرُو اللهْ مَا تْسَمِّيهِشْ إِنْتِ مَنْزُوسْ.»

¹⁶وِالشَّيْء هَاذَا تْعَاوِدْ ثْلاَثَة مَرَّاتْ، وْمِنْ بَعْدْ تِرْفَعْ المَاعُونْ لِلسْمَاء.

¹⁷بُطْرُسْ بْقَى حَايِرْ وِبْدَا يِسْإِلْ فِي رُوحُو عْلَى المَعْنَى مْتَاعْ الرُّؤْيَا هَاذِي الِّي شَافْهَا. وْإِذَا بِالرْجَالْ الِّي بْعَثْهُمْ كُرْنِيلْيُوسْ بْدَاوْا يِسْأْلُوا عْلَى دَارْ سِمْعَانْ الدَّبَّاغْ وْوُقْفُوا قُدَّامْ البَابْ!

¹⁸وْسِأْلُوا: «زَعْمَة سِمْعَانْ الِّي يِتْسَمَّى بُطْرُسْ يُسْكُنْ هْنَا؟»

¹⁹وْفِي الوَقْتْ هَاذَاكَا مَازَالْ بُطْرُسْ قَاعِدْ يْفَكِّرْ فِي مَعْنَى الرُّؤْيَا، يَاخِي قَالُّو الرُّوحْ القُدُسْ: «ثَمَّة ثْلاَثَة رْجَالْ قُدَّامْ البَابْ يِسْأْلُوا عْلِيكْ.

²⁰أَهْبْطِلْهُمْ وْإِمْشِي مْعَاهُمْ مِنْ غِيرْ مَا تِتْرَدِّدْ عْلَى خَاطِرْ آنَا الِّي بْعَثْتْهُمْ.»

²¹هْبَطِّلْهُمْ بُطْرُسْ وْقَالْ: «آنَا الِّي تْلَوّْجُوا عْلِيهْ، عْلاَشْ جِيتُوا لِهْنَا؟»

²²جَاوْبُوهْ: «القَايِدْ مْتَاعْ المْيَاةْ عَسْكْرِي كُرْنِيلْيُوسْ هُوَ رَاجِلْ صَالِحْ وِيْخَافْ رَبِّي وْشَعْبْ اليْهُودْ الكُلْهُمْ يِشْهِدْلُو بِالشَّيْء هَاذَا، أَوْحَالُو اللهْ عْلَى طْرِيقْ مَلاَكْ طَاهِرْ بَاشْ يِسْتَدْعَاكْ لْدَارُو وْيِسْمَعْ الكْلاَمْ الِّي عِنْدِكْ.»

²³سْتَدْعَاهُمْ بُطْرُسْ بَاشْ يْبَاتُوا اللِّيلَة هَاذِيكَا عَنْدُو، وْفِي الصْبَاحْ مْشَى مْعَاهُمْ وِمْشَاوْ مْعَاهُمْ زَادَا جْمَاعَة مِالإِخْوَة الِّي فِي يَافَا.

²⁴وْمِنْ غُدْوَة وُصْلُوا لِمْدِينِةْ قَيْصَرِيَّة وْكَانْ كُرْنِيلْيُوسْ يِسْتَنَّى فِيهُمْ وِاسْتَدْعَى أَقَارْبُو وِصْحَابُو القْرَابْ لِيهْ.

²⁵وَقْتِلِّي دْخَلْ بُطْرُسْ سْتَقْبْلُو كُرْنِيلْيُوسْ وِسْجِدْلُو.

²⁶يَاخِي قَوّْمُو بُطْرُسْ وْقَالْ: «قُومْ مَانِي إِلاَّ إِنْسَانْ كِيفِكْ.»

²⁷وِدْخَلْ بُطْرُسْ وْهُوَ يْكَلِّمْ فِيهْ وْشَافْ بَرْشَة نَاسْ.

²⁸قَالِلْهُمْ: «إِنْتُومَا تَعْرْفُوا الِّي مْحَرَّمْ عْلَى اليْهُودِي بَاشْ يِتْعَامِلْ مْعَ المُوشْ يْهُودِي وِلاَّ حَتَّى يْزُورُو فِي دَارُو. آمَا اللهْ وَرَّانِي الِّي مَا يِلْزِمْنِيشْ نْقُولْ عْلَى حَتَّى حَدْ الِّي هُوَ مَنْزُوسْ وِلاَّ مْحَرَّمْ.

²⁹هَاذَاكَا عْلاَشْ وَقْتِلِّي سْتَدْعِيتُونِي جِيتْ طُولْ، شْنُوَّة السْبَبْ الِّي خَلاَّكُمْ تِسْتَدْعَاوْنِي؟»

³⁰جَاوِبْ كُرْنِيلْيُوسْ: «قْبَلْ أَرْبْعَة أَيَّامْ، فِي الوَقْتْ هَاذَا بِالضَّبْطْ كُنْتْ نْصَلِّي فِي الدَّارْ مْعَ مَاضِي ثْلاَثَة، يَاخِي ظْهُرْ قُدَّامِي رَاجِلْ لاَبِسْ جِبَّة تِلْمَعْ.

³¹وْقَالِّي: "يَا كُرْنِيلْيُوسْ! اللهْ سْمَعْ صْلاَتِكْ وِتْذَكِّرْ صَدَقَاتِكْ.

³²وْتَوْ أَبْعِثْ شْكُونْ لْيَافَا وِاسْتَدْعَى سِمْعَانْ الِّي يِتْسَمَّى بُطْرُسْ رَاهُو سَاكِنْ فِي دَارْ سِمْعَانْ الدَّبَّاغْ القْرِيبَة مِالبْحَرْ."

³³يَاخِي بْعَثْتْ بَاشْ نِسْتَدْعَاكْ بِالوَقْتْ، عْمَلْتْ البَاهِي كِجِيتْ، وْإِحْنَا تَوْ الكُلْنَا حَاضْرِينْ قُدَّامْ اللهْ بَاشْ نِسْمْعُوا الِّي أُمْرِكْ بِيهْ رَبِّي الكُلْ.»

³⁴بْدَا بُطْرُسْ يِتْكَلِّمْ وْقَالْ: «آنَا بِالحَقْ عْرَفْتْ الِّي اللهْ مَا يْفَضِّلْ حَدْ عْلَى الآخَرْ.

³⁵وْهُوَ يِقْبِلْ كُلْ وَاحِدْ يْخَافْ رَبِّي وْيَعْمِلْ الخِيرْ مَهْمَا كَانْ جِنْسُو.

³⁶وِبْعَثْ كِلْمْتُو لْبَنِي إِسْرَائِيلْ، وْبَشِّرْهُمْ بِالسَّلاَمْ الِّي يْجِي عْلَى طْرِيقْ يَسُوعْ المَسِيحْ الِّي هُوَ رَبْ النَّاسْ الكُلْ.

³⁷وْإِنْتُومَا لاَزِمْ عْرَفْتُوا الِّي صَارْ فِي اليَهُودِيَّة. وْأَوِّلْ حَاجَة وُقْعِتْ بْدَاتْ فِي الجَلِيلْ بَعْدْ المَعْمُودِيَّة الِّي نَادَى بِيهَا يُوحَنَّا المَعْمَدَانْ.

³⁸اللهْ مْسَحْ يَسُوعْ النَّاصْرِي بِالرُّوحْ القُدُسْ وْبِالقُوَّة وْكَانْ يِمْشِي مِنْ بُقْعَة لْبُقْعَة يَعْمِلْ فِي الخِيرْ وْيِشْفِي فِي النَّاسْ الِّي تْسَلِّطْ عْلِيهُمْ بْلِيسْ الكُلْهُمْ عْلَى خَاطِرْ اللهْ كَانْ مْعَاهْ.

³⁹وْإِحْنَا شْهُودْ عْلَى كُلْ الِّي عَمْلُو فِي بْلاَدْ اليْهُودْ وْفِي أُورْشَلِيمْ وْبِالحَقْ قَتْلُوهْ كِعَلّْقُوهْ عْلَى لُوحَة.

⁴⁰آمَا اللهْ قَوّْمُو مِالمُوتْ فِي النْهَارْ الثَّالِثْ وْخَلاَّهْ يُظْهُرْ.

⁴¹مُوشْ لِلنَّاسْ الكُلْ آمَا لِلشْهُودْ الِّي خْتَارْهُمْ اللهْ مِنْ قْبَلْ. لِينَا أَحْنَا الِّي كْلِينَا وِشْرَبْنَا مْعَاهْ بَعْدْ مَا قَامْ مِالمُوتْ.

⁴²مْبَاعِدْ أْمَرْنَا بَاشْ نْبَشّْرُوا بِيهْ شَعْبْنَا، وْنِشْهْدُوا الِّي اللهْ حَطُّو بَاشْ يْكُونْ القَاضِي الِّي يْحَاسِبْ الحَيِّينْ وِالمُوتَي.

⁴³الأَنْبِيَاءْ الكُلْ يِشْهْدُولُو الِّي كُلْ مِنْ يِمِّنْ بِيهْ ذْنُوبُو تِتْغْفِرْ فِي إِسْمُو.»

⁴⁴وَقْتِلِّي كَانْ بُطْرُسْ يِتْكَلِّمْ بِالكْلاَمْ هَاذَا جَا الرُّوحْ القُدُسْ لِلِّي كَانُوا يِسْمْعُوا فِي كْلاَمُو.

⁴⁵يَاخِي تْعَجّْبُوا المُؤْمْنِينْ اليْهُودْ الِّي جَاوْ مْعَ بُطْرُسْ الِّي المَوْهْبَة مْتَاعْ الرُّوحْ القُدُسْ تِعْطَاتْ زَادَا لِلنَّاسْ الِّي مَا هُمْشْ يْهُودْ.

⁴⁶وْسَمْعُوهُمْ يِتْكَلّْمُوا بْلُغَاتْ أُخْرَى وِيْسَبّْحُوا فِي اللهْ وْقَالْ بُطْرُسْ:

⁴⁷«حَتَّى وَاحِدْ مَا يْنَجِّمْ يْحُوزْ المَاء بَاشْ مَا يِتْعَمّْدُوشْ النَّاسْ الِّي خْذَاوْ الرُّوحْ القُدُسْ كِيفْنَا؟»

⁴⁸وِأْمَرْ بَاشْ يِتْعَمّْدُوا بْإِسْمْ يَسُوعْ المَسِيحْ، وْمِنْ بَعْدْ طَلْبُوا مِنُّو بَاشْ يُقْعُدْ مْعَاهُمْ أَيَّامَاتْ أُخْرِينْ.